Chituwa 40

Mosese wasoska hema lo

1Ambuya anguti kwaku Mosese, 2“Pa zuŵa lakudanga la mwezi wakudanga mukazenganga hema lakupaturika, hema lakuwunganamo. 3Ndipo mukaŵikangamo bokosi la ukaboni, ndipo mukachinganga bokosi ndi chivwinkhu. 4Ndipo mukaserezgangamo gome, ndi kuyalika umampha; ndipo mukaserezganga chakuŵikapo nyali, ndi kuŵikapo nyali zake. 5Ndipo mukaŵikanga jochero la sembe za vyachema cha golide, paurongo pa bokosi la ukoboni, ndi kumika chakuchinga cha khomo la hema lakupaturika. 6Mukamikanga jochero la sembe yakocha paurongo pa khomo la hema lakupaturika, hema lakuwunganamo, 7ndi muŵike chakusambiyamo pakati pa hema lakuwunganamo ndi jochero la sembe, ndi muŵikemo maji. 8Ndipo mukamikanga bwalo kwakuzunguliya kose, ndi kupayika chakuvwinkha cha likomo la bwalo lo. 9Sono mukatonga mafuta ghakupaka ndi hema lakupaturika ndi vyose vyamukati mwake, ndi kuripatuwa ndi vyakujarika mukati, ndipo likaŵanga lakupaturika. 10Mukapakanga so guŵa la sembe yakocha ndi viyaŵi vyake, ndi kupatuwa chiguŵa cha sembe, ndipo jochero la sembe liŵenge lakupaturika kwakuruska. 11Mukapakanga so chakusambiyamo ndi chiŵanja chake, ndi kuchipatuwa. 12Sono mukazanga ndi Aroni ndi ŵana ŵake ŵanthurumi ku khomo la hema lakuwunganamo, ndipo muŵasambikenge ndi maji, 13ndi mukavwarikanga Aroni vivwalo vyakupaturika ndipo mukamupakanga ndi kumupatuwa, alinga kuti wanditeŵete nge ndi mzukuru. 14Mukazanga so ndi ŵana ŵake ŵanthurumi ndi muŵavwarikenge maraya, 15ndi kuŵapaka uli ndimo mungupakiya wiskeu, alinga kuti ŵanditataliyenge nge mbazukuru: ndipo kupakika kwawo kukaŵarondiyanga ku uzukuru wambura kumara mu migonezi yawo yose.”

16Viyo ndimo wanguchitiya Mosese, kwakulingana ndi vyose vyo Ambuya angumulanguliya, viyo ndimo wanguchitiya. 17Ndipo mu mwezi wakudanga wa chirimika cha chiŵi, pa zuŵa lakudanga la mwezi, hema lakupaturika linguzengeka. 18Mosese wanguzenga hema lakupaturika, wanguchita viŵanja vyake, ndi wangumika vikhozgeru vyake, ndi wangujinthamo vyakupingiya vyake ndi wangutumphuska mizati yake; 19ndi wangutandazgiyapo chihema pachanya pa hema lakupaturika, ndipo wanguŵikapo chakuvungiya cha chihema pachanya pake, uli ndimo Ambuya angulanguliya Mosese. 20Ndipo wanguto mya ya ukaboni ndi kuyiŵika mu bokosi, ndi wanguŵikapo vyakupingiya bokosi ndi wangumika chitengo cha lisungu pachanya pa bokosi; 21ndipo wanguza ndi bokosi mu hema lakupaturika, ndi wangumika chivwinkhu cha chakuchinga, ndi wanguchingako ku bokosi laukaboni; uli ndimo Ambuya angulanguliya Mosese. 22Ndipo wanguŵika gome mu hema lakuwunganamo, kudera la ku nkhonde la hema lakupaturika, kubwalo ku chivwinkhu, 23ndipo wanguŵikapo chiŵandi paku lo mwakwene paurongo pa Ambuya; uli ndimo Ambuya angulanguliya Mosese. 24Ndipo wanguŵika chakuŵikapo nyali mu hema lakuwunganamo kulereskana ndi gome kuchiri ku mwera kwa hema lakupaturika, 25ndi wanguŵika nyali paurongo pa Ambuya; uli ndimo Ambuya angulanguliya Mosese. 26Ndipo wanguŵika jochero la sembe la golide mu hema lakuwunganamo paurongo pa chivwinkhu, 27ndi wangochiyapo sembe yakununkhira, uli ndimo Ambuya angulanguliya Mosese. 28Ndipo wanguŵika mu malo ghake chakuchinga cha khomo la hema lakupaturika. 29Ndipo wanguŵika jochero la sembe yakocha pa khomo la hema lakupaturika lamu hema lakuwunganamo ndi wangusaska pakulo sembe yakocha ndi sembe ya ufwa; uli ndimo Ambuya angulanguliya Mosese. 30Ndipo wangumika chakusambiyamo pakati pa hema lakuwunganamo ndi jochero la sembe ndi wanguŵikamo maji ghakusamba mwaku cho, 31mwaku gho Mosese ndi Aroni ndi ŵana ŵake ŵanthurumi ŵangusamba manja ghawo ndi marundi ghawo; 32ŵangusamba penipo ŵaserenga mu hema lakuwunganamo, ndi penipo ŵazanga ku jochero la sembe, uli ndimo Ambuya angulanguliya Mosese. 33Ndipo wanguzenga bwalo kwakuzunguliya hema lakupaturika ndi jochero la sembe, ndi wangumika chakuchinga cha likomo la bwalo lo. Viyo Mosese wangumarizga nchitu yo.

Mtambo pachanya pa chihema chakuwunganamo

(Maŵerengedu 9.15-23)

34Sono mtambo unguvimba pa hema lakuwunganamo ndi unkhankhu wa Ambuya unguzaza hema lakupaturika. 35Ndipo Mosese wangutondeka kusere mu hema lakuwunganamo, chifukwa mtambo wajanga paku lo ndi unkhankhu wa Ambuya unguzaza hema lakupaturika. 36Mu maulendo ghawo ghose, penipo mtambo ungutoreke kuchanya kutuwa pa hema lakupaturika, ŵaYisraele ŵangwenda kuya kunthazi; 37kweni asani mtambo wengavi kutoleke kuchanya, po kuti ŵangwenda kuya kunthazi cha mpaka zuŵa lenilo ungutoreke kuchanya. 38Pakuti mu maulendo ghawo ghose mtambo wa Ambuya wenga pachanya pa hema lakupaturika ndi msana, ndi moto wenga mwaku lo ndi usiku, mu maso gha ŵaYisraele wose.

Currently Selected:

Chituwa 40: TongaMw

Highlight

Copy