Marako 4

E’yo o’bele ’ba ori ripirisiri

1 # Mat 13:1-28; Luk 8:4-15 # Luk 5:1-3 Dika eri ’ba ’ba imba miri tia. ’Ba ongulumuru oku yi vunia karakarau tu; eri nga fi o’bo alia, ga ri yi dria ani; ’ba ongulumuru dria yi nga ovu nyakua amve miri tia ogogo, 2Eri nga e’yo kakau imba yi dri e’yo o’bezasi; imbata erini ma alia eri ’yo yi tia kini: 3Emi eri! Mi ndre, ’ba ori ripiri fu ori ri. 4Eri eca ’dini, erini ori riria, ori azini nga ’de geri tia, aria nga emu nyani, 5Azini nga ’de ’yaku oniefi beri ma alia, nyaku alenia amboru yo; eri nga perepere enga caga, nyakuni ovule ali koI korurisi; 6etu ka efu ra eri nga ve ra, eri nga ’wi teketeke eri ma lani ovule yorisi. 7Azini nga ’de oci eselia, ocini nga zo ra, nga eri ondri ci, awini efi ka ku, 8Azini inga ’de nyaku onyiru ma alia, eri nga ka ra; erini engaria eri ti karakarau, eri ka ra, azini pale kali na, azini kali azia, azini turu. 9Eri ’yo ra, kini, ’Ba bile be e’yo erizuri ma eri.

10Eri ka ovu a’dule, ’ba eri ageia ’diyi pi ’ba mudri drini iri ’diyi be nga e’yo o’beza ’diyi ma efi zi tinia. 11#1 Kor 5:12Eri nga ’yo yi tia kini, Yi fe emi dri e’yo vale ku suru Munguniriniri nizu, te ’ba amve ’diyi dri afa dria ovu e’yo o’bezasi; 12#Isa 6:9, 10; Yoh 12:40; ’Yeta 28:26’dini ndrezanmi, yi ma ndre ra, te yi ma ni ku, te erizaroni, yi ma eri ra, te yi ma va efini ku; yi kazu yi asi ojazu yi ma e’yo onzi wuzu ku. 13Eri nga ’yo yi tia, Emi vani e’yo o’beza ’diri ma eti ku ya? Emi nga di e’yo o’beza dria ni ngoni ya? 14’Ba ori ripiri eri e’yo rio 15Yini rile geri tia ’diyi yi ’di: ka e’yo eli ’bo, Satani eri emu coti, e’yo te rileri opa yi asia ra. 16’Dinile yini rile angu oniefi beri ma alia ’diyi yi ’di: yi ka e’yo eri ’bo, coti yi a’i ra ayikosi; 17te ola yini yo, yi adri o’du Were, vutinia candi inzata be ka efu e’yo nde ma e’yosi ra, yi aba, aba coti. 18’Ba azini yi ’ba rile oci eselia ’diyi, yi ’ba e’yo eripi ’diyi, 19#Mar 10:23, 24te egata nyaku ’dorini pi fi yi asia, lokiri lonyini pie, afa azini ma ava pie cina, yi nga e’yo nde ondri ci, eri nga ovu efi ’yakokoru ani. 20Te rile angu onyiru ma alia ’diyi yi ’di: ’ba nde ’diyi yi eri e’yo nde, yi a’i eri ra, yi ka efi ra, azini pale kali na, azini kali azia, azini turu.

Tala ti opizu abakasi

21 # Luk 8:16-18 # Mat 5:15; Luk 11:33 Eri ’yo yi tia kini, ’Ba yi adri tala eji, tini opizu abakasi ya? kani ’bazu gbolo etia ya? Yi ejini eri ’bazu afa tala ’bazuri ma dria ku ya? 22#Mat 10:26; Luk 12:2E’yo zizaruni yo, pe lu eri ma ece indo; e’yo ndrozaruni vini yo, pe lu eri ma nga i e’da ra. 23’Ba bile be e’yo erizuri ma eri, 24#Mat 7:2; Luk 6:38Eri ’yo yi tia kini, Emi ndre onyiru e’yo emini erileri; yi nga o’bi emi dri o’biza nde emini o’bileri vusi, ereni yi nga fe emi dri indi. 25#Mat 13:12; 25:29; Luk 19:26’Ba afa beri dri yi nga afa fe: dika; te ’ba afa kokoruri ma driasi yi nga afa erini opa dria ra.

Ori engapi zopiri ma e’yo

26Eri ’yo ra kini, Suri Munguni eri Ovu ’dini, ekile ’ba ka nga ori o’be inyakua; 27#Yak 5:7eri ka nga o’du ko linisi, ka nga oru etu be dria; ori enga ra, zo ra, te agu nde nini ngoni ngoni yari ku. 28Nyaku eri nyaka eji eri drisi; eri bi so raka, eri nga vini ayi ra, eri nga efi ’ya tre ayiza nde ma alia ndo; 29#Yoe 3:13ka di ka dria ’bo, coti yi eli ’du ra, ewu lozanirini ecalerisi.

Haradali ma efi ma e’yo

30 # Mat 13:31, 32, 34; Luk 13:18, 19 Eri nga ’yo ra kini, Ama di nga suru Munguni o’bi a’di be ya? Ma nga eri e’da e’yo o’beza ngorisi ya? 31Eri ovu haradali efile; yini eri riria nyakua eri gakandiaru, ori dria nyakua ’diyi aga eri ombosi ra, 32#Dan 4:12, 21; Eze 17:23; 31:6te yini eri riria ’boria, eri zo ra, eri eca amboru aga afa amvua ’diyi dria ca, eri arakala aja amboru, aria ’bua ’diyi nga emu ori endrinia ani.

Yesu imba ’ba e’yo o’bezasi a’di ’yezu ya?

33Eri nga e’yo o’beza ’diyile o’be kakau, e’yo nde oluzu yi tia yini ecole erilerile; 34te e’yo o’beza kokoru eri ’yoni yi tia ku, te ’ba erini imbale ’diyi ma tia a’dule eri nga e’yo dria ma efi ece.

Yesu fe olirikoni ovuzu ndi

35 # Mat 8:18, 23-27; Luk 8:22-25 Etu ’dasi, ka eca ondre be, eri ’yo yi tia kini, Ama zo aa’dasi, 36Yini ’ba ongulumuru kuria, yi ji eri ’dani oguru alia. Oguru azini nga aci yi be indi, 37Oliriko amboru nga enga ra, yi eri ’ba mbu oguru alia, kpere yini gazu oguru ma alia tre ani. 38Te eri ovu o’dua, bongo dri ’bazuri ma dria, oguru ma alia vile; yi nga eri enga ra, kini, Opi, ama ka dri ja ra, e’yoni mi dri yo ya? 39Eri nga oru ani, eri nga ega oli dria, nga ’yo miri ma tia kini, Mi adri ndi! Mi ombe mi ti ci! Oli nga ku ja, angu nga dria ndri tili. 40Eri nga ’yo yi tia kini, Emi ovu urisi ’dini a’disi ya? Nita emini di yo ya? 41Uri nga yi bi ambo, yi nga ’yo yi agyi tia kini, ’Di te a’di Iya, oli miri be dria yini e’yo erini linzizu ’doni?

Currently Selected:

Marako 4: LB66

Highlight

Copy