Luke 5

Jisu ko nokaemo se kuleto ama disaipeli madu

(Matiu 4:18-22; Maka 1:16-20)

1Omadeu ṉaniu kale Jisu ta o lojoake Qenesareti toupa#5:1 Qenesareti toupa: Ko ikio Qalili toupa kama pado ni kekai nokaekema. ko keta kale ni se maba madu ta ke zaitivake vo tu ke didieko vo Baṉara ko bazu kikelake. 2Ni vota o keake omuqa koaka lula ozoozoari ama keta kale, se abu ko maba poso keta ka saqorema. Ni seta ke pusaekake seko vaqara. 3Nio Jisu ta o zazuke kala pado koaka topi, Saimone vo pado topi, ni vota o pasevake vo tu vota sasa raura buti o koivievo keta kasi azo kiolake. Nio Jisu ta o papuake voa koaka topi ni o nianiiekimake sea matuma vaki.

4Ni so keru vo o paika keru pesio sekasi, vota eri kiolake Saimone kasi, “Sasa raura buti koivieka ko koaka koa koloa koi, ni meta risaekomo meko vaqara poso, nio meta me qovou ko niuniu,” kiolake.

5Nio Saimone ta eri kiolake, “Lekasa, eṉeta ṉe matu iruruputala pado ama ipu kale melai pulia quli ṉeba koala. Melai ṉoko so kio kale, aṉata a bikou ko vaqara poso,” kiolake. 6Nio seta ke pikake ko vaqara poso ni seta ke koake matu kubo niuniu ni koa vaqara poso ta sipole kota rokasiake. 7So sole seta ke kapoemake sekale amu kama pado koaka topi amu tu ke kilo tu kepa tauvemo se kikelake. Ni seta ke kuevake sekasi ni kekai sukatikake koa omuqa koaka ko niuniu ti sipole kota duluike koa omuqa koaka.

8Nio so keru Saimone Pita o kea keru ko quli ko ereima, vota o iqeiqeake Jisu ko kuleto ni eri kiolake, “Ola aṉa kasi azo Lekasa! Aṉata sarueko salala sole,” kiolake. 9Ako vo ni vokale amu sea kiadamu ta kekai vuzeike koa matu kubo niuniu ke koema sole. 10Ni koa omadeuvo jari vo Saimone sase qo iruruputani nioqa, Jemisi ni Jone, Zebeti ko omuqa lasive meqora kidi ta qota vuzeike. Nio Jisu ta eri kiolake Saimone kasi, “Pui ṉalo, ako erisaṉa azo ṉota ṉo daniekou movo se maba poso aṉa kaqe sole,” kiolake.

11Nio seta ke kailoekake seko omuqa koaka keta kale, ni ke vaekake kiadama quli ni ke luluevake vo Jisu.

Jisu ko urikivo kala pokupoku ala

(Matiu 8:1-4; Maka 1:40-45)

12Ni omadeu taku Jisu ta obeta evake kala peuru kale sai kala pado maba pokupoku ko saboevani o evakoi. Nio vota o veake vo Jisu ni vota ota patopatoike o loilo kude ni ovai zaivotake vo ni eri kiolake, “Tanala, ṉota ṉo zariovou ta, ṉo roveovou urikilo aṉa!” kiolake.

13Nio Jisu ta o rauqazake ni o tibaevake vo ni vota eri kiolake, “Aqa zaria, tu urike!” kiolake. Nio taukavole voa maba ta ota urikake voko pokupoku kale azo. 14Ni Jisu ta eri va kiolake vo, “Pui ṉoqai bazutou komi kala kasi, melai ṉota ola sidopu avole vo siama kasi tu o lelepiṉo saita inio ṉota ṉo erekou koa siqasiqa vo Mosese ko Bazu ko melati soruekako tu kiadamu ta ke tuvevo puekou ko ṉota erisaṉa ta ṉoda urika kio,” kiolake.

15Melai vo Jisu ko bazu ta kota va aerake kiadakoi, ni matuma vaki ta ko kuevake mati tu ke didievo vo ni o urikimo seko vere poso kale azo. 16Melai vota ota olake mati maba pide ama zaekale, ni sai nio o vararaitake.

Jisu ko urikivo kala maba vo pui o roveani vezokato

(Matiu 9:1-8; Maka 2:1-12)

17Ni omadeu ṉaniu kale Jisu ta o nianiiekatake, nio kake se Parese madu ni se Mosese ko Bazu kekai nianiiekatani ta kebeta papuake sai seke kuevini kiadama peuru poso kale azo Qalili ni Jiudia, ni Jerusalema azo. Ni vo Baṉara ko pizato Jisu tona ko evako kale vota o urikimake se vere amu. 18Ni kake ta ke kuevake seke boriveni boribori kale kala maba, vo pui o roveani vezokato, ni seta ke madoekake tu vati amaqeo pade ko poro kale tu ke tekuevo Jisu ko kuleto kikelake. 19Melai seta pui ke roveake ako matuma vaki sole, so sole seta pui ke keake ko rora tu ke vati amaqeo vo. So sole seta ke vati koitake kabu topi, ni seta ke puraekake koa lesa pade ni ke soloevake voko boribori kale sea padopadoilo ko tiania vo Jisu ko tanama kale. 20Ni Jisu o paqumuke keru seko oqu, vota eri kiolake voa maba kasi, “Lolo, ṉoko sarueko poso ta kota ṉa akoiva,” kiolake.

21Nio se Mosese ko Bazu kekai nianiiekatani maba poso ni se Parese madu ta ke kuimaekiniake ke ṉavio kude ni eri kikelake, “Lala inio nea maba vo o aṉararaivani ta vota Baṉara jari inio! Ako vo Baṉara o kiada inio o roveani akoeko sole ko sarueko,” kikelake.

22Ni Jisu ta ota ma paqumukake seko kerukeru so sole vota eri ma kiolake, “Noi sole inio meta me dukieka soama kerukeru meko bulo kale? 23Maba pui tapata tu eri kio, ‘Noko sarueko ta kota ṉa akoiva,’ ako meta pui me qea voko sarueko ta kota va akoiva kio ma pui, melai matu tapata ikio tu eri kio, ‘Loje tu tali,’ ako mea kiada mela ta me qelou ta vota ota lojoa kio ma pui sole. 24Sole aṉata kasa a mela elou me, aṉa maba a eveni lala ta pizato salala komia peuru ma peuru kale tu a akoekou maba ko sarueko poso,” kiolake. Ni vota eri kiolake voa maba vo pui o roveani vezokato kasi, “Ṉota loje ni lokieka ṉoko kobo ni ola ṉo bade kasi!” kiolake.

25Ni taukavole voa maba ta o lojoake seko vilu kasa ni o lokiekake voko kobo ni ota olake o pade kasi, ni o ilusivake vo Baṉara. 26Nio sea kiadamu ta keta matu vuzeike. Ni keta matu ṉake, ni seta ke ilusivake vo Baṉara ni eri kikelake, “Matu aqasiele ama quli me qealama vairutu!” kikelake.

Jisu ko nokaevo vo Livai takisi o koani

(Matiu 9:9-13; Maka 2:13-17)

27Ni Jisu ta o vaekake koa zae ni vota o veake kala maba takisi o koani Livai#5:27 Livai: Luke ni Maka ko riki kale ta Matiu ko ni ta Livai qovai nokaekake. o ṉi sala, vo obeta papuani voko iruruputo ko pade kale, sai maba kovai olakoi seko takisi tabarikole. Ni Jisu ta eri kiolake vokasi, “Luluela aṉa!” kiolake. 28Nio Livai ta o lojoake, ni o vaekake kiadama quli, ni o luluevake vo.

29Nio Livai ta o erekake ka pado matuma sailao Jisu kaqe o ṉavi Livai ko pade kasi, ni matu kubo madu se takisi ke koani ni mata matu kubo maba poso ta ke zomanake sai se sate tevolo kasi. 30Nio kake Parese madu ni se Mosese ko Bazu kekai nianiiekatani maba poso ta ke ṉuruṉuruake vo Jisu ko disaipeli poso kasi ni eri kikelake, “Noi sole inio meta me qeazata ni me nozuta nia maba poso se takisi ke koani ni se ruqe amu sase?” kikelake.

31Nio Jisu ta o mati tiorikake se, ni eri kiolake, “Se uria saevomu ta pui kevai zaria vo dokita, melai seke verepani nio kevai zariani vo. 32Aṉata pui a queva tu lilimole se sidopu amu, melai lilimole se ruqe amu,” kiolake.

Tabutabuo ko kuimanao

(Matiu 9:14-17; Maka 2:18-22)

33Nio kake maba poso ta eri kikelake Jisu kasi, “Vo Jone Bapitaiso ko disaipeli madu ta kubo taku ke tabutabua seko pui vuato kale, ni ke vararaita, ni so jari se Parese poso ko lulupato ko maba madu, melai noi nio ṉoko disaipeli madu ta ke keazaita ni ke nozuta kiada keru?” kikelake.

34Nio Jisu ta eri kiolake sekasi, “Uri kio ko sea poso ke baerebaereovani vo o vairua rorotani ko bau vuato kale ta ke tabutabuo sekasi obeta eva keru vo, kio? Maba pui! 35Melai ko barolou keru koa taku, aṉa voa vairua rorotoa lala jaria lala ko vou ko taku keru, inio seta pui ke vuatou,” kiolake.

36Nio Jisu ta omai bazuekake mata komia podepodeti eri kikolako, “Puliala ta o rotieka kama kena vaini ama sabosabo kasi azo ni o turueka tana kama sabosabo topi. Soavo o ikou ta o rotiekou ko vaini ama sabosabo ni ko vairu ama suma kale ama voarivoari ta pui kopa korotou tana kama suma topi. 37Ni puliala ta o raibika ko vairu ama vaini ko ju tana kama teamuteamu#5:37 teamuteamu: Seko vaini ko ju ko teamuteamu ta biana ko tupu kale inio ke erekake. Vairu ama vaini ko ju ta ko pudolika koa teamuteamu ko poro, ni pui vairu ama tupu tea, kota kota pisailo inio. kale. Soavo o ikou tea, ko vairu ama vaini ko ju ta ko pisaekou koa teamuteamu, ni ko vairu ama vaini ko ju ta kota raibiziovou, ni ko teamuteamu melai kota niumailou. 38Kota pui so ko kalou! Ko vairu ama vaini ko ju ta ko raibiziovou uria vairu ama teamuteamu kale! 39Melai puliala mea Jiu mela kale ala ta oka zaria nozueko ko vairu ama vaini ko ju lulama vaini ko ju nozueko ko tova. ‘Lulama vaini ta kobe qulepa,’ kimela sole.” Vo Jisu ta soa bazuemo o evake tu kasa omai iko koa vairu ama bazu vo omai bazuekako ta pui ke kati valuvaluekou tana kama bazu.

Currently Selected:

Luke 5: BLBNT

Highlight

Copy