यूहन्ना 21
21
तिबिरियुस झील रे कनारे चेल्लेयां जो लिबणा
1इन्हा गल्लां रे बाद यीशु ने खुद जो गलीली समुन्द्र (तिबिरियुस) रे कनारे चेल्लेयां रे सामणे प्रकट कित्तेया। अते इस तरिके कने सामणे आये; 2शमौन पतरस अते थोमा जिस जो कि दिदुमुस भी बोल्लेया जान्दा, अते गलील प्रदेश रे काना कस्बे का नतनएल, जब्दी रे पुत्तर, अते यीशु रे चेल्लेयां बिच का दो जणे होर इकठ्ठे थिये, 3शमौन पतरस ने तिन्हा जो बोल्लेया, मैं मच्छी पकड़ने चलया तिन्हा ने तिसजो बोल्लेया, असी भी तेरे कने चलदे अते से निकली करी किस्ती पर चढ़ी गे, पर तिस राती किच्छ भी नी पकड़या 4भ्याग हुन्दे ही यीशु कनारे पर आये पर चेल्लेयां ने नी पछियाणेया कि से यीशु हिन। 5तां फिरी यीशु ने तिन्हा जो बोल्लेया, ओ मित्तरों, कै तुसा का किच्छ मच्छियाँ हिन? तिन्हा ने जवाब दित्तेया, ना 6यीशु ने उन्हा जो बोल्लेया, किस्ती रे सज्जे पास्से जाल पाओ तां किच्छ मिलणा इधेरे तांइ तिन्हा ने जाल पाया पर मच्छियाँ जादा होणे री वजह कने तिन्हा का जाल खिच्ची नी होया 7तां तिस चेल्ले ने जिस कने यीशु प्यार करदे थिये, पतरस जो बोल्लेया, ए तां प्रभु हिन! शमौन पतरस ने ए सुणी करी कि से प्रभु हिन, चोग्गा पाई लित्तेया (किजोकी से नंगा थिया) अते समुन्द्र अंदर कुदी पेया। 8पर दूज्जे चेल्ले किस्ती पर मच्छियाँ कने भरितेरा जाल छिकदे कनारे आये, किजोकी से कनारे का जादा नी, पर कोई लगभग सौ मीटर#21:8 दो सौ हत्थ री दुरी तक दुर थिये। 9जां से कनारे पूज्जे तां तिन्हा ने तित्ते भखे रे कोले अते तिन्हा पर मच्छी ते रोट्टी रख्खे री दिख्खी। 10यीशु ने तिन्हा जो बोल्लेया, जे मच्छियाँ तुसा अवे पकड़ी हिन तिन्हा बिच का किच्छ लियाओ। 11शमौन पतरस गेया अते किस्ती पर चढ़ी करी इक्क सौ त्रियुन्जा बड्डी मच्छियाँ कने भरितेरा जाल कनारे पर खिच्ची लियाया, अते इन्नी मच्छियाँ होणे पर भी जाल नी फट्टेया 12यीशु ने तिन्हा जो बोल्लेया, आओ, रोट्टी खाओ, चेल्लेयां बिच का कुसकी री भी हिम्मत नी होई कि पुच्छे कि तू कुण है? किजोकी से जाणदे थिये कि ए प्रभु ही हिन। 13यीशु ने रोट्टी लेई करी तिन्हा जो दित्ती ते तिय्यां ही मच्छी भी। 14ए तिज्जी वरी ए कि यीशु मरे रे बिच का जिन्दा होणे का बाद चेल्लेयां जो लिब्बे।
यीशु ते पतरस
15रोट्टी खाणे का बाद यीशु ने शमौन पतरस जो बोल्लेया, ओ शमौन, यूहन्ना रे पुत्तर, कै तू इन्हा सारेयां का बधी करी मेरे कने प्यार रखदा? पतरस ने तिन्हा जो बोल्लेया, हाँ प्रभु, तुसा तां जाणदे ही कि मैं तुसा कने प्यार करदा। तिन्हा ने तिसजो बोल्लेया, मेरी शिक्षा पर चलणे वाले लोक्कां जो उरणू सांई चरा। 16तिन्हा ने फिरी दूज्जी वरी तिसजो बोल्लेया, ओ शमौन, यूहन्ना रे पुत्तर, कै तू मेरे कने प्यार करदा? तिन्ने तिन्हा जो बोल्लेया, हाँ प्रभु, तुसा तां जाणदे हिन कि मैं तुसा कने बड़ा प्यार करदा। तिन्हा ने तिसजो बोल्लेया, मेरी शिक्षा जो मनणे वाले लोक्कां जो भेड़ां सांई सम्भाल। 17तिन्हा ने तिज्जी वरी तिसजो बोल्लेया, ओ शमौन, यूहन्ना रे पुत्तर, कै तू मेरे कने प्यार रखदा? पतरस उदास होई गेया कि यीशु ने तिसका तिज्जी वरी इय्यां बोल्लेया कि, कै तू मेरे कने प्यार रखदा? अते तिसने बोल्लेया, ओ प्रभु जी, तुसा तां सब किच्छ जाणदे तुसा जाणदे हिन कि मैं तुसा कने प्यार रखदा यीशु ने तिसजो बोल्लेया, मेरी शिक्षा जो मनणे वाले लोक्कां जो भेड़ां सांई चरा। 18मैं तेरे कने सच-सच बोलदा, जां तू जुआन थिया तां तैयार होई करी जित्ते चाह्ंदा थिया तित्ते चली जांदा थिया पर जां तू बूड्डा होणा तां तू अपणे हत्थ पसारणे, अते दूज्जे ने तिज्जो तैयार करी के जित्ते तू नी चाह्ंदा तित्ते तिज्जो लेई जाणा। 19यीशु ने ए सब पतरस री मौत रे पास्से इसारा करणे तांइ बोल्लेया, जिस कने पतरस ने परमेश्वर री बड़ाई करणी। इन्ना बोल्ली करी यीशु ने पतरस जो बोल्लेया, मेरा पीच्छे चल ते “मेरा चेल्ला बणी रे।”
यीशु ते तिन्हेरे प्यारा चेल्ला
20पतरस मुड़ेया अते दिख्खेया कि से चेल्ला जिस कने यीशु प्यार करदे थिये, उन्हेरे पीच्छे आया करदा है। ए से ही थिया जिनिये रोट्टी खांदे बेल्ले तिन्हेरे नेड़े बैठ्ठे रा थिया ते झुकी करी पूच्छदा थिया, ओ प्रभु, तुसा जो धोखा देई करी पकड़वाणे वाला कुण है?
21तिसजो दिख्खी करी पतरस ने यीशु जो बोल्लेया, ओ प्रभु जी, इसेरा कै हुणा? 22यीशु ने तिसजो बोल्लेया, जे मैं चाए कि से मेरे आणे तक, ए इत्ते ही रे, तां तिज्जो इस कने कै मतलब? तू मेरे पीच्छे चल ते मेरा चेल्ला बणे रे। 23इय्यां ही ए गल्ल संगी विश्वासी बिच फैली गई कि तिस चेल्ले ने नी मरणा, पर यीशु ने तिस कने ए नी बोल्लेया थिया, कि तिसने नी मरणा पर तिन्हेरे बोलणा रा ए मतलब थिया कि जे मैं ए चाए कि से मेरे आणे तक, ए इत्ते ही रे, तां तिज्जो इस कने कै मतलब? 24ए से ही चेल्ला ए जे इन्हा गल्लां री गवाई दिन्दा अते जिनिये इन्हा गल्लां जो लिख्खेया, अते असी जाणदे कि तिसेरी गवाई सच्ची है।
आखरी गल्लां
25अते होर भी बड़े सारे कम्म हिन, जे यीशु ने कित्ते जे अगर उन्हा जो इक्क-इक्क करी के लिखदे, तां मैं समजदा कि तिन्हा जो रखणे तांइ इस दुनिया री जगाह् भी घट पेई जाणी थी।
Currently Selected:
यूहन्ना 21: CDHNT
Highlight
Share
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
