Yohane 9

Yesu wachizga munthu wakuwa wachiburumutiya

1Ndipo wachiruta, wanguwona munthu wachiburumutiya kutuwa ku kawi. 2Ndipo ŵasambizi ŵake ŵangumfumba, ŵakuti, “Msambizgi, wangulakwa njani, mwenuyu pamwe ŵapapi ŵake, kuti wanguwa wachiburumutiya?” 3Wangwamuka Yesu, “Chingana ndi mwenuyu kuti wangulakwa cha, chingana mbapapi ŵake; kweni alinga kuti zirongoleke mwake nchitu zaku Chiuta. 4Titenere kuzitata nchitu za Wakundituma, kweche msana: kutuza usiku, penipo palive yumoza waziŵa kutata nchitu. 5Ndeche mu charu, ndine Kungweruka kwa charu.” 6Wanguti wakamba viyo, wangufunyiya matapasi, wangukantha dongu ndi mata gho, ndipo wangung'eteka dongu lo pa maso ghake, 7kwaku iyo wanguti, “Kanga, kasambe mu chiziŵa chaku Siloama” (lo ling'anamuka, wakutumika). Viyo wanguruta, wangwachisamba, ndipo wanguwe wakulereska. 8Viyo ŵanase, ndi wo ŵamwonanga kali kuti wenga mpempha, ŵanguti, “Asi uyu ndi mweniyo wajanga pasi wakupempha?” 9Wanyake ŵanguti, “Ndiyo”: ŵanyake, “Awa, kweni wakozgana nayo.” Iyo wanguti, “Ndine na!” 10Viyo ŵangumfumba, “Ghangubanuka uli maso ghako?” 11Iyo wangwamuka, “Munthu yo wadanika Yesu wangukantha dongu, wangung'eteka maso ghangu, wangundinene, ‘Kanga ku Siloama, kasambe’: viyo ndinguruta ndingwachisamba, ndipo ndilereska.” 12Wangumnene, “We pani iyo?” Wanguti, “Kuti ndiziŵa cha.”

13Ŵangumtole ku ŵaFarisi yo kali wenga wachiburumutiya. 14Lenga zuŵa la sabata po Yesu wangukantha dongu, ndi kubamuwa maso ghake. 15Viyo ŵaFarisi nawo ŵafumbanga so mo wangulereske. Iyo wanguŵanene, “Wanguŵika dongu mu maso ghangu, ndipo ndingwachisamba ndipo sono ndilereska.” 16Viyo ŵanyake ŵamu ŵaFarisi wo ŵanenanga, “Munthu mweniyo kuti ngwakwaku Chiuta cha, pakuti wareka kusunga sabata.” Kweni ŵanyake ŵanguti, “Waziŵa uli munthu mulakwi kuchita visimikizgu vyaviyo?” Ndipo kwenga gaukanu mwaku wo. 17Viyo ŵangumfumba wachiburumutiya, “Iwe utitinji ndi iyo, po wabanuwa maso ghako?” Iyo wanguti, “Ndi mchimi.”

18Viyo ŵaYuda wo ŵengavi kuvwana ndi iyo, kuti wanguŵa wachiburumutiya, ndi wangulereska so, mpaka ŵangudana ŵapapi ŵake ŵaku yo wangulereska so, ndi kuŵafumba, kuti, 19“Kumbi uyu ndi mwana winu, yo imwe mutiti wangupapika wachiburumutiya? Na sono walereska uli?” 20Ŵangwamuka ŵapapi, ŵake, wanguti, “Tiziŵa kuti uyu ndi mwana widu, ndipo kuti wangupapika wachiburumutiya. 21Kweni po walereske sono, kuti tiziŵa cha; chingana ndi yo wangubanuwa maso ghake, ifwe tirive kuziŵa: mufumbeni, ndi mura iyo; wajikambiyenge mweneko.” 22Wapapi ŵake ŵakambanga ivi pakuti wopanga ŵaYuda: chifukwa ŵangupangana kali ŵaYuda, kuti asani yumoza wangamzomerezga kuŵa Kristu, wasezgekenge mu sinagoge. 23Chifukwa cho ŵapapi ŵake ŵanguti, “Ndi mura; mufumbeni iyo.”

24Viyo ŵangumdana kachiŵi munthu yo wenga wachiburumutiya, ndipo ŵangunena nayo, “Paska unkhankhu kwaku Chiuta: ifwe tiziŵa kuti munthu yo ndi mlakwi.” 25Iyo wangwamuka, “Chakuti ndi mlakwi, kuti ndiziŵa cha; chinthu chimoza ndiziŵa, kuti ndenga wachiburumutiya, ndipo sono ndilereska.” 26Ŵangumufumba, “Wangukuchitiya chine? Wangubanuwa uli maso ghako?” 27Wanguŵamuka, “Ndakuneniyani kali, kumbi kuti mwavwa cha: mukhumba kuvwanji so? Kumbi imwe mukhumba kuŵa ŵasambizi ŵake namwe?” 28Viyo ŵangumtuka, ŵakuti, “Iwe ndiwe msambizi waku yo; ifwe te ŵasambizi ŵaku Mosese. 29Tiziŵa ifwe kuti Chiuta wangurongoro kwaku Mosese, kweni ghapa munthu uyu, kuti tiziŵa cha ko watuwa.” 30Wangwamuka munthu yo wanguŵanene, “Nadi chinthu ichi nchakuziziswa mbweni, kuti imwe mureka kuziŵa ko watuwa, kweni awonani wabanuwa maso ghangu. 31Tiziŵa kuti Chiuta wareka kuvwa ŵalakwi; kweni asani yumoza ndi muwopa Chiuta, ndi wachita khumbo lake, watumuvwa mweniyo. 32Kutuwa ku mtendeku mu charu kuti kwavwika cha kuti yumoza wangubanuwa maso gha wakupapika wachiburumutiya. 33Asani munthu uyu wengavi kutuwa kwaku Chiuta, mphanyi wengavi nthazi kuchita kanthu.” 34Wangumwamuka, “Iwe ungupapika mu vilakwa kosekose, ndipo kumbi usambizga ifwe?” Ndipo ŵangumdikiya kubwaro.

35Yesu wanguvwa kuti ŵamudikiya kubwaro; ndipo wati wambowozga wanguti, “Kumbi uvwana iwe mu Mwana waku Chiuta?” 36Iyo wangwamuka wanguti, “Ndipo ndi yani, Ambuya, alinga kuti ndivwane mwaku iyo?” 37Yesu wangumnene, “Wamwona, ndipo ndimweniyo so warongoro nawe.” 38Ndipo iyo wanguti, “Ambuya ndivwana.” Ndipo wangumlambiya. 39Yesu wanguti, “Ine ndikuziya cheruzgu mu charu chino, mwakuti wambura kuwona wawone; ndi wakulereska waŵe wachiburumutiya.” 40Wamu ŵaFarisi wo ŵanguŵanayo pamoza ŵati ŵavwa yagha ŵangumufumba, “Kumbi ifwe nafwe te ŵachiburumutiya?” 41Yesu wanguŵanene, “Ne mwenga wachiburumutiya, mphanyi mwengavi ulakwi, kweni sono pakuti mutiti, ‘Tiwona:’ ipu ulakwi winu ujaririya.

Currently Selected:

Yohane 9: TongaMw

Highlight

Copy