Chituwa 31

Ŵakuchita nchitu iyi

(Chituwa 35.30—36.1)

1Ambuya anguti kwaku Mosese, 2“Awona, ndadana zina laku Bezalele mwana munthurumi waku Uru, mwana munthurumi waku Huru, wa mtundu waku Yuda; 3ndipo ndamuzaza ndi Mzimu waku Chiuta, ndi mziŵiru ndi chinjeru, ndi kuziŵa ndi umisiri, 4kuziŵiska Wamisiri machitidu, kuchita mu golide, siliva ndi mkuŵa, 5pakusema mya ndi kuyimika, ndi mukusema miti, ya mlombwa mu vyakuchita vyose. 6Ndipo awona, ndamika pamoza nayo Oholiaba mwana munthurumi waku Ahisamaka, wa mtundu waku Dani, ndipo ndapaska mziŵiru ku ŵanthu wakwenere, alinga kuti wachite vyose vyenivyo ndakulanguliya: 7Hema lakuwunganamo, ndi bokosi la phanganu, ndi chitengo cha lisungu cho che pachanya pake, ndi vyamu hema, 8gome ndi viyaŵi vyake ndi chakumikapo nyali chakutowa ndi viyaŵi vyake, 9ndi jochero la mpasku wakocha ndi viyaŵi vyake vyose, ndi chakusambiyamo ndi pasi pake, 10vivwalo vyakuchitika kwa manyanda, vivwalo vyakupaturika vyaku Aroni mzukuru yo ndi vivwalo vya ŵana ŵake ŵanthurumi penipo ŵateŵeta nge mbazukuru, 11ndi mafuta ghakupaka ndi vyakununkhira vya chema vya malo ghakupaturika. Wakachitanga kwakuyana ndi vyose vyo ndakulanguliya.”

12Ndipo Ambuya anguti kwaku Mosese, 13“Ukambe ku ŵaYisraele, ‘Mukasunganga masabata ghangu, pakuti ichi nchisimikizgu pakati pangu ndi imwe, mu migonezi yinu yose, alinga kuti muziŵe kuti ine, Mbuya nditumupatuwani. 14Mukasunganga sabata, chifukwa ndakulanguliyani kuti ndakupaturika, we yose wakulikazuzga wakabayikanga; we yose wakuchita mlimu mwaku lo, wakadumulikangako ku ŵanthu ŵake. 15Milimu yikachitikanga mu mazuŵa ghankhonde ndi limoza, kweni zuŵa la chinkhonde ndi chiŵi ndi sabata la chipumulo pe, lakupaturika ku Ambuya; we yose wakuchita mlimu we wose pa zuŵa la sabata wakabayikanga. 16Viyo ŵaYisraele ŵakasunganga zuŵa la sabata, kuliphwere sabata mu migonezi yawo yose, nge nchipanganu cha muyaya. 17Nchisimikizgu cha muyaya pakati pangu ndi ŵaYisraele kuti mu mazuŵa ghankhonde ndi limoza Ambuya angulenga kuchanya ndi charu chapasi ndipo pa zuŵa la chinkhonde ndi chiŵi angupumuwa, ndi anguyuyuka.’ ” 18Ndipo angupaska kwaku Mosese, ŵati ŵamala kukamba nayo pa phiri la Sinai, magome ghaŵi gha mapanganu, magome gha mwa, gha kulembeka ndi munwi waku Chiuta.

Currently Selected:

Chituwa 31: TongaMw

Highlight

Copy