लूका 16

चलाक भडांरी

1यीशु ने इक्क अमीर मणू रा उदारण अपणे चेल्‍लेयां जो दस्सेया, कि इक्क अमीर मणू ने अपणे काम्म-धन्दे जो संभालणे तांइ इक्क मुंशी रख्खे रा थिया पर तिस पर ए इल्जाम लग्गी गेया कि से अपणे मालक रे पैसेयां जो खत्म करेया करदा है। 2इधेरे तांइ तिस अमीर मणू ने मुंशी जो सदाया ते तिसका पूच्छेया, मैं जे किच्‍छ भी तेरे बारे अन्दर सूणेया करदा है, से सच है, कि नी? अवे तू अपणे कम्म रा लेखा-जोखा मेरे जो दस्सी दे किजोकी मैं तिज्जो नौकरी का कह्ड्डी दैणा। 3तां मुंशी सोच्चणा लगेया, मेरा मालक मेरे जो नौकरी का कडणे वाला है, फिरी मैं कुते जाह्न्गा? मेरे का तां मजूरी भी नी होणी अते लज्जे भीख भी किय्यां मंग गा? 4मेरे जो किच्‍छ इदेया करणा पैणा कि जां मेरा मालक मेरे जो नौकरी का कह्ड्डी दिंगा, तां मेरे मते जणे मित्र होणा चाएदे ताकि से मेरे जो तिस बेल्ले सम्भाली लेंन। 5इधेरे तांइ मुंशी ने अपणे मालक रे दैण-दाराँ जो इक्क-इक्क करी के सद्देया ते पैल्ले मणू का पूच्छेया, कि मेरे मालक का तैं किन्ना उधार लित्ते रा है? 6तां पैल्ले देंन-दार ने मुंशी जो जवाब दित्तेया, मेरे पर सौ मण#16:6 लगभग 37 लीटर जैतून रा तेल उधार है। तां मुंशी ने बोल्लेया, कि इसजो बदली करी पंजाह मण लिख्खी दे। 7फिरी तिनिए दूज्जे देंन-दार का पूच्छेया, कि तेरे पर मेरे मालक री किन्नी उधारी है? अते तिनिए बोल्लेया, बीह् टन कणक री उधारी है, तां मुंशी ने तिसजो बोल्लेया, कि सोलह टन लिख्खी लै। 8फिरी इय्यां होया कि तिस अमीर मणू ने अपणे ठग्ग मुंशी री चलाकी दिख्खी करी तिसेरी तारिफ कित्ती, किजोकी तिनिए बड़ी चलाकी कने कम्म कित्ता थिया, तिय्यां ही इस दुनिया मणू दुनियादारी री गल्लां बिच परमेश्वर रे लोक्कां का जादा चलाक हिन। 9मैं तुसा जो बोलदा कि दुनिया री धन-दौलत कने तुसा दूज्जेयां रा भला करो अते तिन्हा जो अपणा मित्तर बणाई लेयो किजोकी जां तुसा रे मरणे का बाद तुसा जो अपणे कने हमेसा रे स्वर्गीय घर बिच लेई लैणा। 10जे थोडे़ का थोडे़ अन्दर भरोसेमंद है, से मती सारी चीजां अन्दर भी भरोसेमंद होणा ते जे थोडे़ का थोडे़ अन्दर बेईमान है, से मती सारी गल्लां अन्दर बेईमान होणा। 11जे अगर तुसा दुनियावी धन-दौलत बिच भरोसेमंद नी हुंगे तां परमेश्वर ने तुसा जो स्वर्गीय धन-दौलत किजो दैणा। 12ते जे अगर तुसा दूए लोक्कां रे धन-दौलत जो इस्तेमाल करणे बिच भरोसेमंद नी रे, तां परमेश्वर ने तुसा जो स्वर्गीय धन्न किजो दैणा? 13कोई भी मणू दो मालकां री सेवा नी करी सकदा, से या तां इक्क कने नफरत करी सकदा अते दूज्जे कने प्यार या इक्क जणे कने बड़ी ईमानदारी कने रेह्ई सकदा पर दूज्जे जो से अण-दिख्खा करी सकदा इय्यां ही कोई भी मणू परमेश्वर अते धन-दौलत, दोनां री सेवा किठ्ठे नी करी सकदा। 14फरीसी मणू, जे कि धन-दौलत रे लालची थिये, से यीशु गल्लां जो सुणी करी यीशु रा मजाक उडाणा लग्गे।

यीशु रे किच्‍छ उपदेस

15यीशु ने तिन्हा जो बोल्लेया, तुसा जे मणूआं जो ए जताणा चाह्‍ंदे कि तुसा बड़े सही हिन, पर परमेश्वर तां तुसा रे मनां जो भी जाणदे। दुनिया जिस गल्ल रा बड़ा आदर करदी, से गल्ल परमेश्वर री नजरां अन्दर घटिया हिन। 16जां बपतिस्मा दैणे वाला यूहन्ना परमेश्वर रा सुब बसेख सुणादा थिया, तां तांइ मूसा रे जरिए दित्ते गेरे परमेश्वर रे कानून अते भविष्यद्वक्तां रे सुब बसेख ही मणूआं रा मार्ग दर्शन करदे रे, अवे परमेश्वर रे राज रे सुब बसेख मणूआं तांइ पूज्जेया करदी है ते तिस अन्दर जाणे तांइ मणू उताह्ल्ले होया करदे हिन। 17फिरी भी आसमान ते जमीन रा टली जाणा तां असान है पर परमेश्वर रे कानून अन्दर लिख्खे रा इक्क-इक्क अख्खर भी नी मिह्टि सकदा। 18जे कोई अपणी लाड़ी जो तलाक देई करी छड्डी दिन्दा ते कुसकी दूज्जी जनानी कने ब्याह करदा तां ए व्याभिचार मन्नेया जान्दा। अते जे कुसकी तलाक दित्ते री जनानी कने ब्याह करी लिन्दा, से भी व्याभिचार ही करदा।

अमीर मणू ते गरीब लाज़र

19फिरी यीशु ने तिन्हा लोक्कां जो इक्क उदारण दित्तेया, दिख्खो, इक्क मणू थिया ते से बड़ा अमीर थिया। से बडे़ छैल अते मैह्न्गे रे कपड़े पान्दा थिया। ते हर रोज बड़े ऐश-ओ-अराम री जिन्दगी जिन्दा थिया। 20ते लाज़र नां रा इक्क दुखी ते गरीब भिखारी जो तिस अमीर मणू रे घर रे दुआर का बिहाली दित्ता जांदा थिया ते तिसेरा सारा जिस्म जख्मां कने भरित्ते रा हुन्दा थिया। 21लाज़र तिस अमीर मणू री बचे री जुठ्ठी रोट्टी खाई करी अपणे पेट जो भरणा चाह्‍ंदा थिया, ते इधेरे तांइ से बाह्र बेई रैहन्दा थिया, इत्ते तक कि कूत्ते भी आई करी तिसेरे जख्मां जो चटदे थिये। 22इक्क रोज लाज़र मरी गेया ते स्वर्गदूत तिसेरी आत्‍मा जो स्वर्ग अन्दर तिसेरे पुरखे अब्राहम का लेई गे, से अमीर मणू भी थोड़े रोज्जां बाद मरी गेया ते तिसजो दब्बी दित्तेया गेया। 23तिसेरी आत्‍मा पताल बिच चली गई जां से नरक अन्दर तड़फदा थिया, तां तिसेरी नजर स्वर्ग पर पेई जित्ते से ही गरीब लाज़र अब्राहम री खोख्खा अन्दर थिया। 24तां तिस अमीर मणू ने जोरे कने हक्क मारी करी बोल्लेया, ओ पिता अब्राहम! मेरे पर तरस खाओ ते इस लाज़र जो मेरे का भेज्जी देयो कि ए अपणी उंगली जो सेड़ी करी मेरी जिब्ब जो ठण्डा करी जाओ, किजोकी मैं तां इस आग्ग रे सेक कने फुक्की चले रा है। 25पर अब्राहम ने बोल्लेया, ओ पुत्तर, चेत्ता कर कि तेरी जिन्दगी जां बड़ी अरामदेह थी, पर लाज़र री जिन्दगी बड़ी दर्दनाक थी। अवे से इत्ते स्वर्ग अन्दर अराम कने रेया करदा है, अते तू नरक अन्दर अपणे हिस्से दा दुख सेह्या करदा है, 26होर तां होर असा रे बिच इक्क बड़ा बड्डा गात्त है, जिसेरी वजह कने कोई भी स्वर्ग का नरक जो अते नरक का स्वर्ग जो चाह्ई करी भी नी जाई सकदा। 27अमीर मणू ने बोल्लेया, पिता अब्राहम! मैं तुसा रे छंदे करदा कि लाज़र जो मेरे प्यो रे घरे भेजी देयो, 28किजोकी, दुनिया पर मेरे पंज भ्याल होर भी हिन, ए तिन्हा का जाई करी जे किच्‍छ भी मेरे कन्ने होया करदा है, तिन्हा जो दस्सी सको ताकि जिस बेल्ले से मरण तां तिन्हा जो नरक अन्दर नी आणा पेयो 29अब्राहम ने बोल्लेया, तेरे भ्यालां तांइ मूसा रे कानून ते भविष्यद्वक्तां दी कताबां हिन, से तिन्हा जो पढ़ी करी तिन्हेरी गल्लां पर चली सकदे 30तिनिए बोल्लेया, पिता अब्राहम जी! जे कोई मरे रे मणूआं बिच का तिन्हा जो समझाणा जाओ, तां ही से अपणे पाप्पां का तौबा करी सकदे। 31अब्राहम ने तिसजो बोल्लेया, जे से मूसा रे कानून अते भविष्यद्वक्तां री कताबा बिच जे लिख्खे रा है, तिन्हा जो नी सूणदे तां कोई मरे रे मणूआं बिच का जिन्दा होई करी तिन्हा का जाओ, तां भी तिन्हा तिन्हेरा विश्वास नी करणा।

Currently Selected:

लूका 16: CDHNT

Highlight

Copy