मत्ती 26
26
यीशु रे खिलाफ चाल
1जां यीशु ए सारी गल्लां बोल्ली बैठे तां अपणे चेल्लेयां जो बोलणा लग्गे, 2तुसा जाणदे की दो दिनां बाद फसह रे त्याहार है ते मणू रा पुत्तर, जे मैं ही है सुली पर चढ़ाए जाणे तांइ पकड़वाया जाणा।
3तां बड्डे पुरोत्त ते प्रजा रे बुजुर्ग मणू काईफा नां रे प्रधान पुरोत्त रे अगँणे कठ्ठी गे, 4ते अप्पु बिच सलाह करण लगे की यीशु जो चलाकी कने पकड़ी करी मारी रखण। 5पर से बोलदे थिये, पर्व रे बेल्ले नी कुथकी इय्यां ना हो की लोक्कां रे मन बिच बलवा मची जाए।
यीशु पर कीमती इत्र रा छिड़काव
6जां यीशु बैतनिय्याह बिच शमौन कोढ़ी रे घरे थिया। 7तां इक्क जनानी सगंमरमर रे बर्तन बिच कीमती इत्तर लेई करी तिसका आई, ते जां से रोटी खाणे तां बैठे रे थिये तां तिन्हेरे सिर पराल्ले उन्धेरी दित्तेया। 8ए दिख्खी करी तिन्हेरे चेल्ले गुस्से होए ते बोलणा लगे, इसेरी बर्बादी किजो कित्ती गई? 9इसजो तां अच्छे दाम पर बेच्ची करी गरीब्बां बिच बडेंया जाई सकदा थिया। 10ए जाणी करी यीशु ने तिन्हा जो बोल्लेया, जनानी जो किजो तगं करेया करदे हिन? तिसने मेरे कने अच्छाई कित्ती।
11गरीब तां तुसा कने हमेसा रैहन्दे, पर मैं तुसा कने हमेसा नी रैह्णा। 12इनिये मेरे सरीर पर जे ए इत्तर उन्धेरे रा है, ए मेरे गाढ़े जाणे तांइ कित्ते रा है। 13मैं तुसा कने सच बोलदा, की सारी दुनिया बिच जित्ते कुथकी ए सुब बसेख दस्सेया जाणा, तित्ते इसेरे इस कम्म रा जिकर भी इसेरी याद बिच कित्तेया जाणा।
यहूदा इस्करियोती रा धोखा दैणा
14तां यहूदा इस्करियोती ने, जे बारा चेल्लेयां बिच का इक्क थिया बड्डे पुरोत्त का जाई करी ए बोल्लेया।
15जे अगर मैं तिसजो तुसा रे हत्थ पकड़वाई देयां तां मेरे जो कै दिगें? तिन्हा ने तिसजो तीह् चाँदी रे सिक्के तौली करी देई दित्ते। 16ते से तिसी बेल्ले का तिन्हेरे जो पकड़वाणे रा मौक्का तोपणा लग्गेया।
चेल्लेयां कने फसह री आखरी धाम
17अखमीरी रोट्टी रा त्योहर रे पैल्ले दिन, चेल्ले यीशु का आई करी पूच्छणा लग्गे, तुसा कुते चाह्ंदे की असी तुसा तांइ फसह री रोट्टी खाणे री तयारी करण? 18तिन्हा ने बोल्लेया, नगर बिच अमुक मणू का जाई करी तिसजो बोल्लो की गुरु बोलदे की मेरे बेल्ला नेड़े है, मैं अपणे चेल्लेयां कने तेरे इत्ते फसह रा त्याहार मनाणा। 19अते चेल्लेयां ने से ही कित्तेया जिय्यां यीशु ने तिन्हा जो करणे तांइ बोल्लेया थिया, ते फसह री रोट्टी त्योहर कित्ती। 20जां सांज्ज होई तां से बारा चेल्लेयां कने रोट्टी खाणे तांइ बैठ्ठे। 21जां से खाया करदे थिये तां तिन्हा ने बोल्लेया, मैं तुसा कने सच बोलदा की तुसा बिच का इक्क ने मेरे जो पकड़वाणा। 22इस पर से बड़े उदास होए, ते हर इक्क तिन्हा का पूच्छणा लग्गेया, ओ गुरु, कै से मैं है। 23तिन्हा ने जवाब दित्तेया, जिस ने मेरे कने थाली बिच हत्थ पाए रा है तिनिये ही मेरे जो पकड़वाणा। 24मणू रा पुत्तर, जे मैं ही है तां जदेया तिसेरे बारे बिच लिख्खे रा है, मरणा जरुरी है पर तिस मणू तांइ अफसोस है जिसेरे वजह कने मणू रा पुत्तर, जे मैं ही है पकड़वाया जादां: जे तिस मणू रा जन्म ही नी हुदां तां तिसेरे तांइ भला हुदां। 25तां तिसेरे पकड़वाणे वाले यहूदा ने बोल्लेया, ओ गुरु कै से मैं है? तिन्हा ने तिसजो बोल्लेया, तू बोल्ली बैठा।
प्रभु भोज
26जां से खाया करदे थिये तां यीशु ने रोट्टी लित्ती ते आशीष मगीं करी तोड़ी, ते चेल्लेयां जो देई करी बोल्लेया, लेयो, खाओ ए मेरा सरीर है।
27फिरी तिन्हा ने कटोरा लेई करी शुक्रिया कित्ता, ते तिन्हा जो देई करी बोल्लेया, तुसा सारे इस बिच का पीयो, 28किजोकी ए मेरा वाचा रा से खून है, जो मतेयां रे पाप्पां री माफी तांइ बहाया जादां। 29मैं तुसा कने सच बोलदा की अंगूर रा ए रस्स तिस दिन तिकर कदी नी पिगां जां तिकर तुसा कने अपणे पिता रे राज बिच नौआ ना पीयां। 30फिरी से भजन गाई करी जैतून पहाड़ पर गे।
पतरस रे मन्हा करणे री भविष्यवाणी
31तां यीशु ने तिन्हा ने जो बोल्लेया, “तुसी सारेयां ने आज ही रात्ती मेरे बारे बिच धोखा खाणा; किजोकी लिख्खेया गे रा है कि
‘मैं पुहाल जो मारी दैणा ते तां धण री भेड़ां ने तित्तर-बित्तर होई जाणा।’”
32पर मैं जिन्दे होणे रे बाद तुसा का पैल्ले गलील जो जाणा। 33इस पर पतरस ने तिन्हा जो बोल्लेया, जे सारे तुसा रे बारे बिच धोखा खाण ते खाण, पर मैं कदी भी धोखा नी खाणा। 34यीशु ने तिसजो बोल्लेया, मैं तेरे कने सच बोलदा की अज्ज ही रात्ती मुर्गे रे बांग मारणे का पैल्ले, तैं त्रै वरी मेरे का मुकरी जाणा। 35पतरस ने तिन्हा जो बोल्लेया, जे मेरे जो तुसा कने मरणा भी पे, तां भी मैं तुसा का कदी नी मुकरणा ते इदेया ही सारे चेल्लेयां ने भी बोल्लेया।
गतसमनी बिच प्रार्थना
36तां यीशु अपणे चेल्लेयां कने गतसमनी नां रे इक्क जगाह् पर आये ते अपणे चेल्लेया जो बोलणा लग्गे इत्ते ही बेई रेयो जां तिकर मैं तित्ते जाई करी प्रार्थना करां। 37से पतरस ते जब्दी रे दोई मुडेंया जो कन्ने लेई गे, ते उदास ते व्याकुल होणा लग्गे। 38तां तिन्हा ने तिन्हेरे जो बोल्लेया, मेरा दिल बड़ा उदास है इत्ते तिकर की मेरी जान निकलेया करदी है तुसा इत्ते ही रुको ते मेरे कने जागदे रेयो। 39फिरी से थोड़ा होर अग्गे बधी करी मुँह रे भारे पेय, ते प्रार्थना कित्ती, ओ मेरे पिता जे होई सके तां ए कटोरा मेरे का टली जाए तां भी जिय्यां मैं चाह्ंदा तिय्यां नी पर जिय्यां तुसा चाह्ंदे तिय्यां ही हो। 40फिरी तिन्हा ने चेल्लेयां का आई करी तिन्हा जो सुत्ते रे पाया ते पतरस जो बोल्लेया कै तुसा मेरे कने इक्क घड़ी भी नी जाग्गी सके? 41जागदे रेयो, ते प्रार्थना करदे रेयो की तुसा परिक्षा बिच ना पेयो: आत्मा तां तैयार है, पर सरीर कमजोर है। 42फिरी तिन्हा ने दुई वरी जाई करी प्रार्थना कित्ती ओ मेरे पिता, जे ए मेरे पिए बगैर नी हटी सकदा तां तुसा री मर्जी पूरी हो। 43तां तिन्हा ने आई करी तिन्हा जो सुत्ते रे पाया किजोकी तिन्हेरी हाख्खियां निन्दर कने भरे री थी। 44तिन्हेरे जो छड्डी करी से फिरी चली गे, ते तिन्हा ही शब्दां बिच फिरी तिज्जी वरी प्रार्थना कित्ती।
45तां तिन्हा ने चेल्लेयां का आई करी तिन्हेरे जो बोल्लेया, अवे सोदें रेयो, ते अराम करो: दिख्खो, से बेल्ला आई पूज्जे रा है, ते मणू रा पुत्तर, जे मैं ही है पापियां रे हत्थां पकड़वाया जादां। 46उठो, चलिये दिख्खो, मेरा पकड़वाणे वाला नेड़े आई पूज्जे रा है।
यीशु रा धोखे कने पकड़वाया जाणा
47से ए बोल्लेया ही करदे थिये की यहूदा जे बारां बिच का इक्क थिया, आया ते तिसेरे कने बड्डे पुरोत्त ते लोक्कां रे बुजुर्ग मणू रे पास्से का बड्डी भीड़, तलवारां ते लठ लेई करी आई। 48तिन्हेरे पकड़वाणे वाले ने तिन्हेरे जो ए निशानी दित्ती री थी: जिस जो मैं चुम्मी लेयां से ही है तिसजो पकड़ी लेयो। 49ते तिसी बेल्ले यीशु का आई करी बोल्लेया, ओ गुरु, नमस्कार! ते तिन्हेरे जो बड़ा चुम्मेया। 50यीशु ने तिसजो बोल्लेया, ओ दोस्त जिस कम्म तांइ तू आए रा है तिसजो करी लेय तां तिन्हा ने नेड़े आई करी यीशु पर हत्थ पाए ते तिन्हा जो पकड़ी लेया। 51यीशु रे साथियां बिच का इक्क ने हत्थ बधाई करी अपणी तलवार खिची ली ते प्रधान पुरोत्त रे नौक्कर पर चलाई करी तिसेरा कान्न उड़ाई दित्ता। 52तां यीशु ने तिसजो बोल्लेया, “अपणी तलवार म्यान बिच रख्खी लै, किजोकी जे तलवार चलादें से सारे तलवार कने खत्म कित्ते जाणे। 53कै तू नी जाणदा की मैं अपणे पिता का बिनती करी सकदा, ते से स्वर्गदूतां री बारां पलटन का जादा अब्बे ही हाजिर करी सकदा। 54पर पवित्रशास्त्र री लिख्खे री गल्लां इय्यां ही पूरी होणा जरुरी हिन, वरना से गल्लां पूरी किय्यां होणी?”
55तिस बेल्ले यीशु ने भीड़ जो बोल्लेया, कै तुसा तलवारां ते लाठियां लेई करी मेरे जो डाकू सांई पकड़ने तांइ निकले रे हिन? मैं हर रोज मन्दिर बिच बेई करी उपदेस देया करदा थिया ते तुसा मेरे जो नी पकड़ेया। 56पर ए सारा किच्छ इस तांइ होए रा है की भविष्यद्वक्ता रे वचन पूरे होण तां सारे चेल्ले तिन्हेरे जो छडी करी न्हसी गे।
कैफा रे सामणे यीशु
57तां यीशु रे पकड़ने वाले तिन्हेरे जो काईफा नां रे प्रधान पुरोत्त का लेई गे, जित्ते शास्त्रि ते बुजुर्ग मणू कठे होए थिये। 58पतरस दुर ही दुर तिन्हेरे पीच्छे-पीच्छे प्रधान पुरोत्त रे अगँण तिकर गेया, ते अन्दर जाई करी प्यादेयां कने बेई गेया ताकि से दिख्खी सके कि अवे आखर तिकर क्या-क्या होणा। 59बड्डे पुरोत्त ते सारी महासभा यीशु जो मारी रखणे तांइ तिन्हेरे खिलाफ झूठ्ठी गवाई री तलाश बिच थिये। 60पर मते सारे झूठ्ठे गवाह रे आणे पर भी ना मिल्ली आखर बिच दो जणे आए। 61ते बोल्लेया, इन्ने बोल्ले रा है की मैं परमेश्वर रे मन्दिर जो ढाह्ई सकदा ते तिसजो त्रै दिनां बिच वापस बणाई सकदा।
62तां प्रधान पुरोत्त ने खड़ी करी यीशु जो बोल्लेया, कै तू कोई जवाब नी दिंदा? ए मणू तेरे बारे बिच कै गवाई देया करदे हिन? 63पर यीशु चुप रेय, तां प्रधान पुरोत्त ने तिन्हेरे जो बोल्लेया, मैं तेरे जो जिन्दे परमेश्वर री कसम दिंदा की जे तू परमेश्वर रा पुत्तर मसीह यीशु है तां असा कने बोल्ली दे। 64यीशु ने तिसजो बोल्लेया, तू अप्पु ही बोल्ली दित्ता ते तुसा कने ए भी बोलदा कि अब्बे का मणू रे पुत्तर जो सर्वशक्तिमान रे सज्जे पास्से बैठे रे ते आसमान रे बदलां पर आदें दिखगे। 65इस पर प्रधान पुरोत्त ने अपणे कपड़े फाड़े ते बोल्लेया, इसने परमेश्वर री बेजती कित्ती री है, अवे असा जो गवाई री कै जरुरत? दिख्खो, तुसा अब्बे ए बेजती सुणे री है। 66तुसा कै सोचदे? तिन्हा ने जवाब दित्ता ए मारे जाणे रे जोग्गे है। 67तां तिन्हा ने तिन्हेरे मुँह पर थूक्केया ते तिन्हेरे जो मुक्के मारे, दुएयां ने तिन्हेरे जो थप्पड़ मारी करी बोल्लेया। 68ओ मसीह यीशु असा कने भविष्यवाणी करी के बोल की कुसने तेरे जो मारेयां?
पतरस रा यीशु का मन्हा करणा
69पतरस बाहर अगँणे बिच बैठे रा थिया की इक्क नौकराणी तिसेरा का आई ते बोल्लेया: तू भी यीशु गलीली रे कन्ने थिया। 70तिसने सारेयां रे सामणे ए बोलदे होए इन्कार कित्तेया, मैं नी जाणदा की तू कै बोल्लेया करदी है। 71जां से बाहर डेवढ़ी बिच गेया, तां दुई नौकराणी ने तिसजो दिख्खी करी जे तित्ते थिये, तिन्हेरे जो बोल्लेया, ए भी तां नासरत कस्बे रे यीशु, जी कने थिया। 72तिसने कसम खाई करी फिरी इन्कार कित्तेया मैं तिस मणू जो नी जाणदा। 73थोड़ी देर बाद लोक्कां ने तित्ते खड़ित्ते रे थिये, पतरस का आई करी तिसजो बोल्लेया, सच्ची तू भी तिन्हा बिच का इक्क है किजोकी तेरी बोल्ली तेरा राज खोल्ली दिदीं। 74तां से धिक्कारणे ते कसमां खाणां लग्गेया: मैं तिस मणू जो नी जाणदा। ते तिसी बेल्ले मुर्गे ने बांग मारी। 75तां पतरस जो यीशु जी री बोल्ले री गल्ल याद आई मुर्गे रे बांग दैणे का पैल्ले तू तीन्न वरी मेरा इन्कार करणा ते से बाहर जाई करी फूटी-फूटी करी रोणा लग्गेया।
Currently Selected:
मत्ती 26: CDHNT
Highlight
Share
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
