Marako 8

Nyaka Jezu ’ba alifu su dri

1 # Mat 15:32-39 O’du ’dayisi ’ba ongulumuru kakau ka ovu ’dale dika, isu de afa nyaza yi dri yo, eri nga ’ba erini imbale ’diyi omve i vu kini, 2#Mar 6:34-44Ma asi ovu yikisi ’ba ongulumuru ’diyi vu, yini tele ma be curu’do o’du na nyaka kokorurisi; 3ma ka yi ti pe mvizu yi vile akua abirisi, yi nga ande kai geria; a’disiku yi ma azi enga angu ziria. 4’Ba erini imbale ’diyi nga e’yo omvi tinia kini, ’Ba azini eco fezu ’ba ’diyini trazu nyakasi angu didi ’doa ngoni ngoni ya? 5Eri zi yi tia kini, Mikate emi dri si ya? Yi ’yo ra, Aziri. 6Eri azi ’ba ongulumuru yi ma ri va nyakua; eri nga mikate aziri nde ’du, ka awa’difo ’yo ’bo, eri ati yi ale ra, fe ’ba erini imbale ’diyi dri, ’yi asa ’ba ongulumuru ma palaa ra. 7E’bi nyiri nyiri ovu yi dri were indi; erini asi ndriza a’iria drinia ’bo, eri azi ’ba ma asa afa ’diyi ’ba nde ma palaa indi. 8#Azi 28:5Yi i nga nya ra, nga tra indi; nga nyaka erini aleni atileri ma joloko o’du abaka tre tre aziri. 9’Ba ovu alifu sule. Eri nga yi ti pe mvizu. 10Coti eri fi oguru alia ’ba erini imbale ’diyi be, yi nga mu kala Dalamanutaaria.

E’yo ’bani lezu eceta ndrezuri

11 # Mat 16:1-12 # Mat 12:38; Luk 11:16; Yoh 6:30 ’Ba Farisaini nga efu ra, yi ’ba zi tinia, eceta ’buari ndruzu eri dri eri obezu. 12#Mat 12:39; Luk 11:29Eri nga ava se ambo eri asia, kini, Anzi ’diyi yi eceta ndru a’disi ya? Ma ’yo emi tia ndi ndi, yi ngani eceta fe anzi curu’do ’diyi dri aluni ku. 13Eci nga yi ku ra, nga fi oguru alia dika, nga zo ’aa’dasi.

Akufi ’ba Farisaini

14Te yi dri nga avi nyaka ejizu; yi ovuni nyaka be oguru alia ku, kiri mikate alu ko’diko’di, 15#Luk 12:1; Mar 3:6Eri ’ba e’yo azi yi tia okposi, ’yozu kini, Emi ndre, emi ma ovu mile be emi agei tezu akufi ’ba Farisaini ’diyinisi, akufi ’ba Herodenirisi indi. 16Yi nga e’yo ’yo yi agyi bilia, kini, Amani ovule nyaka kokorurisi. 17#Mar 6:52Yesuni e’yo nde niria, nga ’yo yi tia kini, Emi e’yo ega emi eselia emini ovule nyaka kokorurisi a’disi ya? Emi ndreni nga ku ya? Emi vani ku indi ya? Emi asi ovu mbazaru ya? 18#Yer 5:21; Eze 12:2; Mar 4:12Emini ovuria mile be, emi ndreni afa ku ya? Emini ovuria bile be emi erini e’yo ku ya? Emi egani e’yo emi asia de ku ya? 19#Mar 6:41-44Mani ndra mikate towi ’diyi awaria ’ba alifu towi dri, emi o’du ndra nyaka ma joloko evu tre tre si ya? Yi ’yo ra, Mudri drini iri. 20#Mar 8:6-9Te mikate aziri ’ba alifu su dri, emi o’du ndra nyaka ma joloko abaka tre tre si ya? Yi nga ’yo tinia, Aziri. 21Eri nga ’yo yi tia kini, Emi vani di nga e’yo ku ya?

Yesuni ’ba mile kokoru Betesaidaari atizu

22 # Mar 6:56 Yi nga mu Betesaidaa. Yi nga ’ba mile draza beri eji vunia, yi nga zi tinia eri ma elo ruani ani. 23#Mar 7:32, 33; Yoh 9:6Eri nga ’ba mile draza beri ma dri bi, nga eri ji akuasi amve; eri ka cucu wu eri mile efia ’bo, eri nga i dri ti drinia, eri zi tinia kini, Mi ndre afa ra ya? 24’Ba nde nga i mile enga uru, kini, Ma ndre ’ba ra, te yini aciria yi e’da ma dri patile. 25Te eri nga dri ti milenia dika; eri nga angu lu ’dani, eri ovu atizaru, eri nga afa dria ndre ’yeke. 26#Mar 7:36Eri nga eri ti pe mvizu eri vile joa, kini, Ka tro aku ’diria ti, mi fi ku.

E’yo e’daza Peteroni

27 # Mat 16:13-28; Luk 9:18-27 Yesu nga fu ’ba erini imbale ’diyi be, fizu aku Kaisari Filipinia ’diyi ma alia; eri nga ’ba erini imbale ’diyi zi geria, kini, ’Ba ’yo kini ma a’di ya? 28#Mar 6:14-15; Luk 9:7-8Yi omvi e’yo eri tia ’yozu kini, Yohana ’ba baputizi fepiri’i; ’ba azini kini Eliya’i; ’ba azini kini ’ba nabiru ’diyi ma azi aluri’i. 29#Yoh 6:68-69Te eri zi yi tia kini, Te emi ’yo emini ma a’di’i ya? Petero nga e’yo omvi, ’yo eri tia kini, Mi Kristo’i. 30#Mar 9:9Eri nga e’yo azi yi tia okposi yi ma olu e’yo erini ’ba azini ma tia ku.

Yesuni drata ini ma e’yo ecezu

31Eri ’ba yi imba kini Mvi ’bani ma ecandi i e’yo karakarausi, ’ba ’wara ’diyi pi, kuhani pie, karani pie ma ga eri si, yi ma ’di eri ra, te o’du na ma vutia eri ma enga dika. 32Eri ’yo e’yo ’diri mgboru. Te; Petero nga eri bi ra, nga ’ba ega drinia. 33Erini ti coria ’ba erini imbale ’diyi ndreria, eri ega Petero ma dria kini, Mi da mi ma ngukua, mi Satani’i Mi droni asisile mini e’yo Munguni ma dria ku, te e’yo ’bani ma dria,

34 # Mat 10:38; Luk 14:27 Eri ka ’ba ongulumuru omve i vu ’ba erini imbale ’diyi be ’bo, eri nga ’yo yi tia kini, ’Ba azini ka le mu ma vutia, eri ma ga i ma ngulupi si, ma ’du pati i dizuri, ma emu ma vutia. 35#Mat 10:39; Luk 17:33; Yoh 12:25’Ba azini ka le idri ini pa ra, idri nde nga dri ja ra; te ’ba azini, idri erini ka dri ja e’yo manisi, e’yo barisi indi, eri nga idri ini pa ra. 36’Ba ka angu wudrikuruni nya dria i ma afaru, te idri ini ka avi ra, eri nga a’di ma orodri isu ya? 37’Ba nga idri ini ole a’di afasi ya? 38#Mat 10:33’Ba azini ka ovu drinzasi masi, e’yo mani ’yole ’diyisi indi, anzi ali o’bapi azini onzikanyaru ’diyi ma eselia, drinzani nga Mvi ’bani bi indi erisi, erini emuria diza i Atini be, malaika alatararu be tualu.

Currently Selected:

Marako 8: LB66

Highlight

Copy