Yohane 10

Ntharika ya mliska wa mberere

1“Nadi, nadi ndikuneneskiyani, yo wareka kuserere pa khomo mu likutu la mberere, kweni wakwere kunyake, mweniyo ndi munkhungu ndi wakuphananga. 2Kweni wakuserere pa khomo ndi mliska wa mberere. 3Wakusunga pa khomo watimujuriyako iyo; ndipo mberere zo zituvwa liu lake wachizidana mazina mberere zapa mtima wake; ndipo watizirongozge kubwaro. 4Penipo watuzga zose, waruta paurongo paku zo, ndipo mberere zimrondo; pakuti ziziŵa liu lake. 5Kweni mlendo kuti zimrondonge cha, zimthaŵenge: pakuti liu la ŵalendo kuti ziziŵa cha.” 6Ntharika iyi wanguŵakambiya Yesu; kweni iwo kuti ŵanguwamu cha gho warongoronga nawo.

Yesu mliska wamampha

7Viyo Yesu wanguŵanene so, “Nadidi ndikuneniyani, ine ndine khomo la mberere. 8Wose wo ŵanguza paurongo pangu mbankhungu ndi ŵakuphanga; ndipo mberere kuti zinguŵavwa cha. 9Ine ndine khomo lo: asani yumoza waserere mwaku ine, wataskikenge, ndipo waserengemu ndi watuwengemu, ndipo wasaniyenge chipozwa. 10Munkhungu yo waziyamo kuti, wabe, wabaye, ndi wanange: ine ndinguza kuti ŵaŵe ndi umoyo, ndikuti ŵaŵe nawo kwakuzungura. 11Ine ndine nliska mweneko; mliska mweneko waŵikiya pasi umoyo wake chifukwa cha mberere. 12Yo ngwamphotu, pakuŵa mliska cha, ndi pakuŵavi zapa mtima wake mberere zo, wawona mphumphi yichiza, ndipo watuzijowo mberere, wathaŵa, ndipo mphumphi yo yituzukwamphuwa, ndi kuziparang'a. 13Wathaŵa chifukwa ngwamphotu, ndipo kuti watiziphwere mberere zo cha. 14Ine ndine mliska mweneko. 15Nge ndimo ŵatindiziŵiya Ada, ine nane ndituŵaziŵa iwo; viyo so ndimu ndiziŵiya mberere zangu, ndipo sangu ziziŵa ine; chifukwa ichi ndiŵika pasi umoyo wangu pa chifwa cha mberere zo. 16Ndipo nde nazo mberere zinyake, zo kuti ze za likutu lenili cha; zenizo nazo ine ndizitonge ndipo zivwenge liu langu. Viyo ziŵenge mskambu umoza, mliska yumoza. 17Chifukwa chenichi Dada watindanja, pakuti ndiŵika pasi umoyo wangu, alinga kuti ndiwutonge so. 18Palive yumoza wati wukwamphuwa kwaku ine, kweni ndiwuŵika pasi ine ndameni. Mtufu nde nawo kwachiwuŵika pasi, ndipo nde ndimtufu kwachiwuto so. Langulu lenili ndinguronde ku Ada.”

19Chifukwa cha mazu yagha kunguŵapo so gaukanu mu ŵaYuda. 20Wanandi mwaku wo ŵanenanga, “We ndi demone, wakufuntha; chifukwa chine mutumuvwa?” 21Wamwenga ŵanguti, “Makambidu yagha kuti nga wakuŵa ndi demone cha. Kumbi demone ngwathazi kujura maso gha wachiburumutiya?”

22Ndipo yingufika nyengo ya dghera la chiphoto mu Yerusalemu: kwenga chipwepwe; 23ndipo Yesu wendanga mu kasopi, mu khondi laku Solomone. 24Viyo ŵaYuda ŵangumzingiriya, ndipo ŵangumfumba, “Mpaka zuŵanji utisoronge mtima? Asani ndiwe Kristu, utinene pakweru.” 25Yesu wanguŵamuka, “Ndakuneniyani, ndipo kuti muvwana cha; nchitu zo ndichita ine mu zina la Ada, zenizo zitindisimikizgiya; 26kweni kuti muvwana cha imwe, chifukwa kuti mwe ŵamu mberere zangu cha. 27Mberere zangu zituvwa liu langu, ine nditiziziŵa, ndipo zitindirondo; 28Ine nditizipaska umoyo wamuyaya; kuti zikafwanga cha, ndipo kuti yumoza wazikwamphuwenge mu janja langu cha. 29Ada wo ŵakuzipaska kwaku ine mbara ndi wose; ndipo kuti yumoza ngwanthazi cha kuzikwamphuwa mu janja la Ada. 30Ine ndi Ada te ŵamoza.”

31ŴaYuda ŵangusoska so mya, kuti ŵampong'e. 32Yesu wanguŵamuka, “Nchitu zinandi zeneko ndakurongoni zakutuwa ku Ada; chifukwa cha nchitu yakutinji yaku zo mutindipong'e mya?” 33Ŵangumwamuka ŵaYuda, “Kuti tikupong'a mya chifukwa cha nchitu yamampha cha, kweni pa chifwa cha utusi, ndi so pakuti iwe, pakuŵa munthu, uzisanduska Chiuta.” 34Yesu wangwamuka, “Asi kwalembeka mu langulu linu, ‘Ndinguti, mwe ŵaChiuta’? 35Tiziŵa kuti cho malemba nchakuneneska muyaya; ŵanguŵazumbuwa iwo ŵachiuta. Ŵanthu, kwaku ŵeniwo ghanguziya mazu ghaku Chiuta. 36Nge mkhwaku ine, Ada akundisankha ndi kundituma mu charu. Na mukamba uli imwe kuti, ‘Ndituka Chiuta’ pakuti ndinguti, ‘Ndine Mwana waku Chiuta’? 37Asani nadi ndireka kuchita nchitu za Ada, mungavwananga mwangu cha. 38Kweni asani ndizu ndichita, chingana mureke kuvwaniya mwangu, vwaniyani mu nchitu so; alinga kuti muziŵe ndi kufikapo mtima kuti Dada we mwaku ine, ndi ine mu Dada.” 39Wangulembe so kumko; ndipo wangufwanthamuka mu manja gha wo.

40Ndipo wanguya so kusirgha la Yordane, ku malo ko Yohane wabatizanga, ndipo wanguja kweniko. 41Ndipo ŵangumziya ŵanandi; ndipo ŵakambanga, “Yohane wengavi kuchita chisimikizgu: kweni vyose vyo Yohane wangukambiya paku uyu munthu, vyenga vyakuneneska.” 42Ndipo ŵanandi kwenikuwa ŵanguvwana mwaku iyo.

Currently Selected:

Yohane 10: TongaMw

Highlight

Copy