प्रेरितां रे कम्म 1

यरुशलेम सहर बिच सुब-बसेख रा प्रचार

1ओ आदरणीय थियुफिलुस, मैं पैल्ली कताब उन्हा सारी गल्लां रे बारे बिच लिख्खे री थी जे यीशु अपणी सेवकाई री सुरुआत का लेई करी अपणे स्वर्ग पर चुक्की लित्ते जाणे तिकर सिखांदे रे, 2अपणे स्वर्ग पर चुक्के जाणे का पैल्ले तिन्हा ने अपणे चुणे रे प्रेरितां जो पवित्रात्मा री ताकत कने हुकम दित्ते। 3ते तिन्हा ने दुख झेलणे रे मरणे का बाद अप्पु जो अपणे प्रेरितां रे सामणे पक्के सबुतां कने ए साबित कित्ता कि से फिरी मरे रे लोक्कां बिच का जिन्दे होई गेरे हिन, ते चाली दिनां तिकर से तिन्हा सामणे प्रकट हुंदे रे, ते परमेश्वर रे राज री गल्लां करदे रे। 4जां से सारे कठ्ठे थिया तां यीशु ने तिन्हा कने मिली करी तिन्हा जो हुकम दित्तेया, यरुशलेम सहर जो ना छड्डो, पर पिता रे तिस वादे रे पूरा होणे रा इतंजार करो, जिसेरी गल्ल तुसा मेरे का सुणी चुके रे हो। 5किजोकी यूहन्ना ने तां पाणी बिच बपतिस्मा दित्ते रा है पर थोड़े रोज्जां बाद तुसा जो पवित्रात्मा रा बपतिस्मा मिलणा#1:5 इसेरा मतलब है कि पवित्रात्मा दित्तेया जाणा।

यीशु जो स्वर्ग जो उठाया जाणा

6अते तिन्हा ने कठ्ठे होई करी तिन्हा का पूच्छेया, ओ प्रभु, कै तुसा अब्बे ही इस्राएल जो रोमी साम्राज्य री गुलामी का अजाद करी के इस्राएली राज जो फिरी स्थापित करी दैणा? 7यीशु ने तिन्हा जो जवाब दित्तेया, “से कुस बेल्ले या कुस युग बिच होणी, से सिर्फ परमेश्वर रे हक बिच हिन ते से तुसा रे जानणे तांइ नी हिन। 8पर जां पवित्रात्मा तुसा पर आणा तां तुसा ताकत पाणी ते तुसा यरुशलेम सहर ते सारी यहूदियां प्रदेश ते सामरिया प्रदेश बिच, ते दुनिया रे हर कुणे तिकर तुसा मेरे गवाह बणना।” 9ए बोल्ली करी ओ तिन्हेरे दिखदे-दिखदे ही परमेश्वर ने तिन्हा जो स्वर्ग पर चुक्की लित्ता, ते बदलां ने तिन्हेरे जो प्रेरितां री हाख्खियां का लुकाई लित्तेया। 10तिन्हेरे जाणे रे बेल्ले जां से आसमान पास्से दिख्खेया करदे थिये, तां चाणचक्के ही, दो मणू चिट्टे कपड़ेयां अंदर तिन्हेरे सामणे आई खड़ित्ते, 11ते तिन्हेरे जो बोल्लेया, ओ गलीली मणूओं, तुसा किजो खड़ी करी आसमान पास्से दिख्खेया करदे हिन? ए ही यीशु, जे तुसा रे का स्वर्ग पर चुक्की लित्ते गेरे हिन, जिस तरिक्के कने तुसा उन्हा जो स्वर्ग पर जादें दिख्खेया तिसी तरिक्के कने उन्हा ने फिरी हटणा।

मत्तियाह जो यहूदा री जगाह् मिलणा

12“जां स्वर्गदूत तित्ते का हटी गे तां चेल्‍ले जैतून नां रे पहाड़ा का यरुशलेम सहर जो हटी आए जे तिस जगाह् का इक्क किलोमीटर री दुरी पर है।” 13जां से यरुशलेम बिच पूज्जे, तां भोड़ी पर गे जित्ते पतरस ते यूहन्ना ते याकूब ते अन्द्रियास ते फिलिप्पुस ते थोमा ते बरतुल्मै ते मत्ती ते हलफई रा मुडां याकूब ते शमौन जे जेलोतेस नां रे समुह रा मणू थिया ते याकूब रा मुडां यहूदा रैहन्दे थिये। 14ए सारे मती जनानियां ते यीशु री मां मरियम ते तिन्हेरे अपणे भ्यालां कने इक्क मन होई करी प्रार्थना बिच लग्गी रेय। 15तिन्हा ही दिनां बिच पतरस संगी विश्वासियां रे बिच जे इक्क सौ भी लोक्कां रे नेड़े-तेड़े थिये, खड़ी करी बोलणा लगेया, 16ओ विश्वासियों, जरुरी थिया कि पवित्रशास्त्र रा ओ लेख पूरा हो जे पवित्रात्मा ने दाऊद रे जरिए का यहूदा रे बारे बिच पैल्ले का बोल्ले रा थिया, जिनिये यीशु रे पकड़ने वालेयां री मदद कित्ती थी, 17किजोकी से ता असा बिच का इक्क थिया, ते इस सेवकाई बिच हिस्सेदार होया, 18जिय्यां कि तुसा जाणदे तिन्निए पाप री कमाई कने इक्क खेत्तर खरीदी लित्ता, ते सरे रे भारे पेया ते तिसेरा पेट फटी गेया ते तिसेरी सारी आन्द्रां निकली आई। #1:18 यहूदी अधिकारियां ने यहूदा जो पैसे दित्ते जां तिनिये यीशु जो तिन्हा रे हत्थां धोखे कने पकड़वाणे रा वादा कित्ता थिया, पर बाद बिच यहूदा ने तिन्हा लोक्कां जो से पैसे वापिस हटाई दित्ते। पर यहूदी अधिकारियां ने से पैसे लैणे का मना करी दित्ता, तां यहूदा ने से पैसे तिन्हा का ही सूटी दित्ते ते यहूदा ने अप्पु जो फाँसी लाई लित्ती ते से जमीन पर पेई गेया ते तिसेरा पेट फटी गेया ते तिसेरी सारी आंद्रा बाहर निकली आई, ते यहूदी अधिकारियां ने तिस पैसे कने इक्क खेत्तर खरीदी लित्तेया। 19इस गल्ल जो यरुशलेम सहर रे सारे रैह्णे वाले जाणी गे, इत्ते तिकर कि तिस खेत्तर रा ना तिन्हेरी भाषा बिच हकलदमा मतलब की खून रा खेत्तर पेई गेया।

20“जिय्यां की दाऊद ने भजन सहिंता बिच लिख्खे रा है,

तिसेरा घर उजड़ी जाए, ते तिसेरे बिच कोई ना बसे, ते भजन संहिता बिच दाऊद ने लिख्खे रा है,

तिसेरा औहदा कोई होर लेई लै।”

21इधेरे तांइ जिन्ने मणू यूहन्ना रे बपतिस्मा का लेई करी यीशु मसीह रे स्वर्ग पर चुक्के जाणे तिकर असा कने हर जगाह् बराबर रे, तिन्हा बिच का ही कोई इक्क तिसेरी जगाह् पर चुणेया जाए, 22ठीक है कि तिन्हेरे बिच का इक्क मणू हमारे कने यीशु रे मरे रे लोक्कां बिच का फिरी जिन्दे होणे रा गवाह होई जाए। 23तां तिन्हा ने बाकि लोक्कां बिच का दो लोक्कां जो खड़ा कित्ता, पैल्ले यूसुफ जो जिस जो बरसब्बास कहलादां, जिसेरा दुआ ना यूस्तुस है, ते दूए मत्तियाह जो, 24ते ए प्रार्थना कित्ती, ओ प्रभु तुसा जे सारेयां रे मनां जो जाणदे, ए प्रकट करो कि इन्हा दोन्नां बिच का तुसा कुस जो चुणे रा है, 25कि से इस सेवकाई ते प्रेरिताई रा हक्क लै, जिस जो यहूदा मरणे का बाद खाली छड्डी करी तिस जगाह् पर चली गेया जित्ते तिसजो अपणे कम्मां रे हिसाब कने होणा चाएदा। 26तां तिन्हा ने तिन्हेरे नां री चीठ्ठियां पाई, ते चीठ्ठी मत्तियाह रे नां पर निकली अते से तिन्हा ग्यारह प्रेरितां कने गिणेया गेया।

Currently Selected:

प्रेरितां रे कम्म 1: CDHNT

Highlight

Copy