ŴaRoma 2

Cheruzgu chaku Chiuta

1Viyo ndiwe wambura mpandira, wa munthu yose wakweruzga: chifukwa mwaku chenicho uteruzga munyako, ujisuska wamweni; pakuti wakweruzga uchita vyenivyo. 2Ndipo tiziŵa kuti cheruzgu chaku Chiuta kwakuyana ndi uneneska che pa ŵakuchita vyaviyo. 3Ndipo kumbi upima chenichi, wamunthu we, wakuŵeruzga ŵeniwo ŵachita vyaviyo, ndi wakuvichita wamweni, kuti iwe wamfyanthamukako ku cheruzgu chaku Chiuta? 4Pamwenga uyuyuwa kumbi usambasi wa ulemu wake ndi unkhunthiya ndi chilekerezga, pakureka kuziŵa kuti ulemu wo waku Chiuta ngwakurongozge iwe ku chipe? 5Kweni mu unononu wako ndi mtima wako wakukana kupe, ujiŵikiya kandundu mu zuŵa la kandundu ndi la uvumbuzi wa cheruzgu chirunji chaku Chiuta; 6mweniyo wawerezgiyenge kwaku yose kwakulingana ndi nchitu zake. 7Umoyo wamuyaya kwaku ŵeniwo ŵachita umampha kwalinthata, mbakulembe unkhankhu ndi rumbu ndi uwura chivuzi; 8kweni kwaku wo mbakujitukumuwa ndi kuti ŵavwiya uneneska cha kweni ŵavwiya ulakwi kukaŵanga ukari ndi kandundu, 9pakaŵanga suzgu ndi kuzita kwamu mtima wa munthu we yose yo wachita uheni, wamu Yuda danga ndiso wa muGriki. 10Kweni unkhankhu ndi rumbu ndi chimangu kwaku yose yo ngwakuchita umampha, ku muYuda danga ndi so ku muGriki: 11chifukwa kwaku Chiuta ulive urumba chisku.

12Chifukwa ŵeniwo wose ŵalakwa kwambura dangu, kwambura dangu nako so ŵamyowa: ndipo ŵeniwo wose ŵalakwa mu chilangulu, ndi chilangulu ŵamkweruzgika; 13chifukwa kuti ŵakuvwa dangu mbarunji kwaku Chiuta cha, kweni ŵakuchita dangu ndiwo ŵamrunjiskika. 14Chifukwa penipo ŵaMitundu pakuŵavi chilangulu ŵachita vya chilangulu kwaku iwo ŵeneko; 15mwakuti ŵarongo iwo kuti nchitu ya chilangulu cho yilembeka mu mitima yawo, njuŵi zawo zakusimikizgiyapo, ndi maghanaghanu ghawo, limoza ku linyake, ghakuŵapanikizga pamwenga ghakuŵapandiriska; 16mu zuŵa lenilo Chiuta wamkweruzgiya mwaku Yesu Kristu vibisibisi vya ŵanthu, kwakulingana ndi evangeli wangu.

ŴaYuda ndi dangu

17Kweni asani iwe utamulika muYuda, ndi uthamiya chilangulu cho, ndi utumbwiya mwaku Chiuta, 18ndi uteska khumbu lake, ndi ukhozga vyo vyamamphaku; 19asani, pakusambizgika chilangulu cho, ukhozga vyo uziŵa kuti we chirongozgi wa ŵachiburumutiya, ukweru ku ŵamu mdima, 20wakulanga ŵakupusa, msambizgi wa malitema, pakuŵa ndi chikozgu cha mziŵiru ndi cha uneneska mu chilangulu cho; 21viyo wa wakusambizga munyake, asi ujisambizga wamweni? Wa wakumemeza kuba cha, kumbi iwe utuba? 22Wa wakukamba kureŵa cha, nawe ureŵa kumbi? Wa wakutinkha vyangoza, kumbi iwe uskoŵa ŵakasopi?#2.22 ŵakasopi: uku ndiku kuti matempele. 23Wa wakutumbwiya mu chilangulu, kumbi pakujumpha dangu utimyuyuwa Chiuta? 24Chifukwa, uli ndimo kwalembeke, “Zina laku Chiuta litokoskeka mu ŵaMitundu pa chifwa chinu.”

25Pakuti nadi mchinju utanduwa, asani uchita dangu: kweni asani ndiwe mjumpha-dangu, mchinju wako waŵadi uruwa-mchinju. 26Viyo asani uwuramchinju wo usungirizga vyakutemeka virunji vya chilangulu cho, asi uwuramchinju wake wampimika mchinju? 27Ndipo so asi uwura-mchinju wo wa ku kawi, pakufiska chilangulu cho, weruzgenge iwe wamjumpha-dangu, chingana we ndi lembo ndi mchinju? 28Chifukwa kuti ndiyo muYuda cha, yo ngwamu kawonekedu pe; chingana nkhuti ndiwo mchinju cha, wo ngwamu kawonekedu mu liŵavu: 29kweni ndiyo muYuda yo ngwa mukati; ndipo mchinju ngwa mtima, mu mzimu, mu lembo cha; rumbu laku mweniyo kuti nda ku ŵanthu cha, kweni kwaku Chiuta.

Currently Selected:

ŴaRoma 2: TongaMw

Highlight

Copy