MALIKO 16

Kulamuka kwa Yesu kuimfa

(Mt. 28.1-8; Lk. 24.1-12; Yoh. 20.1-10)

1Pidagwanda Nsiku Yakupuma, Maria wa ku Magadala, Maria mache Yakobo, na Salome adagula mafuta akununkhira kuti aende nawo kadzoza mtembo wa Yesu. 2Pa Dimingu na machibesebese, pidachita dzuwa bulukeni, iwo adenda kumasiye kule. 3Panjira adavunzana mbati, “Mbani anakatigulung'undisira mwala ule kuubulusa pamsuwo wa masiye.” 4Thangwi mwala ule ukhali ukulu pyakwanga. Mbwenye, pidakwiza iwo maso, adaona kuti mwala ukulu ule udagulung'undiswa kale. 5Pidachita akazi ale gwibidi m'masiye mudaikhwa Yesu mule, adaona mphale wakuvala mkhanjo wakuchena akhala pansi kukhundu yamadyo, tenepo iwo adatutumuka.

6Mphale ule adalonga mbati, “Lekani tutumuka. Ndikupidziwa kuti mukuyang'ana Yesu wa ku Nazareti, ule adakhomerwa pamtanda. Iye hali muno tayu, alamuswa! Ngayang'anani, mbuto ikhadamuikha iwo njishi. 7Tenepo ndokoni mukapereke mphangwazi kuna anyakufunzache pabodzi na Peturo kuti: ‘Yesu atsogola ku Galilea; imwe munakamuona kweneko ninga mudakupangirani iye.’ ”#Mt. 26.32; Mk. 14.28.

8Natenepo iwo adabuluka m'masiyemo na kuthamanga, pontho mwakudodoma uku akutetemera pyakwanga na mantha. Iwo hadalonge chinthu kuna munthu na mbodzi ene tayu, thangwi akhali na mantha.

Kumala kwakale kwa Mphangwa

Pidalamuswa Yesu, adaonekera kuna azinji

(Mt. 28.9-10, 16-20; Lk. 24.13-49; Yoh. 20.11-23; Mab. 1.6-8)

[9Pidalamuka Yesu kuimfa na machibesebese pa Dimingu, chakutoma adaonekera kuna Maria wa ku Magadala, ule akhadabulusa iye mizimu yakuipa minomwe.#16.9-20 Kumala kwakale kwa Mphangwa: Pyakulembwa pinango pyakale nkhabe Mk. 16.9-20. 10Iye adenda kapanga ale adatewera Yesu; enewa akhali kusintili na kulira. 11Iwo adava Maria akulonga kuti Yesu ali m'maso, pontho kuti iye akhadamuona, mbwenye iwo hadapikhulupire tayu.

12Kubuluka penepo Yesu adaoneka mwa mtundu unango kuna anyakufunza awiri pikhaenda iwo kumidzi. 13Iwo adabwerera kapanga anyakutewera anangowo, mbwenye iwo hadaakhulupire pontho tayu.

14Pakumalisira, Yesu adaonekera kuna anyakufunza khumi na mbodzi mwenemo mbalikudya. Iye adaasumulula thangwi ya kusowa kwawo chikhulupiro pontho na kuuma kwawo mtima pakukhonda khulupira mafala adalongwa na ale adaona Yesu, pidalamuswa iye kuimfa. 15Yesu adaapanga mbati, “Ndokoni padziko yonsene yapansi pano mbamukalalike Mphangwa Zadidi kuna anthu onsene.#Mab. 1.8. 16Ule anakhulupira mbabatizwa anapulumuswa, mbwenye anakhonda khulupirayo Mulungu anati aatchunyuse. 17Anyakukhulupira anapaswa mphamvu zakuchita nazo pinthu pyakudodomesa: na dzinanga anabulusa mizimu yakuipa; analonga pilongero pya chilendo; 18ngakhala anathukula nyoka penu kumwa chinthu chakupha, hanakuwazika tayu; anasanjika manjawo pana anthu akudwala, anthuwo mbawanga.”

Yesu akwatwa kwenda kudzulu

(Lk. 24.50-53; Mab. 1.9-11)

19Pidamala Mbuya Yesu kulonga nawo, adakwatwa kwenda kudzulu mbakakhala kudzanja yamadyo ya Mulungu.#Mab. 1.9-11. 20Anyakufunza adabuluka mbakalalikira konsene kwene. Mbuyambo adaphatadi nawo basa mbaaonesa kuti kulalika kwawo kukhali kwa kuona, thangwi ya pinthu pyakudodomesa pikhachitikapyo.]

Kumala kwakale kwinango

[9Akazi ale adenda kuna Peturo pontho na kuna anzache mbakaapanga mwachigwandira pyonsene pikhadapangwa iwo. 10Pidamala penepi Yesu yekha ene adatuma mphangwa zangwiro zamoyo wakukhala na kukhala, zakudzesa chipulumuso chakukhonda mala kudzera muna kulalika kwa anyakufunzache konsene kwene kubulukira kumabulukiro dzuwa kufikirana kumadokero dzuwa.]

Currently Selected:

MALIKO 16: SenaMw

Highlight

Copy