यूहन्ना 12
12
यीशु रे पैरां पर इत्तर पाणा
1यीशु फसह रे त्याहार का छे दिन पैल्ले बैतनिय्याह कस्बे जो आया जित्ते तिन्हा ने लाज़र जो मुर्देयां का फिरी जिन्दा कित्तेया थिया। 2तित्ते तिन्हा ने यीशु रे आदर तांइ रात्ती बेल्ले रोट्टी बणाई, ते मार्था सेवा करदी थी, ते लाज़र उन्हा बिच का इक्क थिया जे रोट्टी खाणा थिये बैठे रे थिये। 3तां मरियम ने जटामांसी रा अद्दा लीटर#12:3 अद्दा सेर कीमती इत्र लेई करी यीशु रे पैरां पर उन्धेरी दित्तेया, ते अपणे बालां कने तिन्हेरे पैर पुन्जे, ते इत्र री खुशबू कने सारा घर खुशबूदार होई गेया। 4पर उसदे चेल्लेयां बिच का यहूदा इस्करियोती जे तिसजो पकड़वाणे वाला थिया, बोलणा लग्गेया, 5ए इत्र तीन्न सौ दीनार#12:5 तीन सौ दिन री धियाड़ी बिच बेच्ची करी गरीबां जो किजो नी दित्तेया गेया? 6तिनिये ए गल्ल इस तांइ नी बोल्ली कि तिसजो गरीबां री चिन्ता थी, पर इस तांइ किजोकी ओ चोर थिया, ते उन्हेरी पैसे री थैल्ली हमेसा तिसका रैहंदी थी, ते जे किच्छ भी उस बिच पाया जादां थिया, ओ कड्डी लिदां थिया। 7यीशु ने बोल्लेया, तिसजो रैह्णा देयो, तिसने ए मेरे मरणे रे बाद मेरे सरीर जो कब्र बिच रख्खे जाणे री तयारी बिच कित्तेया। 8किजोकी गरीब तां तुसा रे कन्ने हमेसा रैन्हदे, पर मैं तुसा रे कन्ने हमेसा नी रैह्णा।
लाज़र रे खिलाफ चाल
9जां यहूदी लोक्कां री बड़ी भीड़ जो पता चली गेया कि से उत्ते है, तां से ना सिर्फ यीशु री वजह कने आए, पर इस तांइ भी कि लाज़र जो दिख्खे, जिस जो तिनिये मरेयां बिच का जिन्दा कित्तेया थिया।
10तां बड्डे पुरोत्तां ने लाज़र जो भी मारणे री तरकिब सोच्ची। 11किजोकी तिसेरे वजह कने मते सारे यहूदी लोक्कां ने यहूदी अधिकारियां जो नक्कारी दित्तेया थिया, ते यीशु पर विश्वास करणा लग्गी पे थिये।
यरुशलेम सहर बिच विजय-प्रवेश
12अगले दिन मते लोक्कां ने जे त्योहर बिच आए थिये ए सूणेया कि यीशु यरुशलेम सहर बिच आया करदा है।
13इस तांइ उन्हा ने खजूर री डालियां लित्ती ते उस कने मिलणे जो निकले, ते हक्का मारणा लग्गे, जय हो! धन्न इस्राएल रा राज्जा, जे प्रभु रे नां कने आंदा। 14जां यीशु जो गधे रा बच्चा मिल्लेया तां से तिस पर बेई गेया, जिय्यां कि पवित्रशास्त्र बिच लिख्खे रा है,
15“ओ सिय्योन री कुड़ी#12:15 यरुशलेम रे लोक्कों मत डर, दिख,
तेरा राज्जा गधे रे बच्चे पर बेई करी चली आया करदा है।”
16यीशु रे चेल्ले पैल्ले ए गल्ल नी समजे थिये, पर जां यीशु री बड़ाई सामणे आई तां तिन्हा जो याद आया कि ए गल्लां उसदे बारे बिच लिख्खी गई री हिन, ते लोकां ने उस कने इसी तरिक्के रा बर्ताव कित्तेया थिया। 17तां भीड़ रे तिन्हा लोकां ने ग्वाही दित्ती, जे उस बेल्ले उस कन्ने थिये जां तिनिये लाज़र जो कब्र का सद्दी करी मुर्देयां बिच का फिरी जिन्दा कित्तेया थिया। 18इसी वजह कने मणू तिसजो मिलणे जो आए थिये किजोकी उन्हा ने ए सूणेया थिया कि तिनिये ए चमत्कार दिखाए रा है। 19तां फरीसियां ने आपस बिच बोल्लेया, सोच्चो तां सही कि असा रे का किच्छ नी बणदा दिख्खो दुनिया उसदे पीच्छे होई चल्लि री है।
यूनानियां रा यीशु जो तोपणा
20जे मणू उस पर्व बिच अराधना करणे जो आए थिये उन्हा बिच का किच्छ यूनानी थिये।
21उन्हा ने गलील प्रदेश रे बैतसैदा रे रैहणेवाले फिलिप्पुस का आई करी उस का बिनती कित्ती की, श्रीमान, असी यीशु जो मिलणा चाह्ंदे। 22फिलिप्पुस ने आई करी अन्द्रियास जो बोल्लेया, तां अन्द्रियास ते फिलिप्पुस ने जाई करी यीशु जो बोल्लेया 23इस पर यीशु ने उन्हा जो बोल्लेया, ओ वक्त आई गे रा है कि मणू रे पुत्तर री बड़ाई हो। 24मैं तुसा जो सच-सच बोलदा कि जा तिकर कणक रा दाणा जमीन पर पेई करी मरी नी जादां, ओ किल्ला रेन्दां पर जां ओ मरी जादां, तां बड्डा फल्ल लान्दा। 25जे अपणी जान जो प्यार करदा, ओ तिसजो गुआई दिन्दा पर जे इस दुनिया बिच अपणे प्राण जो प्यार नी करदा, ओ हमेसा री जिन्दगी तांइ उसेरी रक्षा करगा 26जे कोई मेरी सेवा करे, तां मेरा चेल्ला बणी जाए, ते जित्ते मैं है उत्ते तिनिये भी होणा, तां पिता ने उसदा आदर करणा।
अपणी मौत रे बारे बिच भविष्यवाणी
27अवे मेरा मन बड़ा वरी दुखी है इस तांइ अवे मैं कै बोल्लां? ओ पिता, मेरे जो इस दुख री घड़ी का बचा? पर मैं इसी वजह कने इस दुख का घड़ी#12:27 दुख उठाणा ते सुली पर मरणा बिच पूज्जे रा है। 28ओ पिता, अपणे नां री बड़ाई कर। तां तिस बेल्ले स्वर्ग बिच का ए अवाज आई, मैं उसेरी बड़ाई कित्ती, ते अग्गे भी करगा। 29तां जे मणू खड़ित्ते रे सूणदे थिये उन्हा ने बोल्लेया कि बद्दल गरजेया, दुज्जयां ने बोल्लेया, कोई स्वर्गदूत उस कने बोल्लेया। 30इस पर यीशु ने बोल्लेया, ए मेरे तांइ नी पर तुसा री मदद तांइ होए रा है। 31अवे इस दुनिया रे लोक्कां रा हिसाब-किताब होणा, अवे इस दुनिया रा सरदार जे शैतान है, तिसजो कड्डी दित्तेया जाणा। 32ते जे अगर मैं दुनिया का उच्चे पर चढ़ाया गेया तां सारेयां जो अपणे पास्से छिक्की लैणा। 33इय्यां बोल्ली करी तिनिये ए साफ करी दित्तेया कि उन्ने कदेइ मौत कने मरणा। 34इस पर लोक्कां ने तिसजो बोल्लेया, असा ने पवित्रशास्त्र री ए गल्ल सुणे री है, कि मसीह ने हमेसा जिन्दे रैह्णा, फिरी तू किय्यां बोलदा कि मणू रे पुत्तर जो उच्चे पर चढ़ाया जाणा ज़रुरी है? ए मणू रा पुत्तर, कुण है? 35यीशु ने तिन्हा जो बोल्लेया, अवे थोड़ी देर तिकर तुसा रे मझाटे है, जां तिकर रौसनी#12:35 इत्ते रौसनी रा मतलब यीशु मसीह है। तुसा रे कन्ने है, तां तिकर चलदे रेयो, इय्यां ना हो कि न्याहरा तुसा जो आई घेरे, जे न्याहरे बिच चलदा से नी जाणदा कि कुते जाया करदा है। 36जां तिकर रौसनी तुसा रे कन्ने है, रौसनी पर विश्वास रख्खो ताकि तुसा रौसनी री सतांन बणो।
यहूदियां रा अविश्वास बिच बणे रैणा
ए गल्लां बोल्ली करी यीशु तित्ते का चली गे ते तिन्हा लोक्कां का दुर रे। 37तिनिये उन्हेरे सामणे इन्ने चमत्कार दिखाए।
तां भी उन्हा ने उस पर विश्वास नी कित्तेया। 38ताकि यशायाह भविष्यद्वक्ता रा बोल्ले रा वचन पूरा हो जे तिनिये बोल्लेया थिया:
“ओ प्रभु, ह्मारी खबर रा कुसने विश्वास कित्तेया?
ते परमेश्वर री ताकत कुस पर प्रगट होए रा है?”
39इस तांइ ओ विश्वास नी करी सकें, किजोकी यशायाह ने ए भी बोल्लेया है:
40“उन्नये उन्हेरी हाख्खी अन्नि ते, उन्हेरा मन कठोर करी दित्तेया रा है,
कुते इय्यां ना हो कि ओ हाख्खी कने दिख्ण, ते मन कने समजन, ते फिरण, ते मैं उन्हेरे जो ठीक करां।”
41यशायाह ने ए गल्लां इस तांइ बोल्ली किजोकी उसने यीशु री आणे वाली महिमा दिख्खी थी, ते उसदे बारे बिच गल्लां कित्ती। 42तां भी अधिकारियां बिच मते लोक्कां ने उस पर विश्वास कित्तेया, पर फरीसियां री वजह कने खुल्ली करी नी मन्दे थिये, कि कुते ऐसा ना हो कि ओ सभास्थल का बाहर कड्डी दित्ते जाण। 43किजोकी मणूआं रे पास्से री बड़ाई उन्हा जो परमेश्वर रे पास्से री बड़ाई का जादा प्यारी थी।
ज्योति बिच चलणा
44“यीशु ने हक्क मारी करी बोल्लेया, जे मेरे पर विश्वास करदा, ओ मेरे पर नी पर परमेश्वर पर जिन्हा ने मेरे जो भेज्जे रा है तिन्हा पर विश्वास रखदा।”
45ते जे मेरे जो दिखदा, ओ मेरे भेजणे वाले जो दिखदा 46मैं दुनिया बिच रौसनी होई करी आए रा है, ताकि जे कोई मेरे पर विश्वास करे, ओ न्याहरे बिच ना रे 47जे कोई मेरी गल्लां सुणी करी ना मन्ने, तां मैं तिसजो गलत नी ठैहरादां, किजोकी मैं दुनिया जो गलत ठैहराणे तांइ नी, पर दुनिया रे लोक्कां छुटकारा दैणे तांइ आए रा है। 48जे मेरे जो निक्कमा मनदा ते मेरी गल्लां नी मन्दा, तिसजो गलत ठैहराणे वाला तां इक्क है उन्निए ही आखरी दिन बिच तिसजो गलत ठहराणा। 49किजोकी मैं अपणे पास्से का गल्लां नी कित्ती पर पिता जिनिये मेरे जो भेज्जे रा है, उन्ने ही मेरे जो हुकम दित्तेया कि क्या-क्या बोलणा? 50ते मैं जाणदा कि तिन्हेरे हुकम हमेसा री जिन्दगी रे रस्ते पर लेई चलदे, इस तांइ मैं जे किच्छ भी बोलदा से ही बोलदा जैसा पिता मेरे जो बोलदे।
Currently Selected:
यूहन्ना 12: CDHNT
Highlight
Share
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
