यूहन्ना 17

यीशु दी महायाजकीय प्रार्थना

अप्पु तांई

1यीशुयैं अपणे चेलेयां नैं एह़ गल्लां ग्लाणे ते बाद सुअर्गे पास्से दिक्खी नैं ग्लाया, “हे पिता, सैह़ बग्त आई रेह्आ ऐ; अपणे पुत्तरे दी महिमा कर कि पुत्तर भी तेरी महिमा करैं, 2क्जोकि तैं तिसियो सारे लोकां पर हक्क दित्या, कि जिन्हां जो तैं तिसियो दित्या ऐ तिन्हां सारेयां जो सैह़ सदा दी ज़िन्दगी दैं। 3कने सदा दी ज़िन्दगी एह़ ऐ कि सैह़ तिज्जो इकमात्र सच्चे परमात्मे जो कने यीशु मसीह जो, जिसियो तैं घल्लेया ऐ, जाणन। 4जेह्ड़ा कम्म तैं मिन्जो करणे जो दित्या था, तिसियो पूरा करी नैं मैं धरतिया पर तेरी महिमा कित्ती ऐ। 5हुण हे पिता, तू अप्पु सौगी मेरी महिमा तिसा महिमा नैं कर जेह्ड़ी महिमा संसारे दिया सृष्टिया ते पैहल्ले, तिज्जो सौगी थी।

अपणे चेलेयां तांई

6“मैं तेरा नां तिन्हां माणुआं दे सामणै प्रगट कित्ता ऐ जिन्हां जो तैं संसारे च मिन्जो तांई दित्ता। सैह़ तेरे थे कने तैं तिन्हां जो मिन्जो तांई दित्ता, कने तिन्हां तेरे वचने जो मन्नी लेआ ऐ। 7हुण सैह़ जाणी गियो हन कि जेह्ड़ा कुच्छ तैं मिन्जो दित्या ऐ सैह़ सब कुच्छ तेरे पास्से ते ऐ। 8क्जोकि जेह्ड़े वचन तैं मिन्जो दित्यो, मैं सैह़ वचन तिन्हां अल्ल पज्जाई दित्ते; कने तिन्हां वचनां जो अपनाई लेआ, कने सच्च-सच्च जाणी लेआ ऐ कि मैं तेरे पास्से ते आया, कने बसुआस करी लेआ ऐ कि तैंईं मिन्जो घल्लेया। 9मैं तिन्हां तांई विणती करदा ऐ, जिन्हां जो तैं मिन्जो दित्या ऐ, क्जोकि सैह़ तेरे हन; अपर संसारे दे लोकां तांई विणती नीं करदा जेह्ड़े संसारे दे हन, 10कने जेह्ड़ा कुच्छ मेरा ऐ सैह़ सब तेरा ऐ, कने जेह्ड़ा तेरा ऐ सैह़ मेरा ऐ, कने इन्हां ते मेरी महिमा प्रगट होई ऐ। 11मैं हुण संसारे च नीं रैहणा, अपर इन्हां संसारे च रैहणा, कने मैं तिज्जो अल्ल ओआ दा। हे पवित्र पिता, अपणे तिस नांऐ ते जेह्ड़ा तैं मिन्जो दित्या ऐ, तिन्हां दी रक्षा कर कि सैह़ भी अहां साइआं इक्क होन। 12जाह़लू मैं तिन्हां सौगी था, तां मैं तेरे तिस नांऐ ते, जेह्ड़ा तैं मिन्जो दित्या ऐ तिन्हां दी रक्षा कित्ती। मैं तिन्हां दी चौकसी कित्ती, कने विनाश दे पुत्तरे जो छड्डी तिन्हां च होर कोई नास नीं होएया, इसतांई कि पवित्रशास्त्रे च जेह्ड़ा लिख्या सैह़ पूरा होयैं। 13अपर हुण मैं तिज्जो अल्ल ओआ दा ऐ, कने एह़ गल्लां संसारे च ग्लांदा ऐ, तांजे सैह़ मेरी खुसिया च भरोई जान। 14मैं तेरा वचन तिन्हां अल्ल पज्जाई दित्ता ऐ; कने संसारे दे लोकां तिन्हां नैं बैर कित्ता, क्जोकि जिंआं मैं संसारे दा नीं ऐ; तिंआं ई सैह़ भी संसार दे नीं हन। 15मैं एह़ विणती नीं करदा ऐ, कि तू तिन्हां जो संसारे ते चुक्की लेआ, अपर एह़ कि तिन्हां जो तिस सैताने ते बचाई रख। 16जिंआं मैं संसारे दा नीं ऐ, तिंआं ई सैह़ भी संसारे दे नीं हन। 17तेरे वचनां च सच्चाई ऐ, कने सच्चाईया नैं तिन्हां जो पवित्र कर। 18जिंआं तैं मिन्जो संसारे च घल्लेया, तिंआं ई मैं भी तिन्हां जो संसारे च घल्लेया; 19कने तिन्हां तांई मैं अप्पु जो पवित्र करदा, तांजे सैह़ भी सच्चाईया नैं पवित्र कित्ते जान।

सारे बसुआसियां तांई

20“मैं सिर्फ इन्हां तांई विणती नीं करदा, अपर तिन्हां तांई भी जेह्ड़े इन्हां दे वचनां दे जरिये मिन्जो पर बसुआस करगे, 21कि सैह़ सारे इक्क होन; जिंआं तू हे पिता मिन्जो च ऐ, कने मैं तिज्जो च, तिंआं ई सैह़ भी अहां च होन, जिसते संसारे सारे लोक बसुआस करन कि तैंईं मिन्जो घल्लेया ऐ। 22सैह़ महिमा जेह्ड़ी तैं मिन्जो दित्ती मैं तिन्हां जो दित्ती ऐ, कि सैह़ तिंआं ई इक्क होन जिंआं कि अहां इक्क हन, 23मैं तिन्हां च कने तू मिन्जो च कि सैह़ सिद्ध होई नैं इक्क होई जान कने संसार जाणे कि तैंईं मिन्जो घल्लेया, कने जिंआं तैं मिन्जो नैं प्यार रखेया तिंआं ई तिन्हां नैं प्यार रखेया। 24हे पिता, मैं चांह़दा कि जिन्हां जो तैं मिन्जो दित्या ऐ, जित्थु मैं ऐ तित्थु सैह़ भी मिन्जो सौगी होन, कि सैह़ मेरी तिसा महिमा जो दिक्खन जेह्ड़ी तैं मिन्जो दित्ती ऐ, क्जोकि तैं संसारे दी सृष्टिया ते पैहल्ले मिन्जो नैं प्यार रखेया। 25हे धार्मिक पिता, संसारे दे लोकां मिन्जो नीं जाणेया, अपर मैं तिज्जो जाणेया; कने इन्हां भी जाणेया कि तैंईं मिन्जो घल्लेया ऐ। 26मैं तेरा नां तिन्हां पर प्रगट कित्ता कने प्रगट करदा रैंह्गा कि जेह्ड़ा प्यार तिज्जो मिन्जो नैं था सैह़ तिन्हां च बणी रैंह्, कने मैं तिन्हां च बणी रैंह्।”

Currently Selected:

यूहन्ना 17: XNR

Highlight

Copy