लूका 9
9
बारा चेल्लेयां रा भेज्जेया जाणा
1फिरी यीशु ने अपणे बाराह् चेल्लेयां जो सद्देया, ते तिन्हा जो बिमारियां जो दुर करणे ते सारी दुष्टात्मा जो कडणे री ताकत ते हक दित्तेया 2ते तिन्हा जो परमेश्वर रे राज करणे रा सुब बसेख सारे मणूआं जो सुनाणे ते बिमार मणूआं जो खरा करणे तांइ भेज्जेया। 3यीशु ने तिन्हा जो बोल्लेया कि तुसा अपणे सफर बिच किच्छ भी लेई करी मत जादें, ना ही सोठी ना झोली ना रोट्टी ते ना पैसे ते ना ही जादा कपड़े 4ते तुसा जिस भी ग्रां अन्दर जांह्गे, तित्ते कुसकी इक्क घर अन्दर प्रोह्णे बणी करी रेय, जां तांइ तुसा तिस ग्रां का बाहर नी आन्गे, तां तांइ तिस ही घर बिच रेयो 5जे तिस ग्रां रे मणू तुसा रे सुब बसेख जो नी मनगे, तां तित्ते का निकलदे बेल्ले अपणे पैरां री धूड़ झाड़ी आयो, ताकि ए तिन्हा पर गवाई होई सको कि से अपणी कित्ते री अप्पु भुगतन 6तां से बाराह् चेल्ले तित्ते का निकली करी ग्रां-ग्रां अन्दर जाई करी परमेश्वर रे राज करणे री सुब बसेख रे बारे अन्दर सुणांदे रे ते बिमार मणूआं जो खरा करदे रे 7जां हेरोदेस राज्जे जो यीशु रे कम्मां रे बारे अन्दर पता लगेया, तां से सुणी करी बड़ा-भरी उदास होई गेया किजोकी केई मणू बोल्लदे थिये, कि ए यूहन्ना बपतिस्मा दैणे वाला है, जे कि मरी करी फिरी जिन्दा होई गे रा है।
हेरोदेस री चिंता
8किच्छ मणू बोलदे थिये, कि ए एलिय्याह-भविष्यद्वक्ता है अते किच्छ मणू तां ए बोल्लेया करदे थिये, कि ए पुराणे बेल्ले रे भविष्यद्वक्ता बिच का कोई फिरी जिन्दा होई गे रा है 9पर हेरोदेस राज्जे ने बोल्लेया, कि यूहन्ना बपतिस्मा दैणे वाले रा सर तां मैं ही कटाया थिया, ते अवे ए कुण है जिसेरे बारे अन्दर मैं ए सब गल्लां सूणेया करदा है? फिरी तां राजा हेरोदेस यीशु जो दिखणे तांइ पूरी कोसीस करणा लग्गेया 10जां प्रेरित हटी आए, तां जे किच्छ तिन्हा ने कित्तेया थिया, से सब गल्लां यीशु जो दस्सियाँ ते यीशु अपणे चेल्लेयां जो तित्ते का छामत-चारे बैतसैदा नां रे सहर बिच लेई गे।
पांज्ज हजार मणूआं जो खुआणा
11पर मणूआं जो पता लग्गी गेया ते से भी तिन्हेरे पीच्छे चली पे यीशु ने तिन्हेरा सुआगत कित्तेया ते यीशु ने तिन्हा जो परमेश्वर रे राज करणे रे बारे अन्दर दस्सेया अते जे ठीक होणा चाह्ंदे थिये तिन्हा मणूआं जो खरा कित्तेया 12जिस बेल्ले सांज्ज होणा लग्गी तां चेल्लेयां ने यीशु जो आई करी बोल्लेया, इन्हा मणूआं जो नेड़े, कुसकी ग्रां-पदरा अन्दर भेजी देयो, ताकि से तित्ते रेई सकण ते अप्पु तांइ रोट्टी रा इन्तजाम करी सकण किजोकी ए इलाका सुनसान है जित्ते रैह्णे-खाणे तांइ किच्छ भी नी है 13यीशु ने अपणे चेल्लेयां जो बोल्लेया, तुसा ही इन्हेरे तांइ रोट्टी रा इंतजाम करो तिन्हा ने बोल्लेया, कि असा रे का तां पंज रोटियां अते दो मच्छियाँ रे सिवाए होर किच्छ भी नी है, पर जे असी इन्हा तांइ रोट्टी खरीदी करी लेई आण, तां किच्छ इतंजाम होई सकदा तित्ते लाई-पाई करी पंज हजा़र तां मड़द ही थिये। 14तां यीशु ने अपणे चेल्लेयां जो बोल्लेया, कि इन्हा जो पंजाह्-पंजाह् करी के पान्द बिच बिठाई देयो 15चेल्लेयां ने तिय्यां ही कित्ता, ते सब मणू भुईय्याँ बैह्ई गे 16फिरी यीशु ने तिन्हा पंज रोटियां ते दो मच्छियाँ जो हत्थां पर रख्खेया ते स्वर्ग पास्से दिख्खी करी परमेश्वर रा शुकर कित्तेया ते फिरी तिन्हा रोटियां जो तोड़ी-तोड़ी करी मणूआं जो दैणे तांइ अपणे चेल्लेयां का दिन्दे गे 17जां सब जणे रज्जी करी खाई बैठ्ठे, तिसेरे बाद भी चेल्लेयां ने बचे री रोटियां रे बाराह् टोकरे भरी करी रख्खे 18इक्क रोज यीशु मणूआं का बखरे होई करी इक्क कह्ल्ली जगाह् बिच प्रार्थना करणे जो गे, ते तिन्हेरे सोग्गी चेल्ले भी थिये, तां यीशु ने तिन्हा का पूच्छेया, कि मणू मेरे बारे अन्दर कै सोचदे कि मैं कुण है?
पतरस रा यीशु जो मसीह यीशु मनणा
19तिन्हा ने जवाब दित्तेया, कि किच्छ मणू यूहन्ना बपतिस्मा दैणे वाला बोल्दे, किच्छ तुसा जो एलिय्याह मन्दे, अते किच्छ बोल्दे, कि तुसा पुराणे बेल्ले रे भविष्यद्वक्ता बिच का कोई इक्क हिन, जे कि जिन्दा होई गे रा है। 20यीशु ने अपणे चेल्लेयां का पूच्छेया, पर तुसा जो कै लगदा, कि मैं कुण है? पतरस ने जवाब दित्तेया, कि असी तां तुसा जो परमेश्वर रा भेज्जे रा मसीह यीशु मन्दे 21तां यीशु ने तिन्हा जो चितौणी देई करी बोल्लेया, कि मेरे मसीह यीशु होणे रे बारे अन्दर कुसकी जो जरा भी मत बोल्दे 22फिरी यीशु ने अपणे चेल्लेयां जो बोल्लेया, कि ए पक्की गल्ल है, कि मणू रे पुत्तर ने बड़े दुख्ख सैह्णे हिन ते बड़े-बड़े बुजुर्ग लोक, बड्डे पुरोत्त, अते यहूदी शास्त्रियां ने तिसजो नक्कारी दैणा ते मरवाई दैणा, पर तिनिए त्रीय्ये रोज्जे फिरी जिन्दे होई जाणा।
अपणे मरणे रे बारे यीशु री भविष्यवाणी
23फिरी यीशु ने तिन्हा सबणी जो बोल्लेया, जे कोई मेरा चेल्ला बणना चाह्ंदा, तिसजो अपणी दुख-तकलिफां जो चुक्की करी मेरे तांइ मरणे जो भी तैयार रैह्णा पैणा।
यीशु रे पीच्छे चलणे रा मतलब
24किजोकी, जे तुसा अपणी जान बचाणा चांगे, तां तुसा तिसजो नी बचाई सकणा पर जे कोई मेरे तांइ अपणी जान देई दिंगा, सिर्फ तिसजो ही सच्चा जीण मिलणा 25किजोकी इसेरा कै फायदा कि इन्सान इक्क पास्से तां सारी दुनिया जो जीत्ती लै पर अपणी जान जो ही गवाई दे? 26जे मणू मेरे ते मेरे सुब बसेख का शर्मसार हुंदा, मणू रे पुत्तर, जे मैं ही है ने भी, जां अपणी, ते अपणे पिता-परमेश्वर री, ते पवित्र स्वर्गदूतां कने महिमा कने आणा, तां तिन्हा मणूआं जो भी पछियानणे का मुकरी जाणा 27पर मैं तुसा जो सच बोलदा, कि जे इत्ते खड़ित्ते रे हिन, तिन्हा बिच का किच्छ ईदेह् भी हिन, जिन्हा तिस बेल्ले तांइ नी मरणा, जां तांइ से परमेश्वर रे राज जो नी दिख्खी लिन्दे। 28इन्हा गल्लां रे कोई आठ्ठ रोज्जां बाद यीशु अपणे कन्ने पतरस, याकूब, ते यूहन्ना जो लेई करी प्रार्थना करणे तांइ इक्क पहाड़ पर गे।
यीशु रा रुप बदलणा
29प्रार्थना करदे-करदे यीशु रा रुप ही बदली गेया ते तिन्हेरे कपड़े लस्कदे-गाढ़े चिट्टे रांग रे होई गे 30तां दिख्खो मूसा ते एलिय्याह, ए दो मणू तिन्हा कने गल्लां करेया करदे थिये 31ए सब महिमा अन्दर दिस्से, ते से यीशु रे यरुशलेम अन्दर मरणे री गल्लां करेया करदे थिये 32पतरस ते तिसेरे दोस्तां जो बड़ी गैहरी निन्दर आई गे री थी जां तिन्हेरी निन्दर पूरी तराह् कने खुल्ली गई तां, तिन्हा ने भी यीशु जो तिन्हेरी महिमा अन्दर मूसा नबी ते एल्लीयाह भविष्यद्वक्ता जो, यीशु कन्ने खड़िह्त्तेरा दिख्खेया 33जां मूसा नबी ते एलिय्याह भविष्यद्वक्ता तित्ते का जाणा लगे तां पतरस यीशु जो बोलणा लगेया, ओ मालक, खरा होया जे असी इत्ते हिन, असा जो त्रै तम्बू बनाणा चाएदे, इक्क तुसा तांइ, इक्क मूसा तांइ अते इक्क एलिय्याह तांइ हालांकि, पतरस जाणदा नी थिया कि से कै है बोलदा? 34से हल्ले ए गल्ल करदा ही थिया, कि इक्क बद्दल ने तिन्हा जो घेरी लेया ते से बड़े डरी गे, 35ते से बद्दल रे अन्दर ही थिये, कि तिस बदलां बिच का अवाज आई, कि ए मेरा पुत्तर है, जिस जो मैं चुणे रा है, इसेरी सूणेया करो 36जिय्यां ही ए अवाज आणा बन्द होई, तिय्यां ही सिर्फ यीशु तित्ते किल्ले खड़ित्ते रे थिये ते चेल्लेयां ने जे किच्छ भी दिख्खेया थिया, इस बारे अन्दर तिन्हा रोज्जे कुसकी कन्ने कोई गल्ल नी लाई 37दूए रोज्जे जां से पहाड़ का उतरे, तां मते सारे मणू यीशु का मिलणे तांइ आई पूज्जे।
दुष्टात्मा रे सताए मुंडे जो ठीक करणा
38ते तिन्हा मणूआं बिच का इक्क मणू जोरे सणे बोल्ली पेया, ओ गुरु जी, मैं तुसा रे छंदे करदा, तुसा मेरे निक्के जो खरा करी के उस पर दया करो किजोकी ए मेरा इक्को-इक्क मुंडा है, 39मेरे निक्के जो इक्क दुष्टात्मा घड़ी-घड़ी पकड़दी ते फिरी ए इक्कदम चिन्ड़ा मारणा लगदा से तिसजो इदेया मरोड़दी, कि तिसेरे मुँह का झग्ग निकली आन्दी ते से तिसजो बड़ा भरी मरोड़दी ते तिसजो बड़ी मुस्कल कने छड़दी 40मैं तुसा रे चेल्लेयां जो अपणे निक्के का तिस दुष्टात्मा जो कढ़णे तांइ बोल्लेया थिया, पर से तिय्यां नी करी सके 41फिरी यीशु ने अपणे चेल्लेयां जो बोल्लेया, ओ विश्वास नी करणे वाले ते जिद्दी मणूओं! मैं तुसा कन्ने कितणे करी रोज्जां तांइ रैह्न्गा ते कधाड़ी तांइ तुसा री इदेय गल्लां बरदास्त करदा रैह्न्गा? फिरी यीशु ने तिस मणू जो बोल्लेया, अपणे निक्के जो इत्ते लेई आ 42तिसेरा निक्का आया ही करदा थिया, कि दुष्टात्मा ने तिसजो पटकी करी भुईय्याँ सूटी दित्तेया ते तिसजो मरोड़णा लग्गी, पर यीशु ने दुष्टात्मा जो झिड़केया ते तिस निक्के जो खरा करी के तिसेरे प्यो का देई दित्तेया 43तां सब मणू परमेश्वर रे चमत्कार जो दिख्खी करी हैरान होई गे यीशु रे चमत्कारी कम्मां जो दिख्खी करी सब मणू हैरान थिये।
अपणे मरणे रे बारे यीशु री दोबारा भविष्यवाणी
फिरी यीशु ने अपणे चेल्लेयां जो बोल्लेया, 44तुसा मेरी गल्ल ध्यान कने सुणो, किजोकी मणू रे पुत्तर, जे मैं ही है कन्ने धोखा होणे वाला है ते तिसजो तिसेरे दुश्मणा रे हत्थे पकड़वाई दित्तेया जाणा।
किजोकी मणू रे पुत्तर, जे मैं ही है कन्ने धोखा होणे वाला है ते तिसजो तिसेरे दुसमणां रे हत्थे पकड़वाई दित्तेया जाणा 45पर ए गल्ल चेल्लेयां रे पल्ले नी पेई, किजोकी इस गल्ल रा सह्ई मतलब तिन्हा का छुपी रेया कि से तिसजो जाणी ना सकण ते चेल्ले यीशु का इस बारे अन्दर पूच्छणे का ड़रदे थिये 46फिरी चेल्लेयां बिच इस गल्ल पर बैह्स होणा लग्गी पेई, कि तिन्हा बिच सबणी का बड्डा कुण है?
सबका बड्डा कुण?
47पर यीशु ने तिन्हेरे मन री गल्ल जाणी लेई इधेरे तांइ तिन्हा ने इक्क निक्के जो अपणे नेड़े खड़ा कित्ता 48ते तिन्हा जो बोल्लेया, जे भी मेरे नां कने इस निक्के जो अपणाई लिंदा, से मेरे जो अपणाई लिंदा, ते जे मेरे जो अपणाई लिंदा, से परमेश्वर जो अपणाई लिंदा, जिन्हा ने मेरे जो भेज्जे रा है, किजोकी जे तुसा बिच सबणी का छोटा है, सेह्ई सबणी का बड्ड़ा है 49फिरी यूहन्ना ने यीशु जो बोल्लेया, मालक जी, असा ने इक्क मणू जो तुसा रे नां कने मणूआं बिच का दुष्टात्मा जो कढ़दे दिख्खेया, ते असा ने तिसजो ए सब करणे का मन्हा कित्तेया, किजोकी से असा रे बिच का इक्क नी थिया।
जो खिलाफ नी, से कन्ने है
50यीशु ने यूहन्ना जो बोल्लेया, तिसजो ठाक्को मत किजोकी जे असा रे खिलाफ नी है, से असा रे पास्से ही है 51जां यीशु रा स्वर्ग अन्दर जाणे रा बेल्ला नेड़े आया करदा थिया, तां तिन्हा यरुशलेम जाणे री सोच्ची ते चली पे।
सामरिया रा यीशु रे खिलाफ होणा
52जाणे का पैल्ले यीशु ने सामरिया प्रदेश बिच अपणे चेल्ले का ए सुब बसेख भिजवाया कि असा रे आणे तांइ इक्क जगाह् तैयार करी रख्खो। 53पर तिस ग्रां रे मणूआं ने तिन्हा जो अपणे ग्रां अन्दर आणे का साफ मन्हा करी दित्तेया ते तिन्हेरे चेल्लेयां जो वापस हटाई दित्तेया, किजोकी सामरी मणू जाणदे थिये, कि तिन्हा ने यरुशलेम जो जाणा थिया 54ए दिख्खी करी तिन्हेरे चेल्ले याकूब ते यूहन्ना ने यीशु जो बोल्लेया, प्रभु जी, कै तुसा चाह्ंदे कि असी आज्ञा देई करी इन्हा मणूआं री इस हरकत तांइ आसमान का आग्ग सूटी करी इन्हा जो आग्ग कन्ने भस्म करी देंन? 55पर यीशु ने अपणे चेल्लेयां जो झिड़केया ते बोल्लेया, कै तुसा जो पता नी है, कि तुसा मेरे कन्ने हिन? मणू रा पुत्तर, जे मैं ही है मणूआं री जान लैणे तांइ नी पर बचाणे तांइ आए रा है 56ते फिरी से कुसकी होरसी ग्रां बिच चली गे 57जां यीशु ते तिन्हेरे चेल्ले रस्ते पर चलेया करदे थिये, तां इक्क मणू ने यीशु जो बोल्लेया, कि तुसा ने जित्ते जित्ते भी जाणा, मैं भी तुसा कन्ने जाया करणा।
यीशु रा चेल्ला बणने री कीमत
58यीशु ने तिसजो बोल्लेया, गीदड़ां जो रैह्णें तांइ कुड्डां ते आसमान रे चिडू-पखेरुआं तांइ बसे रे हिन, पर मणू रे पुत्तर, जे मैं ही है जो सर ढ़कणे तांइ भी कोई ठकाणा नी है 59यीशु ने कुसकी दूज्जे मणू जो बोल्लेया, मेरा चेल्ला बणी जा पर तिनिए जवाब दित्तेया, कि ओ प्रभु जी, मेरे जो पैल्ले अपणे घरे जाणा देयो ताकि मैं अपणे प्यो रे मरणे रे बाद तिन्हा दफन करी के वापिस आई सकां 60यीशु ने तिसजो बोल्लेया, मरणे वालेयां जो अपणे मुर्दे दबणा दे, किजोकी परमेश्वर रा वचन सब मणूआं तांइ है, इधेरे तांइ तेरा फर्ज ए है कि तू मणूआं जो परमेश्वर रे राज करणे रे बारे अन्दर दस्स 61फिरी इक्क जह्णा होर बोलणा लगेया, कि मैं भी तुसा रा चेल्ला बणना, पर पैल्ले जाई करी अपणे घरेतां जो बोल्ली करी आन्दा 62यीशु ने तिसजो बोल्लेया, इदेया कोई भी मणू, जे हल पर हत्थ रखणे का बाद पीच्छे दिखदा, से परमेश्वर रे राज अन्दर रैह्णे जोग्गा नी है।
Currently Selected:
लूका 9: CDHNT
Highlight
Share
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
