Blasi Sturka 26

Aisak Guerar ra wan ba

1Baha yua nani ra baha tasbaya aiska ra plun tiwan tara kan, Ebraham yua nani ra plun wahwan kata ba purkara. Baha mita Aisak filisteo kingka Abimélec ra wan Guerar ra. 2Baha yabalka ra Dawan bui witin ra latan takan, bara win: “Man Idsip ra wapara, sakuna yang mai wimna man anira takaskaia sma ba, bara man bahara takaski kama. 3Nanara man ban tasbayam iwisma ba ra ban iwi bas; yang lika man wal kamna, yamniki maikamna, man kiamkam nani ra bara baku sin naha tasbaya nani sut ra yabamna; man aisikam ra pramis munatna ba pramiska kat daukamni. 4Man kiamkam nani ba ailal daukamna, purara slilma nani ailal bâra ba baku, bara naha tasbaya nani sut kiamkam nani ra yabamna. Baha purkara, tasba aiska ra nisan nani sut ba witin nani ra praki yamniki yabamni,#Bla St 22.16-18. 5Ebraham yang lâika bîla nani wali daukan, yang adarki nani sin alki brih daukan bamna.”

6Bamna Aisak kli tawi Guerar ra wih iwan. 7Bara bahara tawanka uplika nani ba ai maya ba dukiara makabi wali kan, bara witin pana win: “Witin ba yang laikra”,#Bla St 12.13; 20.2. kan witin sibrin luki kan, ban kra yang mayi wibia kaka, Rebeca tâwan baha waitnika nani mita witin ra ikbia luki kan, kan Rebeca ba mairin painkira kan bamna.

8Bara ban kan, witin baha tawanka ra pat yu ailal bâra iwi kan ningkara, king Abimélec windar bâk kaikan Aisak ai maya Rebeca taya sapi kan. 9Bara Abimélec Aisak paiwan balbia, bara witin ra win:

—¿Ban apia kasak pali witin na man mayam? ¿Bara nahki kan man wiram witin na man lamkra?

Aisak pana win:

—Yang baku aisari, kan ban kra witin ai tâwan upla yang ra ai ikbia lukri.

10Kuna Abimélec pana witin ra win:

—¿Kuna dîa kan man naku yawan ra wan munram? Kau wiria kan kaka, tawan uplika kum kra ban man mayam wal yapan kaia kan. Bara baku man bui yang nani ai munrika ban saura daukaia kapri.

11Ningkara Abimélec upla sut ra maisa pakan:

—Ya naha waitnika bara maya ra sin kangbia kaka, uplika ba pruaia pâtka ra lakan kabia.

12Bara baha manka ba, Aisak baha tasbaya ra insla dauki mâ mangkan, plun pain sakan. Dawan ai yamnika witin ra yan bamna, 13witin yuyakira pali takan. Bara diara ailal bri kan, insla ailal. 14Sîp nani, bîp nani bara ai albika nani sin ailal bri kan ba mita, filisteo uplika nani mita witin ra tuman lâka brin. 15Ai aisika Ebraham kau raya kan piua ra, albika nani liwanhta nani sakan kan ba; sakuna ningkara filisteo uplika nani ba mita sut tasba ni baman auhbi prakan. 16Bara yu kum Abimélec bui Aisak ra win:

—Man naha tasbaya wina taki was, kan man kau diara ailal brisma yang nani wal.

17Aisak baha tasbaya wina taki wan, bara Guerar ilka bîla langnika ra wih takaskan bahara iwaia dukiara. 18Ai aisika Ebraham yua ra liwanhta nani salhkan kan ba, witin pruan taim, filisteo nani ba mita tasba ni prakan nani ba, witin kli salhki sakan. Bara nina nani ba sin kli mâkan ai aisika mita dîa nina nani mâkan kan ba baku. 19Sakuna yu kumi Aisak albika nani il bîla langnika ra liwanhta salhkan ba ra liwanhta raya kum lî kârma manis bri kan ba sakan. 20Sakuna Guerar ra sîp main kakaira nani ba, baha laya ba dukiara Aisak sîpka main kakaira nani ba aikuki blahwi kan, laya ba witin nani ai dukia win. Baha mita Aisak bal baha liwanhta nina ba mâkan “Unsaban”, kan bahara witin nani wal unsabanka bri kan bamna. 21Baha ningkara ai albika nani wih ki liwanhta wala salhkan, baha dukiara sin unsabi banhwan, bara liwanhtika nina ba mâkan “Waihla lâka”.

22Bara kli baha wina dakwi taki laihura wih bara liwanhta wala salhkan. Bahara lika unsabras kan, bamna baha liwanhtika nina ba “Pri lâka” mâkan, bara win: “Nanara Dawan nahara yawan ra pri lâka ra wan swin sa naha tasbaya ra wan dukia dauki briaia.”

23Bara baha wina Aisak Beerseba ra lui wan. 24Bahara tihmia ra Dawan ba witin ra latan takan, bara win:

“Yang sika man aisikam Ebraham Gâdka,

man si bripara, kan yang lika man wal sna,

yang naipakan Ebraham dukiara

luki yamniki maikamni bara kiamkam sin ailal daukamni.”

25Bahara Aisak altar kum paski, Dawan nina bahara mayunan. Bahara ai tintka watla bapan, bara Aisak albika nani bahara liwanhta kum salhkan.

Aisak Abimélec wal lâ kum daukisa

26Yu kumi Abimélec#Bla St 21.22. Guerar wina Aisak ra balan, witin wal aisaia. Ai uplika Ahuzat bara Ficol, war kiaptinka ba sin aikuki balan. 27Aisak witin nani ra win:

—¿Dîa kan yang ra man nani aulma? Man nani misbara ai kaikram, bara tasbayam wina sin ai kangbram ba, ¿nanara dîa muni ai kaikaia aulma?

28Bara baha nani bui pana witin ra win:

—Yang nani kaikisna Dawan ba man wal sa, bahamna yang nani luki kaiki aisari, man wal lâ kum daukaia. Lâka ba naku daukaia: 29man bui yang nani ra diara saura wan munpara. Yang nani sin man nani wînam ra pana mai kangbras kapri, diara yamni baman man ra daukri bara kupia kumi lâka ra sin mai blikri, bamna nanara Dawan yamni mai munan sa ba mita.

30Bara Aisak witin nani dukiara pata tara kum daukan, plun pi bara di banhwan liliaka ra. 31Yaprika wala yu baiwan ba ra witin nani kumi bani ai walka ra pana pana swer taki aisin. Bara Aisak witin nani lakula daukan bara pana sin witin nani Aisak lakula daukan, baku witin nani wal kupia kumi lâka daukan bara baha ningkara mahka wan.

32Baha piua pali ba Aisak albika nani balan bara liwanhta salhkan ba sturka witin nani ra win, witin nani lî sakan ba. 33Bara Aisak baha liwanhta ba nina Sebá#26.33 Hibru ra Sebá. Baha tânka ba swer taki ba, manis pali ba, Hibru aisi ba binka talia sa. mâkan. Baha tânka ba mita sika baha tawanka nina ba Beerseba mâkan ba, bara nina ba naiwa kat ban baku mâkisa.

34Bara ai luhpia Isau 40 mani bri kan, bara witin Beerí luhpia Judit ba ai maya brin, baha lika hitita mairka ba. Mairin wala sin brin nina ba Basemat, Elón luhpia mairin. 35Baha mairka nani wâl ba mita sika Aisak bara Rebeca wal rayaka ra sarka tara paskan.

Currently Selected:

Blasi Sturka 26: MSKTU

Highlight

Copy