E’doza 14

Iburamuni Lotini pazuri

1 # E’do 10:10; Isa 11:11 Eri nga eca ’dini, ewu Amirafeli opi Sinariari pini, Arioki opi Elasariari pie, Kedorilaomeri opi Elamuari pie, Tidali opi Goimuari pi ngarerisi, 2#Yak 4:1; Azi 29:23; E’do 19:22opi nde ’diyi nga la’di ’di Bera opi Sodomuari pi be, Birisa opi Gomoraari pie, Sinabu opi Adimaari pie, Semeberi opi Zeboimuari pie, opi Belaari (angu nde bani Zoari’i) pie dria. 3#Azi 3:17; Kal 34:12; Yos 3:16; Zab 107:34’Ba ’diyi dria nga emu tualu a’di ’dizu e’bu Sidimuaria (’da Miri A’iruri’i). 4Yi nga azi Kedorilaomeri dri eli mudri drini iri, te eli mudri drini naria yi nga mbu ruaniarisi amve. 5Te eli mudri drini surisi Kedorilaomeri pi nga emu opi ovupi eri be ’diyi pie, yi nga ’ba Refaini Asiterotikarinaimua ’diyi pi ofu ra, ’ba Zuzini Hamua ’diyi pie, ’ba Emini Save-kiriataimua ’diyi pie, 6’ba Horini oni yini Seiria ’diyi pie, kpere Eli-parani ovupi angu roko driari ma kalaaria. 7#2 Sur 20:2Yi nga emvi ra, nga emu Eni-misipatia (angu nde Kadesi’i), yi nga angu ’ba Amalekini eza dria, ofu vini ’ba Amorini ovupi Hazazoni-tamaria ’diyi ra. 8’Dini opi Sodomuari pi nga fu mu yi vu ra, opi Gomoraari pie, opi Adimaari pie, opi Zeboimuari pie, opi Belaari (angu nde Zoari’i) pie; yi nga yi oti a’di ’dizu yi be e’bu Sidimuaria; 9oti yi a’di ’dizu Kedorilaomeri opi Elamuari pi be, Tidali opi Goimuari pie, Amirafeli opi Sinariari pie, Arioki opi Elasariari pie; opi su a’di ’dizu opi towi be. 10#E’do 11:3; 19:17, 30Isu de e’bu Sidimuari ga tre ’bile oritaru ti’dati-’daru be ’diyisi; opi Sodomuari pi nga apa opi Gomoraari be ra, nga o’de ’dale, te ’ba acepi ’diyi apa oni vuleru. 11Yi nga afa dria Sodomu pia Gomora be ’diyi opa ra, nyaka yini be dria, nga di mvi yi ma gerisi; 12#E’do 11:31; 13:12; Yer 2:17, 19yi nga Lotini bi indi, eri Iburamu ma adripi ma mvi ovupi Sodomuari; bi eri ra, afa erini be, mvi yi be.

13 # E’do 14:24 ’Ba alu i papi rari nga emu ra, nga e’yoni olu Iburamu ’ba Ebraniani ma tia, eri de kumara Mamire ’ba Amorini Esikoli pi ma adripi Aneri berini ma tia ogogo; ’ba ’diyi yi ndra ’ba ti ecipi wa’diru Iburamu be ’diyi. 14#E’do 13:8; 17:27; 15:3; Ekl 2:7; Azi 34:1; Lip 18:29; Isa 41:2Iburamu ka eri kini bi i adripini ’bo, eri nga ’ba erini omba nipi, osile eri ma joa, turu na drini mudri drini aro ’diyi ma dri ce ’ba nde ’diyi ma vuti drozu kpere Dania. 15Eri nga ’ba erini oti eselesi a’di ’dizu yi be inisi, eri’i ati’ba erini be, nga yi ofu ra, nga yi odro kpere Hoba Damasiki ma kala dri ejialeruria. 16#1 Sam 30:8, 18, 19Eri nga afa omvi dria ra, omvi vini i adripi Lotini, afa erini pie, oku pie, ’ba nde be dria.

Melekizedekini asi ndriza fezu Iburamu driri

17 # 2 Sam 18:18 Opi Sodomuari nga efu dri fuzu eri be erini emviria, erini Kedorilaomeri pi ofuria opi eri be, ’diyi pie ’boria, e’bu Savenia (pari nde eri E’bu Opiniri’i). 18#Ebra 7:1-10; Zab 110:4; Mik 6:6; ’Yeta 16:17; Ebra 7:10-22Melekizedeki opi Salemuari nga mikate pi ofu patiefi ma su be; eri ovu ’ba edeta edepi Mungu Uru Turiniri’i. 19Eri nga asi ndriza fe eri dri, nga ’yo ra,

Mungu Uru Turi, ’bi pi ma ci nyaku beri ma fe asi ndriza Iburamu dri;

20 # Ebra 7:4 Mungu Uru Turi ma ru ma ovu inzizaru, eri ari’ba mini fepi mi dri ’bori’i!

Iburamu nga eri dri afa dria ma esele mudri ma azi aluri fe ra. 21Opi Sodomuari nga ’yo Iburamu ma tia, ’Baroni mi fe ma dri, te lonyiruri ma ovu di mini. 22#Dan 12:7; Eceza 10:5; Zab 24:1; Mat 11:25Iburamu nga ’yo opi Sodomuari ma tia, Ma enga ma dri oyo sozu Yehova Mungu Uru Tu ’bu pi ma e’iru nyaku beri vu, 23#Esi 9:15; 2 Kor 11:9-12kini ma ngani baka, kani afa enyiriko paari ecizuri, kani afa mini azini, a’i mi dri aluni ’de ku, mi kazu ’yozu, Ma fe Iburamuni ovuzu afa e’iru ma’i, ’dini ku; 24pe lu afa karileni nyale ’bori’i, azini afa ’ba mupi ma be ’diyini; Aneri pi, Esikoli pie, Mamire pie ma ’du esele yini.

Currently Selected:

E’doza 14: LB66

Highlight

Copy