Maka 16

Jisu ko mata saevo voukale azo

(Matiu 28:1-10; Luke 24:1-12; Jone 20:1-10)

1Ni Sabati ko tova inio Maqidalama Mere, ni Mere Jemisi ko niania, ni Salome ta ke tatabaraekake uria tui kama oela meresini sama tu kepa ka loqaeko Jisu ko tupu kikelake. 2Nio Sade lekito puliako ṉaniu peato nio seta keta olake niami keaka kasi. 3-4Nio seko talio kale seta eri kikelake ke navio kude, “Lala inio o mela vatutikou koa lado koa kea ko veutu kale azo?” kikelake. Ako koa lado ta qole ama ikio sole. Melai so keru seke baroa keru sai, seta ke keake ta koa lado ta lula kota vatuta. 5So sole seta keta amaqeake ni ke veake kala vairu ala maba tapo sabosabo sala obeta papuake seko palo rana vasi, ni seta keta matu vuzeike.

6Melai voa vairu ala maba ta eri ma kiolake, “Meta pui vuzeilo ako aṉata aqai nianiia ta meta me vailiva vo Nazareti ala Jisu, vo ke patoevalani korosi topi. Melai vota puliala koi, ako vota lula ota saevala sole. Ni kemo, koi nio ke tekuevalakoi. 7Tu meta olamo tu pa mai bazuekomo voko disaipeli madu ni Pita komia bazu. Ni meta eri kimevou, ‘Jisu ta ota olala Qalili meko kuleto, ni sai nio meba velou omadeuvo o ṉavi obe melati kiovevo jari,’ ” kiolake. 8So sole seta ke saqorake koa kea ko poro kale azo, ni keta soqoike, ako seta keta ṉake ni keta dederake sole. Ni puliala kevai bazuekake seke viqema quli, ako keta ṉake sole.

Jisu mai purato voko baerebaere poso

(Matiu 28:16-20; Luke 24:13-49; Jone 20:11-23)

9 # 16:9-20 Kama lulama Quriki pesio kale ama riki poso kale ta komia kobu (vesi 9-20) ta puliama. Ni so keru Sade keru omadeu vikale Jisu mata o saeve keru, vota okai puratake kuleto ko Maqidalama Mere, koa rekoreko vo lula ota ka ṉamukema sikeura ziolo poso. 10Ni so keru inio Maqidalama Mere ta ko olake ni kopa bazuemake Jisu ko baerebaere poso, sai se kebe va buniubuniuakoi vo Jisu. 11Ni so keru seke viqa keru koa rekoreko ko eri kio, kota ko veala vo Jisu ota tova saevala, seta maba pui tuvevo ke ikake ko.

12Ni koko tova inio Jisu ta mata okai puratake omuqa voko disaipeli kidi qopeta taliakoi keve tona Jerusalema ko kupekupe. Melai voko velo ta edolovoa velo qo evake. 13Ni so keru qo vaita keru, nio nioqata qo bazuemake se disaipeli madu nioqa kale amu, melai seta mata pui tuvevo ke ikake nioqa.

14Ni koko tovatova nio Jisu ta omai puratake voko toni omadeu disaipeli madu kebeta vuatakoi. Ni vota o riqaemake se, ako seko bulo ta zokele ni seta pui tuvevo ke imake sole seke veveni voko mata saevo. 15Nio Jisu ta eri ma kiolake se, “Meta me ziovou kiadama peuru poso kale komia peuru ma peuru kale ni meqai bazutou aṉako Uri ama Bazu kiadama maba poso kasi. 16Ni vo tuvevo o iko ala koa Uri ama Bazu ni bapitaiso o elo ala nio o pakiovou. Melai vo o kapakapato ala ta Baṉara inio o titizivou vo. 17Ni seke tuvevo puto amu ta Baṉara inio o katimou se ko pizato ni ke erekou aqasiele ama iruruputo. Ni seta ke rerikou ko ziolo poso aṉako ṉikale, ni seta kekai pesiovou azaazama pesio. 18Ni seta kebe kamakou ko vou sama dole, ni ke nozuekou vou sama quli melai pui kepa vouvou. Ni kemai ivikou seko ṉase se vere amu ni seta keta urikou,” kiolake vo Jisu.

Jisu ko vaito aukale

(Luke 24:50-53; Iruruputo 1:9-11)

19Ni so keru vo Lekasa Jisu o paikake mati pesipesito se, ti vo Baṉara ta obe koivievake inio vo aukale. Ni sai nio vota o papuake vo Baṉara ko palo rana vasia rana tu o lekasa puo. 20Ni koko tova inio se disaipeli madu ta ke olake kiadama zae poso kale ni kekai bazubazutake ko Uri ama Bazu sai. Ni vo Lekasa Jisu ta o tauvemake se, ni ko quli se kekai bazubazutake quli ta oma mamola puekake koko tuveano. Ako koa omadeuma taku kale inio seta ke erekake sole ko aqasiele ama iruruputo voko pizato kale.

Currently Selected:

Maka 16: BLBNT

Highlight

Copy