Aiseya 30
30
Idsip wina tâ baikanka briaia pliki nani ba mapara
1Dawan kasak aisisa:
“¡Alai pali kabia baha luhpa nani maipara babura nani ba
diara dukaia kulki bara ai tilara ai briras ba
ai warkka daukaia lâka dauki ba
yang bui witin nani daukaia wiras sna,
warkka nani ba daukisa,
bahamna saurka kum purara saurka wala prakisa!
2Witin nani istikira Idsip ra auya,
sakuna witin nani ba yang bîli wina lika makabi walras;
king fero karnika wal ai tâ baikaia dukiara,
Idsip tnaya distika ra dimi bîla kaikanka brisa.#Ais 31.1-3; Jir 2.18,36.
3Sakuna king fero karnika ba man nani ra swira lâka ra mai lakbia,
aimawahkanka nani man kabia,
Idsip wina hilp nani briaia ba.
4Ban kra man nani kuntri lengstarka nani pat Soan tawanka ra
bara Hanés tawanka kat pat blikram wan,
5sakuna witin nani sut ba
baha nisanka bahki nani ba mita kunin lâka ra mai taibia,
hilpkam nani yamnika nani
man nani ra brih balbia apia,
lilia âpu, umpira lâka baman lika brih balbia.”
6Négueb daiwra nani dahra aisin ba:
Pât nani tasbaya ba banhkisa,
layan nani ahbi ba bâra iwisa,
piuta nani daiwan saura nani pâli tauki nani ba bâra sa
diara nani bri ba diara kuki brin nani ba
baha nani bal biriku ra bara kiamil ra prahki
Idsip ra kwahkisa, diara sip daukras uplika nani ba,
7karnika âpu, hilp munaia tâ baikaia sip apia.
Baha mita nina ba yang naku mâkisna:
“Daiwan saura tara kum uhbisa, sakuna diara daukras”.
8Bamna nanara, man bal
naha mamrikisna na wauhtaya ra uls,
param kaikram ba walpa tanhta kum ra uls
witin nani ai mawanra kaiki kaia ulbanka baku,
witnis ban bâra kaia dukiara, ban kaia ra.
9Kan naha uplika nani na, mapara babura nani sa,
kuninkira nani luhpia,
witin nani na Dawan lâka ba walaia brin daukras.
10Diara kaiki nani ra witin nani wisa:
“Lilka aihka nani bâra ba man krikpara.”
Prapit nani ra sin wisa:
“Diara rait param mariki ba yang nani ra ai wipara;
bîla damni swapni ba baman aisi bas;
diara kupi lilia dauki nani ba yang wina sâkpara.
11Man nani yabal ba swis,
yabal bîla pali wina tnaya ra taws,
yawan mawan wina Israel Gâdka Holikira ba sâks.”
12Baha ba mita Israel Gâdka Holikira ba naku wisa:
“Man nani naha bîli nani mai win ba lulki swiram bamna,
bara lâ krikanka ra, watawika lâka ra sin lukankam mangki briram bamna,
nahara sin man nani tâm baikram;
13baha mita, man nani pâtkira sma.
Man nani ba tawan kutbanka baiwan,
slingwi tiwaia man swin ba baku sma.
14Man nani ba sumi dakawa kriki baku mai krikan kabia,
kriki yuya lupia baman taki ba baku takma,
kau pîska kumi pan sâkbia apia pauta aswan mangki utla wina bri balaia,
apia kaka liwanhta wina lî sakaika pan briaia.”
15Dawan, Israel Gâdka Holikira ba, naku aisin:
“Man nani kli tawi bal,
âmyapah bas,
bara swaki mai sakan kabia.
Âmyapah kaia kasak lukaia ba wina karnikam ba bâra kabia.”
Sakuna man nani baha briaia apia wiram,
16panaura man nani wiram:
“Apia, kanra yamni yang nani aras ra uli plapamna.”
Baha ba mita man nani baku plapma.
“Aras plaplapra waginka ra yang nani uli plapamna” wiram.
Baha ba mita man nani ninam bliki nani ba sin plaplapra kabia.#Ais 31.1.
17Upla kumi mita tausin kum munka plapbia tayahkan kan ba mita:
upla matsip mita tayahkanka daukbia ba mita man nani sut plapma,
upla maura baman takaskan kabia
il purara dus kumi bâra ba baku,
apia kaka sain kum kiuhsi kum purara swin ba baku.
Gâd ai yamnika ai uplika nani ra yabaia wisa
18Sakuna Dawan lika man nani bîlam kaikisa, man nani dukiamra ai kupia swapni brisa; witin bîlam kaiki latwan mai kaiki ba mamrikisa, kan Dawan Gâd ba kasakkira sa. ¡Lilia pali sa baha nani witin kat ai lukanka mangki bri ba!
19Kasak pali upla nani Saion, Jerusalem ra iwi ba: man kli inma apia; Dawan umpira mai kaiki ba, witin ai kupia pihni man dukiamra bribia; bîlam baikra inanka walbia ba ra, pana man ra aisabia. 20Âu, Dawan bui man nani ra pât wahwanka maikisa, sari tilara sma ba wina plun, lâ maikisa, sakuna witin sika smasmalkrikam, man wina ban yukuwi baku kabia apia; ban sakuna, namkra ni smasmalkrikam ba man kaikma. 21Bara man kiamam ra wali kama ninam wini naha bîla nani mai wibia: “Naha sika yabal, man nani bahak impaks.” Bara mihtam aihkika ra tawpara, mihtam smihka ra sin apia, tnaya ra sin tawaia apia. 22Bâra lika lilka nani daukram ba, silbar ni lalaubi paskram ba tâski kulkma, lilka nani karbi daukram prâka nani gul ni slilki daukram ba sin. Bara baha nani ba tnaya ra lakma kwala tâski wan âuya warbi ba baku; witin nani ra wima: latara taki was. 23Bara Dawan lî maikbia mâ nani bikram ba purara, tasba ra, mâ nani insla ra mangkram nani ba, tasba wina plun maikbia, manis pali ban pura lui kabia; bîpkam nani ba baha piua ra, twi ailal pali tilara twi pi kabia. 24Warkkam daukaia bîpka wainhka nani ba, birikukam nani ba sin, tasba baiki ba, insla wina plun nani singbaika ra mangki singban kau auhni ba wina plun pibia. 25Baha yua balbia bara upla ailal ikan kabia bara kan kahbaika pliska nani ba kauhbia, lî kârma nani sin bâra kabia il pura nani ra, kiuhsi nani sut purara sin. 26Dawan ba ai uplika klauhanka nani raki, bara klauhanka nani ba kwala ni wilkan kabia. Baku bamna kati ba lapta baku ingni kabia, bara lapta ingnika ba kau aima 7 kau ingni kabia, lapta asla 7 kumi ra ingwi ba ingnika baku kabia.
Gâd lawanka ba Asiria purara
27Man nani kaiks,
Dawan ba laih wina param taki aula ba;
ai kupia baiwanka ba,
pauta klauhan lakni kiasmika siksika baku sa,
ai un nani ba,
ai kupia baiwanka pali man aisisa,
bara ai twisa ba
pauta klauhan baku sa,
âpu wan tikaia,
28ai wingka puhbra ba,
lî kârma lisamra tara dingki ba baku sa;
wan nana kat wan rungki ba;
witin aula nisan nani purara wirhika kahbaia,
sauhki tikaia ra dukiara sin,
un mangkaika un ra mangki yabal wala ra brih waia.
29Sakuna man nani mampa tani lika
aiwani lilia tara daukaia brima,
tihmia ra Dawan liliaka tara dauki baku;
kupiam lilia pali kabia
plut puhbi kan
Dawan ilka ra waia,
Israel yukuwaika ra waia wapi ba baku.
30Bara Dawan ai kulkanka tara bri ba yaka upla nani walbia,
ai klahkla karnika ba marikbia
ai kupia baiwanka ra dauki ba mita,
pauta buki klauhanka âpu wan tiki ba baku,
alhkablakat, pâsa karna lî auhi ba,
ais kauhi ba baku.
31Asiria uplika nani ba,
Dawan bîla baikra walbia,
klala ba bribia ba ra,
witin sirang iwbia.
32Kasakka lâka dadaukra dusa prukanka kumi bani ba,
Dawan mita witin nani purara prukuya ba,
kungbi nani pruki, arp nani kangbi ba binka baku kabia.
Dawan ba witin nani mapara karna pali aiklabia.
33Kan piua wihka wina pat pliskam ridi daukan sa,
Asiria kingka ba ai uplika nani dukiara sin,
pliska ba tara pakni pali sa,
upla angki ikaika pauta manis kir mukan klauhisa.
Dawan wingka puhbra ba mita,
pauta buki klauhbia sulpa lî aubi baku.
Currently Selected:
Aiseya 30: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
