Luke 17

Sarueko ni ruqe

(Matiu 18:6-7,21-22; Maka 9:42)

1Ni Jisu ta eri kiolake voko disaipeli madu kasi, “Ko quli se maba poso ko saruemo ama tu ruqe ke ereko ta ko ereilou, melai matuma koqotato ikio ke kovou sea maba poso seke saruemani edolomu! 2Soala maba o saruevou kala nia silo amu#17:2 kala nia silo amu: animeta pui me uria paqumuka, Jisu ta o kasema meqora poso, ma o kasema esa se maba poso se puliama matuma ni ni pizato samu. se tuvevo ke ilani aṉa ni ota va epezikou voko lai oqu aṉa, ta uri tu kota va titiziovou voko qonaqona topi ko matu lado ni o ṉamuilou kolo tiania tu o duluilo sai. 3So sole meta taka balauvomo ko quli meme erekako!

“Kala ṉovo lolo ta o saruekou ṉokasi, ṉota riqaeva vo; ni vota o liliziovou, ta ṉota ṉoda va akoekou voko sarueko. 4Ni vota o saruekou ṉokasi sikeura taku omadeu ṉaniu ko poro kale, ni koa taku poso kale oṉai kilou ni eri pa kiovou, ‘Ada lilizia,’ kiovou, uri tu ṉota ṉoda va akoekou voko sarueko,” kiolake.

Oqu

5Nio se apositolo madu ta eri kikelake Lekasa Jisu kasi, “Ṉela pizatika eṉeko oqu,” kikelake.

6Nio vo Lekasa ta o mati tiorikake se ni eri kiolake, “Meta masitadi ore ko sisu silo ama jaria pado ama oqu samela tea, me roveo nio kati pesio komia ivili, ‘Rabui ni pa papai ivere kale!’ kati kimevo ti kota ko zorimelo inio,” kiolake.

Vo nabulu ko koidi

7Ni Jisu ta mata eri ma kiolake se, “Esa kala maba me azo ta kala iruruputo vo maba sala vo umauma o erekani kiaro kale ma kala voko sipi o kati vailani. Noi nio, so keru vo obe vaitou keru pade kasi kiaro kasi azo ta ṉo joruevou vo tu vota taukavole o kuo o ṉaviko sailao kio? 8Maba pui so pa kiṉovou! Melai eri nio va kiṉovou, ‘Ṉota la inainaeka aṉako sailao ni kiaka bulebule ama sabosabo saita inio ṉo qati kilou aṉako sailao ni ju tu a vuato, koko tova vasi nio ṉoṉo vuatou,’ kiṉovou. 9Vo lekasa ta pui opa kasekou voko uriavo ko pesio vovo nabulu kasi ako vota o ereka vo o vati soruekako quli pala sole. 10Omadeuvo so jari nio me, so keru meme baikou keru ereko ko quli vo Baṉara o melati soruekako quli, meta eri kimevou, ‘Eṉeta vo Baṉara ko nabulu ṉela pala inio ni pui ṉe male tu kala ta o rauraeṉelo eṉe, ako eṉeta ṉe erekala eṉeko koidi vo o ṉelati soruekako pala tu ṉe ereko,’ kimevou,” kiolake.

Jisu ko urikimo toni pokupoku amu

11Ni Jisu obeta ola keru Jerusalema peuru kale, inio vota o olake Sameria ni Qalili ko tianiama vado kale. 12Ni so keru vo ovai amaqeo kiove keru kala pado peuru inio vota o toraemake toni pokupoku amu. Seke lojoini vaṉa, 13seta ke nokaoke matuma kora kale ni eri kikelake, “Jisu, ṉe Lekasa! Ṉota roqueṉela tu urikiṉela!” kikelake.#17:13 Ṉota roqueṉela tu urikiṉela!: Pokupoku amu ta ‘kaqa kamu’ ma kikelake ni keta ma kaitike seko kai zomano ko ilusato se maba poso sate.

14Nio vo Jisu ta o meake se ni eri kiolake sekasi, “Olamo tu pa lupasiomo se siama madu kasi,” kiolake. Ni so keru se kebeta ola keru inio seta keta urikake ni bulebule tupu keta evake. 15Nio kala pado se azo vo o kea keru voko uriko, vota o ilusivake vo Baṉara voko matuma kora kale ni vota o vaitake. 16Ni vota o loqunake vo Jisu ko kiti raki kasi ni vota o kasekake voko uriavo. Voa maba ta kala Sameriala maba inio.#17:16 Sameriala maba inio: Luke ko melai bazueko komia vuzeilo sama quli ta se Sameriamu ta pui ke lolopareani Jiu amu kasi, melai nei Sameriala pado inio o vaita kasekole voko uriavo. 17Nio Jisu ta eri kiolake, “Toni madu inio sea maba poso ke urikalani, melai lai ta sea siakava? 18Noi sole inio nea pakepakeo maba o kiada inio o vaita ni o ilusiva vo Baṉara?” 19So sole Jisu ta eri kiolake voa maba kasi, “Loje ni ola; ṉoko oqu ta ko urikiṉala ṉo sole,” kiolake.

Vo Baṉara o lekasa puovou keru

(Matiu 24:23-28,37-41)

20Ni kake se Parese madu ta ke kuimaevake vo Jisu, ni eri kikelake, “Noi keru inio vo Baṉara o lekasa puovou keru?” kikelake. Nio Jisu ta o mati tiorikake ni eri kiolake, “Vo Baṉara ko lekasa puo ta pui maba ko keako quli kio. 21Puliala ta eri pa kiovou, ‘Keatini, komi kio ko ko!’ ma ‘Ko ikio ko ko!’ pa kiovou, ako vo Baṉara ta lula omai lekasa puani kake meko valuvalu ke evani maba poso sole,” kiolake.

22Nio vota eri kiolake voko disaipeli madu kasi, “Kama pado taku ta ko kilou so keru me meqai matu zariovou keru kelo kama pado ṉaniu aṉa maba a eveni lala ko tova vaito keru ama, melai meta pui meba kelou ko. 23Kama maba poso ta eri mela kikevou me, ‘Vemo unei nio vo Baṉara o pitoevani Pakio!’ ma ‘Vemo nei nio!’ melai meta pui saqoro velole vo. 24Ako omadeuvo ko kapi ta ko laqata au kama rana ni kokai baroa talolo kama rana, so jari nio ko kalo avo aṉa maba a eveni lala ko vaito ko ṉaniu kale. 25Melai kuleto aṉata olaquavo aqai elou kubo quli, ni komia taku kale ama maba poso ta kelai kaikuapou ni kelai masapou. 26Omadeuvo vo Noa ko taku keru ko ereima quli so jari ama quli kio aṉa maba a eveni lala ko vaito ko ṉaniu kale ko ereilo ama. 27Kiadama maba poso ta ke vuatake ni ke nozutake, ni lasive poso ni rekoreko ta ke raekiniake kiada keru jari, ti ota podolo baro inio kobeta evake koa ṉaniu Noa o zazi keru matu vaka topi ni ko nioqololo ta ko kuevake ni ko ruvurimake sea kiadamu. 28Ni kota omadeuvo vo Lote ko taku keru jari ko kalou. So keru kiadamu ta ke vuatake ni ke nozutake, ni ke tatabaraekiniake, ni ke papatake ni ke padematake. 29Koa ṉaniu kale vo Lote o vaeke keru ko Sodomo peuru, inio ko uza sama nai ta ko saqorake aukale azo ni ko ruvurimake sea kiadamu koa peuru kale amu. 30So jari pado inio ko kalo avo aṉa maba a eveni lala kasa a elou keru.

31“Koa tapata ko elou keru ama ṉaniu kale ta ṉo ṉobeta eloa laṉa ṉoko pade ko okate ta pui ṉoqai ubaitou saqoro kovole ṉoko lomaloma pade ko poro kale ama, ni so jari ṉo ṉobeta eloa laṉa kiaro kale ta pui ṉoqai ubaitou saqoro pade kasi. 32Meta matu kerukeruekomo ko Lote ko reko ko evevo!#17:32 Lote ko reko ko evevo: Lote ko reko ta ko roquekake koko lulama saevo koa ruqe ama peuru Sodomo kale ama, ti kota ko lilitake mata koa peuru kasi vasi so keru vo Baṉara o titizime keru saizama maba poso, vo Lote o kati soqoi keru ko. Kota ko lilitake ti Soloti barabara inio kobeta evake. 33Vo oka zariani pakieko voko tupu kale ama saevo ta vota o ṉamuka inio voko saevo tovama saevo kale ama. Melai vo o ṉamuko ala voko tupu kale ama saevo aṉako luluelo kale ta okai kovou noqola kama saevo.

34“Aṉata a bazuemela me, koa ipu kale inio omuqa kidi ta qopeta maroṉou omadeuma kobo topi, ni kala ta aba vovou kala ta a vaevou. 35Ni omuqa rekoreko ta omadeu mujarato qopeta elou vuiti ko epa tu qo ereko ko palava, ni kama pado nioqʼazo ta aba kovou ka pado ta a vaekou. 36Ni omuqa lasive maba kidi ta qopeta elou kiaro kale, ni kala nioqʼazo ta aba vovou kala ta a vaevou,” kiolake.

37Ni voko disaipeli madu ta ke kuimaevake vo, ni eri kikelake, “Lai nio komi quli ko ereiloa koi, Lekasa?” kikelake.

Nio Jisu ta o opatake, ni eri kiolake, “Sai meme qeloa koi ko belama ko padoilo sai nio ko inabu ko evakoi. Omadeuvo so jari nio komi quli ko ereiloa koi ta kasa komai elou se maba poso,” kiolake.

Currently Selected:

Luke 17: BLBNT

Highlight

Copy