लूका 13

मन बदलो या नास होई जाओ

1तिस बेल्ले तित्ते किच्‍छ मणू आई पूज्जे ते तिन्हा ने यीशु जो दस्सेया कि जां गलील प्रदेश रे किच्‍छ मणू कुर्बानी चढ़ाया करदे थिये तां पिलातुस राजपाल ने तिन्हा रा खून करवाई छड्डेया। 2ए सुणी करी यीशु ने जवाब दित्तेया, तुसा कै सोच्चया करदे हिन कि ए गलील प्रदेश रे मणू दूज्जे सबणी गलीली मणूआं का जादा पापी थिये, कै इधेरे तांइ तिन्हा जो ए गल्लां भुग्तणियाँ पेईयाँ थिया? 3नी पर मैं तुसा जो बोलदा कि जे अगर तुसा अपणे पाप्पां का तौबा ना करो तां तिस्सी तरिक्के कने मुकाए दित्ते जाणे। 4या तुसा इय्यां समजदे कि से अठारा मणू जिन्हा पर शीलोह नां री जगाह् बिच गुम्मट पेया थिया, ते से दबी करी मरी गे थिये: कै से यरुशलेम सहर बिच रैह्णे वाले होरणी मणूआं का भी जादा पापी थिये? 5यीशु ने यरुशलेम रे सबणी मणूआं जो बोल्लेया इदेया किच्‍छ भी नी है तुसा अपणे पाप्पां का तौबा करी लेयो, नी तां तुसा भी तिय्यां ही मरणा।

बगैर फल्ल रे अंजीर रे बूट्टे रा उदारण

6तां यीशु ने तिन्हा जो इक्क उदारण दित्तेया, इक्क मणू ने अंगूर रे बगीचे अन्दर अंजीर रा बूट्टा लाया अते तिस अन्दर कोई फल्ल लग्गेया कि नी लगेया, ए दिख्खणे तांइ से हर साल बगीचे जो जान्दा थिया, पर कोई फल्ल नी लग्गे रा हुन्दा थिया। इक्क रोज से इस गल्ल कने उदास होई गेया 7अते तिनिए बगीचे रे मालक#13:7 इत्ते ए परम-परमेश्वर जो दर्शाए करदा है। ने माली #13:7 इत्ते ए मसीह यीशु जो दर्शाए करदा है।जो बोल्लेया, तू इस बूट्टे जो बड्डी दे, किजोकी मेरे जो इस बूट्टे #13:7 इत्ते बूट्टा इस्राएल देस रे लोक्कां जो दर्शाए करदा है।का फल्ल तोपदे त्रै साल होई गेरे हिन, ते इस बूट्टे ने फजूल अन्दर जगाह् रोक्के री है। 8माली ने तिसजो बोल्लेया, ओ मालका! इस बूट्टे जो, इस साल मत बड्डो, ते मैं इसेरे चौह्न्नी पास्से नदारी करी के इस बिच खाद पाई दिंगा ते मैं इसेरी ठीक तरिक्के कने दिख्ख-रिख्ख करगा 9ते फिरी बगीचे रा मालक बोलणा लगेया, कि जे अगले साल इस बूट्टे अन्दर फल्ल लग्गी जांह्ग्गे, तां खरा, नी तां तू इसजो बड्डी देय्याँ।

विश्राम दिन कुबड़ी जनानी जो ठीक करणा

10विश्राम दिन यीशु सभास्थल अन्दर वचन सुणाया करदे थिये, 11तां इक्क जनानी, जिस बिच दुष्टात्मा वास करदी थी ते जिनिए तिसजो रोला बणाई रख्खे रा थिया ते से कुबड़ी होई गे री थी। 12यीशु ने जां तिसजो दिख्खया, तां तिसजो अपणे का सद्देया अते बोल्लेया, ओ जनानिये, तैं अज्ज अपणी बीमारी का छुटकारा पाई लेया 13ते यीशु ने तिसेरे सरा पर हत्थ रख्या, ते तिस्स ही बेल्ले, सीद्दी होई करी से खड़ी गई, ते परमेश्वर री बड़ाई करणा लग्गी पेई। 14यीशु ने विश्राम दिन तिसजो खरा करदे दिख्खी करी सभास्थल रा प्रधान गुस्सा होई गेया ते मणूआं जो बोलणा लगेया, हफ्ते अन्दर कम्म करणे तांइ छे रोज दित्ते रे हिन, तां तिन्हा रोज्जां बिच ही खरा होणे तांइ आया करो, विश्राम दिन नी 15प्रभु यीशु ने जवाब दित्तेया, कि ओ कपटियों, कै विश्राम दिन रे रोज्जे तुसा अपणे डंगरां जो पाणी पियाणे तांइ नी लिन्दे? 16तां कै मेरे तांइ ए जरुरी नी थिया, कि विश्राम दिन पर इस जनानी, जे अब्राहम रे ‍खानदान का है, बिच का दुष्टात्मा जो कड्डां, जिस जो शैतान ने अठारा साल्लां का जकड़ी रख्खे रा थिया? 17जां यीशु ने ए गल्लां बोल्ली, तां तिन्हेरे खिलाफ जिन्ने भी मणू थिये, तिन्हेरे मुँह बांद्द होई गे, ते बाकि सब-जह्णे तिन्हेरे इस महान कम्म का खुस होई गे।

सरेयाँ रे बीह् रा उदारण

18तां यीशु ने बोल्लेया, परमेश्वर रा राज कदेया है ते मैं इसेरी बराबरी कुस कने करां?

19से सरेयाँ रे बीह् सांई है, जिस जो कुसकी ने अपणे खेत्तरां बिच बाया ते जां से बड्डा होया तां इक्क बूट्टा बणी गेया, अते फिरी आसमान रे चिड़ू-पखेरुआं ने तिसेरी डालियां पर अपणे घोंसले बणाई लित्ते।

खमीर रा उदारण

20यीशु ने फिरी पूच्छेया, कि मैं परमेश्वर रे राज री बराबरी कुस कने करां?

21से उस त्राक सांई है, जिस जो कुसकी जनानी ने बबरु बणाणे तांइ आट्टे अन्दर मलाई दित्तेया बसक्क, त्राक तिस आट्टे का बड़ी घट् थी, तां भी तिस त्राक ने पूरे आट्टे जो त्राक बणाई करी फुलाई दित्तेया।

भीड़ा दरवज्जा

22यीशु ते तिन्हेरे चेल्‍ले सहर-शहर अते ग्रां-ग्रां बिच जाई करी परमेश्वर रे बारे अन्दर उपदेस दिन्दे दिन्दे यरुशलेम जो जाया करदे थिये। 23तां कुसकी ने तिन्हा जो पूच्छेया, प्रभु जी, कै छुटकारा पाणे वाले थोड़े ही मणू हिन? 24यीशु ने तिसजो जवाब दित्तेया, “परमेश्वर रे राज जो पुजणे वाले तंग दुआर का जाणे तांइ मैहनत करो, किजोकी बड़े जणेया ने अन्दर जाणे री कोसीस करणी पर जाई नी सकणा। 25जां परमेश्वर ने, जे घर रे मालक ने दुआर जो बन्द करी दैणा, तां तुसा बाहर खड़े होई करी दुआर जो खट-खटाणा ते बोलणा, ओ प्रभु, असा तांइ दुआर खोली देयो पर अन्दर का ए जवाब आणा, मैं तुसा जो नी जाणदा। 26तुसा ने बोलणा, पर असा ने तुसा कन्ने खाएरा ते अंगूर रास पित्तेरा है, ते तुसा असा रे ग्रां री गलियां बिच उपदेस दिन्दे थिये 27पर तिन्हा बोलणा, मैं तुसा जो बोलदा, कि मैं तुसा जो नी जाणदा कि तुसा कुते का आये रे हिन ओ बुरे मणूओं, तुसा सब मेरे का दुर होई जाओ 28जां तुसा दिखणा कि अब्राहम, इसहाक, याकूब, अते सब भविष्यद्वक्ता परमेश्वर रे राज अन्दर हिन ते तुसा जो बाहर कह्ड्डी दित्तेया गे रा है, तां तित्ते तुसा रोणा अते दान्द पीह्णे 29फिरी दुनिया रे हर पास्से का सारे मणूआं ने परमेश्वर रे राज री धाम अन्दर सामल हुणा आणा, 30ते अज्ज जिन्हा मणूआं री बेजती करदे, तिस बेल्ले तित्ते तिन्हेरा आदर कित्तेया जाणा, ते जिन्हा जो मणूआं का अज्ज बड़ा आदर मिलेया करदा है, तिन्हा जो तिस बेल्ले बेजती कित्तेया जाणा, किजोकी जे नीच्चे हिन से उँचे कित्ते जाणे ते जे अवे उँचे हिन से निचे कित्ते जाणे।

हेरोदेस री दुश्मणी

31तिस ही बेल्ले किच्‍छ फरीसी मणू तित्ते आई रे ते बोलणा लगे, राजा हेरोदेस अन्तिपास तुसा जो मारणा चाह्‍ंदा, इधेरे तांइ तुसा इत्ते का कुदखी होरथी चली जाओ। 32तां यीशु ने तिन्हा फरीसी जो बोल्लेया, जाई करी तिस चलाक तिस मणू जो बोल्ली दे, कि मैं मणूआं बिच का दुष्टात्मा जो निकालदा ते मैं अज्ज भी बमाराँ जो खरा करणा, ते कल्ल भी फिरी त्रीय्ये रोज्जे मैं जिस कम्म तांइ आए रा है, से पूरा करणा। 33अते आज्‍ज, कल्ल ते परसू, इन्हा रोज्जां बिच मैं अपणा कम्म करणा ही है किजोकी कुसकी भी भविष्यद्वक्ता तांइ ए खरा नी होणा कि से यरुशलेम रे बाहर मारेया जाओ।”

यरुशलेम सहर तांइ रोणा

34ओ यरुशलेम रे लोक्कों, इक्क समय पर तुसा ने भविष्यद्वक्ता जो मारे रा है, जिन्हा जो परमेश्वर ने इत्ते रे मणूआं तांइ भेज्जे रा थिया, तिन्हा जो इत्ते रे ही मणूआं ने पत्थरां कने मारे रा है, मैं बड़ी वरी इत्ते रे मणूआं रे बचाणे री कोसीस कित्ती, जिय्यां इक्क मुर्गी अपणे बच्चेयां जो अपणे पंखा रे हेठ समेटी लिन्दी, पर तुसा नी चाएया कि मैं तुसा जो बचां। 35ते अवे दिख्खो, परमेश्वर ने तुसा तांइ तुसा रा घर उजाड़ी रख्खे रा है, ते मैं तुसा जो बोलदा, कि तुसा मेरे जो तां तांइ नी दिख्खी सकणा जां तांइ से बेल्ला आई नी जान्दा, कि तुसा बोलणा, धन्न है से, जे प्रभु रे ना कने आया करदा है।

Currently Selected:

लूका 13: CDHNT

Highlight

Copy