1 Pita 4

Gâd mita sins wankan ba praiska kat wark daukaia sa

1Baha mita, Kraist ai wîna ra pât wahwan ba baku, man nani sin pât wahwaia wilin kaia sma. Kan ani uplika pât wahwan kaka, saurka ba mahka swin sa, 2kau naha tasba ra kabia piua ra, upla wîna brinka nani kat kli daukaia apia, kuna Gâd kupia lâka kat lika iwi kaia. 3Kan piua nani ailal luan ra idan nani dîa daukan ba, sim dukia man nani dauki kapram, baku bamna saura daukaia laik taki ba ra iwi kapram, brinka saura nani ra, bla lâka ra bara pata pira binka nani ra, diranka kum ailal pali, bara aidul tâski nani ra sakahkram. 4Nanara idan ba man nani bui witin nani ra baha taniska lâka kan uya dauki ai yula kahbras sma bamna, aihka lukisa, bara ba mita ninamra saura aisisa. 5Sakuna witin nani ba Gâd ra ai tânka saki aisaia kabia, witinka raya nani bara pruan nani lâka daukaia ridi ba ra. 6Bamna pruan nani ra sin sturi yamni ba aisi smalkan, witinka nani ba naha tasba ra upla wala nani ra lâka dauki ba baku lâka daukan kabia sakuna; witin nani ra aisi smalkan ai spiritka mapa ra Gâd raya ba baku banhwi kabia dukiara.

7Diara nani sut tnata yua ba pat baila sa. Baha mita, man nani sinskam yamni brih aihwaki bas bara kasak wilin pali puram suni bas. 8Diara sut purkara, pana pana uplikam ra latwan kaiki bas, kan latwan lâka ba mita saurka ailal ban swih tikisa bamna.#S L 10.12; 2 Ko 13.7. 9Pana pana walkam nani ba wamtla ra dingki bris, brukwan âpu.#Ro 12.13. 10Kumi bani Gâd mita ai sinska yaban praiska kat ai uplika nani dukia dauki kaia sa, Gâd yamnika sât sât ba bisniska dadaukra painkira nani baku. 11Upla kumi aisi kaka, ai bîla aisanka nani ba Gâd bîla nani baku kaia sa. Upla kum ai uplika dukia daukisa kaka, Gâd mita karnika yabi ba wal daukbia. Dîa dîa man nani daukma ba Jisas Kraist bâk, Gâd ra mayunra yabaia dukiara kabia, bara witinka ra prana ba bara karnika sin yan kabia, ban kaia ra. Baku kabia.

Kristian nani baku pât wahwi kaia

12Muihki laitwankira nani, traika kaikanka tara nani man nani puramra aula ba dukiara aihka lukpara; baha ba diara tringsar kum mai takuya baku lika luki kapara. 13Sakuna, Kraist pât wahwanka ba wal asla kumi wahwaia sma ba dukiara liliam banhwi bas, bara baku sin witin balaia prana ba kaikma ba ra, man nani lilia pali kama.#Ro 8.17; 1 Pi 4.1. 14Kraist tâwan saura pali mai wibia kaka, man nani liliam bas; kan Gâd Spiritka pranakira ba man nani puramra bal iwi bahara takaskisa. 15Man nani tilam wina kum pât wahwisa kaka, baha pâtka ba upla ikan tâwan, implikan, saura pali daukan bara upla wala bisniska tilara diman tâwan kaia sin apia sa. 16Sakuna, upla kum kristian ba tâwan pât wahwisa kaka, ai swira lukaia apia sa, kuna Gâd ra mayunbia naha nina bri ba.

17Lâ daukaia mahka tâ krikaia piua ba balan sa, bara Gâd uplika nani pali sika pas lâka daukan kabia. Bara baha ba yawan ra baku tâ krikuya kaka, ¿tnata ra Gâd sturka yamni bîla wali daukras nani ba mapara nahki kabia ki? 18Bara upla yamni nani ba ban baku pât pali wina swaki sakras kaka, ¿lukras nani bara saura dadaukra nani mapara nahki kabia ki?#S L 11.31. 19Baku bamna, Gâd kupia lâka kat pât wahwi nani ba, ban diara yamni dauki kaia sa, bara ai sulka nani ba aiska pali ai Papaskra mihta ra mangkaia sa, kan witin lika kasakkira sa.

Currently Selected:

1 Pita 4: MSKTU

Highlight

Copy