यूहन्ना 17

यीशुऐ आपणी तैंईंयैं प्रार्थना केरी

1यीशुऐ ऐ सारी गैला आपणै च़ेले बै बोली, होर स्वर्गा धिरै भाल़िया बोलू,

“ओ बापू, सौ बौगत पुजी आऊ सा आपणै बेटै री महिमा केर, ताकि बेटा भी तेरी महिमा केरला। 2किबैकि तुसै तिन्हां सैभी लोका पैंधै अधिकारा धिना, कि ज़ुणा तै तेइबै धिनै सी तिन्हां सैभी लोका बै सौ हमेशा री ज़िन्दगी देला। 3होर हमेशा री ज़िन्दगी ऐसा कि तै तौभै ज़ो एकै सच़ा परमेश्वरा सा होर, यीशु मसीह बै, ज़ो तुसै भेज़ू सा, ज़ाणलै। 4ज़ो कोम तुसै मुँभै केरनै बै धिनै ती तेइबै पूरा केरिया मैं धौरती पैंधै तुसरी महिमा केरी सा। 5ऐबै ओ बापू, ज़ो महिमा मेरी तुसा सैंघै दुनिया बनाणै न पैहलै ती, तुसै तेसा महिमा न आपु सैंघै मेरी महिमा केरा।

आपणै च़ेले री तैंईंयैं प्रार्थना

6 “मैं तुसै तिन्हां मांहणु पैंधै रिहाऐ सी, ज़ुणा तुसै दुनिया न मुँभै धिनै सी, होर तिन्हैं तेरै वचन मने ती। 7किबैकि ज़ो वचन तुसै मुँभै धिनै सी, मैं तै वचन तिन्हां हागै पज़ेरे सी, होर तिन्हैं तै ग्रहण (अपनाए) केरै, होर सच़-सच़ ज़ाणू सा। कि हांऊँ तुसरी धिरै न आऊ सा, होर बशाह केरू सा कि तुसै हांऊँ भेज़ू सा। 8किबैकि ज़ो वचन तुसै मुँभै पज़ेरु सा, सौ मैं तिन्हां हागै पजेरु। होर तिन्हैं सौ ग्रहण केरु होर सच़-सच़ ज़ाणू सा कि हांऊँ तौ धिरै न आऊ सा होर तिन्हैं ऐ बशाह केरू कि तुसै हांऊँ भेज़ू सा। 9हांऊँ दुनिया रै लोका री तैंईंयैं प्रार्थना नैंई केरदा, पर तिन्हरी तैंईंयैं ज़ुणा तुसै मुँभै धिनै सी, किबैकि तै तेरै सी, 10होर ज़ो किछ़ मेरा सा सौ सैभ तेरा सा, होर ज़ो तेरा सा सौ मेरा सा, होर इन्हां न मेरी महिमा प्रगट हुई सा। 11मूँ ऐबै दुनिया न नैंई रौहणा, पर इन्हां दुनिया न रौहणा, होर हांऊँ तौ हागै एज़ा सा। ओ पवित्र बापू, आपणै तेई अधिकारा न ज़ो तुसै मुँभै धिनै सी, तिन्हरी रक्षा केर, ताकि ते बी आसा सांही एक हो। 12ज़ैबै हांऊँ तिन्हां सैंघै ती, ता मैं तेरै तेई अधिकारा न, ज़ो तुसै मुँभै धिनी सा। मैं तिन्हरी रक्षा केरी, होर नाश होंणु आल़ै रै बेटै बै छ़ौड़िआ तिन्हां न कोई नाश नैंई हुआ, तैबै कि ज़ो पवित्र शास्त्रा न बोलू सा सौ, पूरा होला।

13 “ऐबै मूँ तुसा हागै बै ऐणा सा, होर ऐ गैला दुनियां बै बोलणी सा, कि ते मेरी खुशी आपु न पूरी केरी सकलै। 14मैं तुसरा वचन तिन्हां तैंईंयैं पजाऊ सा, होर दुनिया रै लोका सैंघै बैर डाऊ, किबैकि ज़ैण्ढा हांऊँ दुनिया रा नी ऑथि, तैण्ढै ते भी दुनिया रै नी ऑथि। 15हांऊँ ऐ प्रार्थना नी केरा सा कि तू तिन्हां बै दुनियां न च़क, पर ऐ कि तू तिन्हां बै तेई शैताना न ज़ो कि दुष्ट सी, बचाईया डाआ। 16ज़ैण्ढै हांऊँ दुनियां रा नी ऑथि, तैण्ढै तै भी दुनियां रै नी ऑथि। 17सच़ाई रै ज़रियै तिन्हां बै पवित्र केर, तेरा वचन सच़ सा 18ज़ैण्ढै तुसै हांऊँ दुनियां न भेज़ू सा, तैण्ढै मैं भी ते दुनियां न भेज़ै सी, 19होर तिन्हरी तैंईंयैं हांऊँ आपणै आपा बै च़ोखा केरा सा, तैबै ते भी सच़ै रै ज़रियै च़ोखै होलै।

सैभ विश्वासी री तैंईंयैं प्रार्थना

20 “हांऊँ सिर्फ़ च़ेले री तैंईंयैं केल्ही प्रार्थना नी केरदा, पर तिन्हरी तैंईंयैं भी ज़ो इन्हरै वचनै रै ज़रियै मूँ पैंधै बशाह केरलै। 21कि ते सारै एक होलै, ज़ैण्ढै तुसै ओ बापू, मूँ न सी होर हांऊँ तुसा न, तैण्ढै ते भी आसा न होलै, ज़ुणीन दुनियां रै लोक बशाह केरलै कि तुसै हांऊँ भेज़ू सा। 22सौ महिमा ज़ो तुसै मुँभै धिनी सा मैं तिन्हां बै धिनी सा, तैण्ढै ते भी एक होलै ज़ैण्ढै कि आसै एक सी, 23हांऊँ तिन्हां न होर तुसै मूँ न कि ते सिद्ध होईया एक होलै होर दुनियां जाणली कि तुसै हांऊँ भेज़ू सा, ज़ैण्ढी तुसै मूँ सैंघै झ़ुरी ढाई सा तैण्ढीऐ झ़ुरी तिन्हां सैंघै डाई।

24 “ओ बापू, हांऊँ चाहा सी कि ज़ुणा तुसै मुँभै धिनै सी, ज़ौखै हांऊँ सा तौखै ते भी मेरै सैंघै होलै, कि ते मेरी तेस महिमा बै हेरलै कि ज़ो तुसै मुँभै धिनी सा, किबैकि तुसै दुनिया बणाणै न पैहलै मूँ सैंघै झ़ुरी ढाई ती।

25 “ओ धर्मै रै बापू दुनिया हांऊँ नी ज़ाणू, पर मैं तुसै ज़ाणै, होर इन्हैं च़ेले भी ज़ाणू कि तुसै हांऊँ भेज़ू सा। 26मैं तेरा नाँ तिन्हां बै दैसु होर दसदै रौहणा कि ज़ो झ़ुरी तुसाबै मूँ सैंघै ती सौ तिन्हां न रौहली, होर हांऊँ तिन्हां न बणिया रौहनु।”

Currently Selected:

यूहन्ना 17: KFX-NT

Highlight

Copy