ŴaRoma 4

Abrahamu nge nchakuwoniyapo

1Viyo tikatingenji ndi Abrahamu, auskekurufwe kuchiri ku liŵavu, wasaniya chine? 2Chifukwa, asani Abrahamu wangurunjiskika kwamu zinchitu, wenacho chakutumbwiyapo; kweni kuchiri kwaku Chiuta cha. 3Pakuti lembo lititinji? “Ndipo Abrahamu wanguvwaniya mwaku Chiuta, ndipo kungupimikiya iyo nge mburunji.” 4Kweni ku wanchitu kuti mphotu yipimikiya uli nchawanangwa cha, kweni ndi malipiru. 5Kweni kwaku yo ngwakuchita cha, kweni ngwakuvwana mwaku mweniyo warunjiska wambura kusopa, chivwanu chake chimpimikiya nge mburunji. 6Uli ndimo Davidi nayo wakambiya ndi mwaŵi waku yo munthu, kwaku mweniyo Chiuta wapimiya urunji pade pa zinchitu,

7“Mbamwaŵi ŵeniwo vyarekereka vya uchikanamarangu vyawo

ndi vyaku ŵeniwo vilakwa vyaundika.

8Ngwamwaŵi munthu mweniyo

mbuya walive kumpimiya ulakwi.”

9Kumbi mwaŵi uwu viyo ngwapa mchinju pe pamwenga ngwapa uwura-mchinju so? Chifukwa tititi, kwaku Abrahamu chivwanu chake chingupimikiya urunji. 10Na, chingupimikiya uli? Po wenga mumchinju, pamwenga mu uwura mchinju? Mu mchinju cha, kweni mu uwura-mchinju: 11ndipo wanguronde chisimikizgu cha mchinju, chiŵali cha urunji wa chivwanu wo wenga nawo uwura-mchinju: alinga waŵe iyo wiskeu waku wose ŵakuvwana, chingana mbambura kuchinjika, alinga kuti urunji wo ungapimikiya iwo nawo; 12waŵe so wiskeu wa mchinju, ku ŵamu mchinju pe cha, kweni ndi kwaku ŵeniwo ŵatenda mu mendedu gha chivwanu chaku Abrahamu auskefwe, cho wanguŵa nacho wenga wandachinjike.

Chipanganu chaku Chiuta chirondeka mu chigomezgu

13Chifukwa kuti chinguziya mwa chilangulu cha chipanganu cho cha kwaku Abrahamu pamwe ku mbeu yake, chakuti waŵenge iyo mhara wa panupasi, kweni chinguziya mwa urunji wa chivwanu. 14Chifukwa asani ŵamu chilangulu mbakuhara, chivwanu icho nchaumbughuya, ndipo chipanganu cho chawayuka: 15chifukwa chilangulu cho chitataliya kandundu; kweni ko kulive chilangulu, kulive so ubudi. 16Chifukwa chenichi nchakutuwa ku chivwanu, kuti chiŵe kwakulingana ndi wezi; kuti chipanganu chiŵe chakukho ku mbeu yose yo: kwaku yo pe njamu chilangulu cha, kweni so kwaku yo njamuchivwanu chaku Abrahamu, mweniyo mbauskefwe ŵaku tose, 17uli ndimo kwalembeke, “Ndakuŵika wiskeu wa mitundu yinandi,” paurongo paku Chiuta, mwaku mweniyo wanguvwaniya, mweniyo so wasanduska ŵakufwa ŵaŵe ŵamoyo, ndi wadana vyambura kuŵapo, ulaka nge vyengapo. 18Mweniyo Abrahamu, chati chamara chigomekezgu, wanguvwaniya mu chigomekezgu, kuti wakaŵanga iyo wiskeu wa mitundu yinandi, kwakuyana ndi nenedu lo, “Yikaŵanga viyo mbeu yako.” 19Ndipo kwambura kutomboroka mu chivwanu, wangusanda liŵavu laku iyo mweneko nge ndakufwa kali pakuŵa ndi virimika akhumba machumi pe chumi, ndi kafwidu ka mphapu yaku Sara. 20Ndipo kuchiri ku chipanganu chaku Chiuta wengavi kutomboroka mu chivwanu kweni wangukhome mu chivwanu, wakupaska unkhankhu kwaku Chiuta, 21ndiwakukhorwa kuti cho wangupangana wenga so wanthazi kwachichita. 22“Chifukwa kungupimikiya iyo nge mburunji.” 23Kweni kuti kungulembeka pa chifukwa chaku iyo pe cha, “Kuti kungumpimikiya,” 24kweni pa chifwa chaku ifwe nafwe, kwaku taŵenifwe kwamkutipimikiya, pakuvwaniya mwaku yo wanguyuska Yesu Ambuyafwe ku ŵakufwa, 25mweniyo wangukomboleke pa chifukwa cha vilakwa vidu, ndipo wanguyuskikiya pa chifukwa cha kurunjiskika kwidu.

Currently Selected:

ŴaRoma 4: TongaMw

Highlight

Copy