मरकुस 6
6
नासरत बिच यीशु रा बेज्जती
1कफरनहूम सहर का निकली करी यीशु ते तिन्हेरे चेल्ले नासरत बिच आए, 2विश्राम दिन से सभास्थल बिच उपदेस दैणे लग्गेया, ते मते सारे मणू सुणी करी हैरान होए। मणू बोलणा लग्गे, “इसजो इदेयी समझ ते चमत्कार करणे री ताकत कुते का मिल्ली?” 3तां से मणू अप्पु अंदर बोलणा लग्गे, ए तां मरियम रा मुंडा है जे मिस्त्रि है, ते ए याकूब, योसेस, यहूदा, ते शमौन रा भाई है। ते इसेरी भैणा भी असा रे बिच ही रैहन्दी। तिन्हा लोक्कां ने यीशु पर विश्वास ई कित्तेया ते तिन्हेरी बेज्जती कित्ती। 4यीशु ने तिन्हा लोक्कां जो बोल्लेया, “भविष्यद्वक्ता री अपणे सहर, ते अपणे रिस्तेदारां, ते अपणे घर जो छड्डी करी होर कुते भी बेज़्ज़ती नी हुंदी।” 5यीशु तिस जगाह् पर होर कोई चिन्ह-चमत्कार रा कम्म नी करी सकेया, वस थोड़े जणे बिमारां पर हथ रख्खी करी तिन्हेरे जो ठीक कित्तेया। 6ते यीशु जो तिन्हा लोक्कां रे घट विश्वास पर हरानी होई, ते से चारो पास्से रे ग्रां बिच भाषण दिंदा फिरदा रेया।
बारा चेल्लेयां जो भेजणा
7यीशु ने अपणे बारा चेल्लेयां जो अपणे नेड़े सद्देया ते तिन्हेरे जो दो-दो करी के भेजणा लग्गे ते उन्हा जो दुष्टात्मा पर हक्क दित्तेया। 8यीशु ने चेल्लेयां जो हूक्कम दित्तेया, “रस्ते तांइ सोठी जो छड्डी करी होर किच्छ होर मत लिन्दे, ना तां रोट्टी, ना तां झोली, ना तां बटुए बिच पैसे, 9जूत्ते तां पाओ पर दो-दो कुरते मत लेई करी जान्दे।” 10ते यीशु ने अपणे चेल्लेयां जो बोल्लेया, “जिस कुसी घर बिच जाओ, तां जां तिकर उत्ते का निकली ना जाओ तां तिकर तिस्सी घर बिच ही ठैहरे रेयो। 11जिस जगाह् रे मणू तुसा जो ना अपनाण ते तुसा री ना सूणन, उत्ते का जादें ही अपणे तलियां री धूड़ झाड़ सूट्टो ताकि ए तिन्हा लोक्कां रे खलाफ ए गवाई हो कि तिन्हा ने तुसा री गल्ल नी सूणी।”
12तां उन्हा ने जाई करी प्रचार कित्तेया कि तौबा करो ते परमेश्वर का हटी आओ। 13ते तिन्हा ने मते लोक्कां बिच का दुष्टात्मां जो कड्डेया, ते मते सारे बिमारां पर तेल मली करी तिन्हा जो ठीक कित्तेया।
यूहन्ना बपतिस्मा दैणे वाले रा खून होणा
14हेरोदेस राज्जे ने भी यीशु री गल्लां सूणी, किजोकी यीशु रा नां फैल्ली गे रा थिया, ते हेरोदेस राज्जे ने बोल्लेया, “ए यूहन्ना बपतिस्मा दैणा वाला मरेयां बिच का जिन्दा होई गे रा है, इस तांइ से इदेय चिन्ह-चमत्कार करदे।” 15होर लोक्कां ने बोल्लेया, “ए एलिय्याह भविष्यद्वक्ता है,” पर किच्छ होर लोक्का ने बोल्लेया, “भविष्यद्वक्ता या भविष्द्वक्तां बिच का कुसकी इक्क सांई है।” 16हेरोदेस राज्जे ने सुणी करी बोल्लेया, “जिस यूहन्ना रा सर मैं कटवाया थिया, से ही जिन्दा होई गे रा है।” 17हेरोदेस राज्जे ने अपणे भाई फिलिप्पुस री लाड़ी हेरोदियास री वजह कने, जिस कने तिनिये ब्याह करी लित्तेया थिया, लोक्कां जो भेज्जी करी यूहन्ना जो पकड़व़ाई करी जेल बिच पुआई दित्तेया थिया। 18किजोकी यूहन्ना बपतिस्मा दैणे वाले ने हेरोदेस राज्जे जो बोल्लेया थिया, “अपणे भाई री लाड़ी जो रखणा तेरे जो ठीक नी है।” 19इस तांइ हेरोदियास उस का नफरत करदी थी ते ए चांह्दि थी कि तिसजो मरवाई रख्खे पर इय्यां नी होई सकेया, 20किजोकी हेरोदेस यूहन्ना जो धार्मिक ते पवित्र मणू समजी करी उस का डरदा थिया, ते तिसजो बचाई रखदा थिया ते उसेरी गल्ल सुणी करी बड़ा डरदा थिया पर खुसी कने सूणदा थिया। 21हेरोदियास ने हेरोदेस राज्जे रे जन्मदिन रे मौक्के रा फैदा चुक्केया जां हेरोदेस राज्जे ने अपणे प्रधान्नां, सेनापती ते गलील प्रदेश रे बड्डे लोक्कां ताई धाम पाए री थी। 22तां हेरोदियास री कुड़ी अन्दर आई, ते नच्ची करी हेरोदेस जो ते उसेरे कन्ने बैणे वालेयां जो खुस कित्तेया। तां राज्जे ने कुड़ी जो बोल्लेया, “तू जे चाह्दीं मेरे का मग्गं मैं तेरे जो दैणा।” 23ते तिस कुड़ी कने कसम खाई करी बोल्लेया “मैं अपणे अद्दे राज तिकर जे किच्छ तैं मेरे का मग्गंणा मैं तेरे जो देई दैणा।” 24तिनिये बाह्र जाई करी अपणी मां का पूच्छेया, “मैं कै मग्गां?” हेरोदियास ने बोल्लेया, “यूहन्ना बपतिस्मा दैणे वाले रा सर।” 25से तिस्सी बेल्ले राज्जे का अन्दर आई ते उसेरे का बिनती कित्ती, “मैं चाह्दि कि तू अब्बे ही यूहन्ना बपतिस्मा दैणे वाले रा सर इक्क थाल बिच मेरे जो मग्गांई दे।” 26तां राज्जा बड़ा उदास होया, पर अपणी कसम री वजह कने ते कन्ने बैह्णे वालेया री वजह कने उसेरे जो टालणा नी चाह्या। 27ते राज्जे ने इक्क सिपाई जो हुकम देई करी तिसी बेल्ले भेज्जेया कि तिसेरा सिर कटवाई करी लेई आए। 28तिनिये जेल बिच जाई करी उसेरा सिर कट्टेया ते इक्क थाल बिच रख्खी करी लेई आया ते कुड़ी जो दित्तेया, ते कुड़ी ने अपणी मां जो देई दित्तेया। 29ए सुणी करी यूहन्ना रे चेल्ले आए, ते उसेरी लास जो लेई गे ते कब्र बिच दब्बी दित्तेया।
चेल्लेयां रा वापस आणा ते यीशु रा किल्ला रैह्णा
30प्रेरितां ने हटी करी यीशु रे नेड़े कठ्ठी गे ते जे किच्छ तिन्हा ने कित्तेया ते सिखाया थिया, सारा किच्छ यीशु जो दस्सी दित्तेया। 31यीशु ने चेल्लेयां जो बोल्लेया, “असी कुसकी किल्ली जगाह् बिच जाई करी अराम करी लिंदे।” किजोकी मते मणू तित्ते आदें-जादें थिये, ते तिन्हा जो खाणे रा भी मौक्का नी मिल्लेया। 32इस तांइ यीशु ते तिन्हेरे चेल्ले किस्ती पर चढ़ी करी किल्ली जगाह् पर अलग चली गे।
पांज्ज हजार मणूआं जो खुआणा
33मते लोक्कां ने यीशु ते तिन्हेरे चेल्लेयां जो जादें दिख्खी करी पैह्चाणी लेया, ते मते सारे मणू कस्बे का कठ्ठे होई करी उत्ते पैदल दौड़े ते उन्हेरे का पैल्ले पूज्जी गे। 34यीशु ने उतरी करी बड्डी भीड़ दिख्खी, ते तिन्हा पर तरस खाया, किजोकी से तिन्हा भेड़ां सांई थियां, जिन्हेरा कोई रखवाला ना हो, ते से तिन्हा लोक्कां जो मती सारी गल्लां सिखाणा लग्गी पेय। 35जां सांज्ज होणे वाली थी, तां उन्हेरे चेल्ले यीशु का आई करी बोलणा लग्गे, “ए सुनसान जगाह् है, ते सांज्ज भी होणे वाली है। 36इन्हा लोक्कां जो भेज्जी देयो कि नेड़े-तेड़े रे ग्रां या बस्ति बिच जाई करी, अपणे तांइ किच्छ खाणे जो खरीदी लैण।” 37यीशु ने अपणे चेल्लेयां जो जवाब दित्तेया, “तुसी ही इन्हा लोक्कां जो किच्छ खाणे जो देयो।” चेल्लेयां ने यीशु जो बोल्लेया, “क्या असी दो सौ दीनार #6:37 1 इक्क दीनार, इक्क रोज री धियाड़ी जो बोलदे।(दो सौ दिनां री धियाड़ी) री रोट्टियां खरीदी लैण ते उन्हेरे जो खिलाण?” 38यीशु ने चेल्लेयां जो बोल्लेया, “जाई करी दिख्खो कि तुसा का किन्नी रोट्टियां हिन?” चेल्लेयां ने पता करी के दस्सेया, “पाज्जं रोट्टी ते दो मच्छियाँ भी हिन।” 39तां यीशु ने चेल्लेयां जो हुकम दित्तेया कि सारेयां जो हरी घा पराले छोटे-छोटे गुट बणाई करी के बेठाई देयो। 40से सौ-सौ ते पजां-पजां रे गुट बणाई करी बेई गे। 41यीशु ने तिन्हा पाज्जं रोट्टियां ते दो मच्छियाँ जो चुक्केया, ते स्वर्ग पास्से दिख्खी करी परमेश्वर रा धन्यवाद कित्तेया, ते रोट्टियां तोड़ी-तोड़ी करी चेल्लेयां जो दिंदा गे कि से लोक्कां जो दिंदे जाण, ते से मच्छियाँ भी उन्हा सारेयां बिच बंड्डी दित्ती। 42सारे खाई करी रज्जी गे। 43जां मणू रोट्टी खाई बैठ्ठे तां रोट्टी ते मच्छी रे बारा टोकरे बचे रे थिये। 44रोट्टी खाणे वाले लगभग पाज्जं हजार आदमी थिये।
यीशु रा पाणी पर चलणा
45तां यीशु ने तिस्सी बेल्ले अपणे चेल्लेयां जो किस्ती पर चढ़ने तांइ मजबूर कित्तेया कि जां तिकर यीशु तिन्हा लोक्कां जो भेजण तां तिकर चेल्ले यीशु का पैल्ले उस पार बैतसैदा रे कस्बे जो चली जाण। 46चेल्लेयां जो भेजी करी यीशु पहाड़ पर प्रार्थना करणे जो चली गे। 47रात्ती बेल्ले चेल्लेयां री किस्ती समुन्द्र रे बिच थी ते यीशु किल्ले किनारे पर थिये। 48यीशु ने दिख्खेया कि से बड़ी मुसीबत बिच हिन, किजोकी ब्यार तिन्हेरे पुठ्ठे पास्से रे थी, तां रात्ती रे त्रै बजे रे नेड़े से समुन्द्र पर चलदे होए चेल्लेयां रे नेड़े आए ते तिन्हेरे का अग्गे निकली जाणा चाह्ंदे थिये, 49पर चेल्लेयां ने यीशु जो झील पर चलदे दिख्खी करी समजेया कि से भूत हिन, ते चिडां मारणा लगे 50किजोकी सारे उन्हा जो दिख्खी करी डरी गेरे थिये पर यीशु ने तिस्सी बेल्ले चेल्लेयां कने गल्लां कित्ती ते बोल्लेया, “हिम्मत रख्खो: मैं है, डरो मत!” 51तां यीशु ने तिन्हेरे नेड़े किस्ती पर आया, ते ब्यार रुकी गेई ते से बड़े ही हैरान होणा लग्गे। 52चेल्ले अपणे मन री सख्ती री वजह कने तिन्हा चमत्कारां रे बारे बिच समजी नी सके थिये।
गन्नेसरत बिच बिमारां जो ठीक करणा
53यीशु ते तिन्हेरे चेल्ले गलीली समुन्द्र जो पार करी के गन्नेसरत जिले जो पूज्जे, ते किस्ती कनारे पर लाई। 54जां यीशु ते तिन्हेरे चेल्ले किस्ती का उतरे, तां मणू तिन्हा जो दिखदे ही पहचाणी गे। 55ते दौड़ी करी सारे इलाक्के रे बिमारां मणूआं जो मन्जेया पर पाई करी जित्ते से हुंदे थिये तित्ते लेई जांदे थिये। 56ते जिस कुसकी सहर, या बस्तियां बिच यीशु जांदे थिये, मणू बिमारां जो बजारां बिच रख्खी करी उन्हा का बिनती करदे थिये कि से तिन्हा बिमार लोक्कां जो अपणे कपड़े रे पल्ले जो ही छुई लैणा दैण : ते जिनिये यीशु जो छूदें थिये से सारे ठीक होई जादें थिये।
Currently Selected:
मरकुस 6: CDHNT
Highlight
Share
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
