लूका 8
8
यीशु रे चेल्ले
1इसका बाद यीशु मते सहरां अते ग्रां बिच जाई-जाई करी परमेश्वर रे राज री सुब बसेख जो सुणादे रे अते तिन्हा कन्ने तिन्हेरे बाराह् चेल्ले भी थिये। 2चेल्लेयां जो छड्डी करी यीशु कन्ने जनानियां भी थिया, जिन्हा जो यीशु ने बमारियाँ ते दुष्टात्मा का बचाये रा थिया। तिन्हा बिच का इक्क मगदला सहर री मरियम भी थी यीशु ने तिस बिच का सत्त दुष्टात्मा कह्ड्डी थिया। 3हेरोदेस राज्जे रे भंड़ारी, खुज़ा री लाड़ी, योअन्ना, अते सूसन्नाह समेत होर भी मती सारी जनानियां थिया जे कि अपणे पैसेयां कने यीशु ते तिन्हेरे चेल्लेयां रे सेवा-पाणी रा इंतजाम करदी थिया। 4इक्क रोज इय्यां होया कि सहरां का मते सारे मणू यीशु री गल्लां सुनणे जो इक्क जगाह् किठिह् गे ते यीशु ने तिन्हा जो इक्क उदारण देई करी बोल्लेया।
बीह् बाणे वाले रा उदारण
5इक्क बीह् बांणे वाला अपणे खेत्रा अन्दर बीह् बाणा लगेया, अते बीह् बांदे-बांदे किच्छ बीह् सड़का रे कनारे पर पेई गे ते से पैरां हेठ आई गे, ते आसमान रे चिड़ू-पखेरुआं ने से बीह् चुग्गी लै 6अते किच्छ पथरिली मिट्टी पर पे, जिस बेल्ले से बधणा लगे तां तिन्हा बीआं जो खरा-करी पाणी नी मिल्लेया अते से सुकी गे 7किच्छ कंडेया वाली झिल्लां बिच पे अते झिल्लां भी तिन्हा कने बदधी पेई ते झिल्लां ने तिन्हा जो दब्बी दित्तेया 8होर किच्छ बीह् ठीक मिट्टी पर पे अते उगी करी से सौ गुणा फले ए बोल्ली करी यीशु ने जोरे-सणे बोल्लेया, जे सुनणा चाए, से ध्यान कने सुणे! 9यीशु रे चेल्ले उन्हा का पूच्छणा लग्गे कि इस उदारण रा कै मतलब है?
उदारण रा मकसद
10तिन्हा ने अपणे चेल्लेयां जो बोल्लेया, तुसा जो परमेश्वर रे राज री राज़ री गल्लां समजणे री अक्कल दित्ती गे री है, पर होर लोक्कां जो उदारणां बिच सुणाया जादां, ताकि से दिख्खी करी भी दिख्खी ना सकण, ते से सुणी करी भी समजी ना सकण 11इस उदारण रा मतलब ए बीह् परमेश्वर रा वचन है।
बीह् बाणे वाले उदारण रा मतलब
12जे बीह् रस्ते रे कनारे पे थिये से तिन्हा मणूआं सांई हिन, जे परमेश्वर रे वचनां जो सुणी तां लिन्दे पर शैतान तिन्हेरे मना का वचन जो कह्ड्डी लिन्दा ताकि से विश्वास नी करी सकण अते तिन्हेरा छुटकारा नी होई सको 13जे बीह् पथरिली मिट्टी पर पे थिये, से तिन्हा मणूआं सांई हुन्दे जे वचनां जो बड़े मजे कने सूणदे अते तिन्हा पर चलणा भी लग्गी पैंदे, पर वचन तिन्हेरे मना बिच पकड़ नी बणाई पांदा ते किच्छ बेल्ले तांइ से वचना पर विश्वास तां करदे पर, जां परखिणे रा बेल्ला आन्दा तां से बहकी जादें। 14जे बीह् झिल्लां अन्दर पे थिये, से तिन्हा मणूआं सांई हिन जे वचनां जो सुणी तां लिन्दे पर जां से अपणे ही रस्ते चलदे तां दुनियावी फिकर, धन-दौलत, जिन्दगी रा सुख, इन्हा सब चीजां रे हेठ दबी जान्दे, ते इन्हा सब गल्लां कने से अपणे विश्वास अन्दर नी बदधी पांदे 15पर से बीह् जे ठीक मिट्टी पर पे थिये, से तिन्हा मणूआं सांई हुन्दे, जे मन रे ठीक अते नेक, ते सच्चे मन कने परमेश्वर रे वचन जो सुणी करी तिन्हा पर चलदे ते तिन्हेरे सबर री वजह कने ही से खरा फल्ल लियान्दे। 16कोई भी दिय्ये जो बाली करी भांडे हेठ नी रखदा, अते ना ही मन्जे हेठ रखदा, पर दीये जो दीप दान पर रखदे ताकि अन्दर आणे वाले जो लौ मिल्लो।
दीये रा उदारण
17किजोकी इदेया किच्छ भी लुह्के रा नी ए जे सामणे नी आणा, अते भेद किच्छ भी नी ए, जे जाणेया नी जाणा अते लौ बिच सामणे नी आणा 18इधेरे तांइ चुकन्ने रेयो कि तुसा कुस हिसाब कने सूणदे? किजोकी जिस का है तिसजो होर भी दित्तेया जाणा ते जिस का नी है, तिसका से भी लेई लित्ता जाणा जिस जो से अपणा समजदा 19इक्क रोज यीशु री मां अते तिन्हेरे भ्याल तिन्हा कने मिलणे जो आये, पर मणूआं री भीड़ इतणी जादा थी कि से तिन्हा का पूज्जी नी सके।
यीशु री मां ते भाई
20फिरी कुसकी ने तिन्हा जो बोल्लेया, तुसा री मां अते भ्याल बाहर खड़ितेरे हिन से तुसा रे कने मिलणा चाहन्देे हिन 21यीशु ने बोल्लेया, मेरी मां अते भ्याल तां ए हिन जे परमेश्वर रे वचन जो सूणदे अते तिन्हा पर चलदे 22इक्क रोज इय्यां होया कि यीशु अपणे चेल्लेयां कने किस्ती पर चढ़े अते तिन्हा जो बोल्लेया, चलो, असी झील रे पार चलदे तां तिन्हा किस्ती खोली अते चली पे।
तूफान जो सांत करणा
23जां से किस्ती चलाया करदे थिये तां यीशु सोई गे ते तिस्सी बेल्ले झील अन्दर बड़ी भरी हनेरी चली तिन्हेरी किस्ती अन्दर पाणी भरीणा लग्गी पेया अते तिन्हेरी जान पर आई पेई 24फिरी चेल्लेयां ने यीशु जो जगाई करी बोल्लेया, मालक, ओ मालक, असा ड़ुब्बी जाणा! तिस्सी बेल्ले यीशु उठ्ठे अते तिन्हा हनेरी अते पाणी री छल्हार जो झिड़केया अते से रुकी गई, ते तित्ते सब किच्छ सांत होई गेया। 25फिरी यीशु ने तिन्हा का पूच्छेया, कुते गेया तुसा रा विश्वास? पर चेल्ले डरे रे थिये अते हैरान भी थिये, से अप्पु-मिते बोलणा लगे, ए आखर है कुण, जे हनेरी अते पाणी जो हुकम दिन्दा ते से भी इसेरे हुक्मां जो झट्ट मन्नी लिन्दे हिन 26फिरी से गिरासेनिया इलाके अन्दर गे, जे गलील रे सामणे थिया।
दुष्टात्मा रे सताए मणू जो ठीक करणा
27तित्ते तिन्हा जो इक्क मणू मिल्लेया जिस बिच दुष्टात्मा थिया से बड़े रोज्जां का ना तां कपड़े पांदा थिया अते ना ही घरां अन्दर रेया करदा थिया बल्कि से कबरस्तान अन्दर रेया करदा थिया 28जां तिनिए यीशु जो दिख्खेया तां से चिन्ड़ मारी करी तिन्हेरे मुहाग्गर आई करी पेई गेया ते तिन्हेरे छंदे करणा लगेया, ओ परम-परमेश्वर रे पुत्तर, यीशु, तुसा मेरे का कै चाह्ंदे? मैं छंदे करदा तुसा मेरे जो तंग मत करो 29किजोकी यीशु ने तिन्हा दुष्टात्मां जो तिस मणू बिच का निकलणे रा हुकम देई दित्ते रा थिया किजोकी से दुष्टात्मा तिसजो घड़ी-घड़ी तंग करदी थियां, ते जां अगर मणू तिस मणू जो संगलां अते रस्सियां कन्ने बन्नी करी रखदे थिये, तां भी से दुष्टात्मा तिन्हा संगलां ते रस्सियां जो तोड़ी करी, तिसजो बंजर-बियाबान पास्से दुड़ांदी थियां। 30तां यीशु ने तिसजो पूच्छेया, तेरा नां कै ए? तां दुष्टात्मा ने बोल्लेया, मेरा ना सैना है किजोकी तिस मणू बिच मती सारी दुष्टात्मा थिया 31से यीशु रे छंदे करेया करदी थिया कि असा जो पताल बिच जाणे रा हुकम मत दिन्दे। 32तिस्सी जगाह् सूअरां रा इक्क झुण्ड घा चरेया करदा थिया तिन्हा ने छंदे कित्ते कि असा जो इन्हा सूअरां रे अन्दर जाणा देयो, ते यीशु ने तिन्हा जो सूअरां अन्दर जाणा दित्तेया 33तां से दुष्टात्मा तिस मणू का निकली करी तिन्हा सूअरां अन्दर चली गेईयां ते से झुण्ड तिस ढ़लान का दौड़दा झील पर जाई पेया ते डूबी गेया 34जां सूअरां जो चराणे वालेयां ने ए दिख्खेया, तां तिन्हा दौड़ी करी सहर अते ग्रां बिच जाई करी सबणी जो ए खबर सूणाई दित्ती 35फिरी तित्ते रे मणू जे किच्छ होया थिया से दिखणे जो आये से यीशु कने मिल्ले अते तिन्हा ने दुष्टात्मा वाले मणू जो भला-चंगा कपड़े पाई करी यीशु रे पैरां का बैठ्ठे रा दिख्खेया, ए दिख्खी करी से सब डरी गे। 36जिन्हा ने ए सब हुन्दे दिख्खेया, तिन्हा ने होरनां जो भी दस्सेया कि जिस मणू अन्दर दुष्टात्मा थिया, से किय्यां बचेया 37ते तित्ते जे किच्छ भी होया थिया तिसजो दिख्खी करी गिरासेन इलाके रे रैह्णे वाले मणूआं ने यीशु रे छंदे कित्ते कि तुसा इत्ते का चली जाओ किजोकी ए सब दिख्खी करी से सब डरी गेरे थिये फिरी यीशु किस्ती पर चढ़ी करी झील रे दूज्जे पास्से हटी आये। 38जिस मणू रे बिच का दुष्टात्मा निकली थी, से उन्हा कने चलणे तांइ यीशु रे छंदे करणा लग्गेया पर यीशु ने ए बोल्ली करी वापिस भेजेया कि, 39घरे जा अते जे तेरे तांइ परमेश्वर ने कित्तेया ए, तिसजो दस्स तां से जाई करी, जे किच्छ यीशु ने तिस तांइ कित्तेया, तिसजो अपणे सहरां जाई करी मणूआं जो दस्सणे लग्गेया 40यीशु किस्ती पर गलीली समुन्द्र रे पार गे, तां मणूआं ने तिन्हेरा बड़ा सुआगत कित्ता, किजोकी से सब जणे यीशु जो भालदे थिये।
याईर री मरी री कुड़ी ते इक्क बिमार जनानी
41उत्ते याईर नां रा इक्क मणू थिया जे तित्ते री सभास्थल रा इक्क प्रधान थिया से यीशु रे पैरा पेई गेया अते तिन्हा जो घरे चलणे तांइ छंदे करणा लग्गेया 42किजोकी तिसेरी बारह साले री कुड़ी थी, अते से मरणे वाली थी जां यीशु जाया करदे थिये तां मणू इत्तणे थिये कि तिन्हा पर आई पेया करदे थिये 43तिन्हा मणूआं बिच इक्क इदेयी जनानी भी थी, जिस जो बारह सालां का खून चलणे री बीमारी थी तिसने मती जगाह् इलाज कराया अते जे तिसका थिया से सब खरचणे का बाद भी से ठीक नी होई 44तिसने यीशु रे पीच्छे का आई करी तिन्हेरे कपड़े रा इक्क कनारा छुत्तेया, अते छुन्दे तिसेरा खून निकलणा बन्द होई गेया 45यीशु ने तिस्सी बेल्ले पूच्छेया, से कुण ए जिनिये मेरे जो छुत्तेया? जां सबने मन्हा कित्तेया, तां पतरस ने बोल्लेया, ओ मालक, तुसा कने बड़ी बड्ड़ी लोक्कां री भीड़ ए, सारे जणे तुसा पर आई पेया करदे हिन, अवे असी ए किय्यां पता लगाई सकदे कि तुसा जो कुस जणे ने छुतेया? 46पर यीशु ने बोल्लेया, कुसकी न कुसकी ने तां मेरे जो जरुर छुतेया, किजोकी मेरे अन्दरा का ताकत निकली ए 47फिरी से जनानी समजी गई कि अवे मैं होर जादा देर तांइ लुह्की नी सकदी, तां से घबराई करी अते कम्दी-कम्दी यीशु रे पैरां पेई गई ते तिसने सबणी मणूआं जो दस्सेया कि मैं किजो यीशु जो छुत्तेया थिया अते तिन्हा जो छुन्दे ही मैं किय्यां ठीक होई गई 48यीशु ने तिस जनानी रे विश्वास जो दिख्खी करी बोल्लेया, ओ कुड़िए, तेरे विश्वास री वजह कने तेरा छुटकारा होया, अवे सांती कने चली जा। 49से हल्ले ए बोल्लेया ही करदे थिये कि सभास्थल रे प्रधान रे घरे का तित्ते कोई आया अते तिसने प्रधान जो बोल्लेया, तेरी कुड़ी मरी गई इधेरे तांइ गुरु जी जो तकलीफ मत दिंदा 50पर जां यीशु ने ए सूणेया तां याईर जो बोल्लेया, बिल्कुल मत डर सिर्फ विश्वास रख्ख तां तिसने बची जाणा 51घरे जाई करी यीशु ने पतरस, यूहन्ना, याकूब, अते तिस कुड़ी रे मां-प्यो जो अन्दर लेई गे ते होर कुसकी जो भी अन्दर नी आणा दित्तेया। 52सब जणे तिस कुड़ी रे मरी जाणे पर रोया करदे थिये, पर यीशु ने तिन्हा जो बोल्लेया, रोणा बांद्द करो किजोकी ए कुड़ी तां मरे री नी ए, बल्कि सुत्ते री ए 53इस गल्ल पर तिन्हा मजाक उड़ाया किजोकी से जाणदे थिये कि कुड़ी मरी गे री ए 54पर यीशु ने तिस कुड़ी रा हत्थ पकड़ेया अते तिसजो बोल्लेया, कुड़िए, उठी हो! 55तां तिस्सी बेल्ले से कुड़ी फिरी जिन्दी होई गयी अते से उठी होई यीशु ने तिसेरे मां-प्यो जो बोल्लेया, इसजो खाणे तांइ किच्छ रोट्टी देई दयो 56तिसेरे मां-प्यो हैरान होई गे कि तिन्हेरी कुड़ी जिन्दी होई गई, पर यीशु ने तिन्हा जो चितौणी देई करी बोल्लेया कि ए सारी गल्लां कुसकी कने मत लान्दे।
Currently Selected:
लूका 8: CDHNT
Highlight
Share
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
