Galesha 3

Lâ ba, apia kaka kasak lukan lâka ba

1¡Galesha uplika nani, tanis nani! ¿Ani sukika pali ba kupiam yabaki alkan? Yang nani smalkanki ba ni man nani namkra kat, Jisas Kraist dus prihni ra saban ba mamrikatna. 2Bamna naha na man nani ai wis: ¿Moses lâka bîla wali daukan ba mita Gâd Spiritka Holikira ba briram ki, apia kaka, sturi yamni wali kasak lukram mita ki? 3¿Nahki man nani ba ban sinskas sma ki? ¿Dîa trai kaikisma, Spirit mita diara nani tâ krikan ba, nanara karnikam ni daukaia plikisma? 4¿Pât nani wauhram ba, sut bahki pali sa ki? ¡Baha nani sut ba man nani hilpkam kata pain lukaina! 5Ani piua Gâd ai Spiritka Holikira ba, man nani ra maiki wark aihka nani sin dauki ba ra, ¿dîa kan baku daukisa ki? Baha ba daukras sa, man nani lâ bîla wali daukisma ba mita, sakuna dîa dîa walram ba kasak lukisma ba dukiara sa.

6Bamna Ebraham lika Gâd ra kasak lukan, bara Gâd aitani lukan witin ba kasakkira kulkaia.#Bla St 15.6; Ro 4.3. 7Baha mita man nani kaiki kaia sma, kasak luki uplika nani ba sika, Ebraham kiamka nani.#Ro 4.16. 8Bamna kaina piua wina ulban sa, Gâd lika Ju apia nani ba, kasak lukan tâka mita kasakkira kulkan kabia, bara kaina piua wina naha sturka painkira na, Ebraham ra maisa paki win: “Man tamka mita, nisan nani sut ba yamni munan kabia.”#Bla St 12.3. 9Baku bamna, ya Ebraham kasak lukan ba baku kasak lukisa kaka, yamni munan sa.

10Bamna ya nani Moses lâka bîla wali daukaia luki ba lika, saura pali kulkan lâka mununhtara sa. Kan Ulbanka wisa: “Lâ wauhkataya ra dîa ulban ba aiska daukras uplika nani ba lika, saura pali kulkan lâka mununhtara sa.”#Kli S 27.26. 11Baha lika param sa, upla kumi sin âpu sa, lâ dîa wi ba kat dauki bamna, Gâd mita kasakkira kulki ba; kan Ulbanka ba wisa: “Gâd mita kasakkira kulki uplika ba, kasak lukan lâka mita raya kabia.”#Ab 2.4. 12Bamna Moses lâka ba lika kasak lukan lâka tânka apia sa, kuna dîa aisi ba wals: “Ya naha diara nani na sut daukisa kaka, witin baha dukia nani ba mita raya kabia.”#Lib 18.5.

13Lâ mita saura pali wan kulkan ba wina Kraist mita pri wan sakan sa, kan yawan wan tâwan witin lika upla saura kum baku takan; Ulbanka ba wisa: “Saura pali sa baha nani dus ra paman prui ba.”#Kli S 21.3. 14Naha na baku takan, Gâd mita Ebraham ra yamni munaia pramis munan ba, Kraist Jisas bâk Ju apia uplika nani ra yaia; bara baku yawan sut bribia kasak lukan lâka ba mita, baha Spiritka Holikira Gâd mita pramis munan ba.

Lâ bara pramis ba wal

15Muihki nani, yang mai aisisni sampla kum baku: Upla kum upla wala wal lâ kum dauki swin ba, upla kumi sin âpu sa baha lâka krikaia, apia kaka kau pura prakaia. 16Bamna nanara, Gâd mita Ebraham ra bara ai kiamka ra sin pramis daukan. Ulbanka ra wiras sa: “Kiamka nani ra”, upla ailal dukiara aisaras, kuna naku wisa: “man kiamkam ra”;#Bla St 12.7. bara naha wiaia want sa upla kumi ra baman aisisa, baha ba Kraist. 17Bamna aisisna ba lika naha sa: Gâd lika Ebraham wal lâ kum dauki pramis munan. Baha mita, Moses lâka 430 mani ningkara balan ba,#Imp St 12.40. sip apia sa Gâd lâ dauki pramis munan ba bahki sakaia. 18Baku bamna, Gâd yabi dukia ba Moses lâka ba wina ai hilpka brisa kaka, baha lika pramis munan ba dukia apia sa;#Ro 4.14. sakuna Gâd mita Ebraham ra baha ba prisant yaia wisi pramis munan.

19Baku sa kaka, ¿Moses lâka ba dîa mapara hilp sa ki? Baha lâka lika ningkara yaban, lâ bîla wali daukras kan ba marikaia. Lâ ba lika yan kan baha “kiamka” aisubi takbia ba kat baman, witinka ra pramis daukan kan ba. Bamna lâ ba insal nani mita aisin, bara Moses lika baha lâka ba upla ra aisi kaia kan. 20Kuna upla kumi baman aisisa kaka, tâwan aisasara ba lika want apia sa; kan Gâd ba kumi baman sa bamna.

Lâ pali bisniska ba

21¿Bamna naha tânka na mita, Moses lâka ba Gâd pramiska nani ba mapara sa wisa ki? ¡Apia pali! Kan lâ kum yan ba upla nani ra raya kaia lâka yabi kata kaka, lâ dîa wi ba kat dauki mita Gâd pain kaikaia kan. 22Sakuna Ulbanka ba wisa, sut lika saurka mita priski silak ra brisa; naha na naku sa, ya Jisas Kraist ra kasak lukbia ba, sip sa Gâd bui dîa pramis munan ba briaia.

23Kau naha kasak lukanka lâka na balras kan ba ra, lâ ba priski wan bri kan, kasak lukan lâka ba param sakan kabia ba kat. 24Lâ ba tuktan main kakaira baku kan; bahamna tuktan baku wan tapahki kan Kraist balan ba kat, bara baku mika yawan bui witin kat kasak lukbia kaka, Gâd mita kasakkira wan kulkbia. 25Bara nanara Kraist ra kasak lukaia piua balan na ra, kli tuktan main kakaira mihta ra apia sa. 26Kan kasak lukan lâka ba mita man nani sut lika Gâd luhpia nani sma, Kraist Jisas wal asla takram ba mita. 27Man nani sut Kraist wal asla kaia wisi tahbi mai daukan ba, witinka mita puram prâka baku mai brisa. 28Bamna nanara lika, Ju kaia, apia kaka Grik kaia, alba kaia, apia kaka pri kaia, apia kaka waitna kaia, mairin kaia tânka ba âpu sa; kan Kraist Jisas wal asla kaia lâka ba mita, man nani sut asla kumi sma. 29Bamna Kraist dukia sma kaka, man nani lika Ebraham kiamka, bara Gâd diara pramis munan ba brima.#Ro 4.13.

Currently Selected:

Galesha 3: MSKTU

Highlight

Copy