मरकुस 5

दुष्टात्मा रे सताए मणू रा ठीक होणा

1यीशु गलीली समुन्द्र रे पार गिरासेनियों रे जिले बिच पूज्जे, 2जां यीशु किस्ती का उतरे तां तिस्सी बेल्ले इक्क मणू जिसेरे बिच दुष्टात्मा थी, से कब्रिस्तान बिच का निकली करी उन्हा जो मिल्लेया। 3से कब्रिस्तान बिच रैहन्दा थिया, ते कोई तिसजो संग्गलां कने भी नी बन्नी सकदा थिया, 4किजोकी से घड़ी-घड़ी बेड़ी ते संग्गलां कने बन्नेया गेया थिया, पर तिनिये संग्गलां जो भन्नी दित्तेया ते बेड़ियां रे टोट्टे-टोट्टे करी दित्ते थिये, ते कोई तिसजो वस अन्दर नी करी सकदा थिया। 5से दिन-रात्ती कब्रिस्तान ते पहाड़ियां बिच चिडां मारदा, ते अप्पु जो पत्थरां कनें जख्मी करदा थिया। 6से यीशु जो दुर का ही का दिख्खी करी तिन्हेरे पास्से दोड़ेया ते तिन्हेरे पैरां पर पेई करी तिन्हा जो प्रणाम कित्तेया, 7-8तां यीशु ने तिसजो बोल्लेया, “ओ दुष्टात्मा, इस मणू बिच का निकली आ!” ते जोर कने लेर मारी करी बोल्लेया, “ओ यीशु, परमप्रधान परमेश्वर रे पुत्तर, मेरा तुसा कने कै काम्म? मैं तुसा जो परमेश्वर री सौह् खुआई करी छंदे करदा कि मेरे जो कष्ट मत देयो।” 9यीशु ने तिसजो पूच्छेया, “तेरा नां कै है?” तिनिये यीशु जो बोल्लेया, “मेरा नां सैना है किजोकी असी मती सारी हिन।” 10ते तिनिये उन्हा का बड़ी बिनती कित्ती, “असां जो इस देस का बाह्र मत भेजदे।” 11उत्ते पहाड़ पर सूअरां रा इक्क बड्डा धण चरेया करदा थिया। 12दुष्टात्मां ने यीशु का बिनती कित्ती “असां जो उन्हा सूअरां बिच भेजी देयो कि असी उन्हेरे बिच समाई जाण।” 13अते यीशु ने उन्हेरे जो हुकम दित्तेया ते दुष्टात्मा निकली करी सूअरां बिच समाई गेई ते से धण, जे कोई दो हजार रा थिया, ढह्ढा का छाल मारी समुन्द्र बिच जाई पेया ते मरी गेया। 14उन्हेरे चराणे वाले ने नह्सी करी सहर ते ग्रां बिच जाई करी ए खबर सूणाई, ते जे होया थिया मणू तिसजो दिख्खणा आए 15ते यीशु का आई करी से तिस मणू जो जिसेरे बिच दुष्टात्मा थियां, मतलब जिसेरे बिच सैना बसी री थी, कपड़े पाए रे ते सातीं कने बैठ्ठा रा दिख्खी करी डरी गे। 16दिख्खणे वालेयां ने उसेरा, जिसेरे बिच दुष्टात्मा थियां, ते सूअरां रा पूरा हाल होर लोक्कां जो भी दस्सेया। 17तां से मणू यीशु का छन्दे करी के बोलणा लग्गे कि हमारे जगाह् का चली जा। 18जां यीशु किस्ती पर चढ़णा लग्गे तां से जिसेरे बिच दुष्टात्मा थियां तिन्हेरे छन्दे करणा लग्गेया, “मेरे जो अपणे कने रैह्णा देयो।” 19पर यीशु ने तिसजो मना करी दित्ता, ते तिसजो बोल्लेया, “अपणे घरे जाई करी अपणे लोक्कां जो दस्स कि तेरे पर तरस खाई करी परमेश्वर ने तेरे तांइ कदेय बड्डे कम्म कित्ते।” 20से मणू जाई करी दिकापुलिस जिले बिच इस गल्ल जो दसणा लग्गेया कि यीशु ने मेरे तांइ कदेय बड्डे कम्म कित्ते ते मते सारे मणू ए सुणी करी हरान हुदें थिये।

याईर री मरी री कुड़ी ते इक्क बिमार जनानी

21यीशु किस्ती पर गलीली समुन्द्र रे पार गे, तां इक्क बड्डी भीड़ तिन्हेरे का कठ्ठी गई से समुन्द्र रे नेड़े ही थिये कि 22याईर नां रे सभास्थल रे सरदारां बिच का इक्क आया, ते तिन्हेरे जो दिख्खी करी तिन्हेरे पैरां पर पेई गेया, 23ते ए बोल्ली करी तिन्हेरे बड़े छन्दे कित्ते, “मेरी हलकी कुड़ी मरणे वाली है: तुसा आई तिसेरे पर हत्थ रख्खो की से ठीक होई करी जिन्दी रे।” 24तां से फिरी यीशु ते तिन्हेरे चेल्‍ले, याईर कने चली पे ते बड्डी भीड़ तिन्हेरे पीच्छे चली पेई, इत्ते तिकर की मणू तिन्हेरे पराल्ले पेया करदे थिये। 25इक्क जनानी थी, जिस जो बारां साल्लां का खून चलणे री बीमारी थी। 26तिनिए बड़े वैद्दां का इलाज कराया, ते अपणी सारी जायदाद खर्च करणे पर भी तिसजो किच्‍छ भी फैदा नी होया थिया, पर होर भी बिमार होई गई थी। 27से यीशु री मसहुरी सुणी करी भीड़ बिच तिन्हेरे पीच्छे का आई ते तिन्हेरे कपड़ेया जो छुई लेया, 28किजोकी से बोलदी थी, “जे ए तिन्हेरे कपड़े ही छुई लिह्गिं तां ठीक होई जाणा।” 29ते तिस्सी बेल्ले तिसेरा खून निकलणा बांद्द होई गेया, ते तिन्हा ने अपणी जिस्म बिच जाणी लेया कि मैं तिस बीमारी का ठीक होई गई री है। 30यीशु ने इक्क-दम अपणे बिच ए जाणी लेया की मेरे बिच का ताकत निकली, ते भीड़ बिच पीच्छे फिरी करी पूच्छेया, “मेरे कपड़े जो कुनिये छुए?” 31तिन्हेरे चेल्‍लेयां ने यीशु जो बोल्लेया, “तुसां दिखदे हिन की भीड़ तुसा पर पेया करदी है, ते तुसा पुछदे कि मेरे कपड़े कुसने छुए?” 32तां यीशु ने तिसजो दिखणे तांइ जिनिए तिन्हेरे कपड़े छुए थिये, चारों पास्से नजर फेरी, 33तां से जनानी ए जाणी करी की मेरे कने कदेया खरा होया, डरदी ते कबंदी होई आई (किजोकी मूसा रे नियम रे हिसाब कने तिस बीमारी वाले मणू समाज बिच नी आई सकदे थिये), ते तिन्हेरे पैरां पर पेई करी तिन्हा कने सारा हाल सच-सच बोल्ली दित्ता। 34यीशु ने तिसजो बोल्लेया, “कुड़िए तेरे भरोसे ने तेरे जो ठीक कित्ता: राजी खुसी जा, ते अपणी इस बीमारी का बची रेय।” 35यीशु हल्ले तिस जनानी कने गल्ल करेया ही करदे थिये ही करदे थिये कि सभास्थल रे सरदार याईर रे घरे रे लोक्कां ने आई करी बोल्लेया, “तेरी कुड़ी तां मरी गई, अवे गुरु जी जो तगं मत कर।” 36से मणू जे गल्लां बोल्लेया करदे थिये तिसजो यीशु ने अनसुणा करी के, सभास्थल रे सरदार याईर जो बोल्लेया, “मत डर सिर्फ विश्वास रख।” 37ते यीशु सिर्फ पतरस ते याकूब ते याकूब रे भाई यूहन्ना जो अपणे कन्ने आणा दित्ता। 38ते याईर रे घरे पूज्जी करी, यीशु ने लोक्कां जो बड़ा मातम मणादे दिख्खेया, 39तां यीशु ने अन्दर जाई करी तिन्हा लोक्कां जो बोल्लेया, “तुसां किजो रोन्दे ते मातम हिन मणादे? कुड़ी मरी नी, पर सोया करदी है।” 40ए सुणी करी से मणू यीशु रा मजाक उडाणा लग्गे पर तिन्हा ने सारेयां जो कड्डी करी कुड़ी रे मां-प्यो ते अपणे चेल्लेया कने अन्दर गे जित्ते कुड़ी पेई री थी। 41ते कुड़ी रा हत्थ पकड़ी करी तिसजो बोल्लेया, “तलिता कुमी” जिसेरा मतलब है, “ओ कुड़ी, मैं तिज्जो बोलदा, उठ।” 42ते से कुड़ी जे बारा साल्ले री थी, तिस्सी बेल्ले उठी करी चलणे फिरणे लग्गी। इस पर मणू बड़े हैरान होए। 43फिरी यीशु ने तिन्हा लोक्कां जो बड़ा समझाई करी हुकम दित्ता कि ए गल्ल कुसकी जो पता ना लग्गे, ते बोल्लेया, “इसजो किच्‍छ खाणे जो देयो।”

Currently Selected:

मरकुस 5: CDHNT

Highlight

Copy