मत्ती 27
27
पिलातुस रे सामणे यीशु
1भ्याग हुन्दे ही सारे बड्डे पुरोत्तां, मन्दिर रे बुजुर्गां अते शास्त्रियां ने यीशु जो मारी रखणे री सलाह कित्ती। 2तिन्हा ने यीशु जो बन्नी दित्तेया, ते लेई जाई करी पिलातुस हाकिम रे हत्थां सौपीं दित्ता।
यहूदा रा आत्म-हत्या करणा
3जां तिन्हेरे पकड़वाणे वाले यहूदा जो पता लग्गेया कि यीशु जो गुनेह्गार साबत करी के मौत री सजा सूणाई दित्ती गे री है, तां से अपणी करणी पर पछताया ते से तीह् चाँदी रे सिक्केयां जो बड्डे पुरोत्तां ते बुजुर्ग मणू का हटाई लाया, 4ते बोल्लेया, मैं बेगुनाह मणू जो मरवाणे तांइ पकड़वाई करी पाप कित्तेया, तिन्हा ने बोल्लेया, असा जो तिसेरी कोई परवाह नी? से तेरी दिक्कत है। 5तां से तिन्हा सिक्केयां जो मन्दिर रे अंगण बिच सूटी करी चली गेया, ते जाई करी अप्पु जो फाह लाई लित्ता। 6बड्डे पुरोत्त ने तिन्हा सिक्केयां जो लेई करी बोल्लेया, इन्हा जो मन्दिर रे भडांर बिच रखणा मूसा रे कानून रे हिसाब कने ठीक नी किजोकी ए खून करणे री कीमत है। 7अते तिन्हा ने सलाह करी के तिन्हा सिक्केयां कने परदेसियां रे गाढ़े जाणे तांइ कुम्हार रे खेत्तर जो खरीदी लित्तेया। 8इस तांइ से खेत्तर आज तिकर खून रा खेत्तर केहलादां। 9तां जे वचन यिर्मयाह भविष्यद्वक्ता रे जरिए दस्सेया गेया थिया, से पूरा होई गेया,
“इस्राएल रे लोक्कां ने जे कीमत तिसेरी ठैहराई थी, तिन्हा ने से तीह् चाँदी रे सिक्के लेई लित्ते।
10ते जिय्यां परमेश्वर ने मेरे जो हुकम दित्तेया थिया, तिय्यां ही तिन्हा ने तिन्हा सिक्केयां कने कुम्हार रे खेत्तर रे खरीदी लित्तेया।”
पिलातुस रे सवाल
11जां यीशु हाकिम रे सामणे खड़ित्ते रे थिये तां हाकिम ने तिन्हा जो पूच्छेया, कै तू यहूदियां रा राज्जा है? यीशु ने तिसजो बोल्लेया, तू अप्पु ही ए बोल्लेया करदा है। 12जां बड्डे पुरोत्त ते बुजुर्ग मणू तिस पर इल्जाम लाया करदे थिये, तां तिन्हा ने कोई जवाब नी दित्ता। 13इस पर पिलातुस ने तिन्हा जो बोल्लेया, कै तू नी सूणदा कि ए तेरे खिलाफ किन्नी गल्लां बोल्लेया करदे हिन। 14पर तिन्हा ने तिसजो इक्क भी गल्ल रा जवाब नी दित्तेया, इत्ते तिकर राज्यपाल जो बड़ी हैरानी होई।
मौत री सजा रा हुकम
15हाकिम रा ए रीवाज थिया कि तिस त्योहर बिच लोक्कां तांइ कुसकी इक्क कैदी जो जिस जो से चाह्ंदे थिये, छड्डी दिंदा थिया। 16तिस बेल्ले तिन्हेरे इत्ते बरअब्बा ना रा इक्क मन्ने रा कैदी थिया। 17अते जां से कठिये, तां पिलातुस ने तिन्हेरे जो बोल्लेया तुसा कुस जो चाह्ंदे की मैं तुसा तांइ छड्डी देयां? बरअब्बा जो या यीशु जो जे मसीह यीशु केहलादें? 18किजोकी से जाणदा थिया की तिन्हा ने तिन्हेरे जो चलाकी कने पकड़वाया रा है 19जां से हिसाब-किताब री गद्दी पर बैठ्ठे रा थिया तां तिसेरी लाड़ी ने तिसजो बोल्ली भेज्जेया, तू तिस धार्मिक रे मामले बिच हत्थ मत पादां, किजोकी मैं अज्ज सुपने बिच तिसेरी वजह कने बड़ी तकलीफ झेलि री है। 20बड्डे पुरोत्त ते बुजुर्ग मणू ने लोक्कां जो उकसाया कि से बरअब्बा जो मगीं लैण ते यीशु रा खातमा करवाण। 21हाकिम ने तिन्हेरे जो पूच्छेया, इन्हा दोन्नां बिच का कुस जो चाह्ंदे की मैं तुसा तांइ छड्डी देयां? तिन्हा ने बोल्लेया, बरअब्बा जो। 22पिलातुस ने तिन्हेरे जो पुच्छेयाफिर यीशु जो, जे मसीह यीशु केहलादां कै करां? सारेयां ने तिन्हा जो बोल्लेया से सुली पर चढ़ाया जाए। 23हाकिम ने बोल्लेया, किजो, तिसने कै बुराई कित्ते री है? पर से होर भी चिल्लाई करी बोलणा लग्गे, से सुली पर चढ़ाया जाए। 24जां पिलातुस ने दिख्खेया कि किच्छ भी नी बणेया करदा है पर तिसेरे उलट हगांमा बदेया जाया करदा है तां तिनिये पाणी लेई करी भीड़ रे सामणे अपणे हत्थ धोए ते बोल्लेया मैं इस धार्मिक रे खून का बेगुनाह है तुसा ही जाणो। 25सब लोक्कां ने जवाब दित्ता, इसेरे खून रा जिम्मा असा पर ते असा रे औलादां पर हो! 26इस पर तिसने बरअब्बा जो तिन्हेरे तांइ छड्डी दित्तेया, ते यीशु जो कोड़े लगवाई करी तिन्हेरे जो देई दित्ता की सुली पर चढ़ाया जाए।
सपाईयां रा यीशु रा मजाक उड़ाणा
27तां हाकिम रे सपाईयां ने यीशु जो किले बिच लेई जाई करी सारी पलटन तिन्हेरे चारो पास्से कठेरी, 28ते तिन्हेरे कपड़े उतरवाई करी तिन्हेरे जो लाल रगं रा बागा पुआया, 29ते कंडेया रा मुकुट दबाई करी तिन्हेरे सिर पर रख्खेया ते तिन्हेरे सज्जे हत्थ बिच नलू दित्तेया ते तिन्हेरे अग्गे घुटने टेकी करी तिन्हेरा मजाक उड़ाणा लगे ते बोल्लेया, ओ यहूदियां रे राज्जे, नमस्कार! 30ते तिन्हेरे पर थूक्केया ते से ही नलू लेई करी तिन्हेरे सिर पर मारणा लग्गे। 31जां से तिन्हेरा मजाक उड़ाई बैठे तां से बागा उतरवाई करी फिर तिन्हेरे ही कपड़े तिन्हेरे जो पहनाए ते सुली पर चढ़ाणे तांइ लेई चले।
यीशु रा सुली पर चढ़ाया जाणा
32बाहर जादें बेल्ले तिन्हेरे जो शमौन नां रा इक्क कुरेनी मणू तिन्हेरे जो मिल्लेया तिन्हा ने तिसजो बेगार बिच पकड़ेया की से तिन्हेरा सुली चुकी करी लेई चले। 33तिस जगाह् पर जे गुलगुता मतलब की खोपड़ी री जगाह् केहलादां पूज्जी करी। 34तिन्हा ने पित्ता मिल्ले रा अंगूर रा रस्स तिन्हेरे जो पीणे तांइ दित्तेया पर तिन्हा ने चखी करी पीणा नी चाएया। 35तां तिन्हा ने तिन्हा जो सुली पर चढ़ाया, ते चीठ्ठियां पाई करी तिन्हेरे कपड़े बडीं लित्ते। 36ते तित्ते बेई करी तिन्हेरा पैह्रा दैणा लग्गे, 37ते तिन्हेरा दोष-पत्तर तिन्हेरे सिर का उप्पर लाया कि ए यहूदियां रा राज्जा यीशु है। 38तां तिन्हेरे कने दो डाकू इक्क सज्जे पास्से ते दुआ खब्बे पास्से, सुली पर चढ़ाए गे, 39आणे-जाणे वाले सिर हिलाई-हिलाई करी तिन्हेरा बेजती करेया करदे थिये। 40ते बोलदे थिये, ओ मन्दिर रे तोड़ने वाले ते त्रै दिनां बिच बणाणे वाले अप्पु जो तां बचा! जे तू परमेश्वर रा पुत्तर है तां सुली पर का उतरी आ। 41इसी तरिक्के कने बड्डे पुरोत्त भी शास्त्रियां ते बुजुर्ग मणू समेत मजाक उड़ाई-उड़ाई करी बोलदे थिये, 42इनिये होरां जो बचाया, ते अप्पु जो नी बचाई सकदा ए तां इस्राएल रा राज्जा है अवे सुली का थल्ले उतरी आए तां असी तिस पर विश्वास करण। 43तिसने परमेश्वर पर विश्वास रखे रा है जे से इसजो चाह्ंदे तां अवे इसजो छुड़ाई लेय, किजोकी इसने बोल्लेया थिया मैं परमेश्वर रा पुत्तर है। 44इसी तरिक्के कने डाकू भी जे तिन्हेरे कने सुली पर चढ़ाए गेरे थिये इसी तरिक्के कने तिन्हेरा मजाक उड़ाया करदे थिये।
यीशु रा मरणा
45दोपहर का लेई करी त्रिये पहर तिकर तिस सारे देस बिच न्याहरा होई गेया। 46त्रिये पहर रे नेड़े यीशु ने बड़ी जोर कने हक्क लाई करी बोल्लेया, एली एली लमा शबक्तनी। मतलब ओ मेरे परमेश्वर, ओ मेरे परमेश्वर, तुसा मेरे जो किजो छड्डी दित्तेया? 47जे तित्ते खड़ित्ते रे थिये तिन्हा बिच का किन्नेयां ने ए सुणी करी बोल्लेया, से तां एलिय्याह जो सद्देया करदा है, 48तिन्हा बिच का इक्क तिसी बेल्ले दोड़ेया, ते स्पंज लेई करी सिरके बिच डुबाया, ते नलू रख्खी करी तिन्हा जो चुसाया। 49ते तिन्हा जो बोल्लेया, रुकी जाओ, दिखदे एलिय्याह तिसेरी जान बचाणे आदां या नी। 50तां यीशु ने फिरी बड़ी हक्क लाई करी साह छड्डी दित्ते। 51ते दिख्खो, मन्दिर रा परदा उप्पर का लेई करी थल्ले तिकर फटी करी दो टोट्टे होई गेया ते दुनिया हिली गई ते चट्टानां त्रिड़की गेई। 52ते कब्रां खुली गेई, ते मरे रे परमेश्वर रे मते सारे मणू फिरी जिन्दा होई गे। 53ते तिन्हेरे फिरी जिन्दा होणे रे बाद से कब्रां बिच का निकली करी पवित्र नगर बिच गे ते मते लोक्कां जो दिस्से। 54तां सूबेदार ते जे तिन्हेरे कने यीशु रा पैह्रा देया करदे थिये, हिल्लण ते जे किच्छ होया थिया तिसजो दिखिकरी बड़े वरी डरी गे ते बोल्लेया, सच्ची ए परमेश्वर रा पुत्तर थिया! 55तित्ते मती सारी जनानियां जे गलील का यीशु री सेवा करदे होए तिन्हेरे कने आई री थी, दुर का ए सब किच्छ दिख्खेया करदी थी। 56तिन्हा बिच मगदला सहर री मरियम, ते याकूब ते योसेस री माता मरियम, ते जब्दी रे पुत्तरां री मां थी।
यीशु रा दब्बेया जाणा
57जां सांज्ज होई ता यूसुफ नां रा अरिमतिया का इक्क अमीर मणू जे अप्पु भी यीशु रा चेल्ला थिया, आया। 58तिसने पिलातुस का जाई करी यीशु री लास मगीं इस पर पिलातुस ने देई दैणे रा हुकम दित्ता। 59यूसुफ ने लास लित्ती, तिसजो चमकदार चद्दर बिच लपेटेया, 60ते तिसजो अपणी नोयी कब्र बिच रख्खेया, जे तिसने चट्टान बिच खुदवाई थी ते कब्र रे दरवाज्जे पर बड्डा बट्टा लुड़काई करी चली गेया। 61मगदला सहर री मरियम ते दुई मरियम तित्ते कब्र रे सामणे बैठे री थी।
कब्र पर पैहरा
62अगले दिन, विश्राम दिन पर बड्डे पुरोत्तां ते फरीसी लोक्कां ने पिलातुस जो कठ्ठी करी बोल्लेया, 63ओ महाराज, असा जो याद है की तिस भरमाणे वाले ने जां से जिन्दा थिया, बोल्लेया थिया, मैं मेरे मरणे रे बाद तिज्जे दिन पर जिन्दा होई जाणा। 64अते हुकम देयो की त्रिये दिन तिकर कब्र पर पैहरा रख्खेया जाए, इय्यां ना हो की तिसेरे चेल्ले आई करी तिसेरी सरीर जो चोरी करी के लेई जाण ते लोक्कां जो बोलणा लग्गे, से मरेयां बिच का जिन्दा होई गे रा है, तां ए धोख्खा पैल्ले वाले तिस धोख्खे का भी बुरा होणा जां तिसने बोल्लेया थिया कि मैं मसीह है। 65पिलातुस ने तिन्हा जो बोल्लेया, तुसा का पैहरेदार तां हिन जाओ, जिय्यां तुसा जो सही लग्गे, तिय्यां रखवाली करो। 66अते से पैहरेदारां जो कन्ने लेई करी गे, ते कब्र जो बट्टे कने ढकी करी तिस बट्टे पर मौहर लाई करी कब्र री रखवाली कित्ती ताकि कोई तिसजो हटाई ना सके।
Currently Selected:
मत्ती 27: CDHNT
Highlight
Share
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
