Marako 7

Imbata ’ba ’warani idrizuri

1 # Mat 15:1-20 ’Ba Farisaini yi nga yi oku tualu vunia, ’ba karanini ma azini pie, ibipi emupi Yerusalemua ’diyi. 2#Luk 11:38Yi ndre ’ba erini imbale ’diyi ma azi yi nyaka nya dri alatara kokolu be, efini ojikokoru ’dani. 3(’Ba Farisaini piyi ’ba Yahudini be dria, yi ka yi dri oji treitrei ku, yi nyani nyaka ku, yini aziza ’ba ’warani inzilerisi; 4yi ka enga cuua, yi ka yi rua oji dria ku, yi nyani nyaka ku; e’yo yini azini karakarau indi, yini a’ile yi inzizu ’diyi, okelea pi ma ojita imvu pie, sufuria pie dria.) 5’Ba Farisaini ’ba karanini be nga zi tinia kini, ’Ba mini imbale ’diyi acini aziza ’ba ’warani vusi ku, te yi nyaka nya dri alatara kokoru be a’disi ya? 6#Isa 29:13Eri nga ’yo yi tia kini, Isaya olu ndra e’yo emini ’yeke, emi ’ba inzoru ’diyi, erini silerile kini,

Suru ’diri, yi ma inzi tilesi,

te asi yini ovu ma be re;

7yi ma inzi toko, yini ’ba imbaria imbata ’ba vilerisi.

8Emi adri azita Munguni ku, emi adri aziza ’bani bi kirikiri.

9Eri nga ’yo yi tia kini, Emi azita Munguni ’ba toko ’yeke, emi ma inzi aziza emini beni! 10#Efu 20:12; 21:17; Lev 20:9; Azi 5:16Musa ’yo ndra kini, Mi inzi mi ati pi mi andri be; azini kini, ’Ba i ati pi o’dapi andri beri, eri ma dra ada; 11te emi’i emi ’yo, ’Ba azini ka ’yo i ati tia, kani i andri tia, kini, Aza koza mini ecole isule ma vuri eri Koribani (efini afa fele Mungu driri’i)- 12emi a’ini eri azi ngazu eri ati pi dri andri be dika ku, 13’dini emi e’yo Munguni ’ba toko, aziza emini idrilerisi. Emi adri afa azini ’dinile ’diyi ’ye o’biru,

Afa fepi ’bani ovuzu alatara kokoru ’diyi

14Eri nga ’ba ongulumuru omve i vu dika, nga ’yo yi tia kini, Emi dria ma eri e’yo mani, emi ma va e’yo indi: 15#’Yeta 10:14, 15afa aluni ovupi ’ba vu amveleru fipi eri ma alia ecopi eri ’bapi alatara kokoruni yo; te afa efupi ’ba alia ’diyi yi ’ba ’ba alatara kokoruni. 16’Ba azini ka ovu bile be e’yo erizu, eri ma eri. 17Te eri ka fi joa ’ba ongulumuru kuzu amve ’bo, ’ba erini imbale ’diyi nga zi tinia e’yo o’beza ’diri ma e’yosi. 18Eri nga ’yo yi tia kini, Emi ovu e’yo vaza kokoru ’dini indi ya? Emi nini ku ya, kini afa azini amveleru fipi ’ba aliari econi ’ba ’bazaru alatara kokoru aluni ku, 19afa nderini file asia ku, te anyajoa, erini fule daka berisi? (Eri ’yo ’dini nyaka dria ’bazu alaru.) 20Eri nga, i ’yo kini, Afa efupi ’ba aliari eri ’ba ’ba alatara kokoruni. 21Te geri ’ba aliarisi, engazu asi ’bani ma alia, asisile onzini efuni, awu pie, ogu pie, ’ba ’dizuri pi, ali o’baza pie, 22ngiri pie, e’yo onzi pie, lokiri pie, e’yo drinzal’u lezuri pie, mile onzi pie, o’data pie, asi afuru pie, e’yo aparakaruri pie. 23E’yo onzi ’diyi dria yi efu ’ba alia, yi ’ba ’ba alatara kokoruni.

Oku Suro-Foenikeaururi ma a’ita

24 # Mat 15:21-28 Eri nga enga ’dasi, eri nga mu angu Turo pi ma ageia Sidoni beria, Eri nga fi joa, eri leni ’ba aluni ma ni ku; te econi erini i zizaru ku. 25Te coti oku alu, zamva erini ovu orindi onzi be, erini e’yo erini eriria ’boria, eri nga emu i eco va eri palaa. 26Oku nde eri Giriki zani, suru yini Suro-Foenikeni. Eri nga zi tinia eri ma dro orineli onzi eri ma zamva ma ruaasi amve. 27Eri nga ’yo tinia kini, Mi ku anzi ma tra raka, econi nyaka anzini ’duzaru ’bezaru ocea dri ku. 28Eri nga e’yo omvi, nga ’yo eri tia kini, Ada Opi; te ocea nyiri mesa etia ’diyi yi di adri nyaka anzini o’depi vari nya’i. 29Eri nga ’yo tinia kini, E’yo mini ’yole ’elirisi mi mvi; orindi onzi fu eli zamva mini ma ruaasi ’boo 30Eri nga mu i vile joa, eri nga isu zamva la pari dria, de orindi onzi fu ruaniasi ’bo.

Yesu ati ’ba bile dirinyaru e’yo ’yapi kuri

31 # Mat 15:29-31 Dika eri nga fu Turo ma tia, eri mu geri Sidoniarisi cazu miri Galilinia, angu Dekapoli ma ageiari agazu agaduasi. 32#Mar 5:23Yi nga ’ba bile dirinyaru beri eji eri vu indi, eri adri e’yo ombe ombe erini e’yo ’yoria; yi nga zi tinia eri ma ti dri drinia. 33#Mar 8:23Eri nga ’ba nde ji a’dule ’ba tre ma eseliasi amve, eri nga drianzi osu bilenia, eri nga cucu wu, nga andreni elo; 34#Mar 6:41; Yoh 11:41erini angu luria ’bua uru eri nga ava se, nga yo tinia kini, Efata, efini kini, Ma zi i mgbo. 35Bileni nga i zi mgbo, leri ndre ma isu nga ovu ayuzaru, eri nga ani e’yo ’yo ti alasi. 36#Mar 1:43-45Eri azi ’ba nde ma tia yi ma olu e’yoni ’ba aluni ma tia ku, te erini yi aziria okporu ti, yi mu e’yo olu okposi aga ra. 37#Isa 35:5’Ba asi nga osu tu aga ra, ’yozu kini, Eri ’ye afa dria ’yeke ’bo; eri fe ’ba bile dirinyaru berini e’yo erizu, eri fe ’ba ndindiruni e’yo ’yozu indi.

Currently Selected:

Marako 7: LB66

Highlight

Copy