Machitidu gha Ŵakutumika 12

Kuŵembeka kukuru kwa eklesiya

1Kweni pa nyengo yiya Herode karonga yo wangutambaruliya manja ghake kwachichitiya uheni ku ŵanyake ŵamu mpingu wo. 2Ndipo wangubaya ndi lipanga Yakobe, muku waku Yohane. 3Ndipo wachiwona kuti kungukondweska ŵaYuda, wangutaruliya kumko Petro nayo. Ndipo kwenga mazuŵa gha vyambura-mtupu. 4Ndipo wati wamko, wangumuŵika ku ulinda, ndi kumpereka ku mipingu yinayi ya ŵankhondo, ŵanayi mu mpingu ndi mpingu, kuti ŵamkhazge, pakukhumba kumtuzgiya ku khamu lo pavuli pa Phaska. 5Viyo Petro wasungikanga mu ulinda wo: kweni pa chifukwa chake niniziku linguchitikiya kwaku Chiuta kwakufwiririyapo ndi mpingu wo.

Petro watuzgika mu ukayidi

6Ndipo penipo Herode wakhasanga kumtuzga, usiku wuwa Petro waranga tulo pakati pa ŵankhondo ŵaŵi, wakumangika ndi maunyoru ghaŵi: ŵaronda so ŵa paurongo pa likomo ŵakhazganga ulinda wo. 7Ndipo wonani, mungelo wa Mbuya wanguma pake, ndi kungweruka kunguŵaliya mu ulinda. Ndipo wati wapamantha liŵaghara laku Petro, wangumyuska, wakunena, “Soka ruŵi!” Ndipo maunyoru ghangudeuka ku manja ghake. 8Ndipo mungelo yo wangumnene, “Jichinyiye, ndi mangako viyatu vyako.” Ndipo wanguchita viyo. Ndipo wanena nayo, “Phemeska chirundu chako ndi ndirondo.” 9Ndipo wachituwa, wamrondonga; ndipo wengavi kuziŵa kuti chenga chakuneneska cho chinguchitika ndi mungelo yo, kweni wapimanga kuti wanguwona chiwona. 10Ndipo wati waporota mu ulinda wachimoza ndi wachiŵi, wanguza ku likomo la chisulo lakuserere mu msumba; lenilo pa khumbo laku lija linguŵajurikiya: ndipo pakutuwa ŵangwenda mseu umoza; ndipo sosonukweni mungelo yo wangutuwako kwake. 11Ndipo pakuzizimuka Petro watinge, “Sono ndiziŵiska kuti Mbuya watuma mungelo wake, ndipo wanditaska mu janja laku Herode, ndi ku chilereze chose cha khamu la ŵaYuda.”

12Ndipo wachiziŵa ichi wanguza ku nyumba yaku Mariya, nyina waku Yohane, yo wadanika so Marko; kweniko ŵanandi ŵaungananga pamoza, ndi ŵarombanga. 13Ndipo wachigong'oska pa chisasa cha khomu, wanguzako kwachitegherezga msungwana, zina lake Roda. 14Ndipo wachiziŵa liu laku Petro, chifukwa cha chimwemwe kuti wangujurako ku khomu cha, kweni wanguchimbiriyamo, ndi wangutaula kuti Petro iyo wamanga pabwaro pa khomu. 15Kweni iwo ŵangunena nayo, “Ufuntha!” Kweni iyo wakokomezganga kuti kwenga viyo. Ndipo iwo wanguti, “Ndi mungelo wake.” 16Kweni Petro wangurutirizga chigong'oska; ndipo ŵachijurako ŵangumwona, ndipo ŵangutondwa. 17Kweni pakuŵakonozge ndi janja kuti ŵachetame, wanguŵakonkhome mo Ambuya angumutuzgiya mu ulinda. Ndipo wanguti, “Mutauliye vyenivi kwaku Yakobe, ndi ku ŵabali wo.” Ndipo wangutuwako, ndipo wanguruta kunyake.

18Kweni, kunguti kwacha, kunguŵa chimbwambwantha chikuru, mu ŵankhondo wo, chakuti chamuwiya Petro chine. 19Ndipo penipo Herode wangumlembe kwambura kumsaniya, wanguŵafumbiriya ŵaronda, ndipo wangulangula kuti ŵabayike. Sono pakutuwa ku Yuda ndi kusikiya ku Kaisarea, watandaranga kweniko.

Nyifwa yaku Herode

20Herode watundiriyanga ukongwa pa ŵaTuro ndi ŵaSidoni: ndipo ndi mtima umoza ŵanguziya kwaku iyo, ndipo, ŵati ŵawoja. Elasto, mlindachita wa karonga yo, ŵapemphanga chimangu chifukwa charu chawo chinguhiŵika ndi cho chaufumu. 21Ndipo pa zuŵa lakutemeka Herode, wakuvwara kavwaridu kaufumu, wanguka pa chakweruzgiyapo cho, ndipo wangukamba nawo. 22Ndipo khamu lo lingubongo, “Ndi liu laku Chiuta, la munthu cha.” 23Kweni sosonukweni mungelo wa Mbuya wangumkoso, chifukwa kuti wagupaska unkhankhu kwaku Chiuta cha; ndipo pakunyakata ndi fusi, wanguziririka.

24Kweni mazu ghaku Chiuta ghakuwanga ndi ghandananga.

25Ndipo Barnaba ndi Saulo ŵanguweko ku Yerusalemu, ŵati ŵafiska uteŵeti wawo, ndipo ŵangutole pamoza nawo Yohane, wakudanika so Marko.

Currently Selected:

Machitidu gha Ŵakutumika 12: TongaMw

Highlight

Copy