Maka 15

Se Jiu ama tanatanamu ko vati zio vo Jisu Paelati kasi

(Matiu 27:1-2,11-14; Luke 23:1-5; Jone 18:28-38)

1Omadeu vikale inio se raura kama siama madu ni se lotu tanatanamu, ni vo Mosese ko Bazu kekai nianiiekatani, ni sea kiadama matuma maba poso ta ke padoivake tu ke vatoeko Jisu ke ivo avo. Nio seta keta va piriekake voko ṉase, ni ke vati olake ni kepa vaevake Romu ala Qavuna Paelati ko pade kasi. 2Nio Paelati ta o kuimaevake vo ni eri va kiolake, “Ṉo inio se Jiu amu vo Aikovakova ṉa, kio?” va kiolake.

Nio Jisu ta o vati tiorikake ni eri kiolake, “Tuvevo ṉo kiṉolani jari,” kiolake.

3Ni se raura kama siama madu ta kevai kuirikake matu kubo ruqeruqe ama kuiripato, 4sole Paelati ta mata o tova kuimaevake ni eri kiolake, “Noi sole inio pui ṉo opatika nia maba poso keṉai kuirikako quli?” kiolake.

5Melai Jisu ta ota lupaoke tu o kaseko kama ruku, so sole Paelati ta ota matu vuzeike.

Jisu ta o vouvou

(Matiu 27:15-26; Luke 23:13-25; Jone 18:38—19:16)

6Kiadama Alokato ko Ṉojola keru, Paelati ko kalo ta o saqorivou kala maba pirito pade kale ala se maba poso kevai zariani tu o saqoro. 7Ni koa taku kale ta iniseana kake maba poso pirito pade kale seke erekeni ko niumaniumato ni pazokinio Jerusalema seko vati pikipikinio puto kale vo Romu ala Qavuna, ni ke vouvaemeni maba poso. Ni kala sekale ala inio vo Barabasi. 8Nio matuma vaki ta ke padoivake Paelati ko pade kasi ni ke pasevake vo tu vota o ereko koa kalo vo o erekako kiada keru jari ama. 9Nio Paelati ta o kuimaemake se, ni eri kiolake, “Meta mevai zaria tu aṉata a mela rupasivo me Jiu amu mela vo aikovakova?” kiolake. 10Ako vota okai nianiiake ta seko va konoilo kale inio se raura kama siama madu ta ke vati keve vo Jisu vokasi sole.

11Melai se raura kama siama madu ta ke zuruzuruemake sea vaki tu seta ke pasevo vo Barabasi, tu vo inio o rupasivou, ni Jisu ta pui. 12Nio Paelati ta mata o kuimaemake se, ni eri kiolake, “Sole loma quli kio a erekou nea maba kasi vo me eri va kimelani vo inio vo Jiu amu mela vo aikovakova va kimelani?” kiolake.

13Ni seta ke velavelaoke matuma kora kale ni eri kikelake, “Patoevomo vo korosi topi tu o vou!” kikelake.

14Nio Paelati ta o mati tiorikake ni eri ma kiolake, “Melai loma quli sarueko ikio nea maba o erekako?” kiolake.

Melai seta mata ke velavelaoke matuma kora kale ni eri kikelake, “Patoevomo vo korosi topi tu o vou!” kikelake.

15Ni vo Paelati ta okai zariake zolemo sea vaki, so sole vota oma rupasivake vo Barabasi. Ni vota o katimake vo Jisu se solodia madu tu kepa pazovo vo ni kepa patoevo korosi topi.

Se solodia madu vai balebaleito vo Jisu

(Matiu 27:27-31; Jone 19:2-3)

16Ni se solodia madu ta ke vati olake vo Jisu Qavuna ko matu pade ko tianiama vola kale, ni seta ke padoemake sea kiadama solodia madu omadeukoi. 17Ni seta kevai kiakake vo Jisu soqu jaria domu ama suma, ni seta keva viriviriekake ko tarapae kada sama siakona kale, ni kevai kiakake vo. 18Sai kazo inio kevai balebaleitake rauraevo ni eri kikelake, “Raurai, se Jiu amu vo Aikovakova ṉa!” kikelake. 19Ni seta keta va pazokake o lezu ore kale ni kevai supatake ni keva iqeiqeake ni keva loqunake. 20Nio ke paikake vai balebaleito saita inio seta mata keta va ivikake koa rosi ama soqu domu ama sabosabo ni kevai kiakake mata o ṉaviko sabosabo. Saita inio ke vati olake tu kepa patoevo korosi topi.

Jisu ko patoevo korosi topi

(Matiu 27:32-44; Luke 23:26-43; Jone 19:17-27)

21Ni se kebeta talia keru keve tona inio seta ke toraevake kala maba o ṉi ta Saimone, vo obeta kuevani matu peuru kale o ṉaviko peuru kale azo, ni se solodia madu ta ke zuruzuruevake vo tu o boriko Jisu ko korosi. Ni nea Saimone ta Sairini peuru kale ala Alekezada ni Rupasi vo mama. 22Ni seta ke vati olake vo Jisu ka pado zaekale koko ṉi ta Qoloqota, ni koko kio ni kalo ta “Reikareika kama Lezu ko Zae.” 23Ni sai nio seta ke kativake ko vaini ko ju, moa ke kati valuvaluekema, tu siru kota va naitiko voko tupu, tu pui o lainikou koa matuma tola kikelake. Melai Jisu ta ota lupaoke nozueko. 24Nio se solodia madu ta ke patoevake vo Jisu korosi topi. Koko tova inio seta kekai puarikiniake vo Jisu ko suma seko kai daisimato kale, tu kekai nianiio lala inio ota va kovou koa sabosabo, kikelake. 25So keru seke patoeve keru vo Jisu ta siakava koloko kale inio vikale. 26Ni seta ke vaekake ka pado bazu, ko quli se kevai kuirikako, voko korosi topi. Ni koa bazu kikolani ta eri, “Se Jiu amu vo Aikovakova.” 27Ni so jari seta ke patoekake omuqa kuilokuiloa nioqa omuqa korosi topi Jisu sate, kala ta voko palo rana ni kala ta voko made rana.#15:27 Kama lulama Quriki pesio kale ama riki kale ta ikoana mata vesi 28: ‘Ni komi quli kio ko Tabu ama Riki kikovevo ko tuvevo puilo ko eri kikovema, “Se maba madu ta kevai kuirikou voa Pakio ta kala niumaniumato ko maba,” kikovema.’

29Ni so keru se maba poso ke alokata keru sai, seta keva uriuriaṉa putake, ni kevai balebaleitake vo Jisu, ni eri kikelake, “Koe! No inio ṉo biresukou ko Jelepade ni zouke ṉaniu kale mata ṉo dova orumukou kiṉolani ṉa! 30Sole pakiovi ṉo ṉavi, ni saqore koa korosi topi azo!” kikelake.

31Ni omadeuvo jari mata se raura kama siama madu ni se Mosese ko Bazu kekai nianiiekatani melai keva balebaleitake ni eri kikelake ke ṉavio kude, “Edolomu inio o pakiemani, ta noi sole inio pui o pakia o ṉavi! 32Sole uri tu me velo nea Baṉara o soroevani Pakio se Izireli mu vo Aikovakova o saqorou ta koa korosi topi azo erisaṉa, so inio tuvevo me ivou!” kikelake. Ni omuqa kuilokuiloa nioqa ke patoekeni nioqa Jisu sate nioqako omuqa korosi topi melai qo ruqeruqe kasevake vo.

Jisu ko vou

(Matiu 27:45-56; Luke 23:44-49; Jone 19:28-30)

33Ni ṉadale inio kutumana ta ko boulukake koa Jerusalema ko pado ama levoano,#15:33 koa Jerusalema ko pado ama levoano: Komi ko Quriki pesio ta ikoana mata omuqama koko pepepepeli ta ‘kiadama peuru ma peuru kale.’ zouke aoa tiniavo. 34Ni matu sebiviuru keru inio Jisu ta ota velavelaoke ni eri kiolake o ṉaviko pesio kale, “Eloi, Eloi, lama sabakatani?” koko kio ni kalo ta, “A Baṉara ṉa, a Baṉara ṉa, noi sole inio ṉo vaela aṉa?”

35Ni kake maba poso sai ke lojoani ta keta va viqake vo kiolani, ni eri kikelake, “Didievomo, vota o nokaeva inio tu vo Ilaija,” kikelake. 36Ni kala se azo ta o rereake ni opa koake ko kuna zaute ni o duluekake paza kama vaini jukale, ni o ikake ore ko kata topi ni ova okekake vo Jisu tu vota o kuzueko kiolake. Saita inio eri kiolake, “Me daruano saita tu me velo, ako Ilaija obe kilou savo saqorivole komia korosi topi azo!” kiolake.

37Ni matuma upaupato sate inio Jisu ta ota utupake.

38Ni koa taku kale inio ko Jelepade kale ama suma otu ta omuqa teze kota evake, koko okate azo ko tanitake rotizio ti ko raki kale. 39Ni vo solodia madu vo kuleto ala vo obeta lojoani korosi ko kuleto o kea keru Jisu ko vou, vota eri kiolake, “Koe, matu tuvevo, nea maba ta vo Baṉara vo Meqora tivoine!” kiolake. 40Ni kake rekoreko melai sai kebeta lojoake ni ke vati vailake vo Jisu vaṉʼazo ni kake sea rekoreko azo ta Maqidalama Mere, ni Mere vo visi ala Jemisi ni Josepa ko niania, ni Salome. 41Se inio lula ke lulueveni vo Jisu Qalili o irurupute keru, ni ke tauveveni. Ni matu kubo rekoreko melai sai, seke lulueveni vo Jisu Qalili azo Jerusalema.

Josepa Arimatiala ko mutavo vo Jisu

(Matiu 27:57-61; Luke 23:50-56; Jone 19:38-42)

42Ni Sabati ṉaniu ko ka inainao ko taku keru Porare raisiraisi, sipole Sabati kio keru, 43nio vo Josepa Arimatiala ta ota baroake. Vo inio kala o tarekani vo Baṉara ko lekasa puo ko kilo, ni vota kala sea Jiu ama lotu tanatanamu ko Kauniseli kale ala. Lula kota raisika sole vota o amaqeake parani putole Paelati ko kuleto ni opa pasekake Jisu ko tupu vokasi. 44Ni so keru inio Paelati ta aqasiele ota evake, ta Jisu ta lula ota vouva. Nio vota o nokaevake se solodia madu ko kuleto ala ni o kuimaevake, ni eri kiolake, “Tuvevo ikio ta Jisu ta lula ota voula?” kiolake. 45Nio so keru vo okai nianiia keru pado Jisu ko vou inio vota ova zariekake vo Josepa vo Jisu ko tupu tu opa kovo. 46Ni vo Josepa ta opa tatabaraekake matu uri ama suma, ni opa saqorikake Jisu ko tupu korosi topi azo, ni o sudekake koa suma kale ni opa vaekake niami keaka kale, ko ke roitikema lado kale. Saita inio vota o bekolikake ka pado matuma lado koa niami keaka ko veutu tona. 47Ni Maqidalama Mere ni Mere Josepa ko niania nio qo veve sai Jisu ko tupu opa mutakekoi.

Currently Selected:

Maka 15: BLBNT

Highlight

Copy