Blasi Sturka 25

Ebraham bara Queturá wal kiamka nani ba

(1 Kr 1.32-33)

1Ebraham mairin wala wal ai maya takan, nina ba Queturá. 2Witin wal ai luhpia nani baikan ba nina ba: Zimrán, Jocsán, Medán, Madián, Isbac, Súah. 3Jocsán luhpia wâl baikan nina ba Sebá, Dedán. Dedán kiamka nani ba Asur, letuseo nani bara leumeo nani ba. 4Madián luhpia nani ba: Efá, Éfer, Hanoc, Abidá bara Eldaá. Baha nani sut ba Queturá kiamka luhpia nani kata. 5Ebraham ai dukia nani bri kan ba sut Aisak ra yaban. 6Mairin wala wina witin ai luhpia waitna nani bri kan ba, witin kau raya kan bara baha nani ra prisantka nani baman yaban, bara baha ningkara baha nani ba Aisak wal dakbi sakan, lalma tani tasbaya ra blikan witin nani bahara wih iwaia.

Ebraham pruan bara bikan ba

7Ebraham yua nani sut ba mani 175 alkan. 8Witin almuk pali taki pruan, siknis âpu kan, bara ai almukka nani raitika ra bri si bikan. 9Ai luhpia waitna nani Aisak bara Ismael ba balan, bara Macpelá walpaya untika kum ra Mamré lalma tani ra Efrón, Sóhar luhpia hitita ba tasbaya ra bri si bikan. 10Naha tasbaya ba sika Ebraham mita hitita nani wina atkan ba.#Bla St 23.3-16. Bara bahara sika witin ba bikan, ai maya Sara lama kat. 11Ebraham pruan ba ningkara, baha liwanhta nina “Witin raya bara ai kaiki ba” baha lama kat Aisak iwan, bara Dawan bui witin ra ai yamnika yan.

Ismael kiamka nani ba

(1 Kr 1.28-31)

12Ebraham maya Sara albika mairin kan ba nina Agar, Idsip wina mairka ba luhpia Ismael, witin ai luhpia waitna nani nina ba naku kata: 13kumi bani nina tawahkia wina kau sirpika ba kat ulban sa: tawahkia nina ba Nebaiot, baha wina Quedar, Adbeel, Mibsam, 14Mismá, Dumá, Masá, 15Hadad, Temá, Jetur, Nafís bara Quedmá. 16Naha nani sika Ismael luhpia 12 ba nina sa. Witin nani bani ai nina ba, ai kiamka bara ai tasbaya wal ai nina ba mâkan. Bara kumi bani ai kiamka nani ba wihtka aimakan.

17Ismael 137 mani alki pruan. 18Ai kiamka nani ba Idsip tasbaya lamara, Asiria kuntrika ra waia yabalka ra Havilá bara Sur wal bilka ra iwan. Ai muihni nani aikuki mangkrira unsabi kan ba tâwan bahara iwan.

Jekob bara Isau aisubi takan ba

19Naha sika Aisak, Ebraham luhpia waitna sturka ba. 20Aisak mani 40 bri kan piua ra Rebeca wal marit takan. Mairka na Betuel luhpia mairin, lakrika ba Labán, baha sika Aram uplika nani Padán-aram tasbaya ra iwi kan ba. 21Rebeca ba biarapara sip luhpa baikras kan, bara Aisak ai maya dukiara Dawan ra ai pura sunan. Ai pura sunan ba Dawan walan bara Rebeca kwihra tiwan. 22Sakuna tuktan ba sutki kan bara ai biara bilara wal aiklabi kan, bara Rebeca luki kaikan: “Naha paniska na naku ban kaia kaka, ¿dîa mata yang kau ban raya kaia?” Bara ai trabilka ba dukiara Dawan ra ai pura sunan. 23Bara Dawan pana witin ra win:

“Biamra bilara nisan wâl bâra brisma,

upla sâtka wâl bâra sa,

bara nanara wina witin wal pana pana unsabi aiklabisa.

Kumi ba kau kanra kabia wala ba wal,

almukka ba mita ai ningkara bawi kabia.”#Ro 9.12.

24Rebeca ai luhpia baikaia piua ba aimakan ba ra, ai luhpia sutki baikan. 25Tawahkia baikan ba tâwa pauni kan, taya aiska ba tamaya pali baman bri kan, bara witin ai nina ba Isau#25.25 Isau nina wala ba Seír. Kaiks 36.8 ra. mâkan. 26Ningkara baikan ba, baha mita Isau mina tnata ra ai mihta kum ni alki bri kan, baha ba mita ai nina ba Jekob#25.26 Hibru ra ulban ba Jekob. Baha Hibru aisi ba binka talia mana tnata wisa, tânka wala ba mina alkaika mangkisa (kaiks 27.36). mâkan. Aisak mani 60 bri kan, Rebeca ai luhpia nani baikan ba ra.

Isau tawahkia yamnika witin briaia kan ba atkan

27Tuktan nani ba pâwi waitna takan. Bara Isau lika daiwan âikra, unta dadimra pali takan, utla ra iwi kaia brin daukras kan. Sakuna Jekob lika baku apia, witin sâp kaia baman want, baha mita utla ra baman kaia lihki kan. 28Bamna Aisak ba Isau ra kau latwan kata, kan witin wîna auhni nani piaia lihki kan ba mita. Sakuna Rebeca ba lika baku apia, Jekob ra kau latwan kaiki kan.

29Yu kumi Jekob ba plun piaki kan ba ra, Isau unta wina swapan pali plun dauki balan, 30bara witin Jekob ra win:

—Sanglang bla pat pruna na, pilala pauni brisma ba wiria pan ai dakakram.

(Baha mita sika Isau nina wala Edom#25.30 Hibru ra Edom. Baha tânka ba pauni, Hibru aisi ba binka talia sa. mâki ba.)

31Jekob mita pana win:

—Bara ban kaka, baha pilala mana tawahkia briaia yamnika ba pas yang ra aik.

32Bara Isau pana win:

—Man kaikisma yang plun bla pat pruisna, bara baku sin tawahkia briaia yamnika ba yang ra nanara hilp kumi sin âpu sa.

33Jekob kau ban taibi aisi, win:

—Nanara swer taki aisas.

Bara baku Isau swer taki aisin tawahkia briaia yamnika kan ba Jekob ra laki yaban.#Hib 12.16. 34Baha kat Jekob Isau ra tâma bara pilala wal yaban brih pin. Isau baha brih pin bara din ba ningkara buan, bara tawahkia ai yamnika briaia kan ba dukiara diara kumi sin lukras, aisaras taki mahka wan.

Currently Selected:

Blasi Sturka 25: MSKTU

Highlight

Copy