मत्ती 27

राजपाल पिलातुसे दरबारै ईशू

(मरकुस 15:1; लुका 23:1,2; युहन्ना 18:28-32)

1दोती दोथी सोभै बडै परोहित, मुखियै, शास्त्री और सारी माहा सभा दी बेठै दै सोभी किअ ईशू लै मौते सज़ा दैणा लै जोग। 2तेखअ निंयं ईशू तिन्नैं बान्हीं करै राजपाल पिलातुसा सेटा लै।

करोती गराऊंए यहूदे मौत

(शधाणूं 1:18,19)

3ज़ांऊं करोती गराऊंओ यहूदा का थोघ लागअ कि ईशू लै लाअ तिन्नैं झ़ुठअ दोश और तिंयां च़ाहा तेऊ मारनअ ता सह पछ़ताअ तेखअ बडअ भारी और तेऊ दैनै तिंयां तिह च़ंदीए सिक्कै बडै परोहिता और मुखियै लै बापस। 4तेखअ बोलअ तेऊ तिन्नां लै इहअ बी,

“मंऐं किअ अह पाप कि नर्दोश मणछ दैनअ थारै हाथै मारना लै?” तिन्नैं बोलअ इहअ, “हाम्हां किज़ै आसा एता ज़ाण तूह?”

5तेखअ शोटै तेऊ तिंयां सिक्कै मांदरे खोल़ै और आप्पू लै दैनी फांसी।

6बडै परोहितै बोलअ तिन्नां सिक्कै लै इहअ, “म्हारै बधाने साबै निं इना सिक्कै हाम्हैं मांदरे भढारै डाही सकदै। किल्हैकि ईंयां ढबै दैनै तै हाम्हैं कसा मणछा मारना लै किम्मत।” 7ता तिन्नैं किअ आप्पू मांझ़ै जोग और तिन्नां सिक्कै करै लअ परदेसी दाबणा लै एकी खमारो खेच मोलै। 8इहअ करै आसा तेऊ खेचा नांअ आझ़ तैणीं लोहूओ खेच पल़अ द। 9इहअ करै हुअ परमेशरे गूर यिर्मयाह बोलअ द बैण पूरअ,

“तिन्नैं च़कै तिंयां तिह सिक्कै,

मतलब पैहलै ई दैनै दै मोलै-इस्राएली लोगे पित्तरै त हेरअ द पैहलै ई बोली कि तेऊओ ज़ल्म हणअ,

10और ज़िहअ प्रभू मुल्है हुकम दैनअ त

तिहअ ई दैनअ तिन्नैं खमारे खेचो मोल।”

राजपाल पिलातुसे सुआल

(मरकुस 15:2-5; लुका 23:3-5; युहन्ना 18:33-38)

11ज़ांऊं ईशू राजपाल पिलातुस सम्हनै खल़अ त, ता तेऊ पुछ़अ ईशू का, “तूह कै यहूदी लोगो राज़अ आसा?”

ईशू बोलअ, “तंऐं हेरअ आप्पै बोली।”

12ज़ेभै बडै परोहित और मुखियै ईशू लै दोशा लांदै तै लागै दै, तेभै निं ईशू तिन्नां लै किछ़ बी ज़बाब दैनअ। 13एता लै बोलअ पिलातुसै, “ताखा कै शुण्हदअ निं आथी कि ईंयां लोग ताल्है केतरी गल्ले दोशा आसा लांदै लागै दै?” 14पर ईशू निं तेऊए गल्लो बी किछ़ै ज़बाब दैनअ, इधी तैणीं कि पिलातुस बी हुअ रहैन।

मौते सज़ा दैणैंओ हुकम

(मरकुस 15:6-15; लुका 23:13-25; युहन्ना 18:39—19:16)

15पिलातुसो त इहअ रबाज़ कि सह करा त तेऊ ओवार्णे थैरे धैल़ी एकी कैदी आज़ाद ज़ुंण कैद खानै दी होए और ज़हा लै लोग आज़ाद करने अरज़ करे। 16तेऊ ज़मानैं त बरोबा नांओं एक मशूर कैदी कैद खानै दी बंद किअ द। 17ता ज़ांऊं तिंयां कठा हुऐ, पिलातुसै बोलअ तिन्नां लै, “तम्हैं कसा च़ाहा कि हुंह छ़ाडूं तम्हां लै? बरोबा छ़ाडूं, कि ईशू, ज़हा लै मसीहा बोला?” 18तेऊ का आसा त थोघ कि ईशू आसा तिन्नैं ज़िदै मारै बाझ़ी दोशै ढाकअ द।

19ज़ांऊं सह न्याय आसना दी बेठअ द त, ता तेऊए लाल़ी दैनअ तेऊ लै समाद “तूह धर्मीं मणछे मांमलै दी निं हाथ पाई आथी; किल्हैकि मुंह आसा हुअ द सुपनै करै बडअ भारी दुख।”

20बडै परोहितै और मुखियै शकाऊऐ होर लोग इहै कि तम्हैं मांगै बरोबा, ता ईशू लै बोलै इहअ कि एऊ पाआ मारी। 21पिलातुसै ज़ांऊं इहअ पुछ़अ कि इना दूई मांझ़ै तम्हां कुंण लोल़ी कि तम्हां लै हुंह छ़ाडूं?

ता तिन्नैं सोभी बोलअ इहअ, “हाम्हां लै छ़ाड बरोबा।”

22पिलातुसै पुछ़अ तिन्नां का, “तै ईशूओ ज़हा लै मसीहा बोला, एऊओ कै करूं?”

तिन्नैं सोभी बोलअ इहअ कि एऊ पाआ क्रूसा दी मारी।

23पिलातुसै बोलअ तिन्नां लै, “किल्है, एऊ किज़ै बूरअ काम किअ?”

पर तिन्नैं लाई होर भी ज़ोरै-ज़ोरै लैल़ा, “एऊ छ़ड़ाऊआ क्रूसा दी।”

24ज़ांऊं पिलातुसै भाल़अ कि अह गल्ल निं हणैं आल़ी आथी और इनै लाअ होर बी हाल्लअ-गोल्लअ करी, ता तेऊ मांगअ पाणींओ बतिल्लू संघा धोऐ तिन्नां सम्हनै आपणैं हाथ, तेखअ बोलअ तिन्नां लै, “हुंह आसा एऊ धर्मीं मणछे लोहू का नर्दोश; और एता ज़ाणा तम्हैं ई।”

25तेखअ दैनअ तिन्नैं सोभी लोगै ज़बाब, “एऊ मारनैओ दोश लोल़ी हाम्हां और म्हारै शोहरू लै लागअ।”

26इहअ शूणीं करै किअ पिलातुसै लोगा खुश करनै तैणीं बरोबा कैद खानै का आज़ाद, और ईशू दैनअ कोल़ै करै च़िकी क्रूसा दी छ़ड़ाऊंणा लै।

सपाहीओ ईशू संघै बूरअ बर्ताअ

(मरकुस 15:16-20; युहन्ना 19:2,3)

27तेखअ निंयं मुखिये सपाही ईशू कैद खानै भितरा लै और सपाहीओ दल किऐ तेऊ फेर खल़ै। 28तेखअ बन्हैऊंअ तेऊए झिकल़ै खोल्ही करै तेऊ लै लाल च़ोल़अ 29और झ़रीलै कांडैओ मुगट डाहअ गुंदी करै तेऊए मुंडा प्रैंदै और हाथै दैनी एक शोठी और तेऊ सम्हनै ज़ान्हूं दी बेशी लागै सुहांगा करदै, “हे यहूदी लोगे राज़ैआ, नमस्ते।” 30तिन्नैं ईशूए मुंहां दी थुकअ और तेऊ ई शोठै करै लागै तेऊए मुंडै बाहंदै। 31ज़ांऊं तिंयां सुहांग-मखौल करी मुक्कै, तेखअ खोल्हअ तिन्नैं तेऊ का बैंज़णीं रंगो च़ोल़अ पोर्ही और तेऊ का बन्हैऊंऐं तेऊए ई झिकल़ै, तेखअ निंयं क्रूसा दी मारना लै येरुशलेम नगरी बागै।

ईशू क्रूसा दी छ़ड़ाऊंणअ

(मरकुस 15:21-32; लुका 23:26-43; युहन्ना 19:17-27)

32बागै डेऊंदी बारी भेटअ तिन्नां एक शमौन नांओं कुरेन नगरी का आअ द मणछ और तिन्नैं सह नभैऊशै ढाकअ और तेऊ लै बोलअ ज़ोरा-ज़ोरी कि क्रूस च़क। 33तेखअ तेसा ज़ैगा ज़हा लै गुलगुता बोला, मतलब खोपल़ीए ज़ैगा, पुजी करै 34दैनअ तिन्नैं मुर्र नांओंए दुआई राल़अ द अंगूरो मिल्लअ रस झुटणा लै पर ईशू निं सह च़ाखी करै झुटणअ च़ाहअ।

35तेखअ छ़ड़ाऊअ तिन्नैं ईशू क्रूसा दी और तिन्नैं सपाही आप्पू मांझ़ै परच़ी पाई करै तेऊए झिकल़ै बांडै 36और तिंयां रहै तिधी पहरी बेशी। 37पिलातुसै लिखअ एकी तगती दी ईशूओ दोश और सह टोकी क्रूसे च़ुंडी, तेथ त लिखअ द, “नासरत नगरीओ ईशू यहूदी लोगो राज़अ।” 38तिन्नैं छ़ड़ाऊऐ क्रूसा दी दूई डाकू बी एक ईशूए दैहणीं बाखा और एक बाऊंईं बाखा।

39तेसी बाती एछदै-डेऊंदै करा तै आपणैं मूंड झ़ल़ाऊई करै तिन्नें निंदा; 40संघा करा तै तिंयां इहअ बोली “हे मांदरा ढोल़णैं आल़ैआ, और चिऐ धैल़ै बणांणैं आल़ैआ, तूह आप्पू ता बच़, ज़ै तूह परमेशरो शोहरू आसा, तै होथ क्रूसा का धरनीं।”

41इहअ ई बडै परोहित, शास्त्री मुखियै बी लागै सोभ सुहांगा करदै और तिंयां बोला तै इहअ कि 42“होर हेरै एऊ बच़ाऊई पर आप्पू निं अह बच़ी सकदअ! अह ता इस्राएलो राज़अ आसा। ऐबै ज़ै अह क्रूसा का धरनीं होथे, तै करनअ हाम्हां बी एऊ दी विश्वास।” 43अह ता परमेशरा दी भरोस्सअ डाहा, ज़ै सह च़ाहा; तै ऐबै छ़ड़ैऊऐ एऊ, किल्हैकि अह बोला त इहअ, “हुंह आसा परमेशरो शोहरू।” 44इहअ ई ज़ुंण तिंयां ईशू संघै डाकू बी तै क्रूसा दी छ़ड़ाऊऐ दै, तिंयां बी लागै ईशूए निंदा करदै।

ईशूए प्राण शोटणै

(मरकुस 15:33-41; लुका 23:44-49; युहन्ना 19:28-30)

45दपहरा पोर्ही चिऊथै पहरै तैणीं रहअ तेऊ देशै घोर न्हैरअ हई और उडै तैणीं रही ज़ेही राच पल़ी। 46चिऊथै पहरै नेल़ ईशू आपणीं बोली दी ज़ोरै-ज़ोरै बोलअ, “इलोई, इलोई, लम्मा शबक्तनी?” मतलब “हे मेरै परमेशर, हे मेरै परमेशर, तंऐं हुंह किल्है छ़ाडअ?” 47ता ज़ुंण तिधी खल़्हुऐ दै तै तिन्नां मांझ़ै बोलअ कई लोगै इहअ, “अह आसा एलियाह लै हाक्का लांदअ लागअ द।” 48एक आअ ठुर्ही करै और मिल्लै अंगूरे रसा दी चुशू डबेऊअ और नगाल़ीए च़ुंडी दी चैल़ी करै दैनअ तेऊए खाखा च़ाखणा लै। 49ता होरी बोलअ इहअ कि खल़्हिया, भाल़ा हैनूं कि एलियाह एछा बी एऊ बच़ाऊंदअ।

50तेखअ शोटै ईशू ज़ोरै लैल़ पाई आपणैं प्राण। 51तै हेरा, परमेशरे मांदरै लाअ द परदअ धेल़्हुअ प्रैंदा का थाल्लै तैणीं दूई बाखा लै और सारी पृथूई हुई ज़ाज़री और भिल़ी दी लागै पात्थर चटकारदै। 52घोरी खुल्ही और मूंऐं दै पबित्र लोगे ल्हासा हुई ज़िऊंदी 53और ज़िऊई करै नाठै तिंयां पबित्र नगरी लै और बडै भारी लोगा का तिंयां शुझुऐ बी।

54तेखअ एकी सुबैदारै ज़ुंण तिधी ईशू नेल़ पहरी त, ज़ुंण सह ज़ाज़री तिधी हुई ती, तेता भाल़ी डरअ और बोलअ, “अह आसा सच्च़ी परमेशरो शोहरू।” 55तिधी ती बडी भारी बेटल़ी बी गलील लाक्कै का ईशूए सेऊआ करदी आई दी और तिंयां ती लागी दी इना सोभी गल्ला भाल़ी। 56ता तिन्नां मांझ़ै ती मगदल़ गराऊंए मरिअम, याकूब और योसेसे आम्मां मरिअम और जबदीए शोहरूए आम्मां बी।

ईशूए ल्हास दाबी डाहणीं

(मरकुस 15:42-47; लुका 23:50-56; युहन्ना 19:38-42)

57ज़ांऊं सान्ह च़ाल्ली ती पल़ी, ता एक युसुफ नांओं अरमतियाह गराऊंओ सेठ मणछ, सह आसा त आप्पू बी ईशूओ च़ेल्लअ। सह आअ राजपाल पिलातुसा सेटा संघा मांगी तेऊ का ईशूए ल्हास। 58राजपाल पिलातुसै दैनी तेऊ लै ईशूए ल्हासा निंणे ज़ाज़त। 59युसुफै पल़ेटी ल्हास निंईं करै शेतै झिकल़ै दी 60संघा डाही तेऊ सह ल्हास नऊंईं घोरी दी ज़ुंण तेऊ शाफल़ा दी मज़दूरा लाई करै ती खण्हीं दी। संघा डाही तेसा घोरी प्रैंदै एक बडी टोल्ह तेखअ लागअ आपणैं घरा लै हांढदअ। 61तिधी ती मगदल़ गराऊंए मरिअम और दुजी मरिअम घोरी सम्हनै बेठी भाल़ी लागी दी।

घोरी दी पहरअ

62दुजै धैल़ै हुऐ बशैघे धैल़ी बडै परोहित और फरीसी लोग राजपाल पिलातुसा सेटा कठा, संघा बोलअ तिन्नैं राजपाला लै, 63“हे श्रीमान, हाम्हां का आसा थोघ कि तेऊ झ़ुठै मणछै बोलअ त आपणीं ज़िऊंदी ज़िता इहअ, ‘मेरै मरनै का बाद हणअ मुंह चिई धैल़ै बाद भी ज़िऊंदै।’ 64ता तूह दै इहअ हुकम कि चिई धैल़ै तैणीं डाहणअ हाम्हां तेसा घोरी बागै राची-धैल़ी पहरअ पाई ज़िधी सह दाबी आसा डाहअ द। इहअ निं हआ कि तेऊए च़ेल्लै तेऊए ल्हास च़ोरी पाए और लोगा का लागे इहअ बोलदै कि सह हुअ मरी करै ज़िऊंदअ। अह हणअ हाम्हां लै पिछ़लै धोखै का बी खास्सअ बूरअ।”

65राजपाल पिलातुसै बोलअ तिन्नां लै, “तम्हां का पहरी ता बतेर्है आसा, और तम्हैं डेओआ, संघा पाआ आपणैं साबै तिधी पहरअ।” 66तिन्नैं बी पहरी निंयैं और घोरी बागै टोल्हा दी लाई रोम राज़ैए मोहर ताकि सरकारी मोहरा लाई दी टोल्हा पोर्ही नां काढे। संघा पाअ तिधी सपाही करै पहरअ।

Currently Selected:

मत्ती 27: OSJNT

Highlight

Copy