Yohane 18

Kukoreka kwaku Yesu

(Mateyu 26.47-56; Marko 14.43-50; Luka 22.47-53)

1Wanguti wakamba vyenivi, Yesu wangutuwa pamoza ndi ŵasambizi ŵake kuya ku sirgha liya la kamsinju Kedroni, kweniko kwenga ndimba, mwenimo ŵangusere, iyo ndi ŵasambizi ŵake. 2Ndipo Yuda nayo, yo wangumpachiya, wangughaziŵa malo: pakuti panandi Yesu wangukumana ndi ŵasambizi ŵake kwenikuwa. 3Viyo Yuda, wakuŵa ndi liŵanja ndi ŵamirizi ŵakutuwa ku ŵazukuru ŵara ndi ŵaFarisi, ŵanguza kwenikuwa ndi ŵenge ndi malimbuni ndi vidya. 4Viyo Yesu, pakuziŵa vyose vyo vikamziyanga, wangutuwa ndi kuŵanene, “Mulembe yani?” 5Ŵangumwamuka, “Yesu waku Nazarete.” Yesu wanguŵanene, “Ndine.” Ndipo Yuda nayo, mphachi yo, wamanga pamoza nawo. 6Viyo penipo wanguŵanene, “Ndine,” ŵanguwere vuli, ndipo ŵanguwa pasi. 7Wanguŵafumba so, “Mulembe yani?” Iwo ŵanguti, “Yesu waku Nazarete.” 8Yesu wangwamuka, “Ndakuneniyani kuti ndine: viyo asani mulembe ine, ŵarekeni yaŵa ŵarutenge”; 9alinga kuti ghafiskike mazu gho wanguti, “Weniwo mwandipaska, kuti ndatayapo yumoza waku wo cha.” 10Viyo Simoni Petro, wakuŵa ndilipanga wanguliwewepuwa, ndipo wangukose muŵanda wa mzukuru mura, wangudumuwako gutu lake lamarghe. Zina la muŵanda yo lenga Malko. 11Viyo Yesu wanguti kwaku Petro, “Weska lipanga lo mu chibazi chake; kumbi ndireke kumwa nkhombo#18.11nkhombo: nkhombo yapa ying'anamuwa masuzgu gho Yesu Kristu wanguseremu. yo ŵandipaska Ada?”

Yesu watoreke kwaku Anase

12Viyo liŵanja lo ndi nduna ndi ŵamirizi ŵa ŵaYuda ŵangumko Yesu, ŵangumumanga, 13ndipo ŵanguruta nayo danga kwaku Anase; chifukwa wenga msibweni waku Kayafa, mweniyo wenga mzukuru mura chirimika chenichiya. 14Ndipo ndi Kayafa mweniyo wangupangizga ŵaYuda, kuti kwenga kwamandulika kuti munthu yumoza walifwiye khamu.

Petro wakana Yesu

(Mateyu 26.69-70; Marko 14.66-68; Luka 22.55-57)

15Kweni Simoni Petro wangumrondo Yesu, ndi msambizi munyake so. Ndipo pakuti msambizi uyu wenga wakuziŵikwa ku Mzukuru mura, wangusere pamoza ndi Yesu mu luluwa la Mzukuru yo; 16Petro wanguma pakhomu kubwaro. Viyo msambizi munyake yo, yo wanguziŵikwa ku mzukuru mura, wangutuwa, wangukamba ndi munthukazi wapakhomu, ndipo wangumserezga Petro. 17Viyo msungwana yo wapa khomu wanguti kwaku Petro, “Asi ndiwe wamu ŵasambizi wa munthu uyu?” Watiti iyo, “Ine cha.” 18Ndipo ŵaŵanda ndi ŵamirizi ŵakuma pa, ŵangusonkha moto wa maka; ŵawothanga, pakuti kwenga chipwepwe; ndipo Petro nayo wenga pamoza nawo, wakotha moto.

Mzukuru Mura wafumba Yesu

(Mateyu 26.59-66; Marko 14.55-64; Luka 22.66-71)

19Viyo mzukuru mura wangufumba Yesu vyapa ŵasambizi ŵake, ndi vya pa chisambizgu chake. 20Yesu wangumwamuka, “Ine ndakambiya pakwero ku charu; nyengo zose ndasambizga mu masinagoge, ndi mu kasopi, mwenimo ŵatongana ŵaYuda wose, ndipo kuti ndakamba kanthu mu ubende cha. 21Chifukwa chine ufumba ine? Fumbanga wo ŵavwa cho ndinguŵakambiya: ŵaziŵa iwo vyo ndingukamba.” 22Ndipo wachikamba ichi, yumoza wa ŵamirizi ŵakumapo wangumjenyeska Yesu khofi, wakuti, “Kumbi utumwamuka mzukuru mura viyo?” 23Yesu wangumwamuka, “Asani ndakamba uheni, simikizga pa uheni wo; kweni asani ndakamba umampha, undipumiyanji?” 24Viyo Anase wangumtuma wakumangika kwaku Kayafa, mzukuru mura.

Petro wakana so Yesu

(Mateyu 26.71-75; Marko 14.69-72; Luka 22.58-62)

25Simoni Petro wangumapo kotha moto. Viyo wangunena nayo, “Asi nawe so we wamu ŵasambizi ŵake?” Wangukana iyo, wanguti, “Ine cha.” 26Watiti yumoza wamu ŵaŵanda ŵa mzukuru mura, mbali waku yo Petro wangumdumuwa gutu, “Asi ndingukuwona iwe mu dimba po pamoza nayo?” 27Kweni Petro wangukana mbwenu: ndipo sosonukweni tambala wangukokoŵereka.

Yesu watoreke kwaku Pilato

(Mateyu 27.1-2, 11-14; Marko 15.1-5; Luka 23.1-5)

28Kutuwa kwaku Kayafa wangumgumizgiya Yesu ku mphara ya nduna. Kwenga mlenjilenji, ndipo iwo ŵija ŵengavi kuseremo mu mphara cha, mwakuti ŵareke kukazuzgika kweni kuti ŵakarghe phaska. 29Viyo Pilato wangutuliya kubwaro kwaku wo, wanguŵafumba. “Mumtole munthu mwenuyu chisumuwa nichi?” 30Wangwamuka ndi ŵangunena nayo, “Kwambura kuti uyu wenga muchita uheni, mphanyi kuti tamupereka kwaku iwe cha.” 31Pilato wanguŵanene, “Mtoni imwe, ndipo kwakulingana ndi langulu lino mweruzgani.” ŴaYuda ŵangunena nayo, “Kuti kuyiyamu ifwe cha kubaya munthu.” 32Ichi chenga chakuti ghafiskike mazu ghaku Yesu, gho wangukamba pakusimikizga ndi nyifwa yakutinkha yo wakafwanga.

33Pilato wangusere so mu mphara, ndipo wangudana Yesu, wangunena nayo, “Kumbi ndiwe Karonga wa ŵaYuda?” 34Yesu wangwamuka “Kumbi utijikambiya wija ichi, pamwenga ŵanyake ndiwo ŵangukukambiya vyapaku ine?” 35Wangamuka Pilato, “Kumbi nde muYuda ine? Mtundu wako ndi ŵazukuru ŵara ndiwo ŵakupereka kwaku ine: na iwe wachitanji?” 36Yesu wangwamuka, “Ufumu wangu kuti ngwacharu chino cha; asani ufumu wangu wenga wa charu chinu mphanyi ŵamirizi ŵangu ŵarwa, mwakuti ndireke kuperekeka ku ŵaYuda kweni ufumu wangu kuti ngwakuturiya ku charu cha.” 37Viyo Pilato wangunena nayo, “Kumbi ndiwe karonga na?” Yesu wangwamuka, “Iwe utiti ndine karonga. Ine ndapapika ndipo ndaza mu charu pachifukwa chenichi pe, alinga kuti ndisimikizge uneneska. Yose yo ngwa uneneska watuvwa liu langu.” 38Wangumfumba Pilato, “Ngune uneneska?”

Yesu wakombereke ku nyifwa

(Mateyu 27.15-31; Marko 15.6-20; Luka 23.13-25)

Ndipo wachikamba chenichi Pilato wangutuliya so ku ŵaYuda, wanguŵanene, “Ine ndirive kusaniya kufakwa kose mwaku iyo. 39Kweni kwinu karusu kalipo, kakuti ndikufwatuliyeni yumoza pa Phaska. Viyo mukhumba kumbi kuti ndikufwatuliyeni karonga wa ŵaYuda?” 40Viyo wangukambura so, wakuti, “Mwenuyu cha, kweni Baraba ndiyo.” Kweni Baraba yo wenga munkhungu.

Currently Selected:

Yohane 18: TongaMw

Highlight

Copy