Lukas 1

Lukas tulis carita tentang Yesus

1Bapa Teofilus yang kita hormati.

Banya orang so tulis carita tentang apa yang Yesus biking waktu Dia masi sama-sama deng torang. 2Dorang tulis samua itu sama deng dorang dengar langsung dari orang-orang yang so lia deng mata kapala sandiri. Orang-orang itu yang lia dari pertama waktu samua itu jadi, kong kase turus carita itu pa orang-orang laeng. 3Kita sandiri so priksa bae-bae samua carita itu yang dorang tulis mulai dari pertama. Jadi abis itu kita ambe keputusan untuk tulis carita tentang samua yang so perna jadi itu dari awal sampe ahir, kong kirim pa bapa Teofilus. 4Jadi kita tulis carita ini supaya bapa tau pasti, apa yang orang so ajar pa bapa tentang Yesus itu butul.

Malaekat kase tau, Yohanes Pembaptis mo lahir

5 # 1Taw. 24:10 Waktu Herodes jadi raja di daera Yudea, ada satu imam agama Yahudi yang pe nama Zakharia. Dia itu dari imam Abia pe kelompok. Zakharia pe bini pe nama Elisabet. Dorang dua itu turunan dari imam Harun. 6Dorang dua laki bini ini hidup butul pa Tuhan Allah pe muka, deng dong iko samua Dia pe parenta deng aturan-aturan, kong tarada yang bisa kase sala pa dorang. 7Dorang dua so tua, baru tarada ana lagi, karna Elisabet tara bisa dapa ana.

8Satu kali bagini, imam Abia pe kelompok dapa giliran tugas di Ruma Ibada Pusat. Kong dari kelompok itu, Zakharia yang dapa tugas untuk layani pa Tuhan Allah di situ. 9Dia dapa tugas itu karna waktu itu imam-imam agama Yahudi pe biasa cabu undi la dapa tau sapa yang pe nama kaluar untuk bakar kemenyan#1:9: Kemenyan ini, ada biking dari gata pohong satu yang kalu bakar, bobou sadap, kong orang Yahudi jaga pake di dorang pe ibada. Lia lagi kemenyan pe keterangan di kamus. di Ruang Suci dalam Ruma Ibada Pusat. Kong waktu itu Zakharia pe nama yang kaluar. 10Jadi, Zakharia maso di Ruang Suci itu, kong biking dia pe tugas bakar kemenyan, sedangkan di luar ada orang banya yang berdoa.

11Kage-kage Tuhan Allah pe malaekat kase tunju dia pe diri pa Zakharia. Malaekat itu badiri di sabla kanan tampa bakar kayu yang bobou sadap. 12Pe lia bagitu, Zakharia kage kong jadi tako skali. 13Tapi malaekat itu bilang pa dia, “Zakharia, jang ngana tako! Tuhan Allah so dengar ngana pe doa. Ngana pe bini Elisabet akan melahirkan ana laki-laki satu. Ana itu ngana musti kase nama pa dia, Yohanes. 14Nanti ngana sanang skali deng ana itu, deng banya orang me rasa sanang waktu ana itu lahir, 15#Bil. 6:3 karna dia mo jadi orang basar pa Tuhan Allah pe muka. Selama dia hidup, dia tara akan minum anggur atau minuman laeng yang biking mabo. Waktu dia masi ada pa dia pe mama pe puru, Roh Kudus so kuasai pa dia. 16Dia yang nanti mo kase mangarti pa banya orang Israel supaya bale iko pa Tuhan Allah, dorang pe Tuhan. 17#Mal. 4:5-6 Ana itu nanti pe kuasa basar sama deng nabi Elia dulu, karna Roh Kudus so kuasai pa dia. Kong dia mo datang kamuka sebelum Tuhan datang. Dia mo biking orang tua laki-laki pe hati baku bae deng dong pe ana-ana. Dia me akan biking orang yang malawang Tuhan Allah pe parenta jadi orang yang jaga biking barang yang butul. Deng bagitu, dia mo kase siap orang-orang supaya jadi pantas untuk jadi Tuhan Allah pe umat.”

18Tapi Zakharia tanya pa malaekat itu, “Bagimana kita bisa tau kalu kita deng kita pe bini mo dapa ana? Barang torang dua so tua.”

19 # Dan. 8:16, 9:21 Kong malaekat bilang pa dia, “Kita ini Gabriel yang salalu ada deng Tuhan Allah untuk layani pa Dia. Dia utus pa kita untuk bilang kabar yang bae ini pa ngana. 20Yang kita bilang ini pasti mo jadi pa dia pe waktu. Tapi ngana, karna ngana tara percaya yang kita bilang, mulai skarang, ngana tara bisa bicara, sampe samua yang kita bilang ini jadi.”

21Orang banya yang ada berdoa di luar tunggu turus pa Zakharia. Dorang herang barang dia lama skali di dalam Ruang Suci. 22Waktu Zakharia kaluar, dia so tara bisa bicara. Jadi dia cuma kase kode deng tangan pa dorang barang dia so mou. Pe lia bagitu, dorang langsung dapa tau dia dapa penglihatan di dalam Ruang Suci itu.

23Waktu Zakharia so selesai biking dia pe tugas, dia pulang pa dia pe ruma. 24Pe tara lama, Elisabet dia pe bini itu hamil. Kong selama lima bulan dia cuma bakurung di ruma. 25Elisabet bilang bagini, “Tuhan so kase Dia pe bae pa kita. Dia tolong sampe kita bole jadi hamil, kong kita tara malu lagi pa orang-orang.”

Malaekat kase tau, Yesus mo lahir

26Waktu Elisabet hamil anam bulan, Tuhan Allah suru malaekat Gabriel pigi di satu kota di daera Galilea, yang pe nama Nazaret. 27#Mat. 1:18 Tuhan suru dia pigi pa nona satu, dia pe nama Maria. Maria itu bolong tau laki-laki tapi dia ada rencana mo kawing deng laki-laki satu yang pe nama Yusuf. Yusuf ini raja Daud pe turunan. 28Malaekat itu datang pa Maria kong bilang bagini, “Salam, nona Maria! Tuhan mo kase tunju Dia pe bae pa ngana. Dia salalu ada sama-sama deng ngana.”

29Maria kage waktu dengar malaekat bilang bagitu. Dia babatanya dalam hati, malaekat itu pe maksut apa. 30Turus malaekat itu bilang pa dia, “Maria, jang ngana tako, barang Tuhan Allah kase Dia pe bae pa ngana. 31#Mat. 1:21 So tara lama lagi, ngana mo hamil, kong mo melahirkan Anak laki-laki satu. Ngana musti kase nama Anak itu, ‘Yesus’.#1:31: Nama Yesus dalam bahasa Ibrani ada tulis, Yehosua, yang pe arti, ‘Tuhan Allah kase slamat manusia’. Kalu dalam bahasa Yunani ada tulis, Iesous. 32#2Sam. 7:12, 13, 16; Yes. 9:7 Dia itu mo jadi orang basar, deng nanti orang-orang mo pangge pa Dia Anak dari Tuhan Allah yang Paling Tinggi. Tuhan Allah mo biking Dia berkuasa sama deng Dia pe orang tua dulu-dulu, raja Daud. 33Dia akan jadi Raja pa samua bangsa Israel pe turunan, kong Dia tetap Berkuasa sebagai Raja sampe slama-lamanya.”

34Pe dengar itu, Maria bilang pa malaekat itu, “Bagimana itu mo jadi? Kita kan masi nona-nona, bolong perna tidor deng laki-laki.”

35Malaekat itu jawab pa dia, “Bagini. Nanti Roh Kudus mo datang pa ngana. Tuhan Allah yang Paling Tinggi itu mo kuasai pa ngana. Jadi, Anak yang akan ngana kase lahir itu suci, deng orang mo pangge pa Dia, Anak Allah. 36Bukang itu saja, Elisabet ngana pe sudara itu, biar dia so tua deng orang bilang kata, dia tara bisa dapa ana, tapi skarang dia so hamil ana laki-laki anam bulan. 37#Kej. 18:14 Samua itu bole jadi, karna Tuhan Allah bisa biking apa saja.”

38Kong Maria bilang pa malaekat itu, “Kita ini cuma orang yang jaga biking apa yang Tuhan suru. Jadi biar yang bapa bilang itu jadi pa kita.” Abis itu, malaekat kase tinggal pa Maria.

Maria pigi pa Elisabet

39Tara lama dari itu, Maria capat-capat pigi di kota satu di tampa yang babagunung, di daera Yudea. 40Dia pigi pa Zakharia pe ruma. Pe sampe di sana, dia maso kong kase salam pa Elisabet.

41Waktu Elisabet dengar Maria pe salam, ana yang ada pa Elisabet pe puru langsung bagará, kong Roh Kudus kuasai pa Elisabet. 42Turus Elisabet bilang deng suara kuat, “Maria! Tuhan Allah so kase Dia pe bae pa ngana lebe dari samua parampuang! Dia kase Dia pe bae pa Anak yang ngana mo kase lahir. 43Kita sanang skali, karna biar kita ini cuma orang biasa yang tara pantas, tapi kita pe Tuhan pe mama so datang kamari pa kita. 44Tadi, waktu kita dengar ngana pe salam, kita pe ana dalam puru ini langsung bagará, barang dia sanang. 45Ngana paling sanang suda karna ngana so percaya apa yang Tuhan bilang itu mo jadi.”

Maria puji pa Tuhan Allah

46 # Kej. 17:7; 1Sam. 2:1-10 Kong Maria bilang bagini,

“Kita puji pa Tuhan.

47Kita pe hati sanang skali,

karna Tuhan Allah yang kase slamat pa Kita.

48 # 1Sam. 1:11 Barang, Dia so perhatikan pa kita,

kita ini orang yang tarada arti apa-apa, kita ini orang yang cuma biking apa yang Dia suru.

Mulai skarang, samua orang mo bilang kita ini parampuang yang paling sanang skali,

49karna Tuhan Allah Yang Paling Berkuasa so biking hal-hal yang luar biasa pa kita.

Dia memang suci.

50Tuhan Allah kase tunju Dia pe rasa kasiang pa orang yang tako pa Dia,

dari turunan yang satu sampe turunan yang laeng.

51Dia pe kuasa basar jadi Dia biking hal-hal hebat.

Dia kase kaco orang-orang yang sombong sampe dong pe rencana tara ada yang jadi.

52 # Ayb. 5:11, 12:19 Dia kase turung raja-raja dari dorang pe jabatan,

kong Dia angka pa orang-orang yang tarada arti apa-apa.

53Dia kase apa yang bae pa orang-orang miskin sampe dorang puas,

tapi pa orang-orang kaya Dia suru pigi deng tara bawa apa-apa.

54Dia bantu pa orang-orang bangsa Israel, bangsa yang Dia so pili untuk biking apa yang Dia suru,

Dia bantu pa dorang karna Dia inga Dia pe janji untuk kase tunju Dia pe rasa kasiang

55 # Kej. 17:7 pa torang pe orang tua dulu-dulu itu, Abraham deng dia pe turunan.

Janji itu memang Tuhan so bilang dari dulu,

kong berlaku sampe slama-lamanya.”

56Di situ, Maria tinggal deng Elisabet sekitar tiga bulan. Abis itu, Maria pulang pa dia pe ruma.

Yohanes lahir

57Pas dia pe waktu Elisabet mo melahirkan, dia melahirkan ana laki-laki satu. 58Elisabet pe birman-birman deng dia pe sudara-sudara dapa dengar Tuhan so kase tunju Dia pe rasa kasiang yang basar pa Elisabet, sampe Dia kase ana satu, kong dorang samua basimore sama-sama deng dia.

59 # Im. 12:3 Waktu ana itu so delapan hari, dorang mo sunat pa dia iko agama Yahudi pe aturan. Jadi birman-birman deng sudara-sudara datang bakumpul di situ. Dorang mo kase nama ana itu Zakharia sama deng dia pe papa pe nama. 60Tapi dia pe mama tara mau. Dia bilang, “Jangan! Musti kase nama pa dia Yohanes.”

61Kong dorang bilang pa dia, “Tapi di samua ngoni pe sudara, tara ada satu yang pe nama Yohanes.” 62Turus, dorang kase kode pa Zakharia la mo tanya dia pe ana itu mo kase nama sapa.

63Zakharia kase kode minta alat tulis kong dia tulis kata-kata ini, “Dia pe nama Yohanes”. Kong samua orang yang ada di situ jadi herang.

64Waktu itu suda, Zakharia langsung bisa bicara ulang, kong dia puji pa Tuhan Allah. 65Samua orang yang tinggal di dekat situ jadi herang deng tako. Kong samua yang jadi itu, orang-orang kase carita sampe di samua kota di daera Yudea yang babagunung. 66Samua orang yang dengar hal itu babatanya dalam hati, “Akan jadi apa ana itu kalu dia basar?” Dorang bapikir bagitu karna dong tau Tuhan pe kuasa ada sama-sama deng ana itu.

Zakharia puji pa Tuhan Allah

67Abis itu, Roh Kudus kuasai pa Zakharia, Yohanes pe papa. Turus, Zakharia kase tau apa yang Tuhan Allah bilang pa dia,

68“Mari puji pa Tuhan Allah, orang Israel pe Tuhan!

Barang, Dia so datang tolong pa Dia pe umat, orang-orang Israel,

kong kase bebas pa dorang.

69Dia so utus satu Orang yang hebat#1:69: Di teks asli ada tulis, ‘tandu’. Tandu itu lambang kekuatan atau kuasa, yang pe maksut, ‘Orang yang kase slamat’. untuk kase slamat pa torang.

Orang itu raja Daud pe turunan.

Raja Daud itu orang yang jaga biking apa yang Tuhan Allah suru.

70Tuhan Allah janji dari dulu,

kong Dia pe nabi-nabi yang kudus kase tau Dia pe janji-janji bagini:

71Tuhan mo kase bebas pa torang

dari tong pe musu-musu

deng dari kuasa orang-orang yang binci pa torang.

72Tuhan mo biking bagitu,

karna Dia tara lupa yang Dia janji pa torang pe orang tua dulu-dulu.

Dia inga Dia pe janji yang kudus itu deng cara kase tunju Dia pe sayang pa dorang.

73Janji yang Tuhan Allah bilang itu deng basumpa pa Abraham, torang pe orang tua dulu-dulu,

74Dia bajanji, Dia mo kase bebas pa torang dari tong pe musu-musu.

Deng bagitu, torang tara rasa tako mo semba pa Dia.

75Kong selama torang hidup, torang hidup cuma biking Tuhan Allah pe mau,

deng hidup cuma biking yang butul pa Tuhan Allah pe muka.”

76 # Mal. 3:1 Abis itu Zakharia bilang pa Yohanes,

“Kong ngana kita pe ana,

nanti orang mo bilang ngana itu Tuhan Allah yang Paling Tinggi pe nabi yang jaga kase turus Dia pe pasáng pa orang-orang.

Dorang mo bilang bagitu karna ngana datang kamuka di dunia dari Tuhan,

untuk kase siap orang-orang pe hati mo tarima pa Dia.

77Ngana mo kase tau pa Tuhan Allah pe umat,

Dia mo kase slamat pa dorang deng cara Dia mo kase ampun pa dorang dari dorang pe dosa-dosa.

78Torang pe Tuhan Allah rasa kasiang pa torang.

Karna itu, Dia datang dari sorga kase slamat pa torang.

Dia pe datang itu, akan jadi sama deng matahari pagi kaluar

79 # Yes. 9:2 la kase sinar.

Dia itu mo datang kase tarang pa orang-orang yang hidup dalam galap,

deng pa orang-orang yang hidup deng rasa tako.

Dia mo datang pa torang supaya torang tau jalang hidup yang biking torang pe hati salalu tenang.”

80Zakharia pe ana itu lebe hari lebe tamba basar, turus Tuhan biking dia pe hati lebe tamba kuat. Bagitu dia so basar, dia tinggal di padang gurun, tampa yang sunyi deng jao dari kampong, sampe dia mo biking pelayanan pa orang Israel, baru dia kase tinggal tampa itu.

Currently Selected:

Lukas 1: PB MMU

Highlight

Copy