Lukas Kitab ini pe keterangan
Kitab ini pe keterangan
Kabar Bae: Kitab Lukas ini dapa sebut Kabar Bae (B. Ind: Injil), karna dia pe carita tentang Tuhan Allah utus pa Yesus Kristus datang di dunia kong sapa saja yang percaya pa Dia, orang itu pe dosa-dosa akan dapa ampun kong dia akan hidup deng Tuhan Allah slama-lamanya.
Orang yang tulis kitab ini: Kitab ini Lukas yang tulis. Lukas ini dokter (Kol. 4:14), deng dia lagi Paulus pe tamang bae. Dia perna iko pa Paulus waktu dorang pe perjalanan pelayanan yang kedua (Kis. 16:9-10; 2Tim. 4:11; Flm. 1:24). Lukas ini bukang orang Yahudi tapi dia so percaya pa Yesus. Dia bolong perna lia langsung pa Yesus, tapi ada orang-orang yang kase tau pa dia tentang Yesus. Lukas ini paling teliti, karna itu dia cari tau bae-bae samua carita yang orang bilang pa dia tentang Yesus, kong dia susun carita itu mulai dari Yesus lahir sampe Yesus taangka ka sorga (Luk. 1:1-4).
Kitab ini untuk sapa: Kitab Lukas ini ada tulis untuk orang yang Lukas sebut ‘Teofilus yang kita hormati’ (Luk. 1:1). Teofilus ini, menurut ahli Alkitab, tara jelas sapa dia sebenarnya, tapi mangkali dia itu orang Roma yang punya jabatan tinggi, deng dia itu lagi Lukas pe tamang bae. Biar bagitu, Lukas tulis kitab ini lagi untuk samua orang, lebe kusus untuk orang-orang Yunani, yang dapa sebut orang-orang yang bukang Yahudi. Lukas tulis kitab ini supaya jelas, Yesus itu Kristus, Raja yang Tuhan Allah janji mo datang untuk kase slamat pa manusia dari dosa-dosa. Itu sama deng yang Yesus bilang pa Zakheus, Dia pe tujuan datang di dunia untuk cari pa orang-orang yang jao dari Tuhan Allah la kase slamat pa dorang (Luk. 19:10).
Ajaran-ajaran kitab ini: Di kitab ini, Lukas susun carita tentang Yesus dari awal sampe ahir. Dia carita mulai dari waktu malaekat-malaekat datang pa Maria, Yusuf, deng gembala-gembala, deng bagimana Roh Kudus bakarja sampe Yesus lahir (Luk. 1–2). Lukas me carita tentang Yesus pe sudara Yohanes Pembaptis, mujizat-mujizat yang Yesus biking, setang-setang yang Yesus user, deng banya umpama laeng lagi yang Yesus kase tau. Di kitab ini, Lukas carita lagi bagimana Yesus pe rasa kasiang yang basar pa orang-orang susa (Luk. 4:16-19), bagimana parampuang-parampuang yang iko pa Yesus bantu dalam pelayanan (Luk. 8:1-3), deng bagimana pemimpin-pemimpin agama Yahudi cari jalang supaya Yesus dapa bunu. Lukas carita tentang Yesus dapa tangka, dapa adili deng mati di kayu salib kong dapa kubur, turus hidup ulang kong kase tunju Dia pe diri pa samua murit, kong abis itu, Yesus nae ka sorga (Luk. 22–24).
Currently Selected:
Lukas Kitab ini pe keterangan: PB MMU
Highlight
Share
Copy
Want to have your highlights saved across all your devices? Sign up or sign in
Perjanjian Baru Bahasa Melayu Maluku Utara @ Lembaga Alkitab Indonesia 2020