यूहन्ना 11
11
लाज़र री मौत
1मरियम ते उसेरी भैण मार्था रे ग्रां बैतनिय्याह रा लाज़र ना रा इक्क मणू बिमार थिया 2ए ओ ही मरियम थी जिनिये प्रभु रे पैरां पर इत्र पाई करी उन्हेरे पैरां जो अपणे बालां कने पुंजेया थिया, इसेरा ही भाई लाज़र बिमार थिया। 3अते उसेरी भैण ने तिसजो कहलाई भेजेया, ओ प्रभु, दिख, जिस जो तू प्यार करदे, ओ बिमार है 4ए सुणी करी यीशु ने बोल्लेया, ए बीमारी मरणे तांइ नी पर परमेश्वर री बड़ाई तांइ है, कि उस कने (उसदे जरिए) परमेश्वर रे पुत्तर री बड़ाई हो। 5यीशु मार्था ते तिसेरी भैण ते लाज़र जो प्यार करदा थिया। 6पर जां तिनिये सूणेया कि से बिमार है, तां जिस जगाह् पर ओ थिया, उत्ते दो दिनां तांइ होर रुकी गेया। 7इसेरे बाद तिनिये चेल्लेयां जो बोल्लेया, आओ, असी फिरी यहूदियां प्रदेश जो चलदे। 8चेल्लेयां ने तिसजो बोल्लेया, ओ गुरु, अब्बे तां यहूदी अधिकारी तुसा जो बट्टे मारणा चाह्ंदे, ते कै तू फिरी भी उत्ते ही जादां? 9यीशु ने उत्तर दित्तेया, कै दिन रे बारा घटें नी हुदें? अते जे कोई दिन अन्दर चले तां ओ ठोक्कर नी खादां, किजोकी इस दुनिया री रौसनी दिखदा, 10पर जे कोई रात्ती चले तां तिसजो ठोकर लगदी, किजोकी तिन्हा का रौसनी नी है। 11उन्निए ए गल्लां बोल्ली, अते इसेरे बाद उन्हा जो बोलणा लग्गेया, असा रा दोस्त लाज़र सोई गे रा है, पर मैं तिसजो जगाणे जाया करदा है 12तां चेल्लेयां ने तिसजो बोल्लेया, ओ प्रभु, जे से सोई गे रा है, तां तिनिये ठीक भी होई जाणा 13यीशु ने उसेरे मरणे रे बारे बिच बोल्लेया थिया, पर ओ समजे की निद्रं कने सोणे रे बारे बिच है बोलदा 14तां यीशु ने उन्हा जो साफ-साफ दस्सी दित्तेया, लाज़र मरी गे रा है 15ते मैं तुसा री तांइ कने खुस है कि मैं उत्ते नी थिया जिस कने तुसा विश्वास करो, पर अवे आओ, असी तिसका चले 16तां थोमा ने जे दिदुमुस कहलादां, अपणे साथी चेल्लेयां जो बोलदा, आओ, असी भी उस कने मरणे जो चलदे।
यीशु रा फिरी जिंदा होणा ते जिन्दगी
17जां यीशु बैतनिय्याह कस्बे बिच पूज्जे तां तिन्हा जो ए पता चलेया कि लाज़र जो कब्र बिच रख्खे चार दिन होई गेरे हिन। 18बैतनिय्याह कस्बा यरुशलेम सहर का कोई लगभग दो मील #11:18 इक्क मील बिच लगभग डेढ़ किलोमीटर हुंदारी दुरी पर थिया। 19मते सारे यहूदी मार्था ते मरियम जो उन्हेरे भाई रे मरणे पर सांती दैणे तांइ आए रे थिये 20जां मार्था ने यीशु रे आणे री खबर सुणी तां तिसजो मिलणे जो गयी, पर मरियम घरे ही बेई रेई। 21मार्था ने यीशु जो बोल्लेया, ओ प्रभु, जे तू इत्ते हुन्दा, तां मेरा भाई कदी नी मरदा। 22ते अब्बे भी जाणदी कि जे किच्छ तू परमेश्वर का मगणा, परमेश्वर ने तेरे जो दैणा। 23यीशु ने तिसजो बोल्लेया, तेर भाई फिरी जिन्दा होई जाणा। 24मार्था ने तिसजो बोल्लेया, मैं जाणदी कि हिसाब कताब होणे रे दिन पर फिरी जिन्दे होणे रे बेल्ले तिनिये फिरी जिन्दें होई जाणा जां सारे लोक्कां ने भी जिन्दे होई जाणा। 25यीशु ने तिसजो बोल्लेया, फिरी जिन्दा होणा ते अब्बे री जिन्दगी मैं ही है जै कोई मेरे पर विश्वास रखदा, से मरी भी जाए तां भी तिनिये जीणा, 26ते जे कोई जिन्दा है ते मेरे पर विश्वास रखदा, तिनिए कदी नी मरणा, कै तू इस गल्ल पर विश्वास करदी? 27उन्निए तिसजो बोल्लेया, हाँ! ओ प्रभु, मैं विश्वास करदी कि परमेश्वर रा पुत्तर मसीह यीशु जे दुनिया पर आणे वाला थिया, से तू ही है।
यीशु रा रोणा
28ए बोल्ली करी से चली गई, ते अपणी भैण मरियम जो सद्दी करी चुपचाणे दस्सेया, गुरु इत्ते ही है ते तेरे जो सद्देया करदा है।
29ए सूणदे ही ओ झटपट उठी करी उस का आई 30यीशु हल्ले ग्रां रे बाहर ही तिस्सी जगाह् पर थिये जिस जगाह् पर मार्था तिसजो मिल्ली थी। 31तां जे यहूदी मणू मरियम कने घर अन्दर थिये, ते तिसजो तसल्ली थिये दिए करदे, ए दिख्खी करी कि मरियम झटपट उठी करी बाहर जो गे री है समजे कि ओ कब्र पर रोणे जो जाया करदी है, इस तांइ उसदे पीच्छे चली गे। 32जां मरियम उत्ते पूज्जी जित्ते यीशु थिया, तां तिसजो दिखदे कने ही उसदे पैरां पर पेई गई, ते बोलणा लग्गी, ओ प्रभु, जे तू इत्ते हुन्दा तां मेरा भाई नी मरदा। 33जां यीशु ने तिसजो ते उन्हा यहूदियां जो जे उस कने आए रे थिये, रौंदें दिख्खेया, तां मन बिच बड्डा वरी उदास ते दुखी होई गे, 34ते बोल्लेया, तुसा ने तिसजो कुते रख्खे रा है? उन्हा ने तिसजो बोल्लेया, ओ प्रभु, चली करी दिख्खी लै। 35यीशु रोये। 36तां यहूदी मणू बोलणा लग्गे, दिख्खो, ओ उस कने किन्ना प्यार करदा थिया। 37पर उन्हा बिच का किच्छ लोक्कां ने बोल्लेया, कै जिनिये अन्नेया री हाख्खियां री रौसनी ठीक कित्ती, ओ इन्ना भी करी सकेया कि ए मणू नी मरदा?
लाज़र जो जिन्दा करणा
38यीशु मन बिच फिरी बड्डा ही उदास होई करी कब्र पर आया, ओ इक्क गुफा थी ते इक्क पत्थर उस तिस गुफा रे दुआर रख्खे रा थिया।
39यीशु ने बोल्लेया, पत्थर हटाओ तिस मुर्दे री भैण मार्था तिसजो बोलणा लग्गी, ओ प्रभु, उस बिच का अवे तां मुस्क आंदी, किजोकी तिसजो मरे रे चार दिन होई गेरे हिन 40यीशु ने तिसजो बोल्लेया, कै मैं तेरे जो नी बोल्लेया थिया कि जे तू विश्वास करगी, तां परमेश्वर री महिमा जो दिखगी? 41तां उन्हा ने तिस पत्थर जो हटाया यीशु ने स्वर्ग रे पास्से हाख्खी चुक्की करी बोल्लेया, ओ पिता, मैं तेरा शुक्रिया करदा कि तैं मेरी सुणी लित्ती री है 42मैं जाणदा थिया कि तू हमेसा मेरी सूणदा, पर जै भीड़ नेड़े-तेड़े खड़िती री है, उनहेरि वजह कने मैं ए जादा जोरे बोल्लेया कि जिस कने ए विश्वास करण कि तैं मेरे जो भेज्जे रा है, 43ए बोल्ली करी तिनिये बड़े जोर कने हक्क मारी, ओ लाज़र, निकली आ! 44जे मरी गेया थिया, ओ कफन कने हात्थ-पैर भन्निते रे #11:44 यहूदी परम्परा रे हिसाब कने तिस जमाने बिच मणू मरे रे मणू जो कफन बिच कफन कने बन्नी करी कब्र बिच रखदे थिये।ही बाहर आई गेया, ते उसदा मुँह कपड़े कने भन्निते रा थिया, यीशु ने उन्हा लोक्कां जो बोल्लेया कि तिसजो खोल्ली दयो ते जाणे दयो।
यीशु रे खिलाफ चाल
45तां जे यहूदी मणू मरियम कने आए रे थिये ते तिन्हेरा ए कम्म दिख्खेया थिया, उन्हा बिच का मते जणेया ने उस पर विश्वास कित्तेया।
46पर किच्छ ने फरीसियां का जाई करी यीशु रे कम्मां री खबर दित्ती 47इस पर बड्डे पुरोत्तां ते फरीसियां ने महासभा सद्दी, ते बोल्लेया, असी कै करण? ए मणू तां मते चिन्ह-चमत्कार दिखांदा। 48जे असी, तिसजो इय्यां ही छड्डी दिंदे, तां सारेयां ने तिसजो मसीह मन्नी लैणा, ते रोमियां ने आई करी ह्मारी जगाह् #11:48 इत्ते जगाह् रा मतलब देस या यरुशलेम रा मन्दिर भी होई सकदा। ते जाति दोन्नां पर कब्जा करी लैणा। 49तां उन्हा बिच काईफा नां रे इक्क मणू ने जे उस साल रा प्रधान पुरोत्त थिया, उन्हा जो बोल्लेया, तुसा किच्छ नी जाणदे, 50ते ना ही ए समजदे कि तुसा रे तांइ ए ही भला होणा कि असा रे सब मणूआं तांइ इक्क मणू मरे, ते ना ए कि सारी जाति नास (बर्बाद) हो, 51ए गल्ल तिनिये अपणे पास्से का नी बोल्ली थी, पर उस साल रा प्रधान पुरोत्त होई करी भविष्यवाणी कित्ती, कि यीशु ने उस जाति तांइ मरणा। 52ते ना सिर्फ उस जाति तांइ पर इस तांइ भी परमेश्वर रे तित्तर-बित्तर बच्चेयां जो भी इक्क करी दे। 53अते उसी दिन का से यहूदी अधिकारी यीशु जो मारणे री तरकिब्बां बनाणा लग्गी पये। 54इधेरे तांइ यीशु उस बेल्ले का यहूदियां प्रदेश बिच खुली करी नी घुम्मे, पर उत्ते का बणा रे नेड़े रे वाली प्रदेश रे इफ्राईम नां रे इक्क नगर जो चली गे ते अपणे चेल्लेयां कने उत्ते ही रेहणा लग्गे 55यहूदियां रा फसह रा त्याहार रा समय नेड़े थिया, ते मते मणू त्योहर का पैल्ले अपणे ग्रां का यरुशलेम सहर जो गे कि अपणे आप जो अपणे रीवाज रे हिसाब कने मन्दिर बिच जाई करी शुद्व करण। 56अते ओ यीशु जो तोपणा लग्गे ते मन्दिर बिच आपस अन्दर खड़ी करी बोलणा लग्गे, तुसा कै सोचदे? कै तिनिये त्योहर पर नी आणा? 57बड्डे पुरोत्तां ते फरीसियां ने ए हुकम देई रखे रा थिया कि जै जाणदा हो कि यीशु कुते है ओ दस्से, ताकि ओ तिसजो पकड़ी सकण।
Currently Selected:
यूहन्ना 11: CDHNT
Highlight
Share
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
