MALIKO 14

Ayuda asaka njira yakuphera Yesu

(Mt. 26.1-5; Lk. 22.1-2; Yoh. 11.45-53)

1Pakhadasala kwene nsiku ziwiri kuti Phwando ya Paska na Phwando ya Mikate yakusowa chakufufumisira ikwane. Natenepo anyansembe akulu pabodzi na afunzisi a mwambo akhasaka njira yachibiso-biso yakumanga na kupha nayo Yesu.#Kub. 12.1-27. 2Iwo adalonga mbati, “Penepi tileke kupichita pandzidzi wa phwandoyi, gopesera anthu anachita chimpiningu.”

Mkazi adzoza Yesu mafuta ku Betania

(Mt. 26.6-13; Yoh. 12.1-8)

3Yesu akhali ku Betania kumusa kwa Simoni, mamuna akhali na matanya pakutoma ule. Pikhadya Yesu, mkazi adapita m'nyumba mule na mtete wakusasanywa na alabasta, wakudzala na mafuta akudula pontho akununkhira pyakwanga a naridi chadi-chadi. Mkazi ule adaswa mphampha ya mtetewo mbaikha mafutawo mumsolo mwa Yesu.#Lk. 7.37, 38. 4Anthu anango akhali penepowo adazhangali mbalonga kuna unango na mwanzache mbati, “Thangwi yache njanji akuvunga mafuta akununkhirawa? 5Mafutawa ngakukwana kobiri zasiliva zakuphatira munthu basa chaka chamumphu! Mbadagulisa mafutawa mbadapereka kobirizo kuna anyakutcherenga.” Adamkalapira mkaziyo mwavinga.

6Mbwenye Yesu adalonga mbati, “Mulekeni pyache mkaziyu. Munanyanguliranji? Pyandiphatira iyepi mphyamaso. 7Anyakutcherenga munakhala nawo ndzidzi onsene, na ndzidzi onsene unafuna imwe munakwanisa kuaphedza. Mbwenye ine nee munakhala nane ndzidzi onsene tayu.#Deut. 15.11. 8Mkaziyu achitiratu pinakwanisa iye kuchita. Adzoza mafuta m'manungo mwanga kuasasanyaletu ndzidzi wakuikhwa kwanga m'masiye mbudzati kwana. 9Chinchino ndikukupangani pyakuonadi kuti konsene kunalalikwa Mphangwa Zadidi padziko yapansi pano, pyachita mkaziyu pinalongwambo towera anthu amkumbuke.”

Yudasi averana na anyansembe akulu pya kupereka Yesu

(Mt. 26.14-16; Lk. 22.3-6)

10Tenepo Yudasi Iskarioti, mbodzi wa anyakufunzache khumi na awiri ale, adabuluka mbaenda kuna anyansembe akulu towera akapereke Yesu kuna iwo. 11Anyansembe ale adakomerwa kuva pidalonga Yudasi mbadumbira kuti anampasa kobiri. Tenepo Yudasi adasaka ndzidzi wadidi wakupereka nawo Yesu.

Yesu adya Phwando ya Paska pabodzi na anyakufunzache

(Mt. 26.17-25; Lk. 22.7-14, 21-23; Yoh. 13.21-30)

12Pansiku yakutoma ya Phwando ya Mikate yakusowa chakufufumisira, nsiku ikhapha Ayuda anabira a pa Phwando ya Paska, anyakufunza a Yesu adamvunza mbati, “Nkhupi kunafuna imwe kuti tikakusasanyireni Phwando ya Paska?” 13Yesu adatuma awiri a anyakufunzache mbaapanga mbati, “Ndokoni mumzindamo, munakagumanikana na mamuna athukula mulinga wa madzi. Mukamtewere. 14Mukalonge kuna mwenechiro nyumba inakapita iyeyo kuti, ‘Mfunzisi akuvunza kuti, “Njipi subi yakuti ine na anyakufunzanga tidyeremo Phwando ya Paska?” ’ 15Iye anakakuonesani subi ikulu ya nyumba ya m'dzulu, mule mwasasanywa kale pyonsene pyakufunika. Mwenemo mukatisasanyire phwando.” 16Anyakufunza ale adabuluka mbakapita mumzinda mule, mbakagumana pyonsene ninga mudaapangira Yesu. Iwombo adasasanya kudya kwa pa Phwando ya Paska.

17Pidadoka kunja, Yesu adadza pabodzi na anyakufunza khumi na awiri ale. 18Pikhali iwo pathebulu kudya, Yesu adalonga mbati, “Ndikukupangani pyakuonadi kuti mbodzi wa imwe anati andipereke kuna anyamalwanga, weneyu anadya na ine pabodzi.”#Mas. 41.9. 19Anyakufunza adatsukwala napyo mbatoma kumvunza mbodzi na mbodzi mbati, “Ayi si ine analonga imwe tayu, Mbuya?” 20Yesu adaatawira mbati, “Nyakundipereka ndi mbodzi wa khumi na awirimwe weneyo anafonda na ine mkate pabodzi m'palatomu. 21Mwana Munthu anati afe ninga munalongera Malemba. Mbwenye dzedze kuna nyakupereka Mwana Munthuyo! Mbapidakhala pyadidi kuti nyakumperekayo mbadakhonda balwa!”

Kumenya mikate kwa Mbuya Yesu

(Mt. 26.26-30; Lk. 22.14-20; 1Akor. 11.23-25)

22Pikhadya iwo, Yesu adakwata mkate mbapereka takhuta kuna Mulungu mbaumenya. Tenepo adaupereka kuna anyakufunzache mbalonga mbati, “Kwatani mudye mkatewu; enewa ndi manungo anga.” 23Kubuluka penepo adakwata khomitcho ya vinyu mbapereka takhuta kuna Mulungu mbaipereka kuna anyakufunza; onsene adamwa vinyu kubulukira m'khomitchomo. 24Yesu adalonga kuna anyakufunzache mbati, “Chenechi ntchiropa changa chakuchuchiswa kuombola anthu azinji, chiropa chakutsikimizira chiverano cha Mulungu.#Kub. 24.8; Yer. 31.31-34. 25Ndikukupangani pyakuonadi kuti sinamwave pontho vinyuyo tayu kufikirana nsiku inamwa ine vinyu wachinchino mu Ufumu wa Mulungu.”

26Natenepo iwo adaimba nyimbo mbaenda ku Phiri ya Olivi.

Yesu alongeratu kuti Peturo anamkhonda

(Mt. 26.31-35; Lk. 22.31-34; Yoh. 13.36-38)

27Yesu adaapanga mbati, “Monsene munathawa mbamundisiya ndekha, thangwi pyalembwa kuti, ‘ndinapha makabuswa, mabira mbamwazikana.’#Zek. 13.7. 28Mbwenye ndingalamuka kuimfa ndinati nditsogole ku Galilea.”#Mt. 28.16. 29Peturo adamtawira mbati, “Podi onsene akuthaweni kwene, mbwenye ine sinakusiyani tayu!” 30Yesu adalonga kuna Peturo mbati, “Ndikukupanga kuti dzongwe mbadzati lira kawiri mosiku uno, unati ulonge katatu kuti nee unandidziwa tayu.” 31Peturo adamtawira na mphamvu zache zene mbati, “Podi na kundipha kwene pabodzi na imwe, sinalonga tenepo tayu!” Anyakufunza anango onsene ale adalongambo chibodzi-bodzi.

Yesu apemphera m'Getsemani

(Mt. 26.36-46; Lk. 22.39-46)

32Iwo adadza kumbuto yakuthulwa Getsemani, Yesu adapanga anyakufunzache mbati, “Khalani pano, pinakapemphera ine.” 33Iye adakwata Peturo, Yakobo na Yohani mbaenda nawo pabodzi. Yesu adatoma kugoswera na kusanyika mumtima mwache pyakwanga 34mbaapanga anyakufunzawa mbati, “Mtimangawu wadzala na nsisi zakufa nazo, khalani pano, pontho khalani m'maso.”

35Pidafamba iye pang'ono, adapiponya pansi mbapemphera kuti ngakhala pinakwanisika ndzidzi wa nyatwawo ugwande. 36Adalonga mbati, “Baba, Babanga, pinthu pyonsene mphyakukwanisika na imwe. Ndibulusirenimbo khomitcho ya nyatwayi, mbwenye kukhale kufuna kwanu, nee kufuna kwanga tayu.”

37Kubuluka penepo Yesu adabwerera kuna anyakufunzache atatu ale mbaagumana ali m'chitulo. Yesu adavunza Peturo mbati, “Simoni, kani ukugona pyako? Ayi mbamudakwanisa kukhala m'maso ora ibodzi tayu?” 38Yesu adalonga kuna iwo mbati, “Khalani m'maso mbamupemphera towera muleke yeswa na pyakuipa. Mtima ukufuna, mbwenye manungo alenduka.”

39Yesu adenda pontho kapemphera mafala abodzi-bodzi ninga pakutoma. 40Iye adadza pontho kuna anyakufunzache mbaagumana akugona; thangwi maso awo adalemera. Natenepo iwo adasowa chakuti alonge kuna Yesu.

41Pidadza iye pontho kuna iwo kachitatu, Yesu adalonga mbati, “Mukupuma na kugona pyanu basi? Pyakwana! Ndzidzi wafika! Ngayang'anani, Mwana Munthu akuperekwa m'manja mwa anthu akudawa. 42Lamukani, tiende. Yang'anani, nyakundipereka uyo anadzayo!”

Kumangwa kwa Yesu

(Mt. 26.47-56; Lk. 22.47-53; Yoh. 18.3-12)

43Yesu akhali m'kati kulonga pidafika Yudasi, mbodzi wa anyakufunza khumi na awiri ale, pabodzi na mwinji wakuphatirira matalasada na pigomba. Iwo adatumwa na anyansembe akulu, afunzisi a mwambo na akulu-akulu. 44Nyakupereka Yesuyo akhadapangiza mwinji ule chidzindikiro chakuti, “Munthu anamwenyika ine mwakumpsompsonayo ndiye ene anafuna imwe. Mukammange mbamuende naye mwakuyang'anirwa na anyankhondo.”

45Sindzidzi pidafika Yudasi, adenderatu kuna Yesu mbakalonga mbati, “Mfunzisi!” Mbampsompsona. 46Natenepo anthu ale adamphata Yesu mbammanga. 47Mbwenye mbodzi wa anthu adaimira penepowo, adasolola talasadache mbakhamwadza bitchu wa Nyansembe Wamkulu na kumgwandiratu khutu.

48Yesu adaavunza mbati, “Mwatani mwachita kudza na matalasada na pigomba dzandiphata khala ninga ndine phanga? 49Nsiku na nsiku ndikhali namwe kufunzisa m'Nyumba ya Mulungu, mbwenye imwe hamudandimanga tayu. Kwache Malemba anati akwane-kwane.”#Lk. 19.47; 21.37.

50Tenepo anyakufunza onsene adamsiya mbathawa pyawo.

51Mphale unango wakuvala chakufinika chache chene basi akhatewera Yesu. Anthu ale adapiyesa kumphata, 52mbwenye iye adathawa chipezi-pezi kusiya chakufinika chachecho m'nduli.

Yesu pakati pa Thando ya miseru ya Chiyuda

(Mt. 26.57-68; Lk. 22.54-55, 63-71; Yoh. 18.13-14, 19-24)

53Kubuluka penepo Yesu adendeswa kunyumba ya Nyansembe Wamkulu kule kudagumanyikana anyansembe akulu onsene, akulu-akulu, na afunzisi a mwambo. 54Peturo adatewera m'nduli pakansinzo mbakapita muchintalo cha nyumba ya Nyansembe Wamkulu. Peturo adakhala pansi mwenemo pabodzi na anyakulondali mbaotha moto. 55Anyansembe akulu pabodzi na onsene a m'Thando ya miseru ya Chiyuda akhayesa kugumana umboni wakupambizira nawo Yesu, towera amphe, mbwenye hadaugumane tayu. 56Mboni zizinji zidalongera Yesu umboni wakunama, mbwenye umboni wawowo hukhaphatizana tayu.

57Amuna anango adalamuka mbapambizira Yesu mbati, 58“Tidamva weneyu akulonga kuti, ‘Ndinafudza Nyumba ya Mulungu yakumangwa na anthuyi mbandimanga inango yokhonda mangwa na anthu, pangagwanda nsiku zitatu.’ ”#Yoh. 2.19. 59Mbwenye, penepo pene, umboni wawo hudaphatizane pontho tayu. 60Nyansembe Wamkulu adalamuka pakati pa anthu onsene mbavunza Yesu mbati, “Watani unakhonda tawira umboni unakulongera anthuwu?” 61Mbwenye Yesu hadabuluse fala tayu. Iye adakhala pyache mulomo phoo! Nyansembe Wamkulu adavunza pontho Yesu mbati, “Ayi ndiwedi Khristu, Mwana Mulungu Nyakulemedzwa?” 62Yesu adamtawira mbati, “Ndine ene pano.

Monsene munati muone Mwana Munthu

akhala kudzanja yamadyo ya Mulungu Wamphamvu zonsene

pontho munamuona akudza pamakole a kudzulu!”#Dan. 7.13.

63Nyansembe Wamkulu adang'amba mkhanjo wache mbalonga mbati, “Ife nkhabe funave mboni zinango pontho tayu! 64Mwava mwekha kushola Mulungu kwachita iyeku. Apo mukunyerezera tani?” Anthu onsene adatawira kuti akonwa, pontho athema kuphiwa.#Lev. 24.16. 65Anthu anango adatoma kuphulira Yesu mata, mbammanga kunkhope mbammenya mbampanga mbati, “Lotera, mbani akumenya!” Anyakulondali adamkwata mbammenyambo.

Peturo alonga kuti hanadziwa Yesu

(Mt. 26.69-75; Lk. 22.56-62; Yoh. 18.15-18, 25-27)

66Pikhali Peturo pansi muchintalo cha nyumba ya Nyansembe Wamkuluyo, nyabasa mbodzi wachitsikana wa Nyansembe Wamkulu adadza mwenemo. 67Pidaona iye Peturo akuotha moto, adamuyang'anisisa mbalonga mbati, “Iwe pontho ukhali naye pabodzi Yesu wa ku Nazareti ule.” 68Mbwenye Peturo adatuna mbati, “Ine nkhabe kumdziwa, pontho nkhabe vesa pinalonga imwepi.” Tenepo adabulukiratu mbaenda kumsuwo. Penepo pene dzongwe adalira.#14.68 Penepo pene dzongwe adalira: Pyakulembwa pinango pyakale nkhabemo mafala enewa.

69Mtsikanayo adamuona pontho mbalonga kuna anthu akhali penepowo mbati, “Mwanzathuyu ndi mbodzi wa enewo.” 70Peturo adakhonda pontho.

Pidagwanda ndzidzi pang'ono, anthu akuimira penepowo adalonga kuna Peturo mbati, “Ndimomwene, iwe ndiwe mbodzi wa iwo, thangwi ndiwe Mgalilea.” 71Tenepo Peturo adalonga mbati, “Ndikudumbira kuti pinalonga inepi mphyakuonadi! Ngakhala ndikulonga pyakunama, Mulungu mbanditchunyuse pyache! Munthu analonga imweyu, sinamdziwa tayu!”

72Kabodzi na kabodzi dzongwe adalira kachiwiri. Penepo Peturo adakumbuka pidampanga Yesu kuti: “Dzongwe mbadzati lira kawiri, unalonga katatu kuti hunandidziwa tayu.” Tenepo Peturo adasweka mtima mbalira.

Currently Selected:

MALIKO 14: SenaMw

Highlight

Copy