ŴaRoma 3

1Nchine viyo chanduku cha muYuda? Pamwenga ngune wanduzi wa mchinju wo? 2Nchinandi kosekose; chakudanga na, nchakuti ghangupazgikiya iwo manenedu ghaku Chiuta. 3Na kwati, asani ŵengavi kuvwana ŵanyake? Kumbi uwura chivwanu wawo uwayuwenge umagomekezgeka waku Chiuta? 4Kungaŵa viyo cha! Kweni waŵe muneneska Chiuta chingana munthu yose waŵa mtesi; nge ndimo kwalembeke,

“Alinga kuti murunjiskike mu mazu ghinu,

ndi mupunde mucheruzgika imwe.”

5Kweni asani uwura-urunji widu usimika urunji waku Chiuta, tikatingenji? Kumbi ngwambura-urunji Chiuta, pakutitole kandundu? (Ndikamba ulaka ndi munthu.) 6Kungaŵanga viyo cha! Ipu Chiuta wamkweruzga uli charu? 7Kweni asani chifukwa cha utesi wangu uneneska waku Chiuta ungufurwiya ku unkhankhu wake, chifukwa chine ine nane ndeche kweruzgika uli ndi mlakwi? 8Ndipo chifukwa chine tireka kukamba (nge ndimo titukikiya, ndi nge ndimo ŵanyake ŵatiti ifwe tikamba), tichitenge viheni, alinga vizenge vyamampha? Chisusa cha waviyo nchakurunjika.

Palivi yumoza yo ndi murunji

9Na kwati? Kumbi tipambanapo? Cha pe, kosekose: chifukwa tapanikizga kali ŵaYuda ndi so ŵaGriki, kuti wose ŵe pasi pa ulakwi; 10uli ndimo kwalembeke,

“Palive murunji, chingana njumoza;

11palive wakuwamo,

palive wakumpenjapenja Chiuta.

12Ŵapatukako wose pamoza, ŵanangika ŵaka;

palive wakuchita umampha, palive, chingana njumoza.”

13“Singu lawo ndi muunda wamwazi; afuvya ndi malilime ghawo.”

“Liwozga la ŵakhaku le kusi ku milomo yawo.”

14“Mlomo waku wo uzara kutemba ndi kurunda.”

15“Marundi ghawo ghapusumphiya kudiya ndopa;

16phasulu ndi usokwa vye mu nthowa zawo;

17ndipo nthowa ya chimangu ŵalive kose kuyiziŵa.”

18“Palive chopu chaku Chiuta pa maso pawo.”

19Kweni tiziŵa kuti vyenivyo vyose chikamba chilangulu cho, chikambiya wo ŵe pasi pa chilangulu; alinga kuti uchetamiskike mlomo wose, ndi kuti charu chose chitoleke ku cheruzgu chaku Chiuta. 20Chifukwa kuti kuchiri ku nchitu za chilangulu paŵengevi kurunjiskika munthu wamoyo pa maso pake: pakuti mu chilangulu mwe mziŵiru wa ulakwi.

21Kweni sono pade pa chilangulu warongoleka urunji waku Chiuta, wakusimikizgika ndi chilangulu cho ndi ŵamchimi wo; 22urunji nawo wakuchiuta wamu chivwanu mwaku Yesu Kristu, wa kwaku wose ŵakuvwana; pakuti mpambanu palive; 23chifukwa wose ŵakulakwa, ŵapereŵe pe unkhankhu waku Chiuta; 24ndipo mbakurunjiskikiya kwaulera ndi wezi wake mu uwombozi wa mwaku Kristu Yesu: 25mweniyo Chiuta wangumumika kuŵa mphepeska mu chivwanu, mu ndopa zake, kwachirongo urunji wake, pa chifukwa cha kujumphapo maulakwi ghakuŵapo kali, mu chilekerezga cho chaku Chiuta, ndititi, 26kwachirongo urunji wake mu nyengo yamakono; kuti waŵe iyo mweneko murunji, ndi so warunjiska we yose wakuvwana mwaku Yesu.

27Viyo na, kwe pani kutumbwa? Kukanizgikiya limu. Ndi langulu lakutinji? La zinchitu kumbi? Awa; kweni ndi langulu la chivwanu. 28Viyo tipima kuti munthu warunjiskika ndi chivwanu pade pa nchitu za chilangulu. 29Pamwenga kumbi Chiuta ngwa ŵaYuda pe? Asi ngwa ŵaMitundu nawo? Inya, ngwa ŵaMitundu so; 30asani njumoza Chiuta, mweniyo wamrunjiskiya mchinju ku chivwanu, ndi uwura-mchinju ndi chivwanu cho. 31Viyo ndi chivwanu tiwayuwa chilangulu kumbi? Kungaŵanga viyo cha! Kweni tikhozga chivwanu.

Currently Selected:

ŴaRoma 3: TongaMw

Highlight

Copy