लूका 5
5
पैल्ले चेल्लेयां रा चुणेया जाणा
1जां भीड़ परमेश्वर रा वचन सुनणे तांइ यीशु रे उप्पर पेया करदी थी, ते से गन्नेसरत रे समुन्द्र रे किनारे पर खड़ित्ते रे थिये, तां इय्यां होया कि 2तित्ते तिन्हा ने दिख्खेया, मच्छी पकड़ने वाले अपणी किस्तियां जो कनारे पर लाई करी अपणे मच्छी पकड़ने वाले जाल्लां जो धोया करदे हिन। 3मते मणू होणे री वजह कने यीशु तिन्हा दो किस्तियां बिच का इक्क पर चढ़ी गे जे शमौन री थी ते तिन्हा ने शमौन जो बोल्लेया, किस्ती जो कनारे का जरा कर अग्गे जो लेई चल ते से लेई गेया, अते फिरी यीशु किस्ती पर बेई करी मणूआं जो उपदेस दैणा लगे 4जां यीशु मणूआं जो उपदेस देई बैठ्ठे, तां तिन्हा ने शमौन जो बोल्लेया, अपणी किस्ती जो डुग्गे पाणी पास्से लेई चल अते मच्छी पकड़ने तांइ अपणे जाल जो पाणी बिच पा। 5शमौन ने तिन्हा जो जवाब दित्तेया, ओ मेरे मालक, असा सारी रात मच्छी पकड़ने तांइ बड़ी मैहनत कित्ती, पर किच्छ भी नी पकड़ी सके, फिरी भी जे तुसा बोल्लेया करदे हिन, तां मैं सिर्फ तुसा रे बोलणे पर दुबारा जाल पाई दिन्दा। 6जिस बेल्ले तिन्हा ने यीशु रे बोलणे पर दुबारा जाल पाया, तां तिन्हा ने सच्ची अन्दर मती सारी मच्छियाँ पकड़ियाँ, अते से इतणी जादा थिया कि तिन्हेरे जाल ही फटणा लग्गी पये। 7इन्नी देर अन्दर पतरस ने अपणे दोस्तां जो इसारा करी के सद्देया, कि आई करी असा रा हत्थ बटाओ, फिरी तिन्हा ने आई करी दोन्नां किस्तियां जो मच्छी कने इतणा जादा भरी लेया, कि तिन्हेरी किस्तियां डुबणा ही लग्गी पेई। 8ए सब किच्छ दिख्खी करी शमौन पतरस यीशु रे पैरा पेई करी बोलणा लगेया, ओ प्रभु जी, मेरे का दुर चली जाओ, किजोकी मैं तां इक्क पापी मणू है। 9किजोकी इतणी सारी मच्छियाँ रे पकड़िणे कने शमौन अते तिसेरे सारे मित्तरां जो बड़ी हैरानी होई 10अते इय्यां ही जब्दी रे दोह्ई पुत्तर, याकूब ते यूहन्ना, भी हैरान होई गे। फिरी यीशु ने शमौन जो बोल्लेया, शमौन डरां मत, किजोकी जिय्यां तू मच्छी पकड़दा, तियां ही तैं अज्ज का बाद मणूआं जो परमेश्वर रे चेल्ले बणाया करणा। 11ते जिस बेल्ले से सब जणे कनारे पर आई गे, तां तिन्हा ने अपणा सब किच्छ छड्डी दित्तेया, अते यीशु रे पीच्छे चली पे 12जिस बेल्ले से कुसकी सहर अन्दर थिये, तां उत्ते इक्क कोढ़ी मणू आया, ते से यीशु जो दिख्खी करी मुँह रे भारे पेई गेया ते यीशु रे छंदे करणा लगेया, ओ प्रभु जी, जे तुसा चाण तां मेरे जो सुच्चा करी सकदे हिन।
कोढ़ रे रोगी जो ठीक करणा
13यीशु ने अपणा हत्थ बधाई करी तिसजो छुत्तेया ते बोल्लेया, मैं चाह्ंदा कि तू ठीक होई जाये ते तिसेरा कोढ़ तिस्सी बेल्ले ठीक होई गेया। 14यीशु ने तिसजो बोल्लेया, कुसकी जो भी ए मत बोलदा कि तिज्जो मैं खरा कित्ता, पर जाई करी अप्पु जो पुरोत्त का दिखा ते मूसा भविष्यद्वक्ता ने कुसकी कोढ़ी रे सुच्चा होणे तांइ जे भी कुर्बानी चढ़ाणे तांइ पवित्रशास्त्र बिच लिख्खे रा है, तिसजो चढ़ा, ताकि मणूआं जो भी पता लग्गे कि तू अवे खरा होई गेया है। 15पर यीशु रे कम्मां री खप्प तां होर भी फैलणा लग्गी पेई, ते मते जणे मणू उन्हेरी गल्लां जो सुनणे तांइ अते अपणी बमारियाँ का खरा होणे तांइ यीशु का आणा लग्गी पे। 16पर यीशु प्रार्थना करणे तांइ कह्ल्ले बियाबान जगाह् जो चुपचाप चली जान्दे थिये। 17इक्क रोज इय्यां होया, यीशु मणूआं जो उपदेस देया करदे थिये ते फरीसी ते शास्त्रि मणू तित्ते बैठ्ठे रे थिये, जे कि गलील प्रदेश ते यहूदियां प्रदेश रे हर इक्क ग्रां अते यरुशलेम सहर का आये रे थिये, ते मणूआं जो खरा करणे तांइ प्रभु री ताकत यीशु कने थी।
अधरंग रे मरीज जो ठीक करणा
18तिस बेल्ले मते जणे इक्क मणू जो, जे कि अधरंग रा मरीज थिया, बाणी वाले मन्ज्जे पर लटाई करी मणूआं री भीड़ रे बिच का यीशु रे बिल्कुल सामणे लेई जाणे री कोसीस करेया करदे थिये 19पर जादा मणू होणे री वजह कने तिस मरीज जो यीशु का लेई जाणे तांइ रस्ता नी थिया, इधेरे तांइ से तिस मरीज जो लेई करी छत्ती पर जाई चढ़े अते बाणी वाले मन्ज्जे जो रस्सी कने बह्न्नी करी खपरैल जो हटाई करी तिसेरे बिच का, तिस मरीज जो यीशु रे मुहाग्गर उत्तारी दित्तेया 20यीशु ने तिन्हा मणूआं रे विश्वास जो दिख्खी करी तिस मरीज जो बोल्लेया, ओ मणूआं, मैं तेरे सारे पाप माफ करी दित्ते 21यीशु री इन्हा गल्लां जो सुणी करी यहूदी शास्त्रि ते फरीसी अप्पु-मिते सोच-विचार करणा लगे, अप्पु जो परमेश्वर रे बराबर समजणे वाला, ए हुन्दा कुण? ए तां परमेश्वर री बेजती करेया करदा है, किजोकी परमेश्वर जो छड्डी करी, होर दुज्जा कोई पाप्पां जो माफ नी करी सकदा 22पर यीशु तिन्हेरे मन री गल्ल जो समजी गे, ते तिन्हा जो जवाब दित्तेया, तुसा अपणे मन अन्दर इय्यां किजो सोचदे, मैं परमेश्वर री बेज्ज़ती करेया करदा है? 23कै ए बोलणा असान है, तेरे पाप माफ होई गे कि ए बोलणा, उठ अते हंड? 24पर इधेरे तांइ कि तुसा अवे ए जाणी जाण कि मणू रे पुत्तर, जे मैं ही है जो दुनिया पर पाप माफ करणे रा भी हक है फिरी यीशु ने अधरंग रे मरीज जो बोल्लेया, मैं तिज्जो बोलदा खड़िह् जा, अते अपणा पन्द चुक्की करी घरां जो चली जा 25तां से मणू तिस्सी बेल्ले सबणी मणूआं सामणे खड़ी गेया, ते जिस मन्ज्जे पर लेटे रा थिया, तिस्जो चुक्की करी परमेश्वर री बड़ाई करदा, अपणे घरे चली गेया। 26तां फिरी सब जणे हैरान होई गे ते परमेश्वर री बड़ाई करणा लगे अते बड़े वरी डरी गे अते बोलणा लगे, अज्ज असा ने इक्क अलग ही नजारा दिख्खेया 27इसेरे बाद से तित्ते का बाहर चली गे ते तिन्हा ने दिख्खेया, इक्क चुंगी लैणे वाला मणू अपणी चुंगी वसूल करणे वाली चौकी पर बैठ्ठे रा ए, तिसेरा नां लेवी थिया यीशु ने तिसजो बोल्लेया, आ, अते मेरा चेल्ला बणी जा।
लेवी रा सद्देया जाणा
28ए सूणदे ही लेवी खड़ा होई गेया ते सब कम्म छड्डी करी यीशु रा चेल्ला बणी गेया 29फिरी लेवी ने अपणे घरे यीशु तांइ इक्क धाम रख्खी, अते तित्ते चुंगी लैणे वाले ते होर भी मते मणू थिये जे यीशु कने धाम खाया करदे थिये 30तां फरीसी ते यहूदी शास्त्रि, यीशु रे चेल्लेयां कने सिकाइत करणा लगे, तुसा यहूदी होई करी चुंगी लैणे वाले ते पापी मणूआं कने किय्यां खाणा-पीणा बेई जान्दे? 31यीशु ने तिन्हा जो जवाब दित्तेया, जिय्यां मरीजाँ जो ही हकीम अते वैद्दां री जरुरत हुंदी, ते जे भले-चन्गे हिन, तिन्हा जो नी, तिय्यां ही पापी मणूआं जो ही पाप माफ कराणे री जरुरत है ना कि भले अते नेक मणूआं जो 32पर, मैं तिन्हा लोक्कां तांइ नी आया, जे कि भले अते नेक हिन, पर पापियां जो तिन्हेरे पाप्पां का तौबा कराणे तांइ तिन्हा जो सद्दणे तांइ आये रा है 33यहूदी शास्त्ररियां ने यीशु जो बोल्लेया, यूहन्ना ते फरीसियां रे चेल्ले प्रार्थना करदे अते ब्रत्त भी रखदे पर तुसा रे चेल्ले तां हर बेल्ले खांदे-पिन्दे ही रैह्न्दे।
ब्रत पर सवाल
34यीशु ने तिन्हा जो बोल्लेया, जिस बेल्ले तांइ नौआ लाड़ा ब्रातियां कन्ने हो, ब्राति भूख्खे नी रैह्न्दे 35पर इदेय रोज भी आणे, जिन्हा अन्दर नौआ लाड़ा ब्रातियां का बखरा करी दित्तेया जाणा, तां तिन्हा रोज्जे ब्रातियां ने अप्पु ही ब्रत्त रख्खी लेया करणे 36यीशु ने तिन्हा जो इक्क होर उदारण दित्तेया, कोई भी मणू नौए कपड़े री टल्ली फाड़ी करी पुराणे कपड़े जो खरा करणे तांइ तिस बिच नी लान्दा, किजोकी जे कोई इय्यां करगा तां, से नौआ कपड़ा तां खराब होणा ही होणा, ते तिस नौए कपड़े री टल्ली ने पुराणे कपड़े कने कोई मेल भी नी खाणा 37अते कोई भी मणू नौए अंगूर रे रस्स जो पुराणे खलड़ू अन्दर नी भरदा, नी ता नौए अंगूर रे रस्स ने तिस्स पुराणे खलड़ू जो फाड़ी दैणा अते अंगूर रा रस्स ने रुड़ी करी बाहर आई रैह्णा, ते खलड़ू भी कुसकी कम्मे रा नी रैह्णा, 38पर नौए अंगूर रा रस्स जो नौए खलड़ू अन्दर ही भरणा चाएदा 39अते जिस मणू रे मुँहा पुराणे अंगूर रा रस्स रा सुआद लग्गी जाओ, तिसजो नौआ अंगूर रा रस्स खरा नी लगदा, किजोकी तिन्हा बोलणा, पुराणा अंगूर रा रस्स खरा थिया।
Currently Selected:
लूका 5: CDHNT
Highlight
Share
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
