प्रेरितां रे कम्म 2

पवित्रात्मा रा उतरणा

1जां यहूदी लोक्कां रे पिन्तेकुस्त रा त्याहार#2:1 पुराणे नियम बिच पिन्तुकुस्त रा दिन, हफ्ते रा दिवस मन्नेया जांदा थिया (निर्गमन 38:22) ते कटनी रा दिवस भी मन्नेया जांदा थिया। (निर्गमन 23:13) ए दिन फसह रे दिन रे पजांह दिनां रे बाद बिच आंदा थिया। रा दिन आया, तां से सारे इक्क जगाह् कठित्ते रे थिये। 2चाणचक्के ही स्वर्ग का इक्क बड्डे तूफान जदेई सनसनाहट री अवाज होई, ते तिस कने सारा घर जित्ते से बैठ्ठे रे थिये, गुंजी गेया। 3ते तिन्हा जो इक्क इदेइ आग्ग दिस्सि जे दिखणे बिच जिब्बां सांई थी ते से तिन्हा बिच का हर इक्क पर आई टिकी। 4से सारे पवित्रात्मा बिच भरी गे, ते जिय्यां पवित्रात्मा ने तिन्हा जो बोलणे री ताकत दित्ती, से बखरी-बखरी भाषा बिच बोलणा लग्गे। 5तिस बेल्ले तित्ते मते सारे परमेश्वर रा डर मनणे वाले यहूदी भक्त, पर्व मनाणे तांइ यरुशलेम सहर बिच देस-देस का आए रे थिये ते तित्ते रेया करदे थिये। 6जां ए गरजणे जैसी अवाज लोक्कां जो सुणित्ती तां भीड़ कठ्ठी गई, ते मणू डरी गे, किजोकी हर इक्क ने प्रेरितां जो तिन्हेरे भाषा बिच बोलदे सूणेया थिया। 7से सारे बड़े वरी हैरान होई करी बोलणा लग्गे, दिख्खो, ए जे बोल्लेया करदे हिन कै सारे गलीली प्रदेश रे रैह्णे वाले मणू नी हिन? 8तां फिरी असा बिच का हर इक्क अपणी-अपणी मातृ भाषा बिच गल्लां करदे होए किय्यां सूणेया करदा है? 9असी जे पार्थी प्रदेश, मेदी, एलामी, मेसोपोटामिया, यहूदियां, कप्पदुकिया, पुन्तुस ते एशिया। 10ते फ्रूगिया, पंफूलिया, मिस्र देस, लिबिया प्रदेश, जे कुरेने सहर रे नेड़े-तेड़े हिन, इन्हा सारे देस रे रैह्णे वाले ते रोम सहर रे रैह्णे वाले हिन, 11मतलब की यहूदी ते यहूदी धर्म अपनाणे वाले अरबी लोक, क्रेते द्वीप रे मणू ते अरब देस रे मणू भी हिन, पर अपणी-अपणी भाषा बिच तिन्हेरे का परमेश्वर रे बड्डे-बड्डे चमत्कारां री गल्लां सूणदे। 12ते से सारे हैरान होए ते डरी करी इक्क दूए जो बोलणा लग्गे, ए कै होया करदा है? 13पर होरनां ने मजाक उडा़ई करी बोल्लेया, ओ तां नौई सराब रे नशे बिच हिन।

पतरस रा भाषण

14तां पतरस तिन्हा ग्याराह प्रेरितां कने खड़ित्ता ते ऊच्ची अवाज बिच बोलणा लग्गेया, ओ यहूदियां ते ओ यरुशलेम सहर रे सारे रैह्णे वालेयों, ए जाणी लेयो, ते कान्न लाई करी मेरी गल्लां सुणो, 15जिय्यां तुसा समजेया करदे हिन, तैसी गल्ल नी है, ए मणू नशे बिच नी हिन, किजोकी हल्ले भ्यागे रे नौ ही बज्जे#2:15 तिज्जा पहर रे हिन। 16पर ए से गल्ल है, जे योएल भविष्यद्वक्ता रे जरिए बोल्ली गई थी 17परमेश्वर बोलदे,

“आखरी दिनां बिच इय्यां होणा कि मैं अपणा आत्‍मा सारे लोक्कां जो दैणा, ते तुसा रे मुडें ते तुसा री कुड़ियां ने भविष्यवाणी करणी,

ते तुसा रे जवान्नां ने दर्शन दिखणे, ते तुसा रे बुजुर्ग मणू ने सुपने दिखणे

18इत्ते तिकर मैं अपणे दास ते दासियां जो भी तिन्हा दिनां बिच अपणी आत्‍मा दिंगा, ते तिन्हा ने भविष्वाणीयां करणी।

19ते मैं उप्पर आसमान बिच अन्नौखे कम्म ते थल्ले दुनिया पर निशानी, खून, ते आग्ग, ते धुएं रा बद्दल दिखाणा।

20परमेश्वर रे महान ते तेजस्वी दिन रे आणे का पैल्ले सूरज न्याह्रा ते चाँद खून जदेया होई जाणा।

21ते जे कोई परमेश्वर रा नां लिदां उन्निए छुटकारा पाणा।”

22ओ इस्राएलियों, ए गल्लां सुणो: नासरत कस्बे रे यीशु, इक्क मणू थिये जिन्हेरा परमेश्वर रे पास्से का होणे रा सबूत तिन्हा चिन्ह-चमत्कारां, अनौखे कम्मां ते चमत्कारी चिन्ह कने अप्पु जो साबित कित्ता, जे परमेश्वर ने तुसा मझाटे तिन्हेरे का करी दिखाए, जिन्हेरे जो तुसा अप्पु ही जाणदे। 23तिस्सी यीशु जो, जे परमेश्वर री ठैहराई री योजना ते पैल्ले ज्ञान रे मुताबिक पकड़वाए गे, तुसा अधार्मिक लोक्कां री मदद कने यीशु जो पकड़वाई करी ते सुली पर चढ़वाई करी मरवाई दित्ता, 24पर तिन्हा ही जो परमेश्वर ने मौत रे बधंन का छुड़ाई करी जिन्दा करी दित्ता, किजोकी ए नामुमकिन थिया कि से तिसेरे वस बिच रैहन्दे, 25किजोकी दाऊद यीशु मसीह रे बारे बिच बोलदा,

“मैं प्रभु जो हमेसा अपणे सामणे दिखदा रेया किजोकी से मेरे दैह्णे पास्से हिन, ताकि मैं छुड़की ना पैय्यां।#2:25 ताकि मैं तिन्हा लोक्कां का ना डरां जे मेरा नुक्सान करणा चाह्‍ंदे।”

26इसी वजह कने मेरा मन खुस होया ते मेरी जिब्ब मगन होई#2:26 इसेरा मतलब है, “आनंद कने बोलणा।” बल्कि मेरा सरीर भी आस बिच बणी रैह्णा।

27किजोकी तुसा मेरे जान जो पताल बिच नी छडणा ते ना अपणे पवित्र मणू जो सड़णा ही दिंगा।#2:27 कि तुसा मेरे मुर्दा नी छड्डेया ते फिरी जिन्दा करी दित्ता।

28तुसा मेरे जो जिन्दगी रा रस्ता दस्से रा है, तुसा मेरे जो अपणी हजुरी कने खुसी कने भरी दैणा।

29ओ मेरे भाईयों, मैं कुलपती दाऊद रे बारे बिच तुसा कने हिम्मत कने बोल्ली सकदा कि से ता मरी गेया ते दब्बेया भी गेया ते तिसेरी कब्र अज्ज तिकर हमारे इत्ते पाई जादीं। 30से भविष्यद्वक्ता थिया, से जाणदा थिया कि परमेश्वर ने तिस कने वादा कित्ते रा है कि तिसेरे ‍खानदान का इक्क मणू जो तेरे गद्दी पर बैठाणा। 31तिनिए भविष्य बिच होणे वाली गल्ल जो पैह्ल्ले का ही दिख्खी करी मसीह यीशु रे फिरी जिन्दे होणे रे बारे बिच भविष्यवाणी कित्ती की ना तां तिन्हा रा प्राण पताल बिच छड्डेया गेया ते ना तिन्हेरा जिस्म सड़ी पाया। 32इसी यीशु जो परमेश्वर ने जिन्दा कित्तेया, जिसेरे असी सारे गवाह हिन 33इस तरिक्के कने परमेश्वर रे सज्जे हत्थ का सबका बड्डा पदवी पाई करी, ते पिता का से पवित्रात्मा पाई करी जिसेरा वादा कित्ता गेया थिया, ते तिन्हा ने पवित्रात्मा असा जो देई दित्ता रा है, जे तुसा दिखदे ते सूणदे हिन। 34किजोकी दाऊद तां स्वर्ग पर नी चढ़ेया पर से आप बोलदा, प्रभु परमेश्वर ने मेरे प्रभु जो बोल्लेया, मेरे दैहणे बैह्, 35जां तिकर की मैं तेरे दुश्मणा जो झुकाई करी तेरे पैरां थल्ले रा पटरा नी बणाई देयां। 36अते अवे इस्राएल रा सारे मणू ठीक तरिक्के कने जाणी लये कि परमेश्वर ने तिस्सी यीशु जो जिस जो तुसा सुली पर चढ़ा़ई दित्ता, प्रभु भी ठैहराया ते मसीह भी। 37जां लोक्कां ने ए गल्लां सुणी तां से इदेय परेशान होई गे कि जिय्यां से गल्लां तिन्हेरे दिल रे आर-पार होई गयी होण, ते पतरस ते बाकि प्रेरितां का पूच्छणा लग्गे, ओ भाईयों, असी कै करण? 38पतरस ने तिन्हा जो बोल्लेया, अपणे पाप्पां का तौबा करो, ते तुसा बिच का हर इक्क अपणे-अपणे पाप्पां री माफी पाणे तांइ मसीह यीशु रे नां कने बपतिस्मा लै तां तुसा पवित्रात्मा रा दान मिलणा। 39किजोकी ए वादा तुसा तांइ, तुसा री औलादां तांइ, ते उन्हा सारे दुर-दुर रे लोक्कां तांइ भी है जिन्हा जो असा रे प्रभु परमेश्वर अपणे नेड़े सदगा। 40ते पतरस होर मती गल्लां कने भी गवाई देई-करी घड़ी-घड़ी समजाया कि अपणे आप जो इस टेड़ी जाति का बचाओ। 41अते जिन्हा ने तिसेरा बसेख सूणेया ते विश्वास कित्ता, तिन्हा ने बपतिस्मा लित्ता ते तिसी दिन त्रै हजार लोक्कां रे लगभग तिन्हा विश्वासियां रे दल बिच मिली गे। 42ते से प्रेरितां का शिक्षा पाणे, ते सगंती रखणे, ते प्रभु भोज मनाणे, ते प्रार्थना करणे बिच मगन रे।

विश्वासियां री संगती

43ते यरुशलेम रे मते सारे लोक्कां पर भय ते भक्ति छाई गई, मते सारे अनौखे कम्म ते चिन्ह-चमत्कारां जो प्रेरितां रे जरिए दिखाए जांदे थिये। 44ते सारे विश्वास करणे वाले कठ्ठे रैह्‍न्दे थिये, ते तिन्हेरी सारी चीजां आपस बिच साझे बिच थी। 45से अपणी जायदाद ते समान बेच्ची-बेच्ची करी जदेई जिसेरी जरुरत हुंदी थी बंड्डी देया करदे थिये 46से हर रोज इक्क मन होई करी मन्दिर बिच कठिदें थिये, ते घर-घर रोट्टी तोड़दे होए खुसी ते मन रे सिद्देपन कने भोजन करेया करदे थिये, 47ते परमेश्वर री तारीफ करेया करदे थिये, ते सारे मणू तिन्हा का खुस थिये: ते जे छुटकारा पादें थिये, तिन्हेरे जो प्रभु हर दिन तिन्हा बिच मलाई दिदें थिये।

Currently Selected:

प्रेरितां रे कम्म 2: CDHNT

Highlight

Copy