Luke 16

Takula ko nianiio sala maba ko podepodeti

1Ni Jisu ta mata eri kiolake voko disaipeli madu kasi, “Inevoana kala pado batiro ala maba vo o ṉeamuvani kala vailo ko maba vo o kati vailani ni o korotikani voko seleni ni lomaloma. Ni voa batiro ala maba ta ovai kuirikake ta vovo vailo ko maba ta lula ota va ajoeka voko seleni kiolake. 2So sole voa lekasa ta o odievake voa vailo ko maba ni eri va kiolake, ‘Noi nio ko quli aṉa ṉo ada ṉa viqako? Kati kua ko iruruputo ko buka tu korotika ataeko, ako ṉota ṉo baika aṉavo vailo ko maba elo erisaṉa sole,’ kiolake. 3Nio voa vailo ko maba ta eri kiolake voko kerukeru kale, ‘Aṉavo lekasa ta o epezilou aṉa aṉako iruruputo kale azo. Sole loma ikio aṉata a erekou? Aṉata pui a male tu a deliko ko totoqela ni ada quratou tu pasepaseto. 4Aṉata a baqumuka aṉa a qalo avo! Aṉata soa elo a elou, ti so keru aṉako koidi ko vaelou keru, aṉata baerebaere saṉa a elou seke baroekilo amu aṉa seko pade poso kasi!’ kiolake.

5“So sole vota o nokaemake kiadamu se lipulipu samu vovo lekasa kasi. Ni vota o kuimaevake kuleto ala maba, ‘Latau kio ṉoko lipulipu aṉavo lekasa kasi ama?’ kiolake. 6Ni vota o vati tiorikake ni eri kiolake, ‘Siotolu paizana qaloni Olive oela.’ Nio voa vailo ko maba ta o bazuevake vo ni eri va kiolake, ‘Uri tu koa komi ṉoko lipulipu ko pepa ni papi tu rikieka ni taka lipueka ariku paizana!’ kiolake. 7Nio vota mata o kuimaevake omuqala pado maba ni eri kiolake, ‘Latau kio ṉoko lipulipu?’ Ni voa maba ta o opatake, ‘Omadeu vuro baeke vuiti, kiolake. Vailo ko maba ta eri kiolake, ‘Komi kio ṉoko lipulipu ko pepa, sole rikieka siotolu paizana!’ kiolake.

8“Ni koa kalo vo o erekako kale avo inio vo lekasa ta o rauraevake voa lipalipa kala vailo ko maba voko roverove ama kalo kale. Aṉata aqai bazubazuta ko quli ako komia ruqe ama peuru ma peuru kale ama maba poso ta roverove amu ni kemai paloasa se Baṉara ko zakaremu kale ke evani seko korotiko kale ke ṉaviko uri sole.”#16:8 Jisu ta o riqaema seke luluevani vo ako seta pui ke inainaekani ke ṉaviko uri titizato ko ṉaniu kale ke kovo ama, seko mai tauveko kale edolomu seko miduku kale ama batiro, melai inio komia ruqe ama peuru ma peuru ko kalo kale maba poso ta kekai nianiia tu kai iruruputo ko seleni tu ke korotiko ke naviko saevo tapata keru.

9Ni Jisu ta obeta olake pesio ni eri kiolake, “Aṉata a bazuemela me, tu kai lolopareomo komia peuru ma peuru kale ama batiro meko mai tauveko kale edolomu, ni so keru koko paitou keru, inio vo Baṉara ta o baroekimelou me voko noqola kama pade kale. 10Vo kerula o evani silo ama quli kale ta kerula o elou matuma quli kale; vo saqaiqara o evani silo ama quli kale ta saqaiqara o elou matuma quli kale. 11So sole meta pui kerula me elou meko kai iruruputo kale komia peuru ma peuru ama batiro, ta meta mata pui kerula meba elou meko kai iruruputo kale ko tuvevo ama batiro. 12Ni meta pui kerula me elou edolola maba ko lomaloma kale, ta vo Baṉara ta pui opa roveovou katimelo me ko quli me ṉavi koko raki meda ka elo ama quli.

13“Puliala nabulu ta opa roveovou ka nabulupute omuqa lekasa. Vota o roquevou kala ni ovai keduvou kala. Vota ovai masapou kala, ni vota dikidauputole ova nabuluputou kala. Omadeuvo so jari nio meta pui meba roveovou omadeu ilusiko Baṉara ni batiro,” kiolake vo Jisu.

Kama Jisu ko bazu poso

(Matiu 11:12-13; 5:31-32; Maka 10:11-12)

14Nio so keru se Parese madu ke viqa keru kiadama soama Jisu ko rukuruku poso seta ke taniekake vai balebaleito vo, ako seta ke roquekake ko batiro sole. 15Nio Jisu ta eri ma kiolake se, “Me inio ko me, me sidopu meqai rairiziani mela me ṉavi se maba poso ko vilu kasa, melai Baṉara ta obe paqumuka meko bulo poso kale ama ruqe. Ako koko matuma kio ni kalo sama ka kikelako se maba poso ta kuvaruvaru ama quli ikio vo Baṉara ko kelokelozato kale.

16“Mosese o katimelema Bazu ni se poropita madu ko riki poso ta ko pizate ti kobeta baroi Jone Bapitaiso ko taku keru, so keru azo inio aṉata a danite kai bazubazuto ko Uri ama Bazu Baṉara ko lekasa puo ko bazu sama ni maba poso ta ko riaboema amaqimo voko lekasa puo kale. 17Melai pui tapata tu ko au ni miduku ta ko ruvuro, melai puliama kama supi vo Mosese ko Bazu kale ama quli ta kopa besiziovou. 18Kala maba vo o butuekani voko reko ni o raekani edoloma reko ta ota zavemata, ni voa maba vo o raekani koko butuima reko vo melai ota zavemata.”

Batiro ala maba ni Lazarasi

19Ni Jisu ta obeta olake pesio ni eri kiolake, “Kala batiro ala maba ta obeta evake vo okai saboivani ko matu ileile ama sabosabo matu tatabara kama ni kiadama ṉaniu o matu uria vuatani. 20Ni inevoana mata kala ozaoza kala maba o ṉi ta Lazarasi, vota potupotu ala, vo ke vati olani mati vo batiro ala maba ko pade veutu tona, 21ni vo oka zariani kuo ko sailao ko vuruvuru batiro ala maba ko tevolo topi azo ko piako. Ni ko siele poso melai ko kuevake ni kota va leniolenioekake ko potu.

22“Ni voa ozaoza kala maba ta ota vouvake ni se mateana madu ta ke borivake vo ni kepa papuevake Ebarahami ko papara#16:22 Ebarahami ko papara: seko sai papuevo ta kasa ko ika seko rauraevo, Jiu amu ko kalo kale. aukale ama ṉojola kale. Ni vo batiro ala maba ta mata ota vouvake ni ke mutavake, 23ni o evosikake voko vilu heli kale, o koake sai matuma tola, ni o tadatake nio o veake vo Ebarahami matu vaṉa vasi, Lazarasi ta voko papara obeta evake. 24So sole vota o nokaeke, Taite Ebarahami! Roquela aṉa, tu soroeva vo Lazarasi tu o dulueko voko seseu jukale tu opa talai tibiatiko a lenio tu saroro kola iko, ako aṉata ada matu tolaiva komia uza ko poro kale sole!’ kiolake.

25“Melai Ebarahami ta o vati tiorikake ni eri kiolake, ‘Kerukeruto, mabuzu, so keru ṉoṉo jaeve keru ta ṉo qoe kubo ṉoko lomaloma uri ama, so keru Lazarasi o ṉeamuke keru ruqe ama lomaloma poso. Melai erisaṉa vota o patuka ni o zoleiva koi, ni ṉota ṉo eva tola kale. 26Ni mata kama pado quli ta komi. Eṉe ni meko tiania ta ikoana kama pado rosia saqoroma soqili, so sole se keka zariani pakeo tu zio mekasi koi kazo ta pui kepa roveovou, ni sai kazo pakeo kala tu kilo eṉe kasi melai koa omadeuvo jari,’ kiolake. 27Nio vo batiro ala maba ta eri kiolake mata, ‘Aṉata a baseṉa taite Ebarahami, tu ṉota soroeva vo Lazarasi tu o zio aṉavo mama ko pade kasi, 28sai sea sike aṉako kaka ni visi poso ke evakoi. Zarieva tu o zio tu opa balauvimo se, tu puliala kala pado se azo ta o kilou komia tola kama zaekale!’ kiolake.

29“Nio vo Ebarahami ta eri kiolake, ‘Noko tamania kale amu ta ikoana vo Mosese ni se poropita madu kikevevo tu ko katimo ko balauvato seko riki poso kale. Sole se kikevevo inio ṉoko tamania kale amu ke viqou,’ kiolake. 30Nio voa batiro ala maba ta o tiorizatake ni eri kiolake, ‘Kota pui ko male, taite Ebarahami! Melai kala ta o saevou voukale azo ta omai ziovou se tea, seta ke vaekou nio seko ruqe ama kalo poso,’ kiolake. 31Melai Ebarahami ta o vati tiorikake vo ni eri kiolake, ‘Seta pui keta ma viqou ni luluekou Mosese ni poropita madu kikevevo, ta seta mata pui kepa tava viqou kala vo o saevo ala voukale azo,’ kiolake.”

Currently Selected:

Luke 16: BLBNT

Highlight

Copy