यूहन्ना 20

यीशु मसीह रा फिरी जिन्दा होणा

खाली कब्र

1हफ्ते रे पैल्ले रोज्जे#20:1 ईत्तवार रा दिन, मगदला सहर री मरियम, भ्यागा-भ्यागा न्यहारे बिच ही कब्र जो आई रेई, अते दिख्खेया कि कब्र रे दुआर का पत्थर घिरे रा है। 2फिरी से दौड़ी करी शमौन पतरस अते तिस दूज्जे चेल्‍ले का, जे यीशु जो प्यारा थिया, पूज्जी अते बोलणा लग्गी, तिन्हा लोक्कां ने प्रभु रे सरीर जो कब्र का निकाली करी लेई गे अते असा जो नी है पता कि तिन्हा ने उन्हा जो कुते रख्खे रा है। 3तां पतरस अते दुज्जा चेल्ला निकली करी कब्र पास्से चली गे 4से दोनों कने-कने दौड़या करदे थिये, पर दुज्जा चेल्ला पतरस का अग्गे निकली करी कब्र पर पैल्ले पूज्जेया। 5तिन्ने निह्ठ्ठा होई करी (टलू रे) कपड़े पे रे दिख्खे पर से अन्दर नी गेया। 6तां शमौन पतरस भी, तिसेरे पीच्छे-पीच्छे आई पूज्जेया, अते कब्र रे अन्दर चली गेया अते तिसने (टलू रे) कपड़े पे रे दिख्खे 7अते से कपड़ा जे कब्र बिच रखदे बेल्ले तिन्हेरे सिर कने लपेट्टेया गेया थिया (टलू) से बाकि रे कपड़ेयां कने नी, बल्कि इक्क बखरी जगाह् पर तैह् लगाई करी रख्खे रा थिया, 8तां दुज्जा चेल्ला भी जे कि कब्र पर पैल्ले पूज्जेया थिया, अन्दर गेया अते तिन्ने दिख्खेया ते विश्वास कित्तेया कि यीशु मरे रे लोक्कां बिच का जिन्दा होई गेरे हिन। 9किजोकी यीशु रे जिन्दे होणे रे पैल्ले तिकर से पवित्रशास्त्र बिच लिख्खे री इस गल्ल जो नी समजे थिये, कि तिन्हेरा मरे रेयां बिच का जिंदा होणा पक्का है। 10अते से चेल्‍ले फिरी अपणे घरे हटी गे।

यीशु मसीह रा अपणे चेल्‍लेयां जो लिबणा

मरियम मगदलीनी जो लिबणा

11पर मरियम कब्र रे बाहर खड़ी होई करी रुन्दी रेह्ई, अते रुन्दे-रुन्दे से कब्र अन्दर दिख्खणे तांइ झुकी।

12अते जित्ते यीशु री सरीर जो रख्खे रा थिया, तित्ते तिसने दो स्वर्गदूतां जो चिट्टे कपड़ेयां बिच, इक्क जो सिराणे अते दूज्जे जो पैरा का बैठ्ठे रे दिख्खेया। 13अते तिन्हा ने मरियम जो बोल्लेया, ओ कुड़िये, तू किजो रुन्दी है? तिन्ने तिन्हा जो बोल्लेया, से मेरे प्रभु रे सरीर जो चुक्की लेई गे हिन अते मेरे जो नी है पता कि तिन्हा ने उन्हा जो कुते रख्खे रा है। 14ए बोलदे ही से पीच्छे मुड़ी ते तिन्ने यीशु जो खड़ितेरा रा दिख्खेया, पर नी पछियाणेया कि से यीशु हिन। 15यीशु ने तिसजो बोल्लेया, ओ कुड़िये, तू किजो रुन्दी है? तू कुस जो तोपदी है? मरियम ने यीशु जो माली समजी करी तिन्हा जो बोल्लेया, श्रीमान, जे तुसा तिन्हा रे सरीर जो लेई गेरे हिन तां मेरे जो दस्सी देयो कि तिन्हा जो कुते रख्खेया रा है? मैं तिन्हा जो लेई जांगी। 16यीशु ने तिसजो बोल्लेया, मरियम! तिसने पीच्छे मुड़ी करी तिन्हा जो बोल्लेया, ओ गरु! 17यीशु ने तिसजो बोल्लेया, मेरे जो मत छू, किजोकी मैं हल्ले तांइ पिता का उप्पर नी गेया, पर मेरे चेल्‍लेयां का जाई करी तिन्हा जो बोल्ली दे, मैं अपणे ते तुसा रे परम पिता, अते अपणे ते तुसा रे परमेश्वर का उप्पर जाया करदा है। 18मगदला सहर री मरियम ने जाई करी चेल्‍लेयां जो दस्सेया कि, मैं प्रभु जो दिख्खेया, अते तिन्हा ने मेरे जो ए गल्लां दस्सी हिन।

चेल्‍लेयां जो लिबणा

19उसी रोज संझा बेल्ले, जे हफ्ते रा पैल्ला रोज थिया#20:19 उसी रोज संझा बेल्ले, जे हफ्ते रा पैल्ला रोज थिया ईत्तवार री सांज्ज, उन्हेरे चेल्‍लेयां ने यहूदियां रे डर रे मारे दरवाज्जे बांद्द कित्ते रे थिये, उस्सी बेल्ले यीशु आई करी तिन्हेरे मंझाटे खड़े होई गे, अते तिन्हा जो बोल्लेया, तुसा जो सांती मिल्लो।

20अते ए बोल्ली करी तिन्हा ने अपणे हत्थ अते अपणी बख्खी रे पर जख्म वाले भोक्क तिन्हा जो दस्से। चेल्‍लेयां ने जां यीशु जो दिख्खेया तां बड़े खुस होये। 21तां यीशु ने तिन्हा जो फिरी बोल्लेया, तुसा जो सांती मिल्लो जिय्यां परम पिता ने मेरे जो भेज्जेया है, तिय्यां ही मैं भी तुसा जो दुनिया रे लोक्कां का भेजदा। 22ए बोल्ली करी तिन्हा ने तिन्हा पर फूक मारी अते तिन्हा जो बोल्लेया, पवित्रात्मा रौसनी 23जिस कुसकी रे पाप तुसा माफ करदे, उन्हा जो माफी मिलदी अते जिन्हेरे पाप तुसा माफ नी करदे, से बगैर माफी मिल्ले रे रैह्‍न्दे हिन।

थोमा जो लिबणा

24थोमा जे बारा चेल्‍लेयां बिच का इक्क थिया, अते जिस जो दिदुमुस बोलदे थिये, जां यीशु पैल्ले अपणे चेल्‍लेयां रे सामणे आये थिये तां से तिस बेल्ले तिन्हा कने नी थिया।

25दूज्जे चेल्‍ले तिस कने बोलणा लगे, असा ने यीशु जो दिख्खेया पर थोमा ने बोल्लेया, जां तांइ मैं उसेरे हत्थां बिच छेद ना दिख्खी लिंदा, अते उन्हा बिच अपणी उंगली नी पाई लिन्दा, अते उसेरी बख्खी बिच अपणा हत्थ नी पाई लिंदा, तां तांइ मेरे जो विश्वास नी होणा कि से जिन्दे होई गेरे हिन। 26इक्क हफ्ते बाद तिन्हेरे चेल्‍ले फिरी घरे रे अन्दर थिये, अते थोमा तिन्हेरे कने थिया ते दुआर बन्द थिये, तां यीशु आई करी तिन्हेरे मझाटे खड़े होई गे अते बोल्लेया, तुसा जो सांती मिल्लो। 27फिरी यीशु ने थोमा जो बोल्लेया, अपणी उंगली पाई करी मेरे हत्थ दिख्ख, अपणा हत्थ चौड़ा कर अते मेरी बख्ख बिच पा, शक करणा छड्ड अते विश्वास कर। 28ए सुणी करी थोमा ने जवाब दित्येया, ओ मेरे प्रभु, ओ मेरे परमेश्वर 29यीशु ने तिसजो बोल्लेया, तू मेरे जो दिख्खी करी, मेरे पर विश्वास कित्तेया, पर धन्न हिन से जे बिना दिख्खे रे मेरे पर विश्वास रखदे हिन।

इस कताब रे लिख्खे जाणे रा मकसद

30यीशु ने होर भी बड़े सारे चिन्ह-चमत्कारी कम्म अपणे चेल्‍लेयां जो दिखाए, जे इस कताब बिच नी लिख्खी हिन।

31अते जे गल्लां लिख्खी हिन, से इधेरे तांइ हिन कि तुसा विश्वास करो कि यीशु ही परमेश्वर रे पुत्तर, मसीह हिन अते इधेरे तांइ विश्वास करणे रे जरिए तुसा जो उसेरे नां बिच हमेसा री जिन्दगी मिल्लो।

Currently Selected:

यूहन्ना 20: CDHNT

Highlight

Copy