2 Korint 8

Kupia pihni lâka ra hilp muni kaia ba

1Bamna nanara, muihki nani, Gâd kupia yamni lâka Macedonia tasbaya aiska ra, sertska nani ra marikan ba tânka mai win ai daukisa. 2Witin nani trabil manis brin ba mita tânka ba pliki pain kaikan sa, bara baha nani lilia pali sa. Witin nani umpira pali sa, sakuna ai prisantka ai kupia aiska ni diara hilp munan yuyakira kan baku. 3Baha dukiara yang na witnis sna, witin nani ai kupia aiska ni dîa sip kan ba yan, bara dîa yaia sip kan ba purara kau sin yan. 4Kasak pali sin yang nani ra makaban, witin nani ra sin sans yabamna wan muihni nani ra hilp blikaia.#Ro 15.26. 5Yang nani briaia luki kapri ba wal kau pura dauki banhwan, kan witin nani ai wîna ba yan, Dawan ra pas, bara baha ningkara yang nani ra, Gâd kupia lâka ba kat. 6Bahamna, yang nani Taitus ra makabri, naha latwan lâka lalah sakaia warkka na man nani tilamra aiska pali daukbia, kainara pat witin daukata ba baku. 7Bamna man nani lika diara sut aitani kat brisma: kasak lukan lâka, smalkaia mapa ra, diara tânka kaikaia lâka, diara sut ra karna munaia mapa ra, bara yang nani ra latwan ai kaikan lâka sin; baha mita, man nani naha latwan lâka warkka na sin manis daukaia sma.

8Yang naha na adar baku pali lika man nani ra mai wiras; sakuna want sna upla wala nani diara karna dauki ba man nani kaikaia, bara praki kaikma man nani latwanka lâka ba aitani kat brisma sapa. 9Man nani lika wan Dawan Jisas Kraist latwanka lâka tânka ba pat kaikisma. Witin lika yuyakira pali kan, kuna man nani ra latwan mai kaikan ba mita witin umpira pali takan, bara witin umpira takan man nani yuyakira kama ba dukiara.

10Man nani painkam ba tâwan, yang brinki aiska ba naha dukia kat mangkuna. Mani luan piua wina man nani pain pali dauki kapram, bara baman apia, kuna daukaia kapram ba karnikam aiska ni daukram. 11Bara nanara trai muns baha ba tnata kat daukaia, tâ pali piua ra karnikam aiska wal daukram ba baku, ban dîa brisma ba wina yabi. 12Bamna upla kumi wilin pali diara yan daukisa kaka, Gâd mita baha prisantka bri ba pain bribia. Gâd bui upla dîa briras ba makabras.

13Yang sin lukras sna man nani upla wala ra hilp munma ba tâka wina diara luha taki banhma; 14sakuna naha tânka na lika: aikuki kumi kaia. Bamna nanara man nani lika diara brisma walkam wal yui briaia; bara yu wala witin nani aitani bri kabia man nani wal yui briaia. Naha tânka na lika aikuki kumi lâka sa. 15Ulbanka ra aisi ba baku: “Diara manis wahbi brin uplika ba mapa ra, diara kau lika tawras kan; bara wiria wahbi brin nani ra sin diara lakras kan.”#Imp St 16.18.

Taitus ai pânika nani ba wal

16Bamna Gâd ra tingki wisna, yang kupi ra dîa man nani dukiamra luki kapri ba, baha sim lukanka witin Taitus kupia ra sin mangkan. 17Bara ai mihta ra mangkan ba witin pain brin, bara man nani dukiamra uya pali luki bamna, witin ai kupia wina wilin taki auya man nani mai kaikaia.

18Taitus wal wan muihni kumi sin bliki banhwisna, bara serts nani sut mita wisa, witin lika swaki sakan warkka pain pali daukisa. 19Baha baman apia, kuna serts nani mita wan muihni na sakan, yang nani aikuki impaki naha latwan lâka warkka na daukaia, bara naha warkka na pain dauki banhwisna, wan Dawan nina mayunaia dukiara bara marikaia nahki man nani wark pain wilin dauki nani sma ba. 20Baku brin wan daukisa, naha lalah sakaia na dukiara upla wan nina ra saura aisaia apia ba mata. 21Bamna yang nani brin ai daukisa diara sut ba lâ kat pain daukaia, Dawan mawanra baman apia, sakuna upla nani mawanra sin.#S L 3.4.

22Witin nani ba wal, yang nani tili wina wan muihni wala kum sin blikisna, bara naha lika diara ailal mapa ra witin wilin ba tânka wan marikan, bara nanara lika man nani dukiamra sin uya pali lukisa. 23Upla kumi Taitus dukiara makabi walbia kaka, wis witin na lika yang pâinika sa bara aikuki asla wark dadaukra nani banhwisna man nani dukiamra. Wan muihni wala wâl ba dukiara makabi walbia kaka, wis baha nani lika serts nani ba mita blikan sa, bara Kraist ra mayuni banhwisa. 24Bara serts nani ba yaka pain kaikaia dukiara, man nani mita kasak pali latwan kaikisma ba latan pali mariks, bara man nani dukiamra yang nani aitani âiyapah banhwi kaia sna ba sin.

Currently Selected:

2 Korint 8: MSKTU

Highlight

Copy