MALIKO 15

Yesu pamaso pa Pilato

(Mt. 27.1-2, 11-14; Lk. 23.1-5; Yoh. 18.28-38)

1Bzobzo na machibese anyansembe akulu, akulu-akulu, na afunzisi a mwambo, na onsene a m'Thando ya miseru ya Chiyuda adagumanyikana pabodzi kuverana pyakuti achite na Yesu. Tenepo adammanga mbaenda naye kamtula kuna Pilato.

2Pilato adavunza Yesu mbati, “Ayi iwe ndiwedi Mfumu wa Ayuda?” Yesu adamtawira mbati, “Mwalonga tenepo ndimwe.” 3Anyansembe akulu ale adampambizira Yesu pinthu pizinji, 4natenepo Pilato adamvunza pontho mbati, “Ayi hunatawira tayu? Ngava pyonsene pinakulongera iwopi.” 5Mbwenye Yesu hadabuluse fala tayu basi, tenepo Pilato adadodoma.

Yesu atongwa kuti aphiwe

(Mt. 27.15-26; Lk. 23.13-25; Yoh. 18.39—19.16)

6Pandzidzi onsene wa Phwando ya Paska, ukhali nsambo wa Pilato kusudzula nyaperezo mbodzi anafuna anthu kuti asudzulweyo. 7Pakhali mamuna unango dzinache Baraba, ule akhali m'perezo pabodzi na anyakupandukira Boma, ale akhadapha anthu pachimpiningu. 8Mwinji udadza dzapempha Pilato kuti aachitire ninga mwa nsambo wache. 9Pilato adaavunza mbati, “Munafuna ndikusudzulireni Mfumu wa Ayudayi?” 10Iye adapidziwa mwadidi mwene kuti anyansembe akulu adamtula Yesu kuna iye thangwi ya bivu.

11Mbwenye anyansembe akulu adaswiswirisa mwinjiwo kupempha kuti Pilato aasudzulire Baraba m'mbuto mwa Yesu. 12Pilato adaavunza mbati, “Ndichitenji naye mphapo, analonga imwe kuti ndi Mfumu wa Ayudayi?” 13Anthu ale adakhuwa mbati, “Mkhomereni pamtanda!” 14Pilato adaavunza mbati, “Thangwi yache njanji? Asosa mseru wanji?” Mbwenye iwo adakhuwa mwakugaluza fala mbati, “Mkhomereni pamtanda!”

15Pilato, na kufuna kuti mwinji ule ukomerwe, adaasudzulira Baraba. Tenepo adatonga kuti Yesu akwapulwe mbampereka kuti akakhomerwe pamtanda.

Anyankhondo aselusa Yesu

(Mt. 27.27-31; Yoh. 19.2-3)

16Anyankhondo adenda na Yesu muchintalo cha nyumba ya mkulu wa boma mbagumanyisa pabodzi anyankhondo anango a guluyo. 17Iwo adavazika Yesu mkhanjo wamsuzi wanyemba, mbasasanya chipewu cha chifumu na matsamvu a minga, mbachivazika mumsolo mwache. 18Tenepo iwo adatoma kumchitira shawasha mbalonga mbati, “Dondowe! Mfumu wa Ayuda!” 19Akhamkwapula mumsolo na mtswamu, mbamphulira mata, kumgodamira na kumulambira. 20Pidamala iwo kumselusa, adamdulisa mkhanjo wamsuzi wanyemba ule mbamvazika nguwo zache. Tenepo adenda naye kamkhomera pamtanda.

Yesu akhomerwa pamtanda

(Mt. 27.32-44; Lk. 23.26-43; Yoh. 19.17-27)

21Panjira iwo adagumanikana na munthu dzinache Simoni, ule akhabulukira kumidzi kwenda kumzinda. Anyankhondo adamkhakhamiza kuti athukule mtanda wa Yesu. Kwawo kwa Simoni kukhali ku Kirene pontho iye akhali babawo Alekezanda na Rufu.#Arom. 16.13. 22Iwo adenda na Yesu kumbuto yakuthulwa Gologota, kweneku nkhulonga kuti, “Ndi mbuto ya Chibade cha msolo.” 23Kweneko adampasa vinyu wakuvungaza na mtombwe wakuthulwa mure kuti amwe, mbwenye iye hadatawire tayu. 24Tenepo adamkhomera pamtanda mbagawana pyawo nguwo zache pakuchita ntsango kuti aone chinafuna kwata munthu.#Mas. 22.18. 25Ikhali ora yachifemba na machibese idakhomera iwo Yesu pamtanda. 26Chidziwiso cha mseru udapherwa iye chidalembwa kuti, “Mfumu wa Ayuda.” 27Iwo adakhomera pontho mbava ziwiri pamitanda na Yesu, mbodzi kumadyo kwache, unango kumabzere kwache.#15.27 Iwo…kumabzere kwache: Pyakulembwa pinango pyakale pyathimiza vesi 28: Tenepo pidachitikadi pidalonga Malemba kuti, “Iwo adamuyesa ninga mbodzi wa anthu akuipa.”

29Anthu akugwanda na penepo akhakupusa misolo yawo mbatikana Yesu mbati, “Wa! Wa! Udalonga ule si iwe tayu kuti: ‘Ndinafudza Nyumba ya Mulungu mbandiimanga pontho nsiku zitatu?’#Mas. 22.7; 109.25; Mk. 14.58; Yoh. 2.19. 30Apo lero tchithatu pamtandapo upipulumuse wekha ene.”

31Chibodzi-bodzi anyansembe akulu na afunzisi a mwambo adamselusa mbalonga kuna unango na mwanzache mbati, “Adapulumusa anthu anango, mbwenye akuchimwana kupipulumusa yekha ene! 32Ngakhala iye ndi Khristudi, Mfumu wa Aisraele, mbatchithetu mphapo pamtandapo kuti tione mbatimkhulupira!”

Ale adakhomerwa na iye pabodzi akhamtikanambo.

Kufa kwa Yesu

(Mt. 27.45-56; Lk. 23.44-49; Yoh. 19.28-30)

33Paora yakhumi na chiwiri na masikati padziko yonsene yapansi padachita mdima. Mdimawo udamala paora yachitatu na mawulo. 34Paora yachitatu na mawulo, Yesu adalira pikulu mbati, “Eloi, Eloi, lema sabakitani?” Kweneku nkhulonga kuti, “Mulungu wanga, Mulungu wanga, mwandisiyiranji ndekha ine?”#Mas. 22.1. 35Anthu anango penepo adava kukhuwa kwache mbalonga mbati, “Ngavani, iye akuchemera Elia!” 36Mbodzi adathamanga mbakavika chikhwasa-khwasa muvinyu wakuwawa, mbachifeka kumuti, mbaenda kachipasa Yesu kuti amwe. Munthu ule adalonga mbati, “Dikhirani, tione ngakhala Elia anadza dzamtchithisa pamtandapo.”#Mas. 69.21.

37Tenepo Yesu adakhuwa pikulu mbafa.

38Chinguwo chakutchinga nacho mbuto yakuchenesesa ya Nyumba ya Mulungu chidang'ambika kati na kati kutomera padzulu kufika pansi pache.#Kub. 26.31-33. 39Mkadamu wa anyankhondo dzana ule akhaimira patsogolo pamtanda adaona kufa#15.39 kufa: Pyakulembwa pinango pyakale pyalonga kukhuwa na kufa. kudachita Yesu. Natenepo iye adalonga mbati, “Ndimomwene munthuyu akhalidi Mwana Mulungu!” 40Akazi anango akhapiona na pakansinzo. Pakati pawo pakhali Maria wa ku Magadala, Maria mawo wa Jose na Yakobo wamng'ono, na Salome.#Lk. 8.2, 3. 41Pikhali Yesu m'nthemba ya Galilea, akazi enewa akhadamtewera mbamphedza. Akazi anango azinji ale adadza ku Yerusalemu pabodzi naye akhalimbo ponthopo.

Yesu aikhwa m'masiye

(Mt. 27.57-61; Lk. 23.50-56; Yoh. 19.38-42)

42-43Pidakwana ndzidzi wa mawulo Yosefe wa ku Arimatea adafika. Iye akhali munthu wakuveka m'Thando ya miseru ya Chiyuda, pontho akhadikhira kuti Mulungu akhazikise Ufumu wache. Ikhali Chishanu, Nsiku ikhasasanyikira Ayuda pya pa Nsiku Yakupuma, natenepo Yosefe adenda kuna Pilato mwakuwanga mtima mbakapempha mtembo wa Yesu. 44Pilato adadodoma napyo pidava iye kuti Yesu adafa kale. Iye adachemeresa mkadamu wa anyankhondo dzana mbamvunza khala ninga Yesu akhadafa kale. 45Pidatawira mkadamu ule kuti Yesu akhadafa kale, Pilatombo adamtawirisa Yosefe kuti akatchithise mtembo wa Yesu.

46Yosefe adagula nguwo yakuchena mbatchithisa mtembo wa Yesu ule mbaufinikiza na nguwoyo. Adauikha m'masiye akuchita kukumbwa m'mwala mbagulung'undisa mwala ukulu kufunga nawo pamsuwo wa masiyewo. 47Maria wa ku Magadala na Maria mache Jose akhaona kukhaikhwa mtembo wa Yesuwo.

Currently Selected:

MALIKO 15: SenaMw

Highlight

Copy