मत्ती 27

पिलातुसे दे सामणै यीशु

(मरकुस 15:1; लूका 23:1,2; यूहन्ना 18:28-38)

1जाह़लू भ्याग होई तां सारे प्रधान याजकां कने लोकां दे स्याणे माणुआं यीशुये जो मारने दी योजना बणाई। 2कने सैह़ यीशुये जो बन्नी करी तित्थु ते लेई गै, कने जाई नैं पिलातुस हाकमे दे हुआलैं करी दित्ता।

यहूदा दा आत्महत्या करणा

3जाह़लू तिसदे पकड़ुआणे आल़े यहूदैं दिख्या कि सैह़ मौत्ती तांई आरोपी ठैहराया गेआ ऐ तां तिसियो पछतावा होएया कने सैह़ तीई चाँदिया दे सिक्के प्रधान याजकां कने स्याणे माणुआं अल्ल बापस लेई आया। 4कने ग्लाणा लग्गा, “मैं बेकसूर माणुये जो मारने तांई पकड़ुआई नैं पाप कित्ता ऐ।” तिन्हां ग्लाया, “अहां जो क्या लैणां दैणा? तू ई जाण।” 5ताह़लू सैह़ तिन्हां सिक्केयां जो मंदरे दे अँगणे च सट्टी करी चली गेआ, कने जाई नैं अपणे आप्पे जो गल़फा लगाई लेआ।

6प्रधान याजकां तिन्हां सिक्केयां जो लेई नैं ग्लाया, “क्जोकि जेह्ड़ी कीमत अहां कुसी दा खून करवाणे तांई दित्तियो थी। इसा जो खजाने च रखणा ठीक नीं” 7तिन्हां सलाह करी नैं तिन्हां सिक्केयां ते परदेसी माणुआं जो दब्बणे तांई कुम्हारे दा जमीन खरीदी लेई। 8इसा बज़ाह ते सैह़ खेत अज्जे तिकर खूने दा खेते दे नांऐ ते जाणेयां जांदा ऐ। 9ताह़लू जेह्ड़ा वचन यिर्मयाह भविष्यवक्ता दे जरिये ग्लाया गेआ था सैह़ पूरा होएया, “तिन्हां सैह़ तीई सिक्के मतलब तिसा ठैहराईयो कीमता जो (जिसा जो इस्राएल देसे दिया औलादी च कितणेयां ठैहराया था) लेई लेआ, 10कने जिंआं प्रभुयैं मिन्जो हुक्म दित्या था, तिंआं ई तिन्हां सिक्केयां नैं कुम्हारे दा खेत खरीदी लेआ।”

पिलातुस कने यीशु

(मरकुस 15:2-5; लूका 23:3-5; यूहन्ना 18:33-38)

11जाह़लू यीशु पिलातुस हाकमे सामणै खड़ोत्या था तां पिलातुसैं तिसते पुछया, “क्या तू यहूदियां दा राजा ऐ?” यीशु तिस नैं ग्लाणा लग्गा, “तू अप्पु ई तां ग्ला दा ऐ।” 12जाह़लू प्रधान याजक कने स्याणे माणु तिस पर आरोप लगा दे थे, तां तिन्हीं कुच्छ जवाब नीं दित्ता। 13इसा गल्ला पर पिलातुस तिस नैं ग्लाणा लग्गा, “क्या तू नीं सुणदा कि एह़ तेरे खलाफ कितणियां गवाहियां देआ दे हन?” 14अपर यीशुयैं तिसियो इक्की गल्ला दा भी जवाब नीं दित्ता, ऐत्थु तिकर कि हाकमे जो बड़ी हरानी होई।

मौत्ती दी सज़ा दा हुक्म

(मरकुस 15:6-15; लूका 23:13-25; यूहन्ना 18:39; 19:16)

15पिलातुसे दी एह़ रीत थी कि तिस त्योहारे च लोकां तांई कुसी इक्की कैदिये जो जिसियो सैह़ चांह़दे थे, छड्डी दिंदा था। 16तिस बग्त तिन्हां दे ऐत्थु बरअब्बा नांऐ दा इक्क मन्नेया तनेया कैदी था। 17कने जाह़लू सैह़ किठ्ठे होये, तां पिलातुस तिन्हां नैं ग्लाणा लग्गा, “तुहां कुसियो चांह़दे हन कि मैं तुहां तांई छड्डी दैं? बरअब्बा जो, या यीशुये जो जेह्ड़ा मसीह नांऐ ते जाणेयां जांदा ऐ?” 18क्जोकि सैह़ जाणदा था कि सैह़ यीशुये नैं जल़ण रखदे थे, इसतांई तिन्हां तिसियो पकड़ुआया ऐ। 19जाह़लू सैह़ न्याय दी गद्दिया पर बैठेया था तां तिसदिया लाड़िया तिसियो सद्दी घल्लेया, “तू तिस धर्मिये दे मामले च हत्थ मत पांदा, क्जोकि मैं अज्ज सुपणे च तिसदिया बज़ाह ते बड़ा दुख झेलेया ऐ।”

20प्रधान याजकां कने स्याणे माणुआं लोकां जो भड़काया कि सैह़ बरअब्बा जो छड्डी दैं, कने यीशुये जो मरवाई दैं। 21पिलातुसैं तिन्हां ते पुछया, “इन्हां दून्नी च कुसियो चांह़दे हन कि मैं तुहां तांई छड्डी दैं?” तिन्हां ग्लाया, “बरअब्बा जो।” 22पिलातुसैं तिन्हां ते पुछया, “भिरी यीशुये जो, जेह्ड़ा मसीह नांऐ ते जाणेयां जांदा ऐ क्या करैं?” तां सारे तिस नैं ग्लाणा लग्गे, “सैह़ सूल़िया पर टूंगेया जां 23पिलातुसैं ग्लाया, क्जो तिन्हीं क्या गुनाह कित्या ऐ?” अपर सैह़ होर भी जोरे नैं डड्डी-डड्डी करी ग्लाणा लग्गे, “सैह़ सूल़िया पर टूंगेया जां।” 24जाह़लू पिलातुसैं दिख्या कि कुच्छ बणी नीं सकदा अपर इसदे उल्ट हल्ला बधदा जा दा ऐ, तां तिन्हीं पाणी लेआ कने भीड़ा सामणै अपणे हत्थ धोते कने ग्लाया, “मैं इस धर्मिये दे खून ते बेकसूर ऐ; तुहां ई जाणा।” 25सारेयां लोकां जवाब दित्ता, “इसदा खून अहां पर कने अहां दिया औलादी पर होयैं।” 26इसा गल्ला पर तिन्हीं बरअब्बा जो तिन्हां तांई छड्डी दित्ता, कने यीशुये जो कोड़े लगुआई नैं तिन्हां दे हुआलैं करी दित्ता, कि सूल़िया पर टूंगेया जां।

सपाईयां ते यीशु दी बेज्जती

(मरकुस 15:16-20; यूहन्ना 19:2-3)

27ताह़लू पिलातुसे दे सपाईयां यीशुये जो किले च अंणी नैं सारी पलटन तिसदे चौंन्नी बक्खे किठ्ठी कित्ती, 28कने तिसदे कपड़े खोली नैं तिसियो बैजनी रंगे दा चोल़ा लौआया, 29कने कन्डेयां दा मुकट बणाई नैं तिसदे सिरे पर रखी दित्ता, तिसदे सज्जे हत्थ च कनेड़े#27:29 कनेड़ेमतलब सरकंडा दा डंडा दित्ता कने तिसदे गांह गोड्डेयां भार बेई नैं तिसदा मजाक करी नैं ग्लाणा लग्गे, “हे यहूदियां दे राजा, नमस्कार।” 30कने तिस पर थुकेया; कने सैई कनेड़े#27:30 कनेड़े 11:7 दा डंडा लेई नैं तिसदे सिरे पर मारणा लग्गे। 31जाह़लू सैह़ तिसदा मजाक करी बैठे, तां सैह़ चोल़ा तिसते खोली नैं भिरी तिसदे कपड़े तिसियो लौआई दित्ते, कने सूल़िया पर टूंगणे तांई लेई चल्ले।

यीशुये जो सूल़िया पर टुंगणा

(मरकुस 15:21-32; लूका 23:26-43; यूहन्ना 19:17-27)

32बाहर जांदे-बग्त तिन्हां जो शमौन नांऐ दा इक्क कुरेनी माणु मिल्ला। तिन्हां तिसियो बेकार च पकड़ेया कि यीशुये दिया सूल़िया चुक्की नैं लेई चल्लैं। 33जाह़लू सैह़ सारे गुलगुता नांऐ दिया जगाह च पुज्जे, जिसा जगाह जो खोपड़ी दी जगाह भी ग्लांदे हन, 34तिन्हां पित्त मिल्लाई करी अंगूरा दा रस यीशुये जो पीणे जो दित्ता, तिन्हीं चखी तां लेआ अपर पीता नीं। 35ताह़लू तिन्हां यीशुये जो सूल़िया पर टूंगेया कने पर्चियां पाई नैं तिसदे कपड़े बंडी लै, 36कने तित्थु बेई नैं पैहरा दैणा लग्गे। 37कने तिसदा दोसपत्र तिसदे ऊपर सूल़िया पर लगाई दित्ता, कि “एह़ यहूदियां दा राजा यीशु ऐ।” 38ताह़लू तिस सौगी दूँ डाकुआं जो इक्क सज्जे कने इक्क खब्बे पास्से, सूल़िया पर टुंगी दित्ते। 39कने ओणे जाणे आल़े सिरे हिलाई-हिलाई नैं तिसदी निंदा करदे थे, 40कने एह़ ग्लांदे थे, “हे मंदरे ढाणे आल़ेया कने त्रीं दिनां च बणाणे आल़ेया, अपणे आप्पे जो तां बचा। जे तू परमात्मे दा पुत्तर ऐ, तां सूल़िया ते लौई आ।” 41इस तरीके नैं प्रधान याजक भी सास्त्री कने स्याणे माणुआं सौगी मजाक करी-करी नैं ग्लांदे थे, 42“इन्हीं होरनी माणुआं जो तां बचाया, अपर अपणे आप्पे जो नीं बचाई सकदा। ‘एह़ तां इस्राएल देसे दा राजा ऐ।’ हुण जे एह़ सूल़िया ते लौई औयें तां अहां तिस पर बसुआस करन। 43तिन्हीं परमात्मे पर भरोसा रखेया; जे सैह़ इसियो चांह़दा, तां हुण इसियो छड्डाई लै, क्जोकि इन्हीं ग्लाया था, ‘मैं परमात्मे दा पुत्तर ऐ।’ ” 44कने डाकू भी जेह्ड़ा तिस सौगी सूल़िया पर टूंगेयो थे तिसदी निंदा करदे थे।

यीशुये दा प्राण छड्डणा

(मरकुस 15:33-41; लूका 23:44-49; यूहन्ना 19:28-30)

45दोपैरा दे बाराह बजे ते लेई नैं दोपैरा दे त्रै बजे तिकर तिस सारे देसे च नेहरा छाई रेह्आ। 46त्रीये पैहर दे नेड़े यीशु बड़े जोरे नैं डड्डी करी ग्लाणा लग्गा, “ऐली, ऐली, लमा शबक्तनी?” मतलब “हे मेरे परमात्मा, हे मेरे परमात्मा, तैं मिन्जो क्जो छड्डी दित्ता?” 47जेह्ड़े माणु तित्थु खड़ोत्यो थे, तिन्हां च कुच्छ लोक एह़ सुणी नैं ग्लाणा लग्गे, “सैह़ तां एलिय्याह जो हक्कां पा दा ऐ।” 48तिन्हां च इक्क ताह़लू ई दौड़ेया कने स्पंज लेई नैं सिरके च डुबाया, कने कनेड़े#27:48 कनेड़े 11:7 दे डंडे पर रखी नैं यीशुये जो चुसणे जो दित्ता। 49भिरी होर माणु ग्लाणा लग्गे “रुकी जा, दिक्ख, एलिय्याह इसियो बचाणा ओंदा ऐ कि नीं।” 50ताह़लू यीशुयैं जोरे नैं डड्डी करी प्राण छड्डी दित्ते। 51कने दिक्खा मंदरे दा पड़दा ऊपरे ते लेई नैं थल्लै तिकर फटी नैं दो टुकड़े होई गेआ, कने धरती हिल्ली गेई कने चट्टाना तिड़की गियां, 52कने कब्रां खुली गियां, कने मरेयो पवित्र लोकां दी मतिआं लाह्सा जिन्दियां होई गियां, 53कने तिसदे जिन्दे होणे ते बाद सैह़ कब्रां ते निकल़ी नैं पवित्र सैहर च गै कने मतेआं जो दुस्से। 54ताह़लू सूबेदार कने जेह्ड़े तिस सौगी यीशुये दा पैहरा दै दे थे, हिल्लण कने जेह्ड़ा कुच्छ होएया था तिसियो दिक्खी नैं बड़े भरी डरी गै कने ग्लाणा लग्गे, “सच्च-बिच्च एह़ परमात्मे दा पुत्तर था।” 55तित्थु मतिआं जणासा जेह्ड़ियां गलील प्रदेसे ते यीशु दी भक्ति करदियां तिस सौगी आईआं थियां, सैह़ दूरे ते एह़ सब दिक्खा दियां थियां। 56तिन्हां च मरियम मगदलीनी, कने लोक्के भाऊ याकूबे कने योसेसे दी माँ मरियम, कने जबदिये दे पुत्तरां दी माँ थी।

यीशुये जो कब्रा च रखणा

(मरकुस 15:42-47; लूका 23:50-56; यूहन्ना 19:38-42)

57जाह़लू संझ होई तां यूसुफ नांऐ दा अरिमतिया सैहरे दा इक्क अमीर माणु आया, जेह्ड़ा यीशुये दा चेला था। 58तिन्हीं पिलातुसे अल्ल जाई नैं यीशु दी लाह्स दफनाणे तांई मंगी। इसा गल्ला पर पिलातुसैं लाह्सा जो देई दैणे दा हुक्म दित्ता। 59यूसुफैं लाह्स लेई, कने तिसियो चिट्टिया चादरा च लपेटया, 60कने यीशु दिया लाह्सा जो अपणिया नौईआं कब्रा च रखेया, जेह्ड़ी तिन्हीं चट्टाना च कोरियो थी, कने कब्रा दे मुँऐ पर भारी पत्थर खसकाई नैं चली गेआ। 61मरियम मगदलीनी कने दूई मरियम तित्थु कब्रा दे सामणै बैठियां थियां।

कब्रा पर पैहरा

62दूआ दिन जेह्ड़ा बिस्रामे आल़े दिन दे बाद दा दिन था, प्रधान याजक कने फरीसी माणु पिलातुसे अल्ल किठ्ठे होई नैं ग्लाणा लग्गे, 63“हे महाराजा, अहां जो याद ऐ, कि तिन्हीं भरमाणे आल़ैं माणुयैं, जाह़लू सैह़ जिन्दा था, तुहां जो ग्लाया था, कि मेरे मरने दे बाद मैं त्रीये दिने भिरी जिन्दा होई जाणा। 64इसतांई सपाईयां जो हुक्म देआ कि सैह़ त्रै दिन लगातार कब्रा दी रखवाल़ी करन। इआं ना होयैं कि तिसदे चेले आई नैं तिसदिया लाह्सा जो चोरी लेई जान कने लोकां नैं ग्लान, कि ‘सैह़ मरेयां च जिन्दा होई गेआ ऐ।’ ताह़लू पिछला धोखा पैहल्ले ते भी बुरा होणा।” 65पिलातुस तिन्हां नैं ग्लाणा लग्गा, “तुहां अल्ल अपणे पैहरेदार हन। तां जा, अपणिया समझा दे मताबक कब्रा दी रखवाल़ी करा।” 66सैह़ पैहरेदारां जो अप्पु सौगी लेई नैं गै, कने पत्थरे पर मोहर लगाई नैं कब्रा दी रखवाल़ी कित्ती।

Currently Selected:

मत्ती 27: XNR

Highlight

Copy