1 Jan 2

Kraist ba wan tâwan aisasara sa

1Yang luhpi lupia nani, naha bîla mai ulbisna man nani saura yama apia ba dukiara.#Ro 6.11-14. Sakuna upla kumi saura daukbia kaka, wan tâwan aisasara kum brisa Aisa mawanra, baha lika Jisas Kraist, bara witin ba kasakkira sa. 2Jisas Kraist lika, witin ai wîna ba wan saurka dukiara sakripais mana yan;#1 Jn 4.10. yawan wan saurka dukiara baman apia, kuna upla sut saurka nani ba dukiara.

3Gâd lâka ba bîla wali daukisa kaka, baha ba lika wan marikan sa yawan bui witin ra kakaira ba tânka.#Jn 14.15,21,23. 4Sakuna upla kum wibia: “Yang lika witin ba kakaira sna”, kuna ai lâka bîla wali daukras sa kaka, baha uplika ba kuninkira bara diara kasak ba tânka witin ra âpu sa. 5Sakuna, ani uplika Dawan dîa wi ba kat dauki ba, baha sika Gâd ra kasak pali latwan kaiki ba; baku lika kaikan sa yawan, witin wal asla sa. 6Ani uplika witin ba Gâd wal asla sa wisa kaka, witin Jisas Kraist naha tasba ra kan ba baku iwaia sa.

Lâ bîla raya ba

7Muihki nani, lâ raya wala kum yang bui man nani ra ulbras sna; baha sim lâka man nani mita tâ piua wina bri katma ba sika. Naha sim lâ bîla almuk smalkanka ba pat walram. 8Ban sakuna, dîa ulbisna ba ban kra lâ raya baku takisa,#Jn 13.34; 15.12. bara baha ba diara kasak sa Kraist ra bara man nani mampa ra sin, kan tihmia ba mahka lui auya, bara kasak ingni ba pat ingwisa.

9Bamna upla kum wisa witin ba ingni ra sa,#Ro 13.12-14. sakuna ai muihni ra misbara kaikisa kaka, witin ba lika kau tihmia ra sa. 10Ya ai muihni ra latwan kaiki ba, witin lika ingni ra iwisa, bara diara âpu sa witin ra munka saura daukaia. 11Sakuna ya ai muihni ra misbara kaikisa kaka, witin lika tihmia ra iwisa bara sin taukisa; ba mita witin anira auya sapa kaikras sa, tihmia ba mita nakra sut blain dauki bri ba mita.

12Luhpi lupia nani, man nani ra ulbisna, kan Gâd mita Jisas Kraist ra saurkam nani sut swih tikan sa. 13Man nani ra ulbisna, aisa nani, diara nani sut kau paskras kan bara witinka pat bâra kan ba kakaira takram ba dukiara. Wahma nani, man nani ra sin ulbisna, dibil ra pura luram bamna.

14Luhpi lupia nani, man nani ra ulbri sa, Aisa ba kakaira pali takram ba dukiara. Aisa nani, man nani ra ulbri ba lika, witinka diara nani sut kau paskras kan bara pat bâra kan ba kakaira takram dukiara. Wahma nani, man nani ra ulbri ba lika, karna sma ba dukiara; Gâd bîla sin kupiam ra brisma bara baha sut purkara, man nani mita dibil pura luram sa.

15Tasba na bara diara nani bilara ba, latwan kaikpara.#Je 1.27. Ani uplika tasba ra latwan kaiki ba, Gâd Aisa ra sip latwan kaikbia apia; 16kan tasba na mita wanki dukia ba kumi sin Aisa wina apia sa, tasba witin ai dukia sa. Wan wîna tara brinka saura nani ba, wan nakra diara kaiki bani brin dauki ba, naha tasba dukia nani ba wal aimayunaia lâka ba sut, naha tasba wina baman sa. 17Bara tasba na ai brinka saura nani sut wal mahka lui auya; sakuna ya Gâd kupia lâka kat dauki ba, ban kaia ra raya ban iwisa.

Diara kasak bara kunin ba wal

18Luhpi lupia nani, piua tnata ba pat baila sa. Man nani walram upla kumi Kraist mapara ba dukiara, witin aula; nanara upla manis buan sa Kraist mapara, baha mita yawan kaikisa tnata yua ba baila sa. 19Witin nani ba lika yawan wan tila wina takan sakuna kasak pali mai wisna, baha nani ba yawan nani wina apia sa, kan yawan wina kata, witin nani yawan wal ban kaia kan. Sakuna baha ba baku ban takan, upla nani mita param kaikbia dukiara, baha nani ba kasak pali yawan wan tila na wina apia sa.

20Sakuna Kraist mita man nani ra Spirit Holikira maikan sa, bara baha mita man nani sut diara tânka kaikaia lâka brisma.#2 Ko 2.10-16. 21Bamna yang bui man nani ra ulbisna ba lika, man nani diara kasak tânka ba pain kaikisma ba dukiara, kaikras lika apia; bara man nani mita pain kaikisma, diara kasak ba wina kunin kumi sin sip balbia apia ba. 22¿Bara ya ba kuninkira sa ki? Ani uplika Jisas ba Misaya apia sa wibia kaka, baha uplika sika Kraist mapara ba, kan witin ba Aisa bara Luhpia wâlsut ra kulkras pali sa. 23Luhpia ra kulkras uplika nani sut ba, Aisa ra sin kulkras sa; sakuna ya Luhpia ra kulki ba, Aisa ra sin kulkisa.

24Baha mita, tâ pali piua wina dîa mai smalkan ba kupiam ra bri bas; bamna dîa tâ pali piua wina mai smalkan ba kupiam ra bri kama kaka, man nani sin Luhpia bara Aisa ba wal asla pali kama. 25Bara Jisas Kraist mita pramis wan munan sa raya ban kaia lâka ba wankaia.

26Yang naha na man nani ra ulbri, baha nani kunin mai muni nani ba dukiara. 27Sakuna man nani lika Spirit Holikira Jisas Kraist wina maikan ba brisma; baha mita upla wala mita mai smalkaia apia sa, kan Spirit Holikira ba diara nani sut mai smalkisa, bara dîa witin mita smalki ba kunin apia, rait pali sa. Baku bamna, Spirit Holikira mai smalkan ba kat, Kraist wal asla ban bas.

28Bamna nanara, luhpi lupia nani, Kraist wal asla ban bas, bara baku mika witin param takbia ba ra wan âuyapah kabia, bara witin balbia ba ra ai mawanra yawan bubia, bara wan swira daukan kabia apia. 29Man nani pat kaikisma Jisas Kraist lika kasakkira sa; baku bamna, kaiki kaia sma ani uplika nani kasakka lâka dauki ba sika, Gâd luhpia nani sa.

Currently Selected:

1 Jan 2: MSKTU

Highlight

Copy