ŴaRoma 13

Kujithereska ku ŵamitufu

1Mzimu wose uthere ku mitufu yira: chifukwa kulive mtufu kwambura kuti we pasi paku Chiuta: ndipo mitufu yo yiripo, yatemeka ndi Chiuta. 2Viyonthu yo ngwakujimiskirana ndi mtufu wo, wamikana ndi chitema chaku Chiuta: ndipo ŵakumika nawo ŵamkujironde chisusa. 3Chifukwa ŵakuwusa wokuti mbakofya cha ku nchitu yamampha, kweni ku yiheni. Ndipo asani ukhumba kureka kopa mtufu wo, chitanga cho nchamampha, ndipo ukaŵanga ndi rumbu kwaku wo, 4pakuti ndi mteŵeti waku Chiuta ku umampha wako. Kweni asani uchita uheni, wopanga; chifukwa kuti wapinga ŵaka lipanga lo cha; chifukwa ndi mteŵeti waku Chiuta, wakutayiya kandundu paku yo wachita uheni. 5Viyo mujithereske, chifukwa cha kandundu ko pe cha, kweni so chifukwa cha njuŵi. 6Pakuti chifukwa chenichi nacho mulipa msonkhu; chifukwa mbamirizi ŵaku Chiuta ŵakuchita chenichi. 7Lipani kwaku wose vyakuŵenere: ku wamsonkhu, msonkhu wake; ku wamthulu, mthulu wake; ku wachofyu, chopu chake; ku waulemu, ulemu wake.

Uteŵete ku yumoza ndi munyake

8Mungateuwako kanthu ku yumoza cha, kweni kwanjana pe ndiko: chifukwa wakwanja munyake wafiska dangu. 9Yagha ndigho marangu, “Ungareŵa, engabaya, ungaba, ungakhumbira,” ndipo asani kwe dangu linyake, likurulika mu mazu yagha ghakuti, “Wanjenge munyako uli ndi wamweni.” 10Kuti chanju chitataliya munyake kaheni cha; viyo chanju ndi mfisku wa dangu.

11Ndipo so chenichi, pakuziŵa nyengo yino, kuti sonu ndi ora lakuti muyukeko ku tulu: chifukwa sono utaski we pafupiku kwaku ifwe kwakuruska penipo tinguvwaniya. 12Usiku wakapo, ndipo msana we kufupi: viyo tizizuwe nchitu za mdima, 13kweni tivware vidya vya ukweru. Tendenge kwakukongora nge ndi mu msana; mu vitimbeheka ndi mauloŵevu cha, mu maureŵi ndi mauyaya cha, mu ndeu ndi mu bina cha. 14Kweni vwarani Ambuya Yesu Kristu ndi mungaghanaghaniya ku vyaliŵavu cha, kwachifuska maulankhasi ghake.

Currently Selected:

ŴaRoma 13: TongaMw

Highlight

Copy